Mareferensiya ya Kabukhu ka Mitsonkhano ka Moyo Wathu na Utumiki
1-7 ABRIL
CUMA CA M’FALA LA MULUNGU | 1 WAKOLINTO 7-9
“Kusaya Kulowola Ayai Kulowodwa ni Mphaso”
(1 Wakolinto 7:32) Kulewa cadidi, ndinkufuna kuti mukhale wakusaya thupo. Mwamuna wakusaya kulowola ambacita thupo na bzinthu bza Mbuya, momwe angakondwesere Iye.
(1 Wakolinto 7:33, 34) Koma mwamuna wakulowola ambacita thupo na bzinthu bza m’dziko, momwe angakondwesere mkazi wace. 34 Iye ambakhala wakugawanika. Ndipo mkazi omwe akanati kulowodwa na mkazi omwe ni dende, ambacita thupo na bzinthu bza Mbuya kuti akhale wakucena m’thupi mwace na mu mzimu. Tsono mkazi wakulowodwa ambacita thupo na bzinthu bza m’dziko, momwe angakondwesere mwamuna wace.
(1 Wakolinto 7:37, 38) Tsono penu winango watsimikiza mu mtima mwace, acileka kukhala na cakumunesa, acikwanisa kutonga mtima wace, ndipo wasankhula mu mtima mwace kupitiriza kukhala yekha, an’cita bwino. 38 Ndipo, ule omwe an’pita m’banja wacita bwino, tsono omwe aleke kupita m’banja wacitiratu bwino kwene-kwene.
w96 15/10 matsa. 12-13 ndi. 14
Kukhala Wakusaya Kulowola Ayai Kulowodwa ni Mpata Wakutumikira Mwakusaya Kuceukisidwa
14 Mkristau omwe alibe kulowola ayai kulowodwa omwe ambaphatisa basa ukhowa ayai umuse bwace na bzakulinga bza dyera ambacita lini bwino kuposa Akristau wakulowola ayai wakulowodwa. Iye ambapitiriza kusaya kupita m’banja sikuti ‘thangwe ra Umambo,’ koma thangwe ra bzikhumbo bzace. (Mateu 19:12) Mwamuna ayai mkazi omwe akanati kupita m’banja ‘ambacita thupo na bzinthu bza Mbuya,’ na ‘momwe angakondwesere Iye’ ndipo ambatumikira ‘Mbuya nthawe zense mwakusaya kuceukisidwa.’ Bzimwebzi bzimbathandauza kuti iwo ambacita utumiki mwakusaya kuceukisidwa pakutumikira Yahova na Jezu Kristu. Ni kokha mwa kucita bzimwebzi Akristau wakusaya kulowola ayai kulowodwa ‘ambacita bwino’ kuposa Akristau wakulowola ayai wakulowodwa.
Kufufudza Cuma Cauzimu
(1 Wakolinto 7:11) tsono penu angamusiye, apitirize kukhala wakusaya kulowodwa. Tsono penu an’kwanisa lini, abwererane na mwamuna waceyo. Mwamunambo aleke kusiya mkazi wace.
Momwe Bibliya Limbawonera Nkhani ya Kulambana na Kupumirana
Kodi Bibliya limbalewa kuti wanthu angalambane na thangwe liponi? Yahova ambawenga upombo na unzazi. (Ciyambo 39:9; 2 Samuweri 11:26, 27; Psalymo 51:4) Iye ambaipidwa kwene-kwene na upombo, ndipo munthu akacita upombo, limwero limbakhala thangwe lakubveka lakuti mwanzace alambane naye. Yahova ambapasa munthu wakusaya kuphonyayo ufulu bwakusankhula kulambana ayai kupitiriza kukhala pabodzi na mwanzace wa m’banja omwe wacita upomboyo. (Mateu 19:9) Tenepo, munthu wakusaya kuphonyayo akasankhula kulambana na mwanzaceyo, ankucita lini cinthu cakuipa.
Tsono, nthawe zinango munthu wakusaya kuphonyayo angasankhule kupitiriza kukhala na mwanzace omwe wacita upomboyo, maka-maka penu iye wakungula mwakucokera pansi pa mtima. Wanthu omwe ana thangwe lakulambana na mwanzawo mwakubverana na thangwe lakulewedwa m’Bibliya, iwo an’funika kucita kusankhula wokha bzomwe angacite, acibvumambo bzakutewera bzomwe bzingawoneke thangwe ra cakusankhula cawoco.—Wagalata 6:5.
Tsono, nthawe zinango bzinthu bzimbaneseratu, mwakuti Akristau winango ambasankhula kupumirana ayai kulambana na mwanzawo napo kuti mwanzawoyo alibe kucita upombo. Bzimwebzo bzikacitika, Bibliya limbalewa kuti munthu omwe ankusiya mwanzaceyo ‘apitirize kukhala wakusaya kulowola, [ayai wakusaya kulowodwa]. Tsono penu an’kwanisa lini, abwererane na mwamuna [ayai mkazi] waceyo.’ (1 Wakolinto 7:11) Mkristau omwe an’cita bzimwebzi, an’funika lini kunyang’ana mwamuna ayai mkazi munango kuti amange naye banja. (Mateu 5:32) Mbatiwoneni bzinthu bzomwe bzingacitise kuti munthu asankhule kupumirana na bayace ayai mkazace.
• Kusaya kusamalira banja. Banja lingabonere kwene-kwene, thangwe rakuti mwamuna ankusamalira lini mwa kuthupi banja lace, napo palibe comwe cingamutazise kucita bzimwebzo. Bibliya limbalewa kuti: ‘Penu munthu ambasamalira lini wanthu . . . wa m’banja lace, iye ambalamba cikhulupiro, ndipo ngwakuipa kuposa munthu omwe alibe cikhulupiro.’ (1 Timotio 5:8) Penu mwamunayo ankulamba kucinja, mkazi waceyo angasankhule kusiyana naye mwakubverana na malamulo ya boma kuti akhotcerere moyo wace na wa wana wace. Ndipo, mkazi akadandaula kuti bayace omwe ni Mkristau ankulamba kusamalira banja lace, akulu an’funika kuiwona bwino nkhaniyo. Munthu angacosedwe m’gwere akalamba kumbasamalira banja lace mwakuthupi.
• Ciwembo. Munthu wa ciwembo ambaboneresa mwanzace mwakuti angaikhe pa ngozi thanzi ayai moyo wa mwanzaceyo. Penu munthu omwe ambacita ciwemboyo ni Mkristau, akulu an’funika kuifufudza nkhaniyo kuti adziwe penu bziridi tenepoyo ayai nee. Munthu angacosedwe m’gwere akambacitira ciwembo anzace pabodzi na kumbacita bzinthu mwa ukali.—Wagalata 5:19-21.
• Kuletsa mwanzace kunamata Yahova. Nthawe zinango, munthu angatazise bzakutonga bza Mulungu. Bzimwebzi bzikambacitika, munthu omwe ankucitiridwa bzimwebzoyo angasankhule kupumirana na mwanzaceyo mwakubverana na malamulo ya boma kuti abvere ‘Mulungu ninga mtongi, kuposa wanthu.’—Mabasa 5:29.
(1 Wakolinto 7:36) Koma penu winango ankuwona kuti bzinkumunesa kupitiriza kukhala yekha ndipo penu wakula, ndipo bzikathemera kukhala tenepo, acite iye momwe ankufunira, iye ankuphonya lini, alowole ayai alowodwe.
8-14 ABRIL
CUMA CA M’FALA LA MULUNGU | 1 WAKOLINTO 10-13
“Yahova Ngwakukhulupirika”
(1 Wakolinto 10:13) Palibe mayezo yomwe yankubwererani kupambula yale yomwe yambagwera wanthu wense. Tsono Mulungu ngwakukhulupirika, ndipo iye si an’dzalekerera kuti muyezedwe mpaka pomwe mungakwanise lini kupirira, koma pabodzi na mayezoyo iye an’dzafungulambo njira yakupulumukira, kuti mukwanise kupirira.
(1 Wakolinto 10:13) Palibe mayezo yomwe yankubwererani kupambula yale yomwe yambagwera wanthu wense. Tsono Mulungu ngwakukhulupirika, ndipo iye si an’dzalekerera kuti muyezedwe mpaka pomwe mungakwanise lini kupirira, koma pabodzi na mayezoyo iye an’dzafungulambo njira yakupulumukira, kuti mukwanise kupirira.
(1 Wakolinto 10:13) Palibe mayezo yomwe yankubwererani kupambula yale yomwe yambagwera wanthu wense. Tsono Mulungu ngwakukhulupirika, ndipo iye si an’dzalekerera kuti muyezedwe mpaka pomwe mungakwanise lini kupirira, koma pabodzi na mayezoyo iye an’dzafungulambo njira yakupulumukira, kuti mukwanise kupirira.
Kufufudza Cuma Cauzimu
(1 Wakolinto 10:8) Ndipo tirekembo kucita unzazi, ninga momwe winango adacitira bza unzazibzo, acifa wanthu 23.000 pa nsiku ibodzi yokha.
(1 Wakolinto 11:5, 6) tsono mkazi ali-wense omwe an’pemba ayai an’lewa polofesiya mwakusaya kubvala cinthu mu msolo, an’citisa manyazi msolo wace, pakuti mpsibodzi-bodzi na kusenga mpala. 6 Thangwe mkaziyo akasaya kubvala cinthu mu msolo, an’funika kusenga mpala; tsono penu mpsakucitisa manyazi kuti mkazi agwate kwene-kwene tsisi lace ayai kusenga mpala, iye an’funika kubvala cinthu mu msolo.
(1 Wakolinto 11:10) Mkazi an’funika kukhala na cizindikiro ca utongi bwace mu msolo thangwe ra wanjo.
22-28 ABRIL
CUMA CA M’FALA LA MULUNGU | 1 WAKOLINTO 14-16
“Mulungu An’dzakhala ‘Bzinthu Bzense kwa Wensene’ ”
(1 Wakolinto 15:24, 25) Pakumalizira, iye an’dzabwezera umambo kwa Baba wace Mulungu, ndipo an’dzakhala atacosa umambo bwense na utongi na mphanvu zense. 25 Pakuti bzin’funika kuti iye atonge mpaka Mulungu ataikha anyamadulanthaka wense pansi pa minyendo yace.
w98 1/7 tsa. 21 ndi. 10
‘Infa In’dzapfudzidwa’
10 ‘Cimaliziro’ ni cimaliziro ca Utongi bwa Kristu bwa magole 1.000, pomwe Jezu mwakubzicepsa na mwakukhulupirika an’dzapereka Umambo kwa Mulungu Baba wace. (Cibvumbuluso 20:4) Cakulinga ca Mulungu ca ‘kukonkhanisa pomwe bzinthu bzense pabodzi mwa Kristu’ cin’dzakwanisika. (Wayefezo 1:9, 10) Koma cakutoma Kristu an’dzapfudza ‘umambo bwense na utongi na mphanvu zense’, bzomwe bzimbatsutsana na kufuna kwa Mulungu na utongi bwace. Bzimwebzi bzin’dzaphatanidza bzizinji, sikuti kundopfudza wanthu pa Armagedo kokha. (Cibvumbulutso 16:16; 19:11-21) Paulo adati: ‘Bzin’funika kuti [Kristu] atonge mpaka Mulungu ataikha anyamadulanthaka wense pansi pa minyendo yace. Infa, yomwe ni nyamadulanthaka wakumalizira, in’dzapfudzidwa.’ (1 Wakolinto 15:25, 26) Inde, bzakusalira bzense bza pikado ya Adamu na infa bzin’dzakhala bzacosedwa. Tenepo comwe cin’dzakhala cakufunika n’cakuti Mulungu an’dzasiya ‘thenje lacikumbuso’ lakusaya wanthu mwa kumusa wanthu wensewo.—Juwau 5:28.
(1 Wakolinto 15:26) Infa, yomwe ni nyamadulanthaka wakumalizira, in’dzapfudzidwa.
(1 Wakolinto 15:27, 28) Pakuti Mulungu “adaikha bzinthu bzense pansi pa nzayo zace.” Tsono pomwe ankulewa kuti ‘aikha bzinthu bzense pansi pace,’ mpsakudziwikiratu kuti bzimwebzi bzinkuphatanidza lini Ule omwe adaikha bzinthu bzense pansi paceyo. 28 Tsono bzinthu bzense bzikadzakhala pansi pace, mwanayo an’dzabziikhambo pansi pa womwe adaikha bzinthu bzense pansi pace, kuti Mulungu akhale bzinthu bzense kwa wensene.
Kufufudza Cuma Cauzimu
(1 Wakolinto 14:34, 35) akazi akhale cete m’magwere, pakuti mpsakubvumizidwa lini kuti iwo ambalalewe, koma ambabvere, ninga momwe Cakutonga cimbalewera. 35 Iwo akufuna kubvesesa cinthu cinango, akabvunze amuna wawo kumui, pakuti mpsakupasa manyazi kuti mkazi ambalewelewe m’gwere.
(1 Wakolinto 15:53) Pakuti comwe cingadzongekeci cin’dzabvala cakusaya kudzongeka, ndipo comwe cingafeci cin’dzabvala cakusaya kufa.
it-1 matsa. 1197-1198
Thupi Lakusaya Kudzongeka
Mwakuphatana na Kristu na kulamusidwa ninga momwe iye adacitira, anzace omwe an’dzatonga naye, an’dzandolini kutambira moyo wakusaya kumala ninga bzakulengedwa bzauzimu, koma moyo wakusaya kufa na thupi lomwe limbadzongeka lini. Pa kutumikira mwakukhulupirika na kufa na thupi lomwe limbadzongeka, iwo ambatambira mathupi yauzimu yakusaya kudzongeka ninga momwe Paulo adalewera pa 1 Wakolinto 15:42-54. Ndipo nfundo yakuti lin’dzadzongeka lini imbalewa bza thupi lomwe Mulungu ambawapasa, lomwe lingadzongeke lini, lingabvunde lini ne lingapheke lini. Mulungu ambawapasa moyo omwe umbathemba lini bzinthu bza cirengedwe ninga momwe bzakulengedwa bzinango bza thupi la nyama na thupi lauzimu bzimbafunikira. Bzimwebzi bzimbalatiziratu kuti Yahova ambawakhulupira kwene-kwene wanthu amwewa. Kukhala na moyo wakubziimira pawokha bzimbathandauza lini kuti Mulungu anisiya kuwanyang’anira. Ninga Jezu Kristu Msolo wawo, iwo ambapitiriza kubvera na kuteweza malango yense ya Baba wawo.—1 Wak 15:23-28; Onani imortalidade; alma.
29 ABRIL–5 MAIO
CUMA CA M’FALA LA MULUNGU | 2 WAKOLINTO 1-3
“Yahova ni ‘Mulungu wa Mtsangalazo Wense’ ”
(2 Wakolinto 1:3) Atumbizidwe Mulungu na Baba wa Mbuya wathu Jezu Kristu, Baba wa nsisi zikulu na Mulungu wa mtsangalazo wense,
‘Lirani na Omwe Ankulira’
4 Baba wathu wa lufoyi adasunamambo kwene-kwene thangwe ra infa ya atumiki wace ninga, Abalahamu, Izaki, Djakobi, Mozeji na Mambo Davide. (Mirewengo 12:6-8; Mateu 22:31, 32; Mabasa 13:22) Bibliya limbafotokoza kuti Yahova ankudikhira na mtima wense nthawe yomwe iye an’dzalamusa atumiki wace wakukhulupirikawa. (Djobi 14:14, 15) Pa nthaweyo, iwo an’dzakondwa na moyo wa thanzi. Yahova adawawidwa kwene-kwene na infa ya Mwana wace wakuyamba kubadwa. Bibliya limbalewa kuti Mulungu ‘akhambakondwa kwene-kwene’ na Jezu. (Mimwani 8:22, 30) Kumbukirani msunamo omwe Yahova akhanawo pomwe adawona mwana wace ankufa na infa yakuwawa.—Juwau 5:20; 10:17.
(2 Wakolinto 1:4) omwe ambatitsangalaza pa matsautso yathu yense, kuti tikwanise kutsangalazambo winango omwe ali pa matsautso ya mtundu uli-wense thangwe ife tatsangalazidwa na Mulungu.
14 Bzingakhale bzakunesa kudziwa bzomwe tingalewe kuna munthu omwe ankuwawidwa thangwe ra kufedwa. Koma Bibliya limbalewa kuti: ‘Lirime la wanthu wanzeru limbalimbisa.’ (Mimwani 12:18) Azinji ambagumana mafala ya mtsangalazo kuti athandize winango mu broxura lakuti Pamene Munthu Amene Mumakonda Amwalira. Kawiri-kawiri, cinthu comwe mungafunike kucita ni ‘kulira na omwe ankulira.’ (Waroma 12:15) Gaby, omwe adafedwa mwamuna wace, adalewa kuti njira ibodzi yomwe ambaiphatisa basa kuti alatize momwe ankubvera nthawe zinango ni kulira. Iye adati: “Ndimbatsangalazidwa kwene-kwene axamwali wangu akambalira nane pabodzi. Pa nthawe imweyi, ndimbabzibva kuti ndiri lini ndekha pa bvuto langulo.”
Kufufudza Cuma Cauzimu
(2 Wakolinto 1:22) Iye watinemba cizindikiro ndipo watipasa citsimikizo ca bzomwe bzinkubwera mtsogolo bzomwe ni mzimu omwe uli m’mitima mwathu.
Mibvunzo Yakucokera Kwa Anyakuwerenga
Kodi ni ‘cizindikiro’ na ‘citsimikizo’ ciponi comwe m’Kristau ali-wense wakudzozedwa ambatambira kucokera kwa Mulungu?—2 Wak. 1:21, 22.
▪ Cizindikiro: Mwakubverana na bukhu linango, mu cigirego fala lakuti ‘cizindikiro’ pa 2 Wakolinto 1:22 yakhali mafala ya “malamulo na mtemo munango” yomwe yambathandauza “mbali yakuyamba, malipo, piciro, bzomwe bzimbalipira mbali ya mtengo wakugulira pomwe pakana nthawe, tenepo mumbatsimikiza mtemo wa nkhaniyo ayai kucita mpangano wakubveka.” Kwa anyakudzozedwa malipo ayai bzisimbo bzidanembedwa pa 2 Wakolinto 5:1-5 bzimbaphatanidza thupi lakusaya kupswipizidwa lakudzulu. Bzisimbobzo bzimbaphatanidzambo kutambira mphaso ya moyo wakusaya kufa.—1 Wak. 15:48-54.
Mu cigirego, fala lakundendemera na limweri limbaphatisidwa basa pakulewa bza mphete ya malowozi. Limweri ni there cairo kwa wale omwe an’dzakhala mbali ya mkazi wakuyezezera wa Kristu.—2 Wak. 11:2; Cibv. 21:2, 9.
▪ Citsimikizo: Mu nthawe ya m’mbuyo, citsimikizo cikhaphatisidwa basa ninga assinatura kuti atsimikizire kuti n’cacedi, n’cacadidi ayai ciphatano. Kwa anyakudzozedwa, bziri ninga “bzakufungidwa,” ayai cizindikiro, mwakuyezezera na mzimu wakucena ninga wanthu wa Mulungu. Citsimikizoci ciribe kukonzedwa kuti n’cakukhaliratu, koma mpaka pa nthawe yomwe wanthu anifa ali wakukhulupirika ayai cikanati kufika citsautso cikulu.—Wayef. 4:30; Cibv. 7:2-4.
(2 Wakolinto 2:14-16) Koma atendedwe Mulungu, omwe nthawe zense pabodzi na Kristu ambatitsogolera pa kufamba lonkho-lonkho wakusekerera kukunda, omwe mwa ife ambacitisa kuti pfungo lakununcira bwino la cidziwiso cace liyenderere kuli kwense. 15 Thangwe kwa Mulungu ifepano ndife mnunci wabwino wa Kristu, pakati pa wale omwe ankupulumusidwa na pakati pa wale omwe ankuyenda kukapfudzidwa; 16 kwa omwe ankuyenda kukapfudzidwawa, ifepano ndife pfungo la infa lakuyendesa ku infa; tsono kwa omwe akuyenda kukapulumukawo ndife mnunci wa moyo wakuyendesa ku moyo. Ndipo mbani omwe adathemera kuphata basa limweri?