Mareferensiya ya Kabukhu ka Mitsonkhano ka Moyo Wathu na Utumiki
4-10 MARÇO
CUMA CA M’FALA LA MULUNGU | WAROMA 12-14
“Kodi Kulatiza Lufoyi Lacikristau Kumbathandauza Ciyani?”
(Waroma 12:10) Pakufuna abale, khalani na lufoyi cairo pakati panu. Pakulatizana ulemu, khalani patsogolo.
it-1 tsa. 55
Lufoyi cairo
Kufuna abale (Gr., phi·la·del·phiʹa, mafala yace caiyo, “lufoyi kwa m’bale”) kun’funika kumbagumanika pakati pa abale wense wa m’gwere lacikristau. (War 12:10; Waheb 13:1; onanimbo 1Pe 3:8.) Mbverano wa abale wa m’gwere un’funika kukhala wakulimba kwene-kwene, ninga momwe bzimbakhala na wanthu wa m’banja libodzi. Napo abale m’gwere ambafunana kale, iwo ankulimbisidwa kuti ambalatize lufoyi mwakukwanira.—1Wat 4:9, 10.
Fala lacigirego lakuti phi·loʹstor·gos, lomwe limbathandauza kuti “kukhala na lufoyi cairo,” limbaphatisidwa basa pakulewa bza munthu omwe ambabverana kwene-kwene na munthu unango. Ndipo falali lacokera ku fala linango lacigirego lakuti sterʹgo, ndipo iro limbaphatisidwa basa pakulewa bza lufoyi la wanthu wa m’banja libodzi. Mpostolo Paulo adalimbisa Akristau kuti akulise khalidweri. (War 12:10) Ndipo iye adalatizambo kuti mu nsiku zakumalizira wanthu angadadzakhala ‘wakusaya kufuna abale wawo,’ (Gr., aʹstor·goi) ndipo wanthuwo akhathemera kufa.—2Tim 3:3; War 1:31, 32.
(Waroma 12:17-19) Lekani kubwezera cakuipa na cakuipa. Citani bzomwe wanthu wense wambabziwona kuti n’bzabwino. 18 Bzikakwanisika, khalani mwa mtendere na wanthu wense. 19 Wakufunidwamwe, lekani kumbabwezera cakuipa, koma pasani mpata ukali bwa Mulungu, pakuti bzidanembedwa kuti: “Kubwezera n’kwangu; ndin’dzabwezera ndinepano, walewa bzimwebzo Yahova.”
(Waroma 12:20, 21) Tsono, “penu nyamadulanthaka wako ana njala, mupase cakudya, ndipo, penu ana nyota, mupase cakumwa. Pakuti mwa kucita bzimwebzi, un’dzamugwezekera masimbe ya moto pa msolo pace.” 21 Lekani kubvuma kukundidwa na cakuipa, koma pitirizani kukunda cakuipa mwa kucita cabwino.
Kufufudza Cuma Cauzimu
(Waroma 12:1) Tenepo ndinkukudandaulirani abale, mwa nsisi za Mulungu, kuti mupereke mathupi yanu ninga nsembe ya moyo, yakucena na yakubvumika kwa Mulungu, yomwe ni utumiki bwakupambulika mwa kuphatisira basa mphanvu zanu zakukumbuka.
Momwe Tingasankhulire Bzinthu Bzabwino Kuti Tisenzeke Nabzo
Bzense bzomwe timbacita pa moyo wathu bzimbatokonya kunamata kwathu Yahova. Paulo adanembera tsamba Akristau wa ku Roma, aciphatisa basa fala lamphanvu pakufuna kubvekesa nfundo imweyi. Iye adawacenjeza kuti: ‘Mupereke mathupi yanu ninga nsembe ya moyo, yakucena na yakubvumika kwa Mulungu, yomwe ni utumiki bwakupambulika mwa kuphatisira basa mphanvu zanu zakukumbuka.’ (Waroma 12:1) Thupi lathu limbaphatanidza nzeru zathu, mtima wathu, na mphanvu zathu. Bzensenebzi timbabziphatisa basa pa kutumikira Mulungu. (Marko 12:30) Paulo adalewa kuti kutumikira Mulungu na moyo wathu wense kuli ninga nsembe. Fala lakuti ‘nsembe,’ lina cenjezo lakubisika. Mu Cakutonga ca Mozeji, Mulungu akhalamba nsembe ya bzifuwo bzakupunduka. (Mwambo 22:18-20) Mwakundendemera na bzimwebzi, nsembe yauzimu ya Mkristau ikapswipizidwa mwa mtundu uli-wense, Mulungu an’dzailamba. Kodi bzimwebzi bzingacitike tani?
Paulo adauza Akristau wa ku Roma kuti aleke kumbapereka thupi lawo ku pikado. Ndipo adawauzambo kuti aphe bzicito bza thupi lawo. (Waroma 6:12-14; 8:13) Kumayambiriro kwa tsamba laceri, Paulo adapereka bziratizo bza ‘bzicito bza thupi.’ Pakulewa bza wanthu wa pikado, iye adati: ‘Pa miromo pawo pana ululu bwa nyoka.’ ‘Minyendo yawo imbathamangira kucosa mulopa anzawo.’ ‘M’maso mwawo mulibe mantha na Mulungu.’ (Waroma 3:13-18) Mkristau angabzipswipize mwakuphatisa basa ‘bziwalo’ bza thupi lace kuti acite pikado zimwezi. Mwa ciratizo, Mkristau akambawona bzinthu bza maika ayai mavidiyo ya ciwembo, iye ankucita pikado na maso yace, acipswipiza thupi lace lense. Nsembe iri-yense yomwe iye angapereke kwa Mulungu, imbabvumidwa lini na iye. (Bzakutonga 15:21; 1 Pedru 1:14-16; 2 Pedru 3:11) Bzimwebzi ndibzo bzomwe bzingacitikire munthu omwe ambasenzeka na bzinthu bzakuipa!
(Waroma 13:1) Munthu ali-wense ambabvere atongi akulu-akulu, thangwe palibe utongi bomwe bulipo kusiya bomwe Mulungu wabvumiza kuti buwoneke. Mautongi yomwe yalipoya, yalipo m’mbuto zawo zakusiyana-siyana mwakucita kubvumizidwa na Mulungu.
11-17 MARÇO
CUMA CA M’FALA LA MULUNGU | WAROMA 15-16
“Lingani Yahova Kuti Mupirire na Kutsangalazidwa”
(Waroma 15:4) Pakuti bzinthu bzense bzomwe bzidanembedwa, bzidanembedwa kuti bzitipfunzise, kuti mwa kupirira kwathu pabodzi na mtsangalazo wa Bzakunembedwabzo, ifepano tikhale na cidikhiro.
‘Lirani na Omwe Ankulira’
Nkhani ya kuwawidwa komwe Jezu adabva thangwe ra kufa kwa Lazaro ni ibodzi mwa nkhani zakutsangalaza zomwe zimbagumanika m’Bibliya. Bzimwebzi bzimbatidabwisa lini, thangwe ‘bzinthu bzense bzomwe bzidanembedwa, bzidanembedwa kuti bzitipfunzise, kuti mwa kupirira kwathu pabodzi na mtsangalazo wa Bzakunembedwabzo, ifepano tikhale na cidikhiro.’ (Waroma 15:4) Penu imwepo munkusunama thangwe ra kufedwa, mungagumanembo mtsangalazo na mavesi yakuteweraya:
▪ ‘Yahova ali pafupi na wale omwe adasweka mtima; iye ambapulumusa wale omwe atepa.’—Psal 34:18, 19.
▪ ‘Pomwe makumbukidwe yakundiboneresa yadadzala m’mtima mwangu, mafala yanu [Yahova] yakunditsangalaza yadakondwesa moyo wangu.’—Psal 94:19.
▪ ‘Mbuya wathu, Jezu Kristu caiyeyo na Mulungu Baba wathu, omwe adatifuna na kutipasa mtsangalazo wakusaya kumala na cidikhiro cabwino mwa kudeka mtima kukulu, atsangalaze mitima yanu ndipo akulimbiseni.’—2 Wat 2:16, 17.
(Waroma 15:5) Tsapano, Mulungu omwe ambapereka mphanvu ya kupirira na mtsangalazo, akupasenimbo makumbukidwe mabodzi-bodzi na yomwe Jezu akhanayo,
‘Lekani Kuti Kupirira Kumalizise Basa Lace’
Kumbirani Yahova kuti akulimbiseni. Yahova ni ‘Mulungu omwe ambapereka mphanvu ya kupirira na mtsangalazo.’ (War. 15:5) Iye ambabvesesa bwino sikuti kokha mabvuto yomwe timbagumana nayo, koma cikhalidwe cathu, makumbukidwe yathu, mpaka na kaumbidwe kathu. Tenepo, iye ngwabwino kwene-kwene pakutithandiza kuti tipirire. Bibliya limbalewa kuti: ‘Iye an’dzacita bzakukhumba bza wale womwe wambamugopa; Iye an’dzabva kukuwa kwawo kwakukumbira thandizo ndipo an’dzawapulumusa.’ (Psal. 145:19) Kodi Mulungu an’dzatawira tani mipembo yathu kuti atilimbise kuti tipirire?
(Waroma 15:13) Mulungu omwe ambapasa cidikhiro, akudzazeni na cikondweso cense pabodzi na mtendere thangwe ra kumukhulupira kwanu, kuti imwepo mukhale na cidikhiro mwa mphanvu ya mzimu wakucena.
Kufufudza Cuma Cauzimu
(Waroma 15:27) Inde, iwo acita bzimwebzo na mtima wense, ndipo wanthu wa mitunduwo akhanawodi mangawa; pakuti penu wanthu wa mitunduwo adatambira bzinthu bzauzimu bza anyakucenawo, iwombo anabo udindo bwa kuwatumikira na bzinthu bzawo bzakuthupi.
w89 1/12 tsa. 24 ndi. 3
‘Lufoyi Lanu Ndacadidi’
Mwakusaya kupenukira, abale wawo omwe akhali wanthu wa mitundu inango adabzibva kuti akhafunikira kuwathandiza. Kuthumizira bzimwebzi, iwo akhana “mangawa” na Akristau omwe akhakhala ku Jeruzalemu. Kodi bzipsa bzabwino bziribe kucokera ku Jeruzalemu kuti bzifikire wanthu wa mitundu inango? Ndipopa mpostolo Paulo adalewa kuti: ‘Inde, iwo acita bzimwebzo na mtima wense, ndipo wanthu wa mitunduwo akhanawodi mangawa; pakuti penu wanthu wa mitunduwo adatambira bzinthu bzauzimu bza anyakucenawo, iwombo anabo udindo bwa kuwatumikira na bzinthu bzawo bzakuthupi.’—Waroma 15:27.
(Waroma 16:25) Kwa Ule omwe angakupaseni mphanvu mwakubverana na bzipsa bzabwino bzomwe ine ndinkudziwisa, pabodzi na kupaliziridwa kwa bzipsa bzabwino pakulewa bza Jezu Kristu, mwakubverana na kuzimbulidwa kwa cinsinsi cakupambulika comwe cidakoyedwa mwa cinsinsi kuyambira kale-kale
it-1 tsa. 858 ndi. 5
Kudziwiratu, Kukhazikisiratu
Mesiya, ayai Kristu, angadadzakhala Mbeu yakupiciridwa, ndipo wanthu wakulungama wa mitundu yense ya pa dziko la pansi angadadzasimbidwa mwa iye. (Wag 3:8, 14) ‘Mbeu’ imweyi idayamba kugumidwa pambuyo pa kupanduka kwa Adamu na Eva mu Edeni, pomwe Abeli akhanati kubadwa. (Ciy 3:15) Bzimwebzi bzidacitika magole 4.000 m’mbuyomo pomwe ‘cinsinsi cakupambulika’ ca kuwonekera kwa ‘mbeu’ yaumesiya cikhanati kuzimbulidwa. Tenepo, ‘bzimwebzi bziribe kuzimbulidwa kwa nthawe itali.’—War 16:25-27; Wayef 1:8-10; 3:4-11.
18-24 MARÇO
CUMA CA M’FALA LA MULUNGU | 1 WAKOLINTO 1-3
“Kodi Imwepo Ndimwe Munthu Wakuthupi Ayai Wauzimu?”
(1 Wakolinto 2:14) Tsono munthu wakuthupi, ambabvuma lini bzinthu bza mzimu wa Mulungu, pakuti iye ambabziwona ninga upsiru; ndipo iye angakwanise lini kubzidziwa, pakuti ibzo bzimbafufudzidwa mwauzimu.
Kodi Kukhala Munthu Wauzimu Kumbathandauza Ciyani?
Kodi munthu wakuthupi ambakumbuka ciyani? Munthu wakuthupi ambafunisisa kuteweza khalidwe la dziko, ndipo iye ambaikha bzikhumbo bzace pa mbuto yakuyamba. Paulo adafotokoza kuti khalidweri liri ninga ‘mphuwe yomwe tsapano inkuphata basa kwa wana wakusaya kubvera.’ (Wayefezo 2:2) Khalidwe limweri limbacitisa wanthu azinji kutewezera wanthu wa ku dzikoku. Iwo ambandocita bzinthu bzomwe bzimbawadekera, ndipo ambakhala alibe basa na mitemo ya Mulungu. Munthu wakuthupi ayai wa makumbukidwe yakuthupi, ambandokumbukira bzinthu bzakuthupi ndipo kawiri-kawiri ambawona udindo bwace, kobiri, ayai bzakufuna bzace kukhala bzakufunika kwene-kwene kuposa cinthu ciri-cense.
Munthu wakuthupi, kawiri-kawiri ambacita bzinthu bzomwe Bibliya limbalewa kuti ni ‘mabasa ya thupi.’ (Wagalata 5:19-21) Mu tsamba lakuyamba lomwe Paulo adanembera Akristau wa ku Kolinto, iye adafotokoza bzinthu bzinango bzomwe munthu wakuthupi ambacita. Iye adalewa kuti munthu wakuthupi ambayambisa migawano, ambacitisa wanthu kusaya kubverana, ambalimbisa winango kupanduka, ambayendesa anzace ku nyumba ya mphala, ambalemekeza lini omwe ankutsogolera ndipo ambawona kudya na kumwa kukhala bzinthu bzakufunika kwene-kwene pa moyo wace. Munthu wakuthupi ambaneseka kupirira akayezedwa kucita bzinthu bzakuipa. (Mimwani 7:21, 22) Ndipo Juda adalewa kuti munthu wakuthupi angafike pakuluza mzimu wa Yahova.—Juda 18, 19.
(1 Wakolinto 2:15, 16) Tsono munthu wauzimu ambafufudza bzinthu bzense, koma iye ambafufudzidwa lini na munthu ali-wense. 16 Pakuti “mbani adafika pakuyadziwa makumbukidwe ya Yahova kuti amupfunzise?” Koma ife tina makumbukidwe ya Kristu.
Kodi Kukhala Munthu Wauzimu Kumbathandauza Ciyani?
Mwakusiyana na munthu wakuthupi, munthu wauzimu ambawona uxamwali bwace na Mulungu kukhala bwakufunika kwene-kwene. Iye ambabvuma kutsogoleredwa na mzimu wakucena wa Mulungu ndipo ambacita nyongo ya kutewezera Yahova. (Wayefezo 5:1) Iye ambacita nyongo yakupfunza makumbukidwe ya Yahova na kuwona bzinthu ninga momwe Yahovayo ambabziwonera. Ndipo ambawona Mulungu kukhala mwanzace caiye. Mwakusiyana na munthu wakuthupi, munthu wauzimu ambalemekeza mitemo ya Yahova pa mbali zense za moyo wace. (Psalymo 119:33; 143:10) Iye ambacita lini ‘mabasa ya thupi’ koma ambakulisa ‘cisapo ca mzimu.’ (Wagalata 5:22, 23) Kuti tibvesese thandauzo la kukhala munthu wa makumbukidwe yauzimu, mbatikumbukireni nfundo iyi: Munthu omwe wazolowera kucita malonda, kawiri-kawiri timbalewa kuti malondayo yam’pita m’thupi, ndipo munthu omwe ambafuna kwene-kwene bza kunamata Mulungu timbalewa kuti ngwauzimu.
Kodi Kukhala Munthu Wauzimu Kumbathandauza Ciyani?
Kodi tingatewezere tani Kristu? Pa 1 Wakolinto 2:16 pambalewa kuti tin’funika kukhala na ‘makumbukidwe ya Kristu.’ Ndipo pa Waroma 15:5 pambatiuza kuti tin’funika kukhala na ‘makumbukidwe mabodzi-bodzi na yomwe Jezu akhanayo.’ Kuti tikhale ninga Kristu, tin’funika kumbakumbuka, kumbabvera nsisi winango na kumbacita bzinthu ninga momwe iye akhacitira. Jezu akhawona uxamwali bwace na Mulungu kukhala bwakufunika kwene-kwene kuposa cinthu ciri-cense. Tenepo, kutewezera Jezu kungaticitise kutewezerambo Yahova. Ndipopa mpsakufunika kwene-kwene kumbakumbuka ninga momwe Jezu akhakumbukira.
Kufufudza Cuma Cauzimu
(1 Wakolinto 1:20) Kodi ali kuponi nyanzeru? Kodi ali kuponi mnembi? Kodi ali kuponi mdziwi nyakutsutsa wa mkonzedwe uno wa bzinthu? Kodi Mulungu alibe kusandusa nzeru ya dzikoli kukhala yapezi-pezi?
it-2 tsa. 1193 ndi. 1
Nzeru
Ndipopa dziko mu nzeru zace, lidalamba makonzedwe ya Mulungu mwa Kristu Jezu, liciyawona ninga upsiru; ndipo atongi wace, napo pinango akhali anyakunyang’anira waluso na ayeruzi wanzeru, adafika pakupha ‘Mbuya wakulemekezeka.’ (1Wak 1:18; 2:7, 8) Koma Mulungu adalatiza kuti nzeru za adziwi wa m’dzikoli n’zapezi-pezi, ndipo adapasa manyazi adziwi wawo mwakuphatisa basa cinthu comwe iwo akhambaciyesa ‘cinthu capezi-pezi ca Mulungu,’ pabodzi na wanthu omwe iwo ‘akhambawayesa wakusaya nzeru, wakusaya mphamvu, na wakunyozeka’ kuti akwanirise cakulinga cace comwe cimbakundidwa lini. (1Wak 1:19-28) Koma Paulo adakumbusa Akristau wa ku Kolinto kuti ‘nzeru za nthawe ino’ na ‘nzeru za atongi wa nsiku zino’ zingadadzamala; tenepo, nzeru imweyi ikhacita lini mbali ya mafala yomwe iye akhayapalizira. (1Wak 2:6, 13) Iye adacenjeza Akristau wa ku Koloso kuti asamale na ‘makumbukidwe ya wanthu na mapumpso, mwakubverana na miyambo ya wanthu.’—Wakol 2:8; ndendemezerani na vesi 20-23.
(1 Wakolinto 2:3-5) Tenepo inepano ndidabwera kuna imwepo ndiri wakutepa na wa mantha, ndipo ndikhatetemera kwene-kwene; 4 pakulewalewa na pakupalizira, mafala yangu yakhali lini yakukwewa, ne yakulatiza nzeru, koma yakhali yakuwonesa mzimu na mphanvu, 5 kuti cikhulupiro canu cireke kucokera pa nzeru za wanthu, koma pa nzeru za Mulungu.
25-31 MARÇO
CUMA CA M’FALA LA MULUNGU | 1 WAKOLINTO 4-6
“Cakufufumisa Cing’ono-ng’ono Cimbafufumisa Mtanda Wense wa Cakudya”
(1 Wakolinto 5:1, 2) Mbiri yabveka kuti pakati panu pankucitika unzazi, unzazi bomwe wanthu wa kudziko ambabucita lini: Bzinkubveka kuti mwamuna munango watenga mkazi wa pai wace. 2 Kodi imwepo munkusamwa thangwe ra nkhani imweyi? Kodi mukhafunika lini kusunama, kuti munthu omwe wacita bzimwebzoyo acosedwe pakati panu?
(1 Wakolinto 5:5-8) muperekeni munthu umweyo kwa Sathani kuti thupiro lipfudzidwe, na cakulinga cakuti mzimu upulumusidwe pa nsiku ya Mbuya. 6 Thangwe lomwe munkusamwira ndabwino lini. Kodi mun’dziwa lini kuti cakufufumisa cing’ono-ng’ono cimbafufumisa mtanda wense wa cakudya? 7 Cosani cakufufumisa cakaleco kuti mukhale mtanda upsa wakusaya cakufufumisa ninga momwe muliri. Pakuti Kristu, bira wathu wa Paskwa adaperekedwa kale ninga nsembe. 8 Tenepo, bwerani ticite cikondwesoci, sikuti na cakufufumisa cakale, ne na cakufufumisa ca bzakuipa, koma na mikate yakusaya cakufufumisa yakuimira kukhulupirika na cadidi.
(1 Wakolinto 5:13) pomwe Mulungu ambayeruza wanthu wakunja? “Mucoseni nyakuipayo pakati panu.”
it-2 tsa. 230
Cakufufumisa
Mpostolo Paulo adaphatisa basa ciratizo cibodzi-bodzici pomwe adauza gwere lacikristau la ku Kolinto kuti licose mwamuna munango omwe akhacita unzazi. Iye adalewa kuti: ‘Kodi mun’dziwa lini kuti cakufufumisa cing’ono-ng’ono cimbafufumisa mtanda wense wa cakudya? Cosani cakufufumisa cakaleco kuti mukhale mtanda upsa wakusaya cakufufumisa ninga momwe muliri. Pakuti Kristu, bira wathu wa Paskwa adaperekedwa kale ninga nsembe.’ Paulo adafotokoza bzomwe akhafuna kulewa pomwe adaphatisa basa fala lakuti ‘cakufufumisa.’ Iye adati: ‘Tenepo, bwerani ticite cikondwesoci, sikuti na cakufufumisa cakale, ne na cakufufumisa ca bzakuipa, koma na mikate yakusaya cakufufumisa yakuimira kukhulupirika na cadidi.’ (1Wak 5:6-8) Mpostolo Paulo adalewa mafalaya acimbandendemezera na Cikondweso ca Mikate Yakusaya Cakufufumisa comwe cikhambacitika pambuyo pa Paskwa. Pakuti ninga momwe cakufufumisa cing’ono-ng’ono cimbafufumisira mtanda wense wa cakudya, gwere lense lingadakhalambo lakupswipa pamaso pa Yahova, lingadaleka kucosa munthu wa unzaziyo. Iwo akhafunika kucoseratu munthu omwe akhali ninga ‘cakufufumisayo,’ ninga momwe Ajirayeri akhafunikira lini kukhala na cakufufumisa m’manyumba mwawo, pomwe akhacita Cikondweso ca Mikate Yakusaya Cakufufumisa.
it-2 matsa. 869-870
Sathani
Kodi mafala yakuti ‘muperekeni munthu umweyo kwa Sathani kuti thupiro lipfudzidwe’ yambathandauza ciyani?
Mposotolo Paulo adapereka malango ya momwe gwere la ku Kolinto likhafunika kucitira na munthu omwe akhacita bza unzazi na mkazi wa pai wace. Iye adanemba kuti: ‘Muperekeni munthu umweyo kwa Sathani kuti thupiro lipfudzidwe.’ (1Wak 5:5) Iye adauza Akristau wa ku Kolintowo kuti akhafunika kucosa munthuyo m’gwere, acisiyambo kubverana naye pa cinthu ciri-cense. (1Wak 5:13) Kupereka munthuyo kwa Sathani kungadamucitisa kukhala kunja kwa gwere, acikhala ku mbali ya dziko lomwe mulungu na mtongi wace ni Sathani. Ninga ‘cakufufumisa cing’ono-ng’ono’ comwe cingafufumise ‘mtanda wense wa cakudya,’ munthu wa unzaziyo akhacita bzinthu mwakuthupi pakati pa gwere; ndipopa kumucosa m’gwere lomwe limbacita bzinthu bzauzimu kungadapfudza ‘thupi’ pakati pa gwerelo. (1Wak 5:6, 7) Mpostolo Paulo adacitambo bzimwebzi mwa kupereka Himeneu na Alexandre kwa Sathani, pakuti iwo akhadasiya kukhala na cikhulupiro na cikumbu-mtima cabwino, ndipo cikhulupiro cawo cidasweka ninga ngalawa.—1Tim 1:20.
(1 Wakolinto 5:9-11) Inepano ndidakunemberani mu tsamba langu kuti muleke kubverana na wanthu wa unzazi, 10 ndinkuthandauza lini kuti mulekeretu kubverana na wanthu wa unzazi wa m’dzikoli, ayai waumbombo na wakupamba ne anyakunamata bzifanikiso. Bzingadakhala tenepoyo, bzingadafunika kuti mucokeretu pa dziko la pansi. 11 Koma tsapano ndinkukunemberani kuti muleke kubverana na ali-wense wakucemeredwa m’bale omwe ngwaunzazi, waumbombo, wakunamata bzifanikiso, wakutukana, cidakwa ne nyakupamba, ndipo napo kudya naye munthu umweyo bzin’funika lini.
Bzomwe Tin’funika Kucita na Munthu Wakucosedwa
Kodi tin’funika kucita ciyani na munthu wakucosedwa? Bibliya limbati: ‘Muleke kubverana na ali-wense wakucemeredwa m’bale omwe ngwaunzazi, waumbombo, wakunamata bzifanikiso, wakutukana, cidakwa ne nyakupamba, ndipo napo kudya naye munthu umweyo bzin’funika lini.’ (1 Wakolinto 5:11) Pakulewa bza munthu ali-wense omwe ‘ambacita bzinthu bzakusaya kubverana na bzomwe Kristu ambapfunzisa,’ Bibliya limbati: ‘Lekani kumutambira m’nyumba mwanu, ndipo lekani kumumusa. Pakuti ali-wense omwe amumuseyo ankucita naye mbali pa mabasa yace yakuipayo.’ (2 Juwau 9-11) Tenepo, ifepano timbaceza lini na wanthu wakucosedwa, ndipo timbacitambo lini nawo pabodzi bzinthu bzauzimu. Nsanza ya Mulindiri ya 15 Setembro, 1981, pa tsamba 25, idati: “Kundolewa kuti ‘Tani moyo?’ kwa munthu wakucosedwa, kungakhale cinthu cakuyamba kuti ticeze naye, ndipo pinango kuyambiratu uxamwali. Kodi tingafune kucita bzimwebzo na munthu wakucosedwa?”
Kodi mpsakufunikadi kulekaratu kucita cinthu na cibodzico na munthu wakucosedwa? Inde, pa mathangwe mazinji. Cakuyamba, ni nkhani yakulatiza kuti ndife wakukhulupirika kwa Mulungu na Fala lace. Ifepano timbafuna kubvera Yahova, bzinese, bzitani. Lufoyi lathu kwa Mulungu lin’dzatithandiza kubvera bzakutonga bzace bzense, ticizindikirambo kuti iye ngwakulungama na wa lufoyi, ndipo bzakutonga bzace mpsabwino kwa ifepano. (Zaiya 48:17; 1 Juwau 5:3) Caciwiri, n’cakuti kutalikirana na munthu wakucosedwa, kumbatikhotcerera, ndipo kumbathandizambo kuti gwere lireke kupswipizidwa mwauzimu, licipitiriza kukhala na mbiri yabwino. (1 Wakolinto 5:6, 7) Cacitatu, n’cakuti kuphatisisa mitemo ya m’Bibliya, kungathandizembo munthu wakucosedwayo. Tikathandizira komiti yakutonga mulandu, ifepano tingatokonye mtima wa nyakuphonyayo omwe walamba kutambira thandizo la akulu. Munthu wakucosedwa, akaluza mbverano wabwino na wanthu womwe ambawafuna, ‘nzeru zace zingamubwerere,’ acizindikira kuphonya kwaceko, ndipo angafune kulungamiza kuphonya kwaceko kuti abwerere kwa Yahova.—Luka 15:17.
Kufufudza Cuma Cauzimu
(1 Wakolinto 4:9) Pakuti ndikuwona ninga kuti Mulungu aikha apostolofe, kuti tiwonesedwe pakumalizira, ninga wanthu wakuyeruzidwa kuti akaphedwe, thangwe takhala wanthu wakuwonesedwa m’bwalo la masenzeka kuna dziko, wanjo na wanthu.
(1 Wakolinto 6:3) Kodi mun’dziwa lini kuti tin’dzayeruza wanjo? Apa tsono tingatazire tani kuyeruza nkhani za moyo uno?
it-2 tsa. 211
Cakutonga
Cakutonga Cakuperekedwa kwa Wanjo. Wanjo omwe mbapadzulu kwene-kwene kuposa wanthu, iwo ambafunika kubvera cakutonga na malamulo ya Mulungu. (Waheb 1:7, 14; Psal 104:4) Napo Sathani omwe ni nyamadulanthaka wa Yahova alimbo pansi pa cakutonga ca Yahova, ndipo adapasidwa malire. (Djobi 1:12; 2:6) Migeli, omwe ni anjo mkulu adazindikira kuti Yahova ni Muyeruzi Mkulu, ndipo adamulemekeza pomwe nthawe inango Migeliyo adalimbana na Sathani. Iye adauza Sathani kuti: ‘Yahova akutsimule.’ (Juda 9; ndendemezerani na Zak 3:2.) Yahova adaikha wanjo wense pansi pa utsogoleri bwa Jezu Kristu. (Waheb 1:6; 1Pe 3:22; Mat 13:41; 25:31; Waf 2:9-11) Ndipopa anjo munango adatumidwa na Jezu kuti akalewalewe na Juwau. (Cibv 1:1) Ndipo, pa 1 Wakolinto 6:3 mpostolo Paulo adalewa bza Akristau wakudzozedwa kuti an’dzayeruza wanjo, ndipo an’dzacita bzimwebzi pa nthawe ya kuyeruzidwa kwa wanjo wakuipa.