KUKULISA LUSO LATHU MU UTUMIKI Kusiya Kupfunzisa Anyakupfunza Bibliya Wakusaya Kuyenda Patsogolo

THANGWE RANYI MPSAKUFUNIKA: Wanthu an’funika kucemera pa dzina la Yahova kuti adzapulumusidwe. (War 10:13, 14) Tsono, ni wense lini omwe ambapfunza Bibliya, ambafuna kukhala na moyo mwakubverana na mitemo ya Yahova. Ifepano timbacita nyongo ya kuphatisa basa bwino nthawe yathu mu utumiki, mwa kumbathandiza wale omwe ankufunisisadi kucinja bzinthu pa moyo wawo kuti akondwese Yahova. Nyakupfunza Bibliya akaleka kuyenda patsogolo pambuyo pa kupfunza naye nthawe itali, bzingakhale bwino kusiya kupfunza nayeko, kuti tiphatise basa nthawe yathu pakuthandiza wale omwe ankufunisisadi kutumikira Yahova. (Ju 6:44) Tsono kutsogolo, munthuyo akadzalatiza kuti ana ‘makumbukidwe yabwino yomwe yangamuthandize kugumana moyo wakusaya kumala,’ tingadzayambe pomwe kupfunza naye Bibliya.—Mab 13:48.

MOMWE MUNGACITIRE:

• Tendani nyakupfunza wanuyo thangwe ra kufuna kugumana cidziwiso cacadidi.—1Tim 2:4

• Tsindikani kuna iye kufunika kwa kuphatisira basa bzomwe iye ankupfunzabzo.—Lu 6:46-49

• Cezani naye bza there la Jezu lakulewa bza munthu wakubzala mbeu, ndipo muuzeni kuti iye awone bzomwe bzinkumutazisa kuyenda patsogolo.—Mat 13:18-23

• Mufotokozereni mwakusamala thangwe race imwepo munkuimisa pfunzirolo

• Muuzeni kuti nthawe zinango mungadzambamuzungire kuti mudzamulimbise, ndipo mungadzayambe pomwe kupfunza naye Bibliya iye akadzawonesa kuti akufuna kuyenda patsogolo

ONANI VIDIYO, NDIPO MUKAMALA TAWIRANI MIBVUNZO YAKUTEWERAYI:

• Kodi mwapfunza ciyani pa maceza yomwe yalatiza bza nyakupfunza Bibliya omwe ankuyenda lini patsogolo?

• Kodi mpalizi athandiza tani nyakupfunza wace kubvesesa kuti iye ankufunikira kucinja bzinthu bzinango pa moyo wace?

• Kodi mpalizi acita ciyani comwe calatiza kuti ngwakukonzeka kudzayamba pomwe kupfunza Bibliya na nyakupfunzayo?