“Pitirizani Kukhala na Khalidwe Labwino Pakati pa Wanthu wa Mitundu”

1. Thangwe ranyi mpsakufunika kuti tidzapitirize kukhala na khalidwe labwino nthawe ya mitsonkhano inkubwerayi?

¹ Pa nthawe za mitsonkhano yacigawo gole liri-lense timbakwewa wanthu wazinji, tenepo mpsakufunika kuti mwa khalidwe lathu tilatize kuti timbanamata Mulungu. (Mwam. 20:26) Bzakucita bzathu bzabwino, bzakubvala bzathu pabodzi na mawonekedwe yathu bzin’funika kutizindikirisa kuti ndife wateweri wacadidi wa Kristu. Tikadzagumanika pa mitsonkhano yacigawo ayai yamadziko inkubwerayi, kodi ‘tin’dzapitriza tani kukhala na khalidwe labwino pakati pa wanthu wa mitundu’ bzicipasa mbiri Baba wathu wakudzulu?—1 Pe. 2:12.

2. Kodi ni mpata uponi wakuwonesa makhalidwe Yacikristau womwe tin’dzakhala nawo pa nthawe ya mtsonkhano wacigawo?

² Latizani Khalidwe Lacikristau: Lufoyi lomwe timbalatizana winango na mwanzace na momwe timbacitira “na wanthu wakunja” bzimbasiyaniratu na mzimu wakuipa wa dzikoli. (Wakol. 3:10; 4:5; 2 Tim. 3:1-5) Tikhale wakukoma mtima na wakupirira tikambakhala na wanthu m’mahotel na anyabasa wa m’marestaurante napo pacitike bvuto. Makhalidwe yabwino yambaphatanidzambo kupereka kakobiri ka kutenda wale womwe wambaphata mabasa yamweyo.

3. N’ciani comwe wabereki wan’funika kukumbukira, ndipo thangwe ranyi?

³ Wabereki wan’dzafunika kusamalira wana wawo pa mbuto ya mtsonkhano na m’mahotel. (Mim. 29:15) Mkazi m’bodzi wa wakuphata basa mu hotel ibodzi adalewa kwa banja linango kuti: “Timbakufunani kwene-kwene wanthumwe. Mabanja yanu, na wana wanu mbakupfunzisidwa bwino. Anyabasa wense wambalewa bza imwepo, ndipo ife timbafuna kuti mumbabwere kumala kwa mdzinga uli-wense.”

4. Pomwe tin’dzakhala mu mzinda womwe un’dzacitikira mtsonkhano, kodi kawonekedwe kathu kadzakhale tani?

⁴ Kubvala Mwakuthemera: Bzakubvala bzathu pa nthawe ya mtsonkhano, bzin’dzafunika kukhala bzakuthemera na bzakulongosoka, bzileke kudzawonesa makhalidwe yakunyanya ya m’dzikoli. (1 Tim. 2:9) Napo pakufika ayai kucoka ku hotel, na pomwe muli kunja kwa hotel, na panthawe zakutsangalaza tinati ayai tamala cigawo ciri-cense, tin’funika kutcenkha kawonekedwe kakunyanyirira ayai makhalidwe yakundobzilekerera. Tenepo, tin’dzakomedwa kubvala crachá ya mtsonkhano ndipo tin’dzacita lini manyazi kupereka umboni tikagumana mpata uli-wense. Kawonekedwe na khalidwe lathu labwino pomwe tin’dzakhala pa mitsonkhano inkubwerayi, bzin’dzandokwewa lini kokha wanthu wa mtima wakulungama wakufuna mafala ya m’Biblia yakupulumusa moyo, koma bzin’dzakondwesambo Yahova.—Sof. 3:17.

Bzakufunika Kukumbukira pa Mtsonkhano Wacigawo wa 2014

◼ Nthawe ya Programa: Misuwo ya nyumba yakutsonkhanira in’dzafungulidwa pa nthawe ya 7:00 yakumacibese. Pa nsiku zense zitatu, nyimbo zakundobva zin’dzayamba pa nthawe ya 8:20 yakumacibese. Pa nthaweyo, tensene tin’dzafunika kuyenda kakhala m’mbuto zathu kuti programa iyambe mwa njira yakulemekezeka. Pa Cixanu na Malinkhuma, nyimbo na mpembo wakumalizira bzin’dzacitika pa nthawe ya 3:55 yakumaulo ndipo pa nsiku ya Mdzinga nthawe ya 2:50 yakumasikati.

◼ Mtsonkhano Wamadziko: M’mbuto zinango kun’dzacitika mitsonkhano ya madziko. Dziwani kuti bzipinda bza nthambi bzidakumbira magwere manango pabodzi na waimikiri wamadziko yakunja pambuyo pa kuwonesesa kukula kwa mbuto yamtsonkhano, mbuto zakuimisira kanderendere, na kudziwa bzipinda bza mahotel bzomwe bziribe wanthu. Kudzala kwene-kwene kungadzacitike penu wapalizi wan’dzayenda kabvesera mtsonkhano wamadzikoyu pomwe walibe kucemeredwa. Penu mkhalidwe wanu unkubvumirani kukagumanika pa mtsonkhano wakwanu, mun’funika lini kusankhula kuyenda pa mtsonkhano wamadziko.

◼ Mbuto Yakuimisira Kanderendere: Pa mtsonkhano uliwense, pan’dzakhala na mbuto yakubvumizidwa kuimisira kanderendere yomwe in’dzalipiridwa lini. Mbuto yakuimisira makanderendere njakucepa, na tenepo, bzikakwanisika kungakhale bwino azinji kukwira kanderendere ibodzi.

◼ Mbuto Yakukhala: Pomwe misuwo in’dzafungulidwa macibese yali-yense, taphata minyendo, lekani kudzathamangira mbuto yakukhala yakundokomera imwepo, ninga kuti munkupikisana na wabveseri wanzanu. Mzimu wakubzipereka womwe umbaticitisa kunyang’ana ubwino kwa winango, umbatizindikirisa kuti ndife Wakristau wacadidi na kuticitisa kukhala wabveseri wakutumbiza Mulungu. (Ju. 13:34, 35; 1 Wak. 13:4, 5; 1 Pe. 2:12) Tingadzakoyere mbuto kokha wale womwe timbakhala nawo pamuyi ayai womwe tabwera nawo m’kanderendere ibodzi ayai womwe timbapfunza nawo Bibliya. Mbuto yakupambulika in’dzakoyedwera nkhalamba na anyakudwala. Pakuti mbutoyi njakucepa, munthu m’bodzi ayai awiri womwe wankuthandiziratu nkhalamba ayai nyakudwala ndiwo wokha wangakhale nawo pabodzi.

◼ Cakudya ca Masikati: Taphata minyendo, dzabwereseni cakudya m’mbuto mwakuti, pa nthawe yakupuma mudzasiye mbuto ya mtsonkhano kuti mukanyang’ane cakudya ca masikati. Mungaphatisire basa ka kolmani kang’ono kakundokwana pansi pa mpando womwe mun’dzakhalayo. Makolmani makulu ninga ya pa phwando na matijela ya vidru yankubvumizidwa lini kubwera pa mbuto ya mtsonkhano.

◼ Bzakupereka: Tingalatize kutenda kwathu pa makonzedwe ya mtsonkhano mwa kucita mwakubzifunira bzakupereka bzathu pa basa la padziko lense pa mtsonkhanoyo. Xeke iri-yense inganembedwe kuti inkuyenda kwa “Associação das Testemunhas de Jeová de Moçambique.”

◼ Cithandizo Camankhwala: Penu mumbamwa mankhwala yakupambulika, taphata minyendo, dzatsimikizeni kubweresa mankhwala yakukwanira pakuti pan’dzakhala lini na mankhwalayo pa mtsonkhanopo.

◼ Kutcenkha Ngozi: Taphata minyendo, mpsakufunika kukhala wakuzindikira kuti titcenkhe ngozi zakubwera thangwe ra kupsedemuka ayai kukhukhumudwa. Pa gole liri-lense ngozi zimbacitika thangwe ra nsapato, kawiri-kawiri zomwe n’zamagogodigo. N’kwabwino kusankhula nsapato zakuthemera zomwe zingakuthandizeni kufamba mwakusaya kuneseka.

◼ Formulariyo ya Muzungireni Munthuyu (S-43): Ka formulariyo ka Muzungireni Munthuyu kangaphatisidwe basa pa kunemba bza munthu womwe walatiza kaso pakucita upalizi bwakusaya kulinganizidwa mu nsiku za mtsonkhano. Maformulariyo yanganembedwe yaciperekedwa ku Cipinda ca Mabukhu ayai kupereka kuna munembi wa gwere lanu mukabwerera kumui.

◼ Marestaurante: Lemekezani dzina la Yahova mwa khalidwe lanu labwino mu marestaurante. Bvalani mu njira yakuthemera ninga mtumiki Wacikristau. Siyani malango yakuthemera penu bzimbacitika.

◼ Mbuto Yakugona: Inati kufika nsiku ya mtsonkhano, Depatimenti Yakutambira Alendo in’dzayamba basa na cakulinga cakuthandiza wense womwe wangadzakumbire mbuto yakumbadzagona. Makonzedweya yambathumizira kukondwa komwe timbabva tikakhala pabodzi ninga Wakristau. Na tenepo kudziwa kuti “bzinthu bzense bzimbacitike mwakuthemera na mwakulongosoka,” kuphatanidza na kufunira bzabwino wanzathu, mpsakufunika kukumbukira nfundo zinango. Kwa womwe wan’dzafikira ku nyumba za abale, wadzakondwe na bzomwe wakonzeredwa wacidzabverana na bzomwe angadzafune mweneciro nyumba. Mudzambasiye cipinda canu ciri cakucena nsiku iri-yense munati kuyenda ku mtsonkhano na pomwe mtsonkhano wamala munati kucoka pamuipo. Mukadzatambiridwa ku nyumba ya m’bale bzin’funika lini kupereka udindo bwanu kwa ali-wense pamuipo bwakukusamalirani pa cakudya na transporte.Tenepo, mpsakufunika aliyense kukumbukira mbali imweyi. Kuteweza kwathu na kubvera malangoya kun’dzacitisa kuti nyakutitambirayo, acite mwakucokera mumtima, si kuti kwakungingimiridwa. Mu njira ibodzi-bodziyo, womwe wan’dzakhala pa mbuto ya mtsonkhanoyo wan’dazafunika kubverana na walatizi na cakulinga cakuti nsiku iri-yense mbuto ya mtsonkhanoyo ikhale yakuwoneka bwino.—1 Wak. 14:40. Nthawe zense tin’dzafunika kulatiza makhalidwe ya bzisapo bza mzimu tikakhala tiri ku hotel. Abereki an’dzafunika kunyang’anira wana wawo nthawe zense pa nthawe yomwe ali ku hotel, mbuto zakusenzekera ku mbuto iri-yense. Pakakhala pagwa mabvuto mu cipinda comwe muli, dziwisani Depatimenti ya kunyang’anira mbuto yakugona ya mtsonkhano wa Cigawo kuti iwo apereke cithandizo cakufunikira.

◼ Athandizi Wakubzipereka: Ali-wense omwe angafune kubzipereka, angakadziwise Depatimenti ya Athandizi Wakubzipereka pa mtsonkhano. Wana womwe wanati kukwanisa magole 16 yakubadwa wangacitembo basa labwino mwakutsogoledwa na wabereki, nyakuwanyang’anira, ayai munthu munango mkulu wakubvumizidwa na wabereki.