Kukulisa Luso Lathu mu Utumiki​—Ulendo Bwakubwereza

THANGWE RANYI MPSAKUFUNIKA: Wanthu azinji omwe ambafuna kubva bzipsa bzabwino ambakhala ankulinga cadidi cakulewa bza Mulungu. (Zai 55:6) Kuti tikwanise kuwapfunzisa mwakukhazikika, tin’funika kumbawazungira mwakubwereza-bwereza. Wanthu ambagumana na mabvuto yakusiyana-siyana, tenepo tin’funika kunyang’ana njira zakusiyana-siyana zakuwapalizirira kuti wanthuwo afune kubva cadidi. Tsono tingakwanise kutokonya mitima ya wanthu penu tin’konzekera bwino ticikhalambo na cakulinga cakuyambisa pfunziro la Bibliya.

MOMWE MUNGACITIRE:

• Mbabwererani mwakamfulumize kwa munthu omwe an’funa kudziwa bzizinji.—Mat 13:19

• Khalani wauxamwali, waulemu na wakutsudzuka

• Yambani na kumumusa mwa nsangala. Phatisani basa dzina na munthuyo. Ndipo mukumbuseni thangwe race mwamuzungira pomwe, pinango kuti mukatawire mbvunzo, kumuyendesera revista ipsa, kukamulatiza webisaite yathu, vidiyo ayai momwe timbacitira pfunziro la Bibliya. Cinjani maceza yanu mukawona kuti munthuyo ana nkhani inango yomwe akufuna kudziwa.—Waf 2:4

• Thirizirani mbeu ya cadidi yomwe mwabzala mu mtima mwace, mwa kuceza naye bzinembo ayai mwa kumbamusiyira marevista. (1Wak 3:6) Yezerani kukhala xamwali wa munthuyo

• Siyani mbvunzo omwe mungadzacezerane pomwe pa ulendo bwakutewera