Kukulisa Luso Lathu mu Utumiki​—Kuthandiza Womwe Timbawapasa Marevista Mwakukhazikika

Thangwe Ranyi Mpsakufunika: Wanthu azinji omwe ambakomedwa kuwerenga marevista yathu ambafuna lini kupfunza nafe Bibliya. Pinango iwo ambakomedwa na cipembedzo cawo, ayai pinango ambaona kuti alibe nthawe ya kupfunza. Tsono, pakuti iwo nthawe zense ambawerenga marevista yathu, angakhale na mtima wakufuna Fala la Mulungu. (1 Pe. 2:2) Mbali inango ya nkhaniyo ingatokonye mitima yawo, ayai bzinthu pa moyo wawo bzingacinje. Nthawe zense, kuwazungira mwacigwatho kungawacitise kutsudzuka nafe ticidziwa bzomwe iwo ambafuna na thupo lawo. Pinango pfunziro la Bibliya lingadzayambike.

Momwe Mungacitire:

• Mwezi uli-wense, citani makonzedwe ya kuyendesera kwa m’bodzi na m’bodzi marevista ya Nsanja ya Olonda na Galamukani! yakucoka tsapanopa. Pinango mungawazungire pa nthawe inango mkati mwa mwezi kuti mukakuze cikhumbo cawo ca kuwerenga nkhani za m’marevista yomwe mudasiya, ayai bukhu linango lomwe ndakugawiridwa la mweziwo. Koyani bwino bzomwe mumbanemba.​—Onani Utumiki Bwathu bwa Umambo bwa Janeiro 2014, tsamba 3.

• Konzekererani ali-wense omwe munkamuzungira. M’mbuto mwa kumbandopereka marevista, citisani mweneciro nyumba kulewalewambo na kukuza uxamwali bwanu na iye, tenepo mungamucitise kufuna kudziwa bzizinji.

• Khalani tceru kuti mugumane mpata wakuyambisa pfunziro. Penu m’bodzi mwa omwe mumbawapasa marevista mwakukhazikika anibvunza bzomwe Bibliya limbalewa pa nkhani inango, mubweresereni bukhu lomwe timbapfunzisira wanthu lomwe lina mtawiro wace mucicezerana naye bzimwebzo. Munati kucoka, citani mbvunzo kuti mudzacezerane ulendo bwapatsogolo. Penu imwepo nthawe zense mwakusaya kuphonya, napo mucikhala kuti mumbaceza mwacigwatho mwakuphatisa basa Bibliya ayai libodzi mwa mabukhu yathu yakupfunzisira, mumbakhala munkucitisa pfunziro la Bibliya. Kodi mudapereka kale kwa mweneciro mui broxura la Bzipsa Bzabwino ndipo mucimulatiza pfunziro la Bibliya lacigwatho? Kodi mudamulatiza kale mavidiyo ya kuti Thangwe Ranyi Tin’funika Kupfunza Bibliya? na Kodi Pfunziro la Bibliya Limbacitidwa Tani? Napo penu munthu alibe kubvuma pfunziro la Bibliya kumbuyo, bzinthu bzingacinje. Kodi bzingakhale bzaphindu kuna imwepo kuyezera pomwe?

Yezerani Kucita Bzimwebzi Mkati mwa Mwezi Wathunthu:

• Citani ndandanda ya wanthu omwe mungawapase marevista mwakukhazikika. Wagawireni marevista yakumalizira kucoka, ndipo wauzeni kuti mun’dzawabweresera pomwe ya mwezi unkubwera.