Tsamba 169

Ndidayamba Kulifuna Kwene-kwene Dziko la Serra Leoa

Cindy McIntire

GOLE LA KUBADWA 1960

GOLE LAKUBATIZIDWA 1974

MBIRI YA MOYO WACE Adayamba umisiyonario mu gole la 1992. Iye adatumikira ku Guiné na ku Senegal ndipo tsapano ankutumikira ku Serra Leoa.

PA ULENDO bwangu bwakuyamba, nditandokhala midzinga miwiri yokha ndidayamba kulifuna dziko la Serra Leoa. Ndikhadabwisika na kuwona wanthu atasenza mtolo wakulemera mwakusaya kucita kuuphatirira. Mbuto zizinji zikhana wanthu balala-balala. Wana wambasenzeka na kubzina mu mseu, kuwombera m’manja na kumbabzinisa minyendo yawo icibveka nyimbo. Ndikhali pakati pa wanthu womwe ambafuna kubvala bzakubvala bza mawonekedwe yakusiyana-siyana, kubzina na nyimbo.

Kupalizira kuno kumbandidekera kwene-kwene. Wanthu wa ku Serra Leoa kuno ambatambira bwino wanthu wakucokera kumadziko yakunja, ambalemekeza Bibliya na kutetekera mafala yace. Iwo kawiri-kawiri ambandicemera kuti ndiyende m’miyi mwawo. Ndikambacoka pamuyipo winango ambandiperekeza mpaka mu msewu. Mikhalidwe yabwino imweyi imbandithandiza kulimbana na bzineso bzing’ono-bzing’ono bzomwe ndimbagumana nabzo ninga, kunesa kwa madzi na magetsi.

Pakuti ndiribe mwamuna, wanthu ambandibvunza penu nthawe zinango ndimbasunama thangwe ra kukhala ndekha. Kulewa cadidi, ndina bzizinji bzakucita mwakuti palibe nthawe yomwe ndidabzibva kuti ndili ndekha. Ndina bzakucita bzizinji pa moyo wangu.

[Tsamba limweri palibe 5, 6]