Mareferensiya ya Kabukhu ka Mitsonkhano ka Moyo Wathu na Utumiki
6-12 MAIO
CUMA CA M’FALA LA MULUNGU | 2 WAKOLINTO 4-6
“Tireke Kubwerera m’Mbuyo”
(2 Wakolinto 4:16) Tenepo tinkubwerera lini m’mbuyo, napo munthu wathu wakunja ankumala, n’cadidi munthu wathu wamkati ankukhalisidwa mupsa nsiku na nsiku.
(2 Wakolinto 4:17) Pakuti napo matsautso njakanthawe na yakupepuka, yambatibweresera umbiri bomwe bumbayenda bucithumizirika ndipo n’bwakusaya kumala;
it-1 matsa. 724-725
Kupirira
Ndipo tin’funikambo lini kuluza cidikhiro cathu cacikristau, cakudzakhala na moyo wakusaya kumala na mathupi yakulungamiratu. Napo ticifika pakuphedwa na anyakutizunza, cidikhiroci cipo cicidzatazika. (War 5:4, 5; 1Wat 1:3; Cibv 2:10) Mabvuto yomwe timbagumana nayo nsiku zino, n’cinthu lini tikayandendemezera na kukwanisika kwa cidikhiro cikuluci. (War 8:18-25) Thangwe ra cidikhiro comwe tinaco ca kudzakhala na moyo wakusaya kumala, mabvuto yali-yense, napo yacikhala makulu tani, iyo ‘njakanthawe na yakupepuka.’ (2Wak 4:16-18) Munthu akambakumbukira kuti mabvuto yomwe tinkugumana nayoya njakanthawe, aciphatisisa pacidikhiro cace cacikristau, bzingamuthandize kupirira, acipitiriza kukhala wakukhulupirika kwa Yahova Mulungu.
(2 Wakolinto 4:18) pomwe tinkunyang’anisisa pa bzinthu bzakusaya kuwoneka na maso, sikuti pa bzakuwoneka. Pakuti bzinthu bzakuwoneka na maso mpsakanthawe, tsono bzakusaya kuwoneka mpsamuyaya.
Kufufudza Cuma Cauzimu
(2 Wakolinto 4:7) Na tenepo tina cuma ici m’bzombo bza dongo kuti mphanvu yakuposa yacibadwa icokere kwa Mulungu, sikuti kwa ifepano.
(2 Wakolinto 6:13) Tenepo ninga mtawiro ndinkulewalewa namwe ninga wana wangu, fungulanimbo kwene-kwene mitima yanu.
13-19 MAIO
CUMA CA M’FALA LA MULUNGU | 2 WAKOLINTO 7-10
“Utumiki Bwakuthandizira Winango”
(2 Wakolinto 8:1-3) Tsapano abale, tin’funa kukudziwisani bza kudeka mtima kukulu kwa Mulungu komwe kudalatizidwa ku magwere ya ku Masedoniya. 2 Pomwe akhagumana na mabvuto makulu thangwe ra mayezo, iwo akhali wakukondwa, ndipo adalatiza mzimu wakupasa napo kuti akhabonera kwene-kwene. 3 Pakuti iwo adacita bzimwebzi mwakubverana na bzomwe akhanabzo, inde, ndikuwacitira umboni bwakuti iwo adalatiza kudeka mtima kukulu kwene-kwene;
w98 1/11 tsa. 25 ndi. 1
“Mulungu Ambafuna Wanthu Omwe Ambapasa Mwakukondwa”
Cakuyamba, mpostolo Paulo adauza Akristau wa ku Kolinto bza abale wa ku Masedoniya omwe adapereka ciratizo cabwino pa kupereka thandizo. Mpostolo Paulo adanemba kuti: ‘Pomwe akhagumana na mabvuto makulu thangwe ra mayezo, iwo akhali wakukondwa, ndipo adalatiza mzimu wakupasa napo kuti akhabonera kwene-kwene.’ Abale wa ku Masedoniyawo alibe kucita kungingimizidwa kuti apereke thandizo lire. M’mbuto mwace, Paulo adalewa kuti ‘iwo adapitiriza kutidandaulira na mtima wense, kuti tiwapasembo mwayi wakupereka mphaso.’ Abalewo adapereka ciratizo cabwino pa nkhani ya kupasa pakuti iwo adacita bzimwebzo napo kuti ‘akhabonera kwene-kwene.’—2 Wakolinto 8:2-4.
(2 Wakolinto 8:4) ndipo iwo adapitiriza kutidandaulira na mtima wense, kuti tiwapasembo mwayi wakupereka mphaso zansisi kuti atengembo mbali pa utumiki bwakuthandizira anyakucena.
(2 Wakolinto 9:7) Ali-wense acite ninga momwe watongera mu mtima mwace, sikuti mwakudandaula ne mwakukakamizidwa, thangwe Mulungu ambafuna munthu omwe ambapereka mwakukomedwa.
Kufufudza Cuma Cauzimu
(2 Wakolinto 9:15) Tinkutenda Mulungu thangwe ra kutipasa mphaso ya fovolo, yomwe tingakwanise lini kuifotokoza.
Tendani Mulungu Thangwe ra ‘Mphaso ya Fovolo’ Yomwe iye Adatipasa
Paulo akhadziwa kuti mapiciro yense yakufunika kwene-kwene yomwe Mulungu adayalewa yan’dzakwanisika thangwe ra mphaso yakulungamiratu ya Kristu. (Werengani 2 Wakolinto 1:20.) Tenepo ‘mphaso ya fovolo yomwe tingakwanise lini kuifotokoza’ imweyi imbaphatanidza kudeka mtima kukulu pabodzi na lufoyi cairo lomwe Yahova adatilatiza mwa Jezu Kristu. Cadidi n’cakuti, mphaso ya fovolo imweyi njapadzulu kwene-kwene ndipo tingakwanise lini kuifotokoza na mafala yathu-yathu. Kodi tin’funa kuiwona tani mphaso ikulu yomwe ifepano tapasidwa? Ndipo kodi mphaso imweyi ingatithandize mu njira ziponi pomwe tinkukonzekera cikumbuso comwe cin’dzacitika pa Citatu 23 Março, 2016?
(2 Wakolinto 10:17) “Koma munthu akasamwa, asamwe mwa Yahova.”
g99 8/7 matsa. 20-21
Kodi Kusamwa n’Kuphonya?
M’Bzinembo Bzacigirego Bzacikristau, fala lakuti kau·khaʹo·mai, lomwe limbasanduliziridwa kuti “kusamwa, kukondwa, kubzitumbiza” limbaphatisidwa basa mu njira ziwiri, yabwino na yakuphonyeka. Mwa ciratizo Paulo adalewa kuti: ‘Mbatikondweni na cidikhiro ca kugumanika mu umbiri bwa Mulungu.’ Ndipo iye adacenjezambo kuti: ‘Koma munthu akasamwa, asamwe mwa Yahova.’ (Waroma 5:2; 2 Wakolinto 10:17) Bzimwebzi bzimbathandauza kusamwa thangwe ra Yahova kukhala Mulungu wathu, bzomwe bzimbaticitisa kutumbiza dzina lace lakucena na umbiri bwace.
20-26 MAIO
CUMA CA M’FALA LA MULUNGU | 2 WAKOLINTO 11-13
“‘Munga m’Thupi’ mwa Paulo”
(2 Wakolinto 12:7) kokha thangwe ra kutambira mafala mwakudabwisa. Tsono kuti ndileke kubzikuza mwakunyanyira, ndaikhidwa munga m’thupi omwe ni anjo wa Sathani kuti ambandikwanse nthawe zense kuti ndileke kubzikuza mwakunyanyira.
(2 Wakolinto 12:8, 9) Thangwe ra bzimwebzi, ndidadandaulira Mbuya katatu-kense kuti andicosere mungayo. 9 Koma iye adandiuza kuti: “Kudeka mtima kwangu n’kwakukwanira kwa iwepo, pakuti mphamvu yangu imbakhala yakukwana ukakhala wakutepa.” Na kukondwa kukulu, ndidapemba bza kutepa kwangu, kuti mphamvu ya Kristu ipitirize kukhala mwa ine ninga tendi.
(2 Wakolinto 12:10) Tenepo, ndimbakomedwa na kutepa, na kutukwanidwa, na nthawe zakusaya, na mayezo na mabvuto, thangwe ra Kristu. Pakuti ndikatepa, ndipo ndimbakhala wamphanvu.
“Iye Ambapasa Mphanvu Munthu Wakuneta”
Werengani Zaiya 40:3 Ifepano tingakhale na maluso mazinji, koma tingakwanise lini kucita bzinthu bzizinji mwa mphanvu zathu zokha. Ndipo bzimwebzi ndibzo bzomwe tensenefe tin’funika kudziwa. Mpostolo Paulo akhakwanisa kucita bzinthu bzizinji, koma iye akhakwanisa lini kucita bzense bzomwe akhafuna. Pomwe iye adafotokozera Yahova bza momwe akhabvera pa nkhaniyi, Yahova adamuuza kuti: ‘Mphanvu yangu imbakhala yakukwana ukakhala wakutepa.’ Paulo adabvesesa bzomwe Yahova akhafuna kulewa na mafalaya. Ndipopa iye adalewa kuti: ‘Ndikatepa, ndipo ndimbakhala wamphanvu.’ (2 Wak 12:7-10) Kodi Paulo akhathandauza ciyani na mafalaya?
Paulo akhadziwa kuti mwa mphanvu zace zokha, iye angadakwanisa lini kucita bzizinji. Iye akhafunikira thandizo la munthu wamphanvu kwene-kwene. Ndipo Paulo akhatambira thandizolo kucokera kwa mzimu wakucena wa Mulungu, maka-maka akatepa. Ndipo mzimuyo ukhamupasambo mphanvu zakuti akwanise kucita bzinthu bzomwe iye angadakwanisa lini kubzicita mwa mphanvu zace zokha. Bzimwebzi bzingacitikembo na ifepano. Yahova akatipasa mzimu wace wakucena, ifepano tin’dzakhala wakulimba!
Kufufudza Cuma Cauzimu
(2 Wakolinto 12:2-4) Ndikudziwa munthu munango wakubverana na Kristu, omwe m’magole 14 m’mbuyomu, adatengedwera kudzulu kwacitatu. Penu adatengedwa na thupi lace ayai penu alibe kutengedwa na thupi lace, bzimwebzo ndikudziwa lini, koma Mulungu ndiye akudziwa. 3 N’cadidi, ndikumudziwa munthuyu. Penu bzidacitika m’thupi ayai kunja kwa thupi, ndin’dziwa lini, Mulungu ndiye an’dziwa. 4 Iye adatengedwera ku paraizo acibva mafala yakusaya kuleweka yomwe njakubvumizidwa lini munthu kuyalewa.
(2 Wakolinto 13:12) Mbamusanani na kumpsompsonana ninga abale.
it-2 tsa. 177
Kumpsompsonana
‘Kumpsompsonana ninga abale.’ Bibliya limbalewa bza ‘kumpsompsonana ninga abale’ (War 16:16; 1Wak 16:20; 2Wak 13:12; 1Wat 5:26) ayai ‘kumpsompsonana mwa lufoyi la ubale’ (1Pe 5:14), komwe kukhambacitidwa na Akristau wakuyambirira. Pinango Akristauwo akhambampsompsonana amuna okha-okha na akazi okha-okha. Njira imweyi yakumusana ya Akristau wakuyambirira pinango ikhabverana na kumusana mwa kumbampsompsonana komwe wanthu wacihebereu akhambacita kale-kale. Napo bzinembo bzimbafotokoza lini bzinthu bzizinji pa nkhaniyi, ‘kumpsompsonana ninga abale’ na ‘kumpsompsonana mwa lufoyi la ubale’ kukhalatiza lufoyi na ciphatano, bzomwe bzikhalipo pakati pa gwere lacikristau.—Ju 13:34, 35.
27 MAIO–2 JUNHO
“Inepano Ndidamutsutsa Maso na Maso”
(Wagalata 2:11-13) Tsono pomwe Sefa adabwera ku Antiyokiya, inepano ndidamutsutsa maso na maso thangwe iye akhadaphonya. 12 Pakuti pomwe wanthu wakucokera kwa Tiyago akhanati afika, iye akhadya na wanthu wa mitundu inango, tsono pomwe wanthuwo adafika, iye adasiya kucita bzimwebzi ndipo adabzipambula thangwe akhagopa wanthu wakugwatidwawo. 13 Ndipo Ajuda winangowo adacitambo bzibodzi-bodzibzo. Napo Barnaba adakhalambo ku mbali yawo pa cinyengo cimweci.
Kodi Mumbawona Cirungamo Ninga Momwe Yahova Ambawonera?
Werengani Wagalata 2:11-14. Pedru adagopa wanthu. (Mim 29:25) Pedru akhadziwa momwe Yahova akhawonera wanthu omwe akhali lini Ajuda. Napo bzikhali tenepo, iye akhagopa kuti Ajuda wakucokera ku Jeruzalemu angadamukumbukira kuipa thangwe ra kubverana na Akristau omwe akhali lini Ajuda wale. Mpostolo Paulo udauza Pedru kuti akhayamba kucita bzinthu mwa cinyengo. N’thangwe ranyi? Thangwe ndakuti Paulo adabva Pedru ankukhotcerera Akristau omwe akhali lini Ajuda pa mtsonkhano ku Jeruzalemu mu gole la 49. (Mab 15:12; Wag 2:13) Kodi Akristau omwe akhali lini Ajuda adabzibva tani na kuphonya kwa Pedru? Kodi iwo adalekerera kuti bzimwebzi bziwakhumudwise? Kodi Pedru adaluza maudindo yace thangwe ra kuphonya komwe adacita?
(Wagalata 2:14) Tsono, nditawona kuti iwo akhafamba lini mwakubverana na cadidi ca bzipsa bzabwino, ine ndidamuuza Sefa pa maso pa wensewo kuti: “Penu iwepo napo ndiwe Mjuda, unkukhala ninga wanthu wa mitundu inango, sikuti ninga Ajuda, thangwe ranyi un’funa kuti wanthu wa mitundu inango ateweze cikhalidwe ca Ajuda?”
Kufufudza Cuma Cauzimu
(Wagalata 2:20) Ndidakhomeredwa pa muti pabodzi na Kristu. Ndine lini pomwe ule omwe ndina moyo, koma ni Kristu omwe ana moyo mwa ine. N’cadidi, moyo omwe ndinawo tsapano, ni thangwe ra kukhulupira Mwana wa Mulungu, omwe adandifuna ndipo adabzipereka thangwe ra ine.
(Wagalata 3:1) Imwe Agalata wakusaya nzeru! Kodi mbani adakucitisani kuti mukhale na makumbukidwe yakuipa, imwepo omwe mudauzidwa mwakubveka bwino bza infa ya Jezu Kristu omwe adakhomereredwa pa muti?
it-1 tsa. 880
Agalata, Tsamba Lakuyenda kwa
Mpostolo Paulo adalewa kuti: ‘Imwe Agalata wakusaya nzeru,’ bzin’funa lini kulewa kuti iye akhandokumbukira bza wanthu wa dzinza la Agaliki, omwe akhakhala ku mphimpha ya kudzulu kwa cigawo ca Galatiya. (Wag 3:1) M’mbuto mwace, mpostolo Paulo akhatsimula Akristau winango omwe akhagumanika m’magwere ya ku cigawo cimwecire omwe akhambatengeka na kagulu ka Akristau wacijuda, omwe akhambangingimira kuteweza bzinthu bzinango bza m’Cakutonga ca Mozeji pakufuna kukhazikisa cirungamo cawo, m’mbuto mwa cirungamo comwe ‘cimbabwera na cikhulupiro’ thangwe ra mpangano upsa. (2:15–3:14; 4:9, 10) Pa nkhani ya dzinza, ‘magwere ya ku Galatiya’ (1:2) yomwe mpostolo Paulo adayanembera yakhana Akristau wakusiyana-siyana. Winango akhali Ajuda ndipo winango akhali wanthu omwe akhali lini Ajuda. Pakati pa wanthu omwe akhali lini Ajudawo, pakhana wale omwe akhadatembenukira kucijuda acicitidwa m’gwatidwe, ndipo winango akhalibe kucitidwa m’gwatidwe, ndipo pinango winango wa iwo akhali wa dzinza la ci Setiki. (Mab 13:14, 43; 16:1; Wag 5:2) Wensenewo akhacemeredwa Agalata pakuti iwo akhakhala mu cigawo cakucemeredwa Galatiya. Bzomwe mpostolo Paulo adanemba m’tsambali, bzikulatiza kuti iye akhanembera Akristau omwe akhawadziwa bwino, kunyansi kwa cigawo ca Galatiya, sikuti kwa wanthu omwe akhawadziwa lini omwe akhakhala kudzulu kwa cigawoco, ndipo omwe akhanati kuwazungira kale.