NKHANI YAKUPFUNZA 34
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
Khulupirani Kuti Yahova Adakulekererani
“Imwepo mudandilekerera bzakuphonya bzangu na pikado zangu.” — SALIMO 32:5.
CAKULINGA CA NKHANIYI
Mu nkhani ino, tiniwona kuti thangwe ranyi tin’funika kukhulupira kuti Yahova ambatilekerera na momwe Bibliya limbatitsimikizira bzimwebzi.
1-2. Kodi timbabzibva tani tikazindikira kuti Yahova walekerera pikado zathu? (Onanimbo cithunzi-thunzi.)
MAMBO Davide akhadasunama kwene-kwene thangwe ra bzinthu bzakuipa bzomwe akhadacita m’mbuyo. (Salimo 40:12; 51:3; onani mafala yomwe yali padzaulu pa kapituloyi) Tsono iye adalatiza kuti akhadakungula na mtima wentse ndipo Yahova adamulekerera. (2 Samuyeli 12:13) Davide adakomedwa kwene-kwene pomwe adazindikira kuti Yahova akhadamulekerera. — Salimo 32:1.
2 Ifepano tingakhalembo wakukondwa tikazindikira kuti Yahova watilatiza ntsisi na kulekerera pikado zathu. Mpsabwino kwene-kwene kudziwa kuti Yahova ngwakukonzeka kulekerera pikado zathu, napo zicikhala zikulu, ifepano tikakungula na mtima wentse, kuzimbula pikadozo na kucita bzomwe tingakwanise kuti tileke kudzazibwerezera pomwe! (Mimwani 28:13; Mabasa 26:20; 1 Juwau 1:9) Timbakomedwa kwene-kwene kudziwa kuti Yahova akatilekerera pikado zathu, iye ambatipasa lini pomwe mulandu ayai kutilanga thangwe ra pikadozo! — Ezekiyeli 33:16.
Mambo Davide adanemba Masalimo mazinji yomwe yambafotokoza bza kulekerera kwa Yahova (Onani ndime 1-2)
3-4. Kodi mpfumakazi inango idabzibva tani pambuyo pa kubatizidwa, ndipo tin’cezerana ciyani mu nkhani ino?
3 Nthawe zinango, wanthu winango angapenukire penu Yahova adawalekerera. Mbatiwoneni bzomwe bzidacitikira Jennifer, omwe adaleredwa m’cadidi. Pomwe adakula, iye adayamba kumbacita bzinthu bzakuipa ndipo akhambabisira abereki wace bzomwe iye akhacitabzo. Tsono pomwe padapita magole, iye adacinja makhalidwe yace, adabzipereka kwa Yahova acibatizidwa. Iye adati: “M’mbuyomu inepano ndikhambacita bzinthu bza upombo, ndikhamwa kwene-kwene bzakumwa bzakuledzeresa, ndikhali munthu waukali kwene-kwene ndipo kukhala na kobiri cikhali cinthu cakufunika kwene-kwene pa moyo wangu. Inepano ndikhadziwa kuti Bibliya limbalewa kuti Yahova angalekerere pikado zathu thangwe ra ntsembe ya Kristu. Napo bziri tenepo, inepano ndikhakhulupira lini kuti Yahova akhadandilekerera.”
4 Kodi nthawe zinango imwepo bzimbakunesani kukhulupira kuti Yahova adalekerera pikado zomwe mudacita m’mbuyomu? Penu ndibzo, dziwani kuti Yahova ngwa ntsisi kwene-kwene. Davide akhana citsimikizo centse cakuti Yahova akhadamulekerera ndipo Yahovayo akufunambo kuti imwepo mukhalembo wakukondwa ninga momwe Davide adabvera pambuyo pakulekereredwa. Mu nkhani ino, tin’cezerana kuti thangwe ranyi mpsakufunika kukhulupira kuti Yahova adalekerera pikado zathu na bzomwe bzingatithandize kucita bzimwebzi.
THANGWE RANYI MPSAKUFUNIKA KUKHULUPIRA KUTI YAHOVA ADATILEKERERA?
5. Kodi n’ciyani comwe Sathani an’funa kuti tikhulupire? Fotokozani.
5 Ifepano tikakhulupira kuti Yahova ambatifuna ndipo adatilekerera tin’dzakhulupira lini magunkha ya Sathani. Kumbukirani kuti Sathani an’dzacita bzentse bzomwe angakwanise kuti aticitise kusiya kutumikira Yahova. Kuti akwanise kucita bzimwebzo, Sathani angayezere kuticitisa kukhulupira kuti pikado zathu zingalekereredwe lini. Mbatiwoneni bzomwe bzidacitikira mwamuna wa ku Kolinto omwe adacosedwa m’gwere thangwe ra kucita upombo. (1 Akolinto 5:1, 5, 13) Pomwe iye adakungula, Sathani akhafuna kuti abale wa m’gwere aleke kumulekerera na kulekambo kumutambira pomwe m’gwere. Pa nthawe ibodzi-bodziyo, Sathani akhafuna kuti mwamuna omwe adakungulayo abzibve kuti akhalibe kulekereredwa “acikundidwa na msunamo ukulu kwene-kwene” acifika pakusiya kutumikira Yahova. Bzimwebzi ndibzo bzomwe Sathani ambafuna. Ntsiku zinombo Sathani ambafuna kuti tibzibve kuti Yahova angalekerere lini pikado zathu ticifika pakusiya kumutumikira, tsono “timbadziwa bzakulinga bzace.” — 2 Akolinto 2:5-11.
6. Kodi n’ciyani comwe tingacite kuti tileke kubzipasa mulandu thangwe ra pikado zomwe tidacita m’mbuyo?
6 Tikakhulupira kuti Yahova adatilekerera tin’dzasiya kubzipasa mulandu. Ifepano tikacita pikado, mwacibadwa timbabzipasa mulandu. (Salimo 51:17) Bzimwebzi mpsabwino thangwe tikazindikira kuti tacita cinthu cakuipa, ifepano tingacinje ticicita cinthu cabwino. (2 Akolinto 7:10, 11) Tsono ifepano tikambabzipasa mulandu kwene-kwene pambuyo pa kukungula pikado, bzimwebzi bzingatisunamise ticifika pakusiya kutumikira Yahova. M’mbuto mwace, ifepano tikakhulupira kuti Yahova adatilekerera tin’dzasiya kubzipasa mulandu. Ndipo tin’dzapitiriza kumutumikira na citsimikizo cakuti iye ambakomedwa nafe ndipo tin’dzakhala pomwe wakukondwa. Bzimwebzi ndibzo bzomwe Yahova akufuna kwa ifepano. (Akolose 1:10, 11; 2 Timotio 1:3) Tsono kodi tingacinje tani momwe timbabvera ticikhulupira kuti Yahova adatilekerera?
N’CIYANI COMWE CINGATITHANDIZE KUKHULUPIRA KUTI YAHOVA ADATILEKERERA?
7-8. Kodi n’ciyani comwe Yahova adauza Mozeji pakulewa bza iye, ndipo bzikutitsimikizira ciyani? (Ekisodo 34:6, 7)
7 Kumbukirani bzomwe Yahova adalewa pakulewa bza iye. Onani bzomwe Yahova adauza Mozeji pa Phiri la Sinai.a (Werengani Ekisodo 34:6, 7.) Napo kuti Yahova ana makhalidwe mazinji yabwino, iye adasankhula kuuza Mozeji kuti Yahovayo ni “Mulungu wantsisi na wakudeka mtima.” Kodi imwepo mukukumbuka kuti munthu omwe ambafuna Yahova omwe adacita pikado acikungula Yahovayo angamulekerere lini? Penu Yahova angalekerere lini munthu umweyu, iye angakhale wakuipa na wakusaya ntsisi! Yahova cipo acidzakhala Mulungu wa mtundu umweyu.
8 Tingakhale na citsimikizo cakuti Yahova anganame lini thangwe iye ni Mulungu wacadidi. (Salimo 31:5) Ndipopa tingakhulupire bzomwe iye ambalewa. Penu imwepo bzikukunesani kukhulupira kuti Yahova adakulekererani, bzibvunzeni kuti: ‘Kodi inepano nimbakhulupira kuti Yahova ni Mulungu wantsisi na wakudeka mtima ndipo angalekerere munthu ali-wentse omwe akungula pikado zace? Penu imwepo mumbakhulupira bzimwebzo mungakhale na citsimikizo cakuti iye adakulekererani.’
9. Kodi kulekereredwa pikado zathu kumbathandauza ciyani? (Salimo 32:5)
9 Kumbukirani bzomwe Yahova ambatipfunzisa m’Bibliya pakulewa bza kulekerera. Kumbukirani bzomwe munembi wa Bibliya Davide adanemba pakulewa bza kulekerera kwa Yahova. (Werengani Salimo 32:5.) Davide adalewa kuti: “Imwepo mudandilekerera bzakuphonya bzangu na pikado zangu.” Fala la Cihebereu lomwe lidasanduliziridwa kuti “kulekerera” m’mavesi yamweya lingathandauzembo “kunyamula.” Pomwe Yahova adalekerera pikado za Davide bzidakhala ninga kuti wacosa pikado zacezo acizinyamula. Davide adakhala wakukondwa thangwe ra kudziwa kuti Yahova akhadalekerera pikado zace. (Salimo 32:2-4) Ifepano tingabzibvembo mu njira ibodzi-bodziyi. Ifepano tikakungula pikado zathu na mtima wentse tin’funika lini kupitiriza kubzipasa mulandu pa bzomwe tidacita. M’mbuto mwace, tingakhale wakukondwa thangwe ra kudziwa kuti Yahova watilekerera na mtima wentse.
10-11. Kodi mafala yakuti “wakukonzeka kulekerera” yambatiuza ciyani pakulewa bza Yahova? (Salimo 86:5)
10 Werengani Salimo 86:5. Pamwepa Davide akulewa kuti Yahova ni “wakukonzeka kulekerera.” Bzimwebzi bzikuthandauza kuti ifepano tikaphonya, Yahova ambafulumiza lini kukalipa. Ndipo iye nthawe zentse akufunisisa kulekerera wale omwe akungula. Thangwe ranyi Yahova ni Mulungu wa mtundu umweyu? Mbali yakutewera ya vesiri imbalewa kuti: “Mudadzala na lufoyi lacadidi kuna wentsene omwe akukucemerani.” Thangwe ra kudeka mtima kwace, iye “ambalekerera na mtima wentse” anyapikado wentse wale omwe ambakungula. (Zaiya 55:7) Penu imwepo bzimbakunesani kukhulupira kuti Yahova adakulekererani, bzibvunzeni kuti: ‘Kodi inepano nimbakhulupira kuti Yahova ngwakukonzeka kulekerera wentse wale omwe ambakungula na omwe ambapemba kwa iye acikumbira kuti awabvere ntsisi? Kodi nin’funikambo lini kukhulupira kuti iye adandilekerera pomwe ndidamukumbira kuti andibvere ntsisi?’
11 Ifepano tingagumane mtsangalazo thangwe ra kudziwa kuti Yahova ambabvesesa momwe tidakonzedwera nakuti ndife wakuperewera. (Salimo 139:1, 2) Mbatiwoneni bzomwe Davide adalewa mu salimo linango na momwe bzimwebzi bzingatithandizirembo kukhulupira kuti Yahova akufuna kutilekerera.
LEKANI KUYEBWA BZOMWE YAHOVA AMBAKUMBUKIRA
12-13. Mwakubverana na Salimo 103:14, kodi Yahova ambakumbukira ciyani pakulewa bza ifepano, ndipo bzimwebzi bzimbamucitisa kucita ciyani?
12 Werengani Salimo 103:14. Davide akufotokoza thangwe lomwe limbacitisa Yahova kukhala wakukonzeka kulekerera wale omwe adakungula pikado zawo. Iye akulewa kuti, “ambakumbukira kuti ndife pfumbi.” Bzomwe bzikuthandauza kuti nthawe zentse iye ambadziwa kuti timbaphonya. Kuti tibvesese bwino-bwino bzimwebzi bwerani tiwone bzomwe mafala ya Davideya yakuthandauza.
13 Davide adalewa kuti Yahova “ambadziwa bwino kaumbidwe kathu”, ndipopa iye ambadziwa “momwe wanthu adakonzedwera na bzomwe ambafunikira.” Iwo ambafunikira kudya, kugona na kupuma. Napo wanthu wakulungamiratu ambafunikira bzinthu bzimwebzi. (Genesesi 2:7) Tsono pakuti Adamu na Eva adaphonya wanthufe ndife pfumbi mwa njira inango. Ndife pfumbi thangwe ndife wakuperewera nakuti timbafunikira kulimbana na cikhumbo cakucita bzinthu bzakuipa. Yahova ambadziwa bwino bzimwebzi; tsono pomwe Davide adalewa kuti Yahova “ambakumbukira” kuti ndife pfumbi, iye akhathandauzambo kuti Yahova ambadziwa kuti ifepano ndife wakuperewera ndipo nthawe zentse an’dzacita nafe bzinthu mwa ntsisi. Ifepano tingafotokoze mafala ya Davideya mu njira iyi: Yahova ambadziwa kuti ifepano nthawe zinango tin’dzaphonya ndipo iye akawona kuti takungula na mtima wentse ambatilatiza ntsisi na kutilekerera. — Salimo 78:38, 39.
14. (a) Kodi Davide adafotokoza pomwe ciyani pakulewa bza momwe Yahova ambatilekererera? (Salimo 103:12) (b) Kodi tingapfunze ciyani na momwe Yahova adalekererera Davide? (Onani kwadru yakuti “Yahova Ambalekerera na Kuyebwa Pikado Zathu.”)
14 Kodi ni cinthu cinango ciponi comwe cingatithandize kutsimikizira kuti Yahova adatilekerera? (Werengani Salimo 103:12.) Davide adalewa kuti Yahova akalekerera, iye ambaikha pikado zathu kutali “ninga momwe kumabvadzuwa kuliri kutali na kumadokero.” Kulewa kunango, kumabvadzuwa m’kutali kwene-kwene na kumadokero; ndipo mbuto ziwirizi zimbagumana lini. Kodi bzimwebzi bzin’funa kulewa ciyani pakulewa bza pikado zomwe Yahova ambalekerera? Bukhu linango pakulewa bza vesi limweri lidalewa kuti: “Yahova ambatenga pikado zathu aciziyendesa kutali na ifepano ndipo bziri ninga mnuntci wa cinthu omwe umbabveka lini pomwe.” Ndipopa tingakhale na citsimikizo centse cakuti iye cipo acidzakumbukira ayai kutikumbusa pomwe. Kumbukirani kuti mnuntci wa cakudya ayai wa bzinthu bzinango ungaticitise kukumbukira cinthu cinango comwe cidacitika m’mbuyo, tsono pambuyo pa Yahova kulekerera pikado palibe cinthu ciri-centse comwe cingamucitise kukumbukira pomwe bzimwebzo. Ndipo ambaziphatisa lini basa pikadozo kuti atipase mulandu ayai kutilanga nazo. — Ezekiyeli 18:21, 22; Mabasa 3:19.
15. N’ciyani comwe tingacite tikapitiriza kubzipasa mulandu thangwe ra pikado za m’mbuyo?
15 Kodi mafala ya Davide yomwe yali pa Salimo 103 yangatithandize tani kukhulupira kuti Yahova adatilekerera? Penu tikupitiriza kubzipasa mulandu thangwe ra pikado za m’mbuyo, tingabzibvunze kuti: ‘Kodi inepano ndikuyebwa bzomwe Yahova ambakumbukira ayai ndikuyebwa kuti iye ambadziwa kuti ndine wakuperewera nakuti an’dzalekerera nyapikado omwe akungula ninga ine? Kodi inepano ndikukumbukirambo bzomwe Yahova ambasankhula kuyebwa ayai ndikukumbukira bza pikado zomwe iye adazilekerera ndipo cipo acidzaziphatisa pomwe basa kuti andipase mulandu ayai kundilanga?’ Yahova ambakumbukira lini bza pikado zomwe tidacita m’mbuyo. Ifepano tin’funikambo lini kuzikumbukira. (Salimo 130:3) Tikakhulupira kuti Yahova adatilekerera, ifepano tin’dzabzipasa lini mulandu ndipo tin’dzapitiriza kutumikira Yahova mwakukondwa.
16. Fotokozani ciratizo comwe cikulatiza ngozi yomwe ingakhale iripo tikapitiriza kubzipasa mulandu thangwe ra pikado zomwe tidacita m’mbuyo. (Onanimbo cithunzi-thunzi.)
16 Kumbukirani ibzi. Munthu akakhala akufambisa karo, iye anganyang’anisise pa supedyo kuti awone bzomwe bzikubwera m’mbuyo mwace. Iye angambacite bzimwebzi nthawe zinango, tsono ingakhale ngozi ikulu iye nthawe zentse akambanyang’anisisa pa supedyoyo. Tsono kuti aifambise karoyo mwakukhotcerereka, iye an’funika kupitiriza kunyang’anisisa mseu omwe uli kutsogolo kwace. Mwa njira ibodzi-bodziyi, nthawe zinango bzimbakhala bzakuthandiza kumbakumbukira pikado zomwe tidacita m’mbuyo; bzimwebzi bzingatithandize kutcenkha kubwerezera pomwe pikadozo. Tsono tikapitiriza kukumbukira bzakuphonya bza m’mbuyo tingasiye kukhala wakukondwa ndipo tingasiye kutumikira Yahova mu njira yakuthemera. M’mbuto mwace, tin’funika kupitiriza kunyang’anisisa mseu omwe uli kutsogolo kwathu. Tiri pa mseu omwe ukutiyendesa ku moyo m’dziko lipsa lomwe Mulungu adatipicira, momwe bzinthu bzentse bzakuipa “bzin’dzakumbukiridwa lini pomwe.” — Zaiya 65:17; Mimwani 4:25.
Ninga momwe munthu omwe akufambisa karo ambafunikira kunyang’anisisa mseu omwe uli kutsogolo m’mbuto mwa kunyang’anisisa supedyo, ifepanombo tin’funika kumbakumbukira bzisimbo bzakutsogolo m’mbuto mwa kukumbukira bzakuphonya bza m’mbuyo (Onani ndime 16)
PITIRIZANI KUTSIMIKIZIRA KUTI YAHOVA AMBAKUFUNANI NDIPO ADAKULEKERERANI
17. Thangwe ranyi tin’funika kupitiriza kutsimikizira kuti Yahova ambatifuna nakuti adatilekerera?
17 Tin’funika kukhulupira kuti Yahova ambatifuna nakuti nthawe zentse iye ngwakukonzeka kutilekerera. (1 Juwau 3:19) Thangwe ranyi? Thangwe Sathani an’dzacita bzentse bzomwe angakwanise kuti aticitise kukhulupira kuti ndife lini wakuthemera kulatizidwa lufoyi ayai kulekereredwa. Zimwezi ni njira zomwe Sathani ambaziphatisa basa kuti ayezere kutitazisa kutumikira Yahova. Ndipo pomwe kuphampha kwa dzikoli kukufendera, iye an’dzacita nyongo ikulu kwene-kwene yakucita bzimwebzi thangwe akudziwa kuti asala na kanthawe kang’ono-ng’ono. (Apokalipse 12:12) Tsono tin’funika kupitiriza kulimbana na Sathani na kupitiriza kutumikira Yahova mwakukhulupirika!
18. N’ciyani comwe imwepo mungacite kuti mupitirize kutsimikizira kuti Yahova ambakufunani nakuti nthawe zentse ngwakukonzeka kukulekererani?
18 Kuti mutsimikizire kuti Yahova ambakufunani phatisani basa nfundo zomwe zidafotokozedwa mu nkhani yomwe idapita ire. Kuti mutsimikizire kuti Yahova adakulekererani, kumbukirani bzomwe Yahova adalewa pakulewa bza iye. Kumbukirani bzomwe iye adafulizira anembi wa Bibliya kuti alewe pakulewa bza kulekerera kwace. Lekani kuyebwa kuti iye ambadziwa kuti ndimwe wakuperewera nakuti an’dzacita namwe bzinthu mwa ntsisi. Ndipo kumbukiranimbo kuti iye ambalekerera na mtima wentse. Tenepo, na citsimikizo cibodzi-bodzi comwe Davide akhanaco pakulewa bza ntsisi za Yahova, imwepo mungalewe kuti: “Ndikutenda Yahova thangwe ra kulekerera ‘bzakuphonya bzangu na pikado zangu’!” — Salimo 32:5.
NYIMBO 1 Makhalidwe ya Yahova
a Onani nkhani yakuti “Yandikirani Mulungu — Yehova Anafotokoza Makhalidwe Ake” mu Ntsanza ya Mulindiri ya 1 Maio, 2009, (Chichewa).