Citisani Kuti Nyengo ya Cikumbuso Ikhale ya Cikondweso!
1. Njiponi njira ibodzi ya kuthumizira cikondweso canu pa nyengo ya Cikumbuso?
1 Mun’funa kuthumizira cikondweso canu m’minyezi ya Março, Abril na Maio? Njira ibodzi ya kucitira bzimwebzi ndiyo kuthumizira utumiki bwanu, bzikakwanisika mucitumikira ninga mpainiya wakuthandiza. Kodi bzimwebzi bzingadzathumizire tani cikondweso canu?
2. Kodi kuthumizira utumiki kumbabweresa tani cikondweso?
2 Thumizirani Cikondweso Canu: Yahova adatilenga kuti timbakondwe pa kumunamata na pa kukwanirisa kusauka kwathu mwauzimu. (Mateu 5:3) Iye adatilengambo kuti timbagumane cikondweso pa kupasa wanzathu. (Mabasa 20:35) Utumiki bwathu bumbatithandiza kucita bzinthu bziwiri—kunamata Mulungu na kuthandiza winango. Ndipopa kuthumizira utumiki bwathu, kumbatibweresa cikondweso cikulu. Kuposa bzimwebzi, tikambayenda kawiri-kawiri kapalizira, luso lathu limbakulambo. Pomwe luso lathu linkukula, mantha yathu yambacepa. Tin’dzakhala na mipata mizinji yakupalizira na kuyambisa mapfunziro ya Bibliya. Bzensenebzi bzimbacitisa kuti utumiki bukhale bwakudekeza kwene-kwene.
3. Thangwe ranyi minyezi ya Março na Abril in’dzakhala minyezi yabwino kuti titumikire ninga apainiya wakuthandiza?
3 Março na Abril in’dzakhala minyezi yabwino kuti titumukire ninga apainiya wakuthandiza thangwe tingadzasankhule kucita maora 30 ayai 50. Kuthumizira bzimwebzi, kutomera pa Malinkhuma ya nsiku 22 Março mpaka pa nsiku ya Cikumbuso, Ciposi, 14 Abril, tin’dzacita kampanya yakucemerera wanthu kuti wadzagumanike pa Cikumbuso. M’magwere mun’dzakhala na cikondweso cikulu kwene-kwene thangwe apalizi wazinji wan’dzakhala wankuphata basa ‘mwakuphatana’ kuti wakwanise kumpsinkha mbali ikulu ya gawo lawo mkati mwa nthawe.—Sofoniya 3:9.
4. Penu tin’funa kudzakhala apainiya wakuthandiza, bzin’funika ticite ciani?
4 Yambaniretu Kukonzekera: Penu mukanati kukonzekera, onani bzomwe mungacite kuti mukwanise kuthumizira utumiki bwanu m’mwezi ubodzi ayai mizinji. Ikhale nkhani yakucitira mpembo. (Tiyago 1:5) Cezeranani nkhaniyi na banja lanu pabodzi na winango wa m’gwere. (Mimwani 15:22) Imwepo mun’dzagumanambo cikondweso cikulu comwe cimbabwera na upainiya bwakuthandiza napo penu muna bvuto la matenda ayai penu muli pabasa lakunembedwa.
5. N’ciani cin’dzacitika tikathumizira utumiki bwathu pa nyengo ya Cikumbuso?
5 Yahova ambafuna kuti atumiki wace wakhale wakukondwa. (Psalymo 32:11) Kuthumizira utumiki bwathu pa nyengo ya Cikumbuso, kun’dzandothumizira lini cikondweso cathu cokha, koma kun’dzakondwesambo Baba wathu wa kudzulu.—Mimwani 23:24; 27:11.