NKHANI YAKUPFUNZA 31
NYIMBO 111 Bzomwe Bzimbatikondwesa
Kodi ‘Mwapfunza Cintsintsi’ ca Kumbakomedwa na Bzomwe Munabzo?
“Ndidapfunza kukhala wakukondwa m’bzinthu bzentse.” — AFILIPI 4:11.
CAKULINGA CA NKHANIYI
Mu nkhani ino tiniwona momwe tingakhalire wakutenda, wakubzicepesa na kupitiriza kumbakumbukira cidikhiro cathu ca kutsogolo.
1. Kodi kukomedwa na bzomwe tinabzo kumbathandauza ciyani, ndipo kumbathandauza lini ciyani?
KODI imwepo mumbakomedwa na bzomwe munabzo? Munthu omwe ambakomedwa na bzomwe anabzo ambakhala wakukondwa na wa mtendere akambakumbukira bzisimbo bzomwe anabzo. Iye ambasunama lini ayai kukalipa thangwe ra bzinthu bzomwe alibe. Tsono kukomedwa na bzomwe tinabzo kumbathandauza lini kuti tin’funika lini kucita thupo na moyo wathu. Mkristau ambanyang’ana njira za momwe angacitire bzizinji pakutumikira Yahova. (Aroma 12:1; 1 Timotio 3:1) Ndipo iye ambapitiriza kukhala wakukondwa napo kuti alibe kutambira utumiki bomwe akhafuna pa nthawe yomwe akhaidikhirira.
2. Thangwe ranyi ni ngozi ikulu kusaya kukomedwa na bzomwe tinabzo?
2 Kusaya kukomedwa na bzomwe tinabzo kungabwerese mabvuto makulu. Wale omwe ambakomedwa lini na bzomwe anabzo angambaphate basa kwa maora yakuthumizirika kuti agumane bzinthu bzakuthupi bzomwe mpsakufunikira lini. Bzakupasa ntsisi mpsakuti Akristau winango adafika pakuba kobiri na bzinthu bzinango bzomwe iwo akhabzifuna. Pinango iwo adakumbuka kuti ‘bzimwebzi bzin’funika kukhala bzangu,’ ‘inepano ndikufuna bzimwebzi tsapanopali,’ ayai ‘nin’tenga kobiriyi ndipo nin’dzaibwezera pa nthawe inango.’ Tsono, kuba kwa mtundu uli-wentse kumbakondwesa lini ndipo kumbalemekezesa lini Yahova. (Mimwani 30:9) Winango adasunama kwene-kwene thangwe ra kusaya kutambira utumiki bomwe akhafuna ndipo adafika pakusiya kutumikira Yahova. (Agalatiya 6:9) Kodi mtumiki wa Yahova angafike tani pakucita bzimwebzi? Bvuto lingakhale lakuti munthuyo wasiya kukomedwa na bzomwe anabzo.
3. Kodi ni cadidi ciponi comwe timbapfunza pa Afilipi 4:11, 12?
3 Tentsenefe tingapfunze kumbakomedwa na bzomwe tinabzo. Mpostolo Paulo adanemba kuti iye ‘akhadapfunza kukhala wakukondwa m’bzinthu bzentse.’ (Werengani Afilipi 4:11, 12.) Iye adanemba mafala yamweya pomwe akhali m’kawoko. Napo bzikhali tenepo, iye alibe kusiya kukhala wakukondwa. Iye adapfunza “cintsintsi cakukhala wakukondwa” na bzomwe akhanabzo. Tikacita nyongo yakukomedwa na bzomwe tinabzo, mafala na bzomwe bzidacitikira Paulo bzingatitsimikizire kuti ifepanombo tingakhale wakukondwa na bzomwe tinabzo bziribe basa momwe bzinthu bziriri pa moyo wathu. Tin’funika lini kukumbuka kuti bzingakhale bzakupusa kukomedwa na momwe bzinthu bziriri pa moyo wathu. M’mbuto mwace, tin’funika kupfunza kumbakomedwa na bzomwe tinabzo. Mwa njira iponi? Mu nkhani ino, tin’cezerana bzomwe bzingatithandize kumbakomedwa na bzomwe tinabzo.
MBATENDANI BZOMWE MUNABZO
4. Kodi kukhala wakutenda kumbatithandiza tani kuti timbakomedwe na bzomwe tinabzo? (1 Atesalonika 5:18)
4 Munthu omwe ngwakutenda kazinji-kazinji ambakomedwa na bzomwe anabzo. (Werengani 1 Atesalonika 5:18.) Tikambatenda thangwe ra kukhala na bzinthu bzomwe tikufunikira tin’dzakumbukira lini kwene-kwene bzinthu bzomwe tiribe. Tikambatenda utumiki bomwe tinabo tsapano, tin’dzacita bzomwe tingakwanise kuti tikwanirise utumikibo m’mbuto mwakufuna kukhala na utumiki bunango. Ndipopa Bibliya limbatilimbikisa kuti timbatende Yahova m’mipembo yathu! Ifepano tikakhala wanthu wakutenda “Mulungu [an’dzatipasa] mtendere wace omwe wanthu angaubvesese lini.” — Afilipi 4:6, 7.
5. Kodi Ajirayeri akhafunika kukhala wakutenda pa bzinthu bziponi? (Onanimbo cithunzi-thunzi.)
5 Mbatiwoneni bzomwe bzidacitikira Ajirayeri. Nthawe zizinji, iwo akhambadandaulira Yahova thangwe ra kusaya kukhala na cakudya comwe akhadya ku Edjipito. (Numero 11:4-6) N’cadidi kuti moyo ukhali lini wakupusa mu dambo. Tsono n’ciyani comwe cingadawacitisa kuti akomedwe na bzomwe akhanabzo? Iwo akhafunika kukumbukira bzinthu bzabwino bzentse bzomwe Yahova akhadawacitira acimutenda. Iwo akhafunika kukumbukira kuti pomwe akhali ku ukapolo na kuboneresedwa kwene-kwene ku Edjipito, Yahova adabweresera Aedjipito miliri 10 ndipo adapulumusa Ajirayeri. Pambuyo pa Ajirayeri kutsudzulidwa, iwo “adatenga bzinthu bzizinji bza Aedjipito” bzomwe ni prata, oro na bzakubvala. (Ekisodo 12:35, 36) Pomwe Ajirayeri adateweredwa na Aedjipito mpaka pa Nyanza Ifuira Yahova mwakudabwisa adacitisa kuti nyanzayo igawanike. Pomwe akhali mu dambo Yahova ntsiku zentse akhambawapasa mana kuti adye. Tsono bvuto likhali liponi? Ajirayeri akhakomedwa lini na bzomwe akhanabzo, sikuti thangwe rakuti akhalibe cakudya comwe akhafunikira koma n’thangwe rakuti iwo akhatenda lini bzomwe akhanabzo.
Thangwe ranyi Ajirayeri alibe kukomedwa na bzomwe akhanabzo? (Onani ndime 5)
6. Kodi ni mwa njira ziponi za momwe tingalatizire kutenda?
6 Kodi n’ciyani comwe cingakuthandizeni kuti mukhale munthu wakutenda? Cakuyamba, mbapambulani nthawe ntsiku zentse kuti mumbakumbukire bzinthu bzabwino bzomwe bzimbakucitisani kukhala wakukondwa pa moyo wanu. Imwepo munganembe bzinthu bziwiri ayai bzitatu bzomwe mumbatenda. (Maliro 3:22, 23) Caciwiri, mbalatizani kutenda kwanu. Khalani wakuyamba kumbatenda winango pa bzomwe ambakucitirani. Ndipo cakufunika kwene-kwene mbatendani Yahova ntsiku zentse. (Salimo 75:1) Cacitatu, mbasankhulani axamwali omwe ambalatiza kuti mbakutenda. Penu axamwali wanu ambatenda lini ayai penu ambang’ung’udzika, imwepo mungayambe kuwatewezerambo. Tsono penu axamwali wanu ambatenda, bzimwebzi bzingakucitisenimbo kuti mukhale wakutenda. (Deuteronomiyo 1:26-28; 2 Timotio 3:1, 2, 5) Tikambanyang’ana mipata kuti timbatende tin’dzasunama lini thangwe ra mabvuto yathu ayai na bzinthu bzomwe tingakwanise lini kukhala nabzo.
7. Kodi n’ciyani comwe cidathandiza Aci kukomedwa na bzomwe akhanabzo?
7 Onani bzomwe bzidacitikira Aci omwe ambakhala ku Indonésia. Iye adati: “Pa nthawe ya COVID-19, inepano ndidayamba kumbandendemezera momwe moyo wangu ukhaliri na momwe ukhaliri moyo wa abale na mpfumakazi. Bzimwebzi bzidacitisa kuti ndileke kukomedwa na bzomwe ndikhanabzo.” (Agalatiya 6:4) Kodi n’ciyani comwe cidamuthandiza kucinja makumbukidwe yace? Aci adati: “Inepano ndidayamba kumbakumbukira bzisimbo bzomwe ndikhakhala nabzo ntsiku iri-yentse na kukumbukirambo bzinthu bzizinji bzabwino bzomwe ndakhala nabzo thangwe ra kucita mbali ya gulu la Mulungu. Patsogolo pace, ndidatenda Yahova thangwe ra bzinthu bzentsenebzi. Ndipo bzimwebzi bzidacitisambo kuti nimbakomedwe na bzomwe ndinabzo.” Penu imwepo mukukomedwa lini na momwe bzinthu bziriri pa moyo wanu, kodi mungacitembo bzomwe Aci adacita kuti mukhale wakutenda?
KHALANI WAKUBZICEPESA
8. Kodi n’ciyani comwe cidacitikira Baruki?
8 Pa nthawe inango, munembi wa Jeremiya wakucemeredwa Baruki adasiya kumbakomedwa na bzomwe akhanabzo pa moyo wace. Baruki akhacita basa lakunesa kwene-kwene. Iye akhafunika kuthandiza Jeremiya pakuyenda kukauza Ajirayeri wakusaya kutenda bzomwe bzingadawacitikira thangwe ra kusaya kubvera Yahova. M’mbuto mwakukumbuka bzomwe Yahova akhafuna kuti iye acite, Baruki adayamba kumbakumbukira kwene-kwene bzomwe iye akhafuna kucita pa moyo wace. Mwakuphatisa basa Jeremiya, Yahova adauza Baruki kuti: “Iwepo ukulinga bzinthu bzizinji. Leka kulinga bzinthu bzimwebzi.” (Jeremiya 45:3-5) Mwa mafala manango, Yahova akhauza Baruki kuti: “Khala wakukondwa na momwe bzinthu bziriri pa moyo wako.” Baruki adatetekera Yahova ndipo adapitiriza kukhala pa uxamwali bwakulimba na Yahovayo.
9. Mwakubverana na 1 Akolinto 4:6, 7, kodi kubzicepesa kun’dzatithandiza kuti tizindikire ciyani? (Onanimbo bzithunzi-thunzi.)
9 Nthawe zinango, Mkristau angawone kuti ngwakuthemera kutambira utumiki bunango. Iye pinango angakumbuke bzimwebzi thangwe rakuti ambadziwa bzinthu bzizinji, ambaphata basa na nyongo ayai thangwe rakuti akutumikira Yahova kwa magole mazinji. Tsono winango angatambire utumiki bomwe iye akubufuna. Kodi n’ciyani comwe cingamuthandize kuti aleke kusunama? Iye angakumbukire mafala yomwe mpostolo Paulo adanemba yomwe yambagumanika pa 1 Akolinto 4:6, 7. (Werengani.) Utumiki bomwe timbatambira na luso lomwe tinalo bzimbacokera kwa Yahova. Yahova ambatipasa lini bzinthu bzimwebzi thangwe rakuti ndife wakufunika kwene-kwene kuposa winango. M’mbuto mwace, iye ambatipasa bzinthu bzentsenebzi thangwe rakuti ambatifuna na thangwe ra kudeka mtima kwace. — Aroma 12:3, 6; Aefezo 2:8, 9.
Yahova ndiye omwe adatipasa luso liri-lentse lomwe tinalo (Onani ndime 9)a
10. Kodi tingakulise tani khalidwe la kubzicepesa?
10 Ifepano tingakulise khalidwe la kubzicepesa mwakukumbukira bzomwe Jezu adacita. Kumbukirani bzomwe bzidacitika usiku bomwe Jezu adatsuka minyendo ya apostolo wace. Mpostolo Juwau adanemba kuti: “Jezu pakudziwa kuti [1] Baba akhadaikha bzinthu bzentse m’manja mwace nakuti [2] akhadacokera kwa Mulungu ndipo [3] angadabwerera kwa Mulunguyo, . . . adayamba kutsuka minyendo ya anyakupfunza wace.” (Juwau 13:3-5) Jezu pinango angadakumbuka kuti apostolo wace ndiwo omwe akhafunika kutsuka minyendo yace. Tsono Jezu alibe kukumbuka kuti pakuti akhali Mwana wa Mulungu, iye akhafunika kukhala na nyumba yabwino, kobiri zizinji ayai moyo wabwino. (Luka 9:58) Jezu akhali wakubzicepesa ndipo akhakomedwa na bzomwe akhanabzo. Iye adatisiira ciratizo cabwino kwene-kwene. — Juwau 13:15.
11. Kodi kubzicepesa kudathandiza tani Dennis kuti ambakomedwe na bzomwe anabzo?
11 M’bale munango wakumeredwa Dennis omwe ambakhala ku Holanda, adayezera kutewezera kubzicepesa kwa Jezu. Tsono kucita bzimwebzi kulibe kukhala kwakupusa. Iye adati: “Munthu munango akatambira udindo bomwe nimbabufuna ndikhakalipa kwene-kwene thangwe ndikhakumbuka kuti inepano ndine omwe ndikhafunika kutambira udindobo. Bzimwebzi bzikacitika nimbapfunza nkhani zakulewa bza kubzicepesa. Mu aplikativo ya JW Library® ndidakoya mavesi yakulewa bza kubzicepesa pa mbuto yomwe bzingakhale bzakupusa kuyagumana ayai kuyawerenga. Ndidabaxalimbo mu telefoni mwangu nkhani zakulewa bza kubzicepesa ndipo nimbazitetekera mwakubwereza-bwereza. Ndidapfunza kuti basa lentse lomwe nimbacitira Yahova timbalicita kuti timutumbizise sikuti kuti timbabzitumbize tekha. Yahova mwakudeka mtima ambalekerera kuti m’bodzi na m’bodzi wa ifepano akhale na basa lakucita ndipo iye ndiye omwe ambacitisa kuti basalo lifambe bwino.” Penu imwepo mwayamba kusunama thangwe rakuti mulibe kutambira utumiki bomwe mukhafuna, citani nyongo kuti mukhale wakubzicepesa. Bzimwebzi bzin’dzakuthandizani kuti mulimbise uxamwali bwanu na Yahova ndipo bzin’dzakuthandizanimbo kuti mumbakomedwe na bzomwe munabzo. — Tiyago 4:6, 8.
MBAKUMBUKIRANI BZA CIDIKHIRO CANU
12. Kodi ni cidikhiro ciponi ca kutsogolo comwe cimbatithandiza kukomedwa na bzomwe tinabzo? (Zaiya 65:21-25)
12 Timbakomedwa kwene-kwene tikambakumbukira bza tsogolo labwino lomwe Yahova adatipicira. M’bukhu la Zaiya, Yahova ambatiuza kuti ambabvesesa mabvuto yomwe ifepano timbagumana nayo. Tsono iye ambatipicirambo kuti an’dzamalisa mabvuto yentseneya. (Werengani Zaiya 65:21-25.) Tin’dzakhala na nyumba zakukhotcerereka na zabwino. Tin’dzaphata basa labwino, tin’dzadya bzakudya bzakupasa thanzi na bzakukoma. Tin’dzagopa lini kuti cinthu cakuipa cingadzaticitikire ayai kucitikira wana wathu. (Zaiya 32:17, 18; Ezekiyeli 34:25) Ifepano tingakhale na citsimikizo centse cakuti mapiciro yabwino yakulewa bza kutsogoloya yan’dzakwanisikadi.
13. Kodi ni pa nthawe iponi yomwe tin’funika kumbakumbukira kwene-kwene bza cidikhiro cathu?
13 Thangwe ranyi mpsakufunika kumbakumbukira kwene-kwene bza cidikhiro cathu cakutsogolo? Thangwe tikukhala mu “ntsiku zakumalizira” ndipo tentsenefe timbagumana na mabvuto ‘yomwe njakunesa.’ (2 Timotio 3:1) Yahova ntsiku zentse ambatithandiza kupirira mwakutipasa malango, mphanvu na thandizo lomwe tikufunikira. (Salimo 145:14) Kuthumizira bzimwebzi, cidikhiro cathu cimbatithandiza maka-maka pa nthawe zakunesa. Pinango imwepo bzimbakunesani kusamalira banja lanu mwakuthupi. Kodi bzimwebzi bzikuthandauza kuti mun’dzakhala wakusauka mpaka kale-kale? Ne ndibzo lini! Yahova akupicira kuti an’dzakupasani bzomwe mukufunikira mu dziko lino ndipo an’dzakupasanimbo bzinthu bzizinji m’Paraizo. (Salimo 9:18; 72:12-14) Pinango imwepo mungakhale mukubva kuwawa ntsiku iri-yentse, mudasunama ayai mukuduwala matenda makulu. Kodi imwepo mun’dzakhala mukubva kuwawa tenepayu mpaka kale-kale ndipo mun’dzapozedwa lini? Ne ndibzo lini. Matenda na infa bzin’dzawoneka lini pomwe mu dziko lipsa. (Apokalipse 21:3, 4) Cidikhiro cimweci cimbatithandiza kuti tileke kukalipa na bzomwe bzikuticitikira tsapano. Tingapitirize kukhala wakukondwa napo ticicitiridwa bzinthu bzakusaya cirungamo, kufedwa munthu omwe timbamufuna, kulimbana na matenda ayai bvuto linango liri-lentse. Thangwe timbadziwa kuti “mabvuto yomwe timbagumana nayo njakanthawe” nakuti mu dziko lipsa tin’dzabonera lini pomwe. — 2 Akolinto 4:17, 18.
14. Kodi tingalimbise tani cidikhiro cathu?
14 Pakuti cidikhiro n’cakufunika kuti timbakomedwe na bzomwe tinabzo, kodi tingacilimbise tani? Cinthu cibodzi comwe cingatithandize ni kumbayezera kubziwona kuti tiri m’Paraizo. Tikacita thupo thangwe ra kusaya kugumana kobiri zomwe tikufunikira pa moyo wathu, tingakumbukire momwe moyo un’dzakhalira pomwe tin’dzafunikira lini pomwe kobiri ndipo palibe munthu ali-wentse omwe an’dzakhala wakusauka. Tikasunama thangwe ra kusaya kutambira utumiki bomwe tikhafuna tingakumbukire momwe bzinthu bzimwebzi mpsakusaya kufunika tikabzindendemezera na momwe moyo un’dzakhalira wabwino tikadzakhala wakulungamiratu ticitumikira Yahova mwakulungamiratu. (1 Timotio 6:19) Timbacita thupo na bzinthu bzizinji kwene-kwene tsapano mwakuti bzingakhale bzakunesa kuti tikumbukire mapiciro yamweya. Tsono tikambakumbukira kwene-kwene bza tsogolo labwino lomwe Yahova adatipicira bzin’dzakhala bzakupusa kwene-kwene kukumbukira bzinthu bzimwebzi m’mbuto mwakukumbukira mabvuto yathu.
15. Kodi imwepo mwapfunza ciyani na bzomwe mpfumakazi Christa adalewa?
15 Mbatiwoneni momwe cidikhiro cidathandizira Christa, omwe adalowodwa na Dennis, omwe afotokozedwa pakuyamba ule. Iye adati: “Ndina matenda yomwe yambandicitisa kukhala wakusaya mphanvu. Nimbakwanisa lini kufamba ndipo nimbafunika kuphatisa basa kangolo ka anyakupunduka ndipo nthawe izinji nimbafunikira kukhala ndidagona. Nimbabva kuwawa ntsiku zentse. Dotolo wangu adandiuza kuti inepano nin’limba lini. Mwakamfulumize, inepano ndidakumbukira kuti, ‘iye ambawona lini tsogolo ninga momwe inepano nimbawonera.’ Nimbakumbukira cidikhiro cangu comwe cimbandicitisa kukhala na mtendere. Ntsiku zino, inepano ndikufunikira kupirira mabvuto mazinji, tsono nin’dzakhala na moyo wabwino m’dziko lipsa!”
“WALE OMWE AMBAMUGOPA AN’DZASAYA LINI CINTHU”
16. Kodi n’ciyani comwe cidacitisa Davide kunemba kuti wale omwe ambathemba Yahova “an’dzasaya lini cinthu”?
16 Napo kuti tingakomedwe na bzomwe tinabzo koma timbagumana basi na mabvuto. Mambo Davide adafedwa wana wace atatu. Iye adanamiziridwa kuti akhadacita bzinthu bzakuipa, adaphindukiridwa na azixamwali wace ndipo mambo adayezera kumupha na kumutewera m’mbuyo kazinji-kentse. Napo kuti adagumana na mabvuto yentseneya Davide akhali wakukondwa. Ndipo pakulewa bza Yahova iye adati: “Wale omwe ambamugopa an’dzasaya lini cinthu.” (Salimo 34:9, 10) Thangwe ranyi iye adafika pakulewa bzimwebzi? Thangwe napo wanthu wa Yahovafe tingadikhirire lini moyo wakusaya mabvuto, koma tina citsimikizo cakuti tin’dzasaya lini bzomwe tikufunikira. (Salimo 145:16) Ninga Davide, tingakhale na citsimikizo cakuti Yahova an’dzatithandiza kupirira pomwe tikugumana na mabvuto. Tingakhale wa mtendere na wakukondwa bziribe basa momwe moyo wathu uliri.
17. Thangwe ranyi imwepo mwatsimikiza kupfunza cintsintsi ca kumbakomedwa na bzomwe munabzo?
17 Yahova akufuna kuti mumbakomedwe na bzomwe munabzo. (Salimo 131:1, 2) Na tenepo, citani nyongo yakupfunza bza cintsintsi ca momwe mungakhalire wakukondwa na bzomwe munabzo. Imwepo mukacita nyongo ya kumbatenda, kukhala wakubzicepesa na kumbalimbisa cidikhiro canu bzimwebzi bzin’dzakucitisani kulewa kuti: “Inde inepano ndikukomedwa na bzomwe ndinabzo.” — Salimo 16:5, 6.
NYIMBO 118 ‘Tithumizireni Cikhulupiro’
a BZOMWE BZIKUCITIKA PA CITHUNZI-THUNZI: M’bale akucita basa lakukonza-konza bzinthu bzomwe bzadzongeka m’gulu lathu, mpfumakazi yomwe idapfunza cirewedwe ca manja ikucitidwa mibvunzo pa mtsonkhano wa dera ndipo m’bale akufotokoza nkhani ya wentse.