Mbani Ankucita Kufuna kwa Yahova Lero Lino?

1. Kodi tin’dzayamba lini kupfunza broxura Mbani Ankucita Kufuna kwa Yahova Lero Lino? Ndipo kodi tin’dzathandizidwa tani na bzimwebzo?

¹ Kuyambira pa mdzinga wa 28 Outubro, broxura Mbani Ankucita Kufuna kwa Yahova Lero Lino? lin’dzapfunzidwa pa Pfunziro la Bibliya la Gwere. Broxura lipsali, lakucosedwa pa Mtsonkhano Wacigawo “Tetezani Mtima Wanu!” lakonzedwa kuti titsogolere apfunzi wa Bibliya ku gulu. Pakupfunza broxurali, tin’dzandothumizira lini kutenda kwathu kucita mbali m’gulu la Yahova, koma tin’dzathandizidwambo kukhala wakuzolowerana nalo kuti tiliphatise basa mu utumiki.—Psalymo 48:13.

2. Kodi broxurali lin’dzapfunzidwa tani m’gwere?

² Momwe Lin’dzapfunzidwira: Nyakutsogolera an’dzafunika kugawa nthawe yace kuti mapfunziro yense yasamalidwe ndendende. Pa mapfunziro 28 yense, iye ati ambadzayambe kulewenga mbvunzo omwe ni msolo wa pfunzirolo. Patsogolo pace, an’dzakumbira kuti nyakulewenga alewenge ndime yakuyambirira. Ndipo nyakutsogolerayo an’dzacita mbvunzo womwe iye wakonzekera pa ndimeyo. Ndime iri-yense yakuyamba na mafala yakupsipisisa, in’funika kulewengedwa, icipfunzidwa pace-pace. Ndimeyo ikamala kulewengedwa, nyakutsogolerayo an’dzakumbira kuti abveseri alewe momwe ndimeyo inkutawira mbvunzo omwe ni msolo wa pfunzirolo. Broxurali lina bzithunzi-thunzi bzizinjisa bzomwe bzingafokotozedwembo. Mavesi makulu-makulu yan’funika kulewengedwa nthawe ikabvumiza. Pomwe akanati kuyenda pa pfunziro linango, nyakutsogolera an’dzabwerezera pfunzirolo mwakucita mibvunzo ya panyansi pa tsambalo. Penu kalipo ka kwadru “Dziwani Bzinango,” iye an’dzakalewengesa, acikumbira kuti abveseri alewe momwe apfunzi wa Bibliya angagumanire phindu pakuteweza mafalayo. Nthawe ikabvumiza, ku phampha kwa pfunzirolo, nyakutsogolerayo angaphatise basa misolo ya mapfunziroyo ninga mibvunzo yakubwereza. Dziwani kuti imweyi ni njira yomwe broxurali lin’dzaphatisidwa basa pa Pfunziro la Bibliya la Gwere. Bzinkulewa lini kuti ni tenepa momwe mudzacitire pa pfunziro la Bibliya la pa mui.

3. Kodi bzin’funika tidzacite ciani kuti tidzagumane phindu lakukwana pakupfunza broxurali?

³ Dzabwereni pa mitsonkhano mudakonzekera kuti mudzagumane phindu lakukwana. Dzaciteni nyongo yakutawira mibvunzo. Pa pfunziropo, dzakumbukireni momwe nkhaniyo ingathandizire apfunzi wa Bibliya. Kupfunza komwe tidzacite kwa broxurali, kudzatikonzekerese kuti tithandize winango kuphatana nafe pakucita kufuna kwa Mulungu, kuti wakhalembo na cidikhiro cakudzakhala na moyo mpaka kale-kale.—1 Juwau 2:17.