Mareferensiya ya Kabukhu ka Mitsonkhano ka Moyo Wathu na Utumiki
7-13 JANEIRO
CUMA CA M’FALA LA MULUNGU | MABASA 21-22
“Lekani Kuti Kufuna kwa Yahova Kucitike”
(Mabasa 21:8-12) Macibese yace tidayenda ku Sezareya. Kumweko tidafikira ku nyumba ya Firipi, mpalizi omwe akhali m’bodzi mwa amuna 7, ndipo tidakhala naye. 9 Mwamuna umweyu akhana wana wacikazi anai wakusaya kulowodwa, omwe akhali apolofeta. 10 Koma pambuyo pakukhala kumwekule nsiku zizinji, mpolofeta munango wakucemeredwa Agabo adabwera kucokera ku Judeya. 11 Iye adabwera kudzagumana nafe ndipo adatenga bande wa Paulo acibzimanga minyendo na manja yace acilewa kuti: “Mzimu wakucena unkuti, ‘Mweneciro wa banderi an’dzamangidwa tenepa na Ajuda ku Jeruzalemu, acidzam’pereka m’manja mwa wanthu wa mitundu.’ ” 12 Pomwe tidabva bzimwebzo, ifepano pabodzi na wanthu omwe akhali kumweko, tidayamba kumudandaulira Paulo kuti aleke kuyenda ku Jeruzalemu.
(Mabasa 21:13) Koma Paulo adatawira kuti: “Thangwe ranyi munkulira na kutepesa citsimikizo cangu? Tsono dziwani kuti ndidakonzeka sikuti kukamangidwa kokha, koma kufa ku Jeruzalemuko thangwe ra dzina la Mbuya Jezu.”
(Mabasa 21:14) Pakuti tidatazira kucinja makumbukidwe yace, tidasiya kumungingimizako ticimuuza kuti: “Kufuna kwa Yahova kucitike.”
Kufufudza Cuma Cauzimu
(Mabasa 21:23, 24) Tenepo, ucite bzomwe tin’kuuzabzi: Tina amuna anai omwe acita piciro. 24 Utenge amuna amwewa ndipo ukacite nawo pabodzi mwambo wakubzicenesa. Uwalipirire bzense bzakufunikira kuti asenge tsisi lawo. Ukacita bzimwebzi, ali-wense an’dzadziwa kuti bzense bzomwe adabva bza iwepo mpsakunama. An’dzadziwa kuti ukucita bzinthu mwakulondoza ndipo unkubverambo Cakutonga.
(Mabasa 22:16) Tenepo, unkudikhira ciyani? Muka, ubatizidwe ndipo tsuka pikado zako mwakucemera dzina lace.’
Nfundo yakuthumizira pa Mab 22:16 mu nwtsty
tsuka pikado zako mwakucemera dzina lace: Ayai ‘tsuka pikado zako ndipo cemera dzina lace.’ Pikado za munthu zingatsukidwe sikuti kokha mwa kubatizidwa na madzi, koma mwakucemera pa dzina la Jezu. Kucita bzimwebzi kumbaphatanidza kukhulupira Jezu na kulatiza cikhulupiroco mwa kucita mabasa yacikristau.—Mab 10:43; Tiy 2:14, 18.
14-20 JANEIRO
CUMA CA M’FALA LA MULUNGU | MABASA 23-24
“Adamunamizira Kuti Ngwakunesa Kwene-kwene, Ndipo Akhacitisa Wanthu Kumukira Boma”
(Mabasa 23:12) Pomwe kudacena, Ajuda adakonza ciwembo na kulumbira mwa kubzitemberera kuti angadadya lini ne kumwa mpaka kupha Paulo.
(Mabasa 23:16) Tsono, mwana wa mpfumakazi ya Paulo, pomwe adadziwa bzomwe akhadapanganabzo, iye adayenda ku mbuto komwe kukhakhala acikunda ndipo adafotokozera bzense Paulo.
(Mabasa 24:2) Pomwe Teritulo adacemeredwa, iye adayamba kunamizira Paulo, aciti: “Tiri pa mtendere ukulu thangwe ra imwepo, ndipo thangwe ra nzeru zanu zakuwona bzinthu na patali, bzinthu bzacinja mu mtundu wathuyu,
(Mabasa 24:5, 6) Ifepano tawona kuti munthuyu ngwakunesa kwene-kwene, ndipo akucitisa wanthu kumukira boma pakati pa Ajuda wense pa dziko la pansi na komwe kuna wanthu, ndipo umweyu ni mtsogoleri wa gulu la anyakupanduka la Anazareti 6 Ndipo umweyu adayezerambo kupswipiza templo, ndipo ifepano tidamuphata.
(Mabasa 24:10-21) Pomwe nduna idalata Paulo na msolo kuti alewelewe, Pauloyo adati: “Ine pakudziwa kuti mwakhala muyeruzi kwa mtunduyu kwa magole mazinji, ndine wakukondwa kulewalewa kuti ndibzikhotcerere pa bzomwe ankundinamizirabzi. 11 Imwepo mungagumane umboni bwakuti zikanati kupita nsiku 12 kucokera pomwe ine ndidayenda ku Jeruzalemu kukanamata; 12 ndipo amwewa akanati kundigumana mu templo ndikutsutsana na munthu ali-wense ne kuyambisa phiringu m’masinagoga ayai mbuto inango iri-yense mu mzindamu. 13 Ndipo amwewa alibe umboni bwakuti akulatizeni pa bzomwe ankulewabzi. 14 Koma ine ndikubvuma ibzi kwa imwe: Njira yakunamatira yomwe iwo ankuicemera ya ‘anyakupanduka,’ ni njira yomwe ndikucitira utumiki bwakupambulika kwa Mulungu wa abereki wangu. Pakuti ndimbakhulupira bzense bzomwe bziri m’Cakutonga na Bzakunembedwa m’mabukhu ya apolofeta. 15 Ndipo ine ndina cidikhiro mwa Mulungu, cidikhiro comwe wanthuwa wanacombo, cakuti kun’dzakhala kumuka kwa anyakufa wakulungama na wakusaya kulungama. 16 Thangwe ra bzimwebzi, ndimbacita nyongo nthawe zense kuti ndipitirize kukhala na cikumbumtima cakucena pamaso pa Mulungu na pa wanthu. 17 Pambuyo pa magole mazinji, ndabwera ku Jeruzalemu kudzapasa mphaso za nsisi mtundu wangu na kudzapereka nsembe. 18 Pomwe ndikhacita bzimwebzo, amwewa adadzandigumana mu templo ndiri wakucenesedwa ninga mwa mtemo, koma kukhalibe thimu la wanthu, ne nyakuyambisa phiringu, koma kukhana Ajuda winango wakucokera m’cigawo ca Asia 19 amwewo ndiwo akhafunikira kugumanika pano pamaso panu kudzandilewera, bzingadakhala kuti pana mathangwe yakundipasira mulandu. 20 Ayai, bvumizani kuti wanthu omwe ali panowa, alewe okha penu awona cakuphonyeka ciri-cense pomwe ndidaima pamaso pa Sinedriyo, 21 kupambula mafala yokhaya yomwe ine ndayalewa pomwe ndikhali pakati pawo yakuti: ‘Ndinkuyeruzidwa pamaso panu thangwe ra nkhani ya cilamuso!’ ”
Kufufudza Cuma Cauzimu
(Mabasa 23:6) Pomwe Paulo adadziwa kuti winango wa iwo akhali Asaduki ndipo winango akhali Afarizi, iye adalewa mwakukuwa mu Sinedriyo kuti: “Amunamwe, abale wangu, ine ndine Mfarizi, mwana wa Mfarizi. Ndikuyeruzidwa pano thangwe ra cidikhiro ca kulamusidwa kwa anyakufa.”
Nfundo yakuthumizira pa Mab 23:6 mu nwtsty
ine ndine Mfarizi: Pakati pa wanthu omwe akhabvesera Paulo, akhalipo winango omwe akhamudziwa kale. (Mab 22:5) Iwo adabvesesa pomwe iye adalewa kuti akhali mwana wa Mfarizi, ndipo iye akhadziwika ninga munthu omwe akhana cikhulupiro cibodzi na ca Afarizi. Iwo akhadziwa kuti Paulo akhanama lini pomwe adalewa bzimwebzi, pakuti Afarizi winango mu nyumba ya Sinedriyo akhadziwa kuti Pauloyo tsapano akhali Mkristau wa nyongo. Koma mu nkhani ino pomwe Paulo adalewa kuti akhali Mfarizi, akhafuna kuthandauza kuti bzomwe iye akhakhulupira pa nkhani ya cilamuso bzikhandendemerana na Afarizi sikuti na bza Asaduki. Mwa kucita bzimwebzi iye adalewa cinthu comwe cikhabverana na Afariziwo. Bzinkuwoneka kuti Paulo adanyosa utowa nkhani yomwe Afarizi na Asaduki akhambanesana kale, ndipo iye akhadikhira kuti akulu-akulu winango wa Sinedriyo akhale ku mbali yace, ndipo bzimwebzi bzidakwanisikadi. (Mab 23:7-9) Bzomwe Paulo adalewa pa Mabasa 23:6 bzinkubveranambo na momwe iye adadzafotokozera pakubzikhotcerera kwa Mambo Agripa. (Mab 26:5) Pomwe Paulo akhali ku Roma, iye adanembera tsamba Akristau anzace wa ku Firipo, ndipo adalewambo kuti akhali Mfarizi. (Waf 3:5) Mwakubverana na Mabasa 15:5 mungawonembo kuti wanthu winango napo pambuyo pakukhala Akristau, adapitiriza kudziwika na wanthu kuti kale akhacita mbali ya Afarizi—Onani nfundo yakuthumizira pa Mabasa 15:5.
(Mabasa 24:24) Pambuyo pa nsiku zing’ono-ng’ono, Felisi adafika pabodzi na mkazace Durusila omwe akhali mkazi wacijuda, ndipo iye adacemeresa Paulo na kumubvesera pomwe akhafotokoza bza kukhulupira Jezu Kristu.
(Mabasa 24:27) Koma pomwe padapita magole mawiri, Felisi adapitidwa m’mbuto na Porisiyo Festo; ndipo pakuti Felisi akhafuna kuti awoneke wabwino pamaso pa Ajuda, iye adandomusiya Paulo m’kawoko.
Nfundo yakuthumizira pa Mab 24:24 mu nwtsty
Durusila: Akhali mwana wacikazi wacitatu na wakumalizira wa Herode wakulewedwa pa Mabasa 12:1, omwe akhali Herode Agripa Wakuyamba. Iye adabadwa mu 38 EC, ndipo akhali mbale wacikazi wa Agripa Waciwiri na Berenise. (Onani nfundo yakuthumizira pa Mabasa 25:13 na mu Glossário mu Tradução do Novo Mundo da Bíblia Sagrada pomwe padanemba kuti: “Herodes.”) Felisi akhali mwamuna waciwiri wa Durusila. Iye pakuyamba akhadalowodwa na Mambo wa ku Siriya Azizus wa ku Emesa, ndipo adadzalambana naye acidzalowodwa na Felisi mu 54 EC, pomwe akhana magole 16 yakubadwa. Ndipo pinango iye akhalipombo Pomwe Paulo adakalewalewa na Felisi bza ‘cirungamo, kubziretsa na ciyeruzo comwe cingadadzabwera.’ (Mab 24:25) Pomwe Felisi adadzakhala nduna m’mbuto mwa Festo, iye adasiya Paulo m’kawoko kuti ‘awoneke wabwino pamaso pa Ajuda,’ ndipo pinango kuti akondwesembo mkazace Durusila omwe akhali Mjuda.—Mab 24:27.
21-27 JANEIRO
CUMA CA M’FALA LA MULUNGU | MABASA 25-26
“Paulo Adakumbira Kukawonekera kwa Sezare, Ndipo Adakapalizira Mambo Herode Agripa”
(Mabasa 25:11) Penu ndinedi wakuphonya, ndipo ndacita bzinthu bzakuthemera kufa, ndikulamba lini kufako. Koma penu bzomwe wanthuwa ankulewabzi bziribe umboni, palibe munthu omwe angandipereke kwa wanthuwa kuti awakondwese. Ndikukumbira kuti ndikawonekere kwa Sezare!”
(Mabasa 26:1-3) Agripa adauza Paulo kuti: “Wabvumizidwa kulewalewa mbali yako.” Na tenepo, Paulo adafuthula boko lace aciyamba kulewa mwakubzikhotcerera kuti: 2 “Pa bzinthu bzense bzomwe Ajuda ankundinamizirabzi, ndine wakukondwa kudzalewalewa mwakubzikhocerera pamaso panu Mambo Agripa, 3 maka-maka thangwe ndimwe mdziwi wa mitemo na kunesana komwe kulipo pakati pa Ajuda. Tenepo, ndikukumbira kuti munditetekere mwakupirira.
(Mabasa 26:28) Koma Agripa adauza Paulo kuti: “Mu kanthawe kakucepa ungadandicitisa kuti ndikhale Mkristau.”
Kufufudza Cuma Cauzimu
(Mabasa 26:14) Ndipo pomwe tidagwa pansi, ndidabva fala linkundiuza m’Cihebereu kuti: ‘Saulo, Saulo, thangwe ranyi unkundizunza? Unkundobziboneresa wekha ukapitiriza kucita bzinthu ninga cifuwo comwe cin’kuthusa minyendo yace pa mpsimbo yomwe ina cakuphaira kuti cibzipweteke.’
Nfundo yakuthumizira pa Mab 26:14 mu nwtsty
cifuwo comwe cinkuthusa minyendo yace pa mpsimbo: Wanthu akhambaphatisa basa mpsimbo yomwe ikhana cakuphaira, pakufuna kutsogolera cifuwo. (Way 3:31) Mafala yakuti ‘cifuwo comwe cinkuthusa minyendo yace pa mpsimbo’ ni mwani omwe umbagumanika m’mabukhu yacigirego. Mwaniyu umbalewa bzomwe bzimbacita ng’ombe ya mtimbo yomwe imbabzipweteka thangwe ra kumbabziphaisira ku mpsimbo pomwe inkukumbidwa. Ni bzomwe Saulo adacita akanati kukhala Mkristau. Mwa kumbazunza anyakupfunza wa Jezu, omwe akhana thandizo la Yahova, Paulo akhabziikha pa ngozi ya kubzibweresera mabvuto makulu. (Ndendemezerani na Mabasa 5:38, 39; 1Timotio 1:13, 14.) Pa Mpalizi 12:11, ‘bzakuphaira ng’ombe’ bzimbandendemezeredwa na mafala ya munthu wanzeru yomwe yambacitisa munthu kubvera malango.
Glossário mu nwt
Mpsimbo. Mtundu umweyu wa mpsimbo ukhambakhala na fero yakusongoka, ndipo alimi akhambaiphatisa basa pakutsogolera ng’ombe. Mpsimboyi imbandendemezedwa na mafala yanzeru yomwe yangacitise munthu kubvuma kubvera malango. Mafala yakuti ‘cifuwo comwe cinkuthusa minyendo yace pa mpsimbo’ yambalewa bzomwe bzimbacita ng’ombe ya mtimbo yomwe imbabzipweteka yokha thangwe ra kumbabziphaisira ku mpsimbo pomwe inkukumbidwa.—Mab 26:14; Way 3:31.
(Mabasa 26:27) Kodi imwepo, Mambo Agripa, mumbakhulupira Bzinembo bza Apolofeta? Ndin’dziwa kuti mumbabzikhulupira.”
28 JANEIRO–3 FEVEREIRO
CUMA CA M’FALA LA MULUNGU | MABASA 27-28
“Paulo Adayenda ku Roma na Ngalawa”
(Mabasa 27:23, 24) Pakuti usiku bwapitabu Anjo wa Mulungu wangu omwe ndinkumucitira utumiki bwakupambulika, adaima pafupi na ine, 24 acindiuza kuti: ‘Leka kugopa Paulo. Un’funika kukawonana na Sezare, ndipo ona! Mulungu mwakudeka mtima, an’pulumusa wense omwe unawo pabodzi pa ulendobu thangwe ra iwepo.’
(Mabasa 28:1, 2) Pomwe tidapulumuka, tidabva kuti nsuwayo ikhacemeredwa Malta. 2 Ndipo wanthu wakulewalewa cirewedwe cacirendo kumweko, adatidekera mtima kwene-kwene. Iwo adatigasira moto na kutitambira bwino tense thangwe kukhabvumba ndipo kukhadjedjera.
(Mabasa 28:16, 17) Pomwe tidadzafika ku Roma, Paulo adabvumizidwa kumbakhala yekha acimbalindiridwa na m’cikunda. 17 Pomwe zidandopita nsiku zitatu, Paulo adacemeresa akulu-akulu wa Ajuda. Pomwe adawatsonkhanisa pabodzi adawauza kuti: “Amunamwe, abale wangu, napo kuti ndiribe kucita cinthu cakutsutsana na wanthu ayai cakutsutsana na mwambo wa abereki wathu, ndidaikhidwa m’kawoko ku Jeruzalemu na kuperekedwa m’manja mwa Aroma ninga nyam’kawoko.
Kufufudza Cuma Cauzimu
(Mabasa 27:9) Ikhadapita kale nthawe itali, ndipo tsapano kufamba pa nyanza kukhali kwakugopswa napo jejum ya pa Nsiku Yakumpsinkha Pikado ikhadapitambo kale. Tenepo Paulo adawapasa malango
Nfundo yakuthumizira pa Mab 27:9 mu nwtsty
jejum ya pa Nsiku ya Kumpsinkha Pikado: Fala lacigirego lakusanduliziridwa kuti “jejum” likhathandauza kubzimana kudya komwe kukhalewedwa mu Cakutonga ca Mozeji, mwakubverana na nsiku yakumpsinkha pikado yomwe ikhacitidwa kabodzi pa gole, yomwe ikhacemeredwambo kuti Iom Quipur (M’cihebereu yohm hak·kip·pu·rím, ‘nsiku yakumpsinkha pikado’). (Mwam 16:29-31; 23:26-32; Mirew 29:7; Onani mu Glossário mu Tradução do Novo Mundo da Bíblia Sagrada pomwe padanemba kuti: “Dia da Espiação.”) Fala lakuti ‘mubzitsautse’ lomwe lidaphatisidwa basa pakulewa bza nsiku yakumpsinkha pikado, kawiri-kawiri limbafuna kuthandauza kucita bzinthu bzakusiyana-siyana kuphatanidzambo jejum. (Mwam 16:29, onani mafala ya m’nyansi.) Fala lakuti ‘jejum’ lakuphatisidwa basa pa Mabasa 27:9 lingathandauze kubzitsautsa komwe kukhacitika pa Nsiku Yakumpsinkha Pikado komwe kukhaphatanidza kubzimana kudya. Nsiku ya Kumpsinkha Pikado ikambacitika kuphampha kwa Setembro ayai kumayambiriro kwa Outubro.
(Mabasa 28:11) Pomwe padapita minyezi mitatu, tidapakira ngalawa yomwe ikhana cizindikiro ca “Wana wa Zeu.” Ngalawayo ikhali ya ku Alexandiriya ndipo idamala nthawe yense ya mphepo iri pa nsuwa.
Nfundo yakuthumizira pa Mab 28:11 mu nwtsty
Wana wa Zeu: Agirego na Aroma wa kale akhakhulupira kuti ‘Wana wa Zeu’ (Mcigirego Dióscuros) akhali mamphase omwe akhali Castor na Pólux wana wa mulungu Zeu (omwe akhadziwikambo na dzina lakuti Júpiter) na Mambo Wacikazi Leda wa ku Esparta. Na bzinthu bzimwebzi, wanthu azinji akhakhulupira kuti iwo akhana mphanvu yakukhotcerera amalinyero ku ngozi za m’madzi. Kulewa bza cizindikiro ca ngalawayi ni umboni bwakuti munthu omwe adanemba nkhaniyi ni mboni yakuwona na maso bza ngalawayi.