Mareferensiya ya Kabukhu ka Mitsonkhano ka Moyo Wathu na Utumiki
1-7 JULHO
CUMA CA M’FALA LA MULUNGU | WAKOLOSO 1-4
“Khundulani Unthu Bwanu Bwakale, Ndipo Bvalani Unthu Bupsa”
(Wakoloso 3:5-9) Tenepo, citisani bziwalo bza thupi lanu bzomwe bziri pansi pano kukhala bzakufa pa bza unzazi, bzinthu bzakupswipiza, bzikhumbo bza kugonana, bzikhumbo bzakuipa na kusirira kwa njiru, komwe n’kunamata bzifanikiso. 6 Pakuti ukali bwa Mulungu bumbabwera thangwe ra bzinthu bzimwebzi. 7 Makhalidwe yanu yakhalimbo tenepayu kale-kale. 8 Koma tsapano, bzensenebzi bzitayeni kutali na imwe, ukali, uipi, mafala yakunyansa na maceza ya kupusa yakucokera pa mulomo. 9 Lekani kumbanamizana. Khundulani unthu bwanu bwakale na mabasa yace,
(Wakoloso 3:10-14) ndipo bvalani unthu bupsa bomwe Mulungu ambapereka. Bzimwebzi bzinkuthandauza kuti mwa kudziwa bzinthu mwakulondoza, mucitise unthu bwanu kukhala bwatsapano mwakubverana na cifanikiso ca Mulungu, 11 pa mkhalidwe umweyu palibe kuti uyu ni Mgirego ayai Mjuda, wakugwatidwa ayai wakusaya kugwatidwa, mulendo, Msita ne kapolo, ne munthu wakutsudzuka; koma Kristu ni bzinthu bzense ndipo ali mwa wense. 12 Tenepo ninga wanthu wakucita kusankhulidwa na Mulungu, wakucena na wakufunidwa, bvalani lufoyi likulu, kucitira winango nsisi, kudeka mtima, kubzicepswa m’makumbukidwe, kufatsa na kupirira. 13 Pitirizani kupirirana na kulekererana na mtima wense napo penu alipo omwe ana mathangwe yakudandaulira mwanzace. Ninga momwe Yahova adakulekererani na mtima wense, imwepo mucitembo tenepoyo. 14 Tsono kuthumizira pa bzensenebzi, bvalani lufoyi, pakuti limbaphatanidzisa wanthu mwamphanvu kwene-kwene kuposa cinthu ciri-cense.
Kufufudza Cuma Cauzimu
(Wakoloso 1:13, 14) Iye adatipulumusa ku mphanvu ya utongi bwa mdima, acititumiza ku umambo bwa Mwana wace wakufunidwa, 14 omwe mwa iye tidalomboledwa, na kulekereredwa bzakuphonya bzathu.
it-2 tsa. 169 ndi. 3-5
Umambo bwa Mulungu
“Umambo bwa Mwana Wace Wakufunidwa.” Patapita nsiku khumi Jezu atayenda kudzulu, mu Pentekosite ya 33 EC, anyakupfunza wace adawona umboni bwakuti iye ‘akhadakwizidwa ku boko la madidi la Mulungu’ pomwe Jezu adawatsanulira mzimu wakucena. (Mab 1:8, 9; 2:1-4, 29-33) ‘Mpangano upsa’ udayamba kuphata basa mwa iwo, ndipo iwo adakhala wanthu wakuyambirira wa ‘mtundu wakucena,’ wa Jirayeri wauzimu.—Waheb 12:22-24; 1Pe 2:9, 10; Wag 6:16.
Kristu akhadakhala ku boko lamadidi la Baba wace, ndipo iye akhali msolo wa gwereli. (Wayef 5:23; Waheb 1:3; Waf 2:9-11) Bzinembo bzimbalatiza kuti kuyambira mu Pentekosite ya 33 EC kuyenda kutsogolo, padakhazikisidwa umambo bwa uzimu pa anyakupfunza wace. Pomwe mpostolo Paulo adanembera tsamba Akristau wakuyambirira wa ku Kolose adalewa bza Jezu ninga kuti akhadapasidwa kale umambo: ‘[Mulungu] adatipulumusa ku mphanvu ya utongi bwa mdima, acititumiza ku umambo bwa Mwana wace wakufunidwa.’—Wakol 1:13; ndendemezerani na Mabasa 17:6, 7.
Kuyambira mu Pentekosite ya 33 EC kuyenda ku tsogolo, umambo bwa Kristu ni bwa uzimu ndipo bumbatonga Jirayeri wauzimu, omwe ni Akristau wakubadwa na mzimu wa Mulungu ndipo adakhala wana wauzimu wa Mulungu. (Ju 3:3, 5, 6) Ndipo Akristau wakubadwa na mzimuwa akadzatambira mabaibai yawo ya kudzulu, iwo an’dzakhala lini mzika za pa dziko la pansi za umambo bwauzimu bwa Kristu, koma an’dzakhala wamambo pabodzi na Kristu kudzulu.—Cibv 5:9, 10.
(Wakoloso 2:8) Samalani kuti munthu aleke kukuphatani ninga cirombo mwakuphatisa basa makumbukidwe ya wanthu na mapumpso, mwakubverana na miyambo ya wanthu na bzinthu bza m’dzikoli bzomwe bzimbacokera lini kwa Kristu;
8-14 JULHO
CUMA CA M’FALA LA MULUNGU | 1 WATESALONIKA 1-5
“Pitirizani Kumbalimbisana”
(1 Watesalonika 5:11-13) Tenepo pitirizani kumbalimbisana ninga momwe munkucitiramu. 12 Tsapano tinkukukumbirani, abale, kuti mumbalemekeze omwe ambaphata basa na nyongo pakati panu, omwe ambakutsogolerani na kukupasani malango mwa Mbuya. 13 Bzin’funika kuti muwalemekeze kwene-kwene mwa lufoyi thangwe ra basa lawo. Khalani mwa mtendere munango na mwanzace.
(1 Watesalonika 5:14) Ndipo ndinkukudandaulirani abale kuti: Mulangize wanthu wakucita bzakusaya kulongosoka, mutsangalaze anyakusunama, muthandize anyakutepa, mucipirira na wanthu wense.
‘Timbafunane . . . mu Bzicito Bzathu na Mwacadidi’
Thandizani omwe adatepa. Mtemo wa m’Bibliya wakuti ‘muthandize anyakutepa, mucipirira na wanthu wense,’ ungatithandize kuwona penu lufoyi lathu ndacadidi ayai ne. (1 Watesalonika 5:14) Abale azinji omwe kale-kale akhadatepa, adadzakhala pomwe na cikhulupiro cakulimba. Koma winango tin’funika kupirira nawo na kuwathandiza mwa lufoyi. Kodi tingawathandize tani? Tingawalimbise mwa kuphatisa basa Bibliya, kuyenda nawo pabodzi mu utumiki bwakumunda, ayai kuwatetekera pomwe iwo ankulewalewa. Ndipo tin’funika lini kumbandowona abale na mpfumakazi zathu kuti “mbakulimba” ayai kuti “mbakutepa.” Koma tin’funikambo kuzindikira kuti tensenefe tina mbali zakulimba mwauzimu na zakutepa zace. Napo mpostolo Paulo akhadziwa kuti iye akhana mbali zacembo zakutepa. (2 Wakolinto 12:9, 10) Ndipopa tensenefe timbafunika thandizo na cilimbiso cakucokera kwa winango.
Kufufudza Cuma Cauzimu
(1 Watesalonika 4:3-6) Ibzi ni bzomwe Mulungu akufuna, kuti mukhale wakucena mucireka kucita unzazi. 4 Ali-wense wa imwepo an’funika kudziwa kulinyang’anira bwino thupi race kuti akhale wakucena na wakulemekezeka, 5 sikuti na kalanga kakusaya kuphatika ninga momwe ambacitira wanthu wa mitundu omwe ambadziwa lini Mulungu. 6 Palibe munthu an’funika kupitirira malire mpaka kufika pa kucitira bzakuipa m’bale wace pa nkhani imweyi, pakuti Yahova an’dzawalanga thangwe ra bzinthu bzensebzi ninga momwe ndikhadakuuzirani kale na kukucenjezani mwa mphamvu.
it-1 matsa. 863-864
Unzazi
Unzazi ni pikado yomwe ingacitise munthu kuthothedwa (kucosedwa) m’gwere lacikristau. (1Wak 5:9-13; Waheb 12:15, 16) Mpostolo Paulo adafotokoza kuti Mkristau omwe an’cita unzazi ambaphonyera thupi lace, mwa kuphatisa basa bziwalo bzace bzakuberekera pa cakulinga cakuphonyeka. Iye ambatokonyedwa mwauzimu mu njira yakuti ambabonera, ambapswipiza gwere la Mulungu ndipo ambakhala pa ngozi yakutenga matenda yakupasirana. (1Wak 6:18, 19) Munthu wakucita unzazi ambapamba ufulu bwa Akristau anzace (1Wat 4:3-7) mwa (1) kupswipiza, kucitisa manyazi na kunyozesa gwere (Waheb 12:15, 16), (2) ambacitisa kuti munthu omwe acita naye unzaziyo aleke kukhala wakucena, penu ni munthu omwe ali lini pa banja, ambakhala wakusaya kucena pomwe an’dzapita m’banja, (3) ambacitisa banja lace kuleka kukhala na mbiri yabwino na (4) kusunamisa abereki, mwamuna ayai axamwali wa munthu omwe acita naye unzaziyo. Iye ambakhala lini ankuphonyera munthu omwe malamulo yace yangalekerere bzinthu bza unzazi, koma ambakhala ankuphonyera Mulungu omwe an’dzalanga munthu wakucita pikado ninga imweyi.—1Wat 4:8.
(1 Watesalonika 4:15-17) Pakuti ifepano tinkukuuzani bzimwebzi mwakubverana na mafala ya Yahova kuti, wamoyofe omwe tin’dzakhala pa nthawe yakukhala kwa Mbuya, tin’dzakhala lini patsogolo pa omwe adagona mu infa; 16 pakuti Mbuyayo an’dzabuluka kucokera kudzulu na kucemera kwa utsogoleri kwa fala la mkulu wa wanjo, na cimbututu ca Mulungu, ndipo omwe adafa mwa Kristu ndiwo an’dzayamba kulamuka. 17 Patsogolo pace, wamoyo omwe tasalafe, tin’dzatengedwa nawo pabodzi m’mitambo kuti tikagumane na Mbuya m’mlengalenga, ticikakhala naye pabodzi mpaka kale-kale.
15-21 JULHO
CUMA CA M’FALA LA MULUNGU | 2 WATESALONIKA 1-3
“Kuwonekera kwa Nyakusaya Kubvera Malamulo”
(2 Watesalonika 2:6-8) Ndipo imwepo mukudziwa comwe cikumucitisa kuti aleke kuwonekera, kuti adzawonekere pa nthawe yakuthemera. 7 N’cadidi kuti cinsinsi ca kusaya kubvera malamulo ciripo kale, tsono cikundokhala mpaka akadzacoka ule omwe tsapano ali ninga nyakuphingiza. 8 Ndipo an’dzawonekera padeca nyakusaya kubvera malamulo ule, ndipo Mbuya Jezu an’dzamupfudza na mzimu wa pakamwa pace, mwakumupfudziratu pa nthawe ya kukhala kwace.
it-1 matsa. 972-973
Kubzipereka kwa Mulungu
Pana cinsinsi cinango comwe n’cakusiyana kwene-kwene na ‘cinsinsi cakupambulika.’ Ni ‘cinsinsi ca kusaya kubvera malamulo.’ Cimweci cikhali cinsinsi kwa Akristau wa cadidi, thangwe mu nsiku za mpostolo Paulo ‘nyakusaya kubvera malamulo’ ninga gulu, akhanati kuwoneka bwino-bwino. Napo ‘nyakusaya kubvera malamuloyu’ angadakhala ninga gulu, kwa wanthu azinji angadapitiriza kukhala wakusaya kudziwika, thangwe ra kuti bzinthu bzakuipa bzomwe iye angadambadzacita, angadambadzabzicita mwakusaya kubziwonesera ndipo angadakhala ninga wakubzipereka kwa Mulungu. Koma kucita bzimwebzi kungadakhala kupandukira, m’mbuto mwakukhala kubzipereka kwa Mulungu. Paulo adalewa kuti ‘cinsinsi ca kusaya kubvera malamulo’ cikhadayamba kale m’nsiku zace, thangwe ndakuti pakhacitika bzinthu bzomwe bzikhabverana lini na malamulo ya m’gwere lacikristau, bzomwe bzingadacitisa kuti nakupita kwa nthawe pakhale na gulu la anyakupanduka. Ndipo kumalizira kwace, gululi lingadadzamalisidwa na Jezu Kristu pa nthawe yakuwonekera kwa kukhala kwace. ‘Nyakusaya kubvera malamuloyu’ omwe angadaphatisidwa basa na Sathani, angadadzakhala padzulu “pa wense omwe ambacemeredwa kuti ‘mulungu’ ayai cinthu cakuthemera kulambiridwa” (Gr., seʹba·sma). Ndipo nyakutsutsa mkulu wa Mulunguyu, omwe Sathani ambamuphatisa basa, angadakhala nyakupumpsa mkulu ndipo angadacitisa kuti wense omwe ambatewera bzicito bzace adzapfudzidwe. Tsono Kuti bzimufambire bwino, ‘nyakusaya kubvera malamuloyu’ angadabisa kuipa kwaceko mwa kumbabziwonesera ninga wakubzipereka kwa Mulungu.—2Wat 2:3-12; ndendemezerani na Mateu 7:15, 21-23.
(2 Watesalonika 2:9-12) Tsono kuwonekera kwa nyakusaya kubvera malamuloyo kumbacitika mwa mphanvu ya Sathani, mwakucita mabasa yakudabwisa, bzizindikiro bzakunama na matsenga, 10 pabodzi na kusaya kulungama na cinyengo ca mtundu uli-wense, kwa wale omwe ankuyenda kukapfudzidwa. Cimweci cin’dzakhala cirango kwa iwo thangwe alibe kulatiza kuti akufuna cadidi kuti apulumuke. 11 Ndipopa Mulungu ambalekerera kuti iwo apumpsidwe na kukhulupira bzinthu bzakunama, 12 kuti wensenewo adzayeruzidwe thangwe alibe kukhulupira cadidi, koma adafuna bzinthu bzakusaya kulungama.
it-2 tsa. 245 ndi. 7
Kunama
Yahova Mulungu ambalekerera wale omwe ambasankhula ‘kupumpsidwa’ na bzinthu bzakunama, kuti ‘akhulupire bzinthu bzakunamabzo’ m’mbuto mwakukhulupira bzipsa bzabwino bza kulewa bza Jezu Kristu. (2Wat 2:9-12) Bzimwebzi bzimbawonekeratu padeca na bzomwe bzidadzacitika kale-kale na Mambo wa Ajirayeri, Akabe. Apolofeta wakunama adatsimikizira Akabe kuti iye angadawina ku nkhondo pakumenyana na Ramoti-gileyade, napo kuti mpolofeta wa Yahova Mikaya akhadamucenjezeratu kale kuti angadakakundidwa. Ninga momwe Mikaya akhadawonesedweratu kale m’matsomphenya, Yahova adalekerera cakulengedwa cace cibodzi cauzimu ‘kukhala mzimu wakunama,’ ndipo cidaikha mafala yakunama pamulomo pa apolofeta wa Akabe. Cakulengedwaci cidaphatisa basa mphamvu yace mwakucitisa apolofetawa kulewa mafala yakunama yomwe yakhadekera iwo na yomwe Akabe akhafuna kuyabva. Napo kuti Akabe akhadacenjezedwa kale, iye adabvuma kunamizidwa ndipo malipo yace yadakhala kuluza moyo wace.—1Wam 22:1-38; 2Nkha 18.
Kufufudza Cuma Cauzimu:
(2 Watesalonika 1:7, 8) Tsono imwe, omwe munkugumana na mazunzo, mun’dzatambira mpumulo pabodzi na ife pa nthawe yomwe Mbuya Jezu an’dzawonekera kucokera kudzulu, na wanjo wace wa mphanvu, m’cirambirambi ca moto. 8 Pa nthawe imweyo Mulungu an’dzalanga omwe ambamudziwa lini na wanthu omwe ambafuna lini kubva bzipsa bza bwino pakulewa bza Mbuya wathu Jezu.
it-1 tsa. 834 ndi. 5
Moto
Pedru adanemba kuti ‘kudzulu na dziko la pansi bzomwe tsapano bziripobzi, bzakoyedwera moto.’ Na momwe nkhaniyi imbalewedwera mwakubveranambo na bzinembo bzinango, bzinkuwonekeratu kuti pamwepa pambalewa lini bza moto caiwo, koma bzimbathandauza kupfudzidwa kwa muyaya. Ninga momwe bzidacitikira mu nthawe ya Nowe, cigumula ciribe kupfudza kudzulu na dziko cairo, koma wanthu wakuipa, tenepombo kuwonekera kwa Jezu Kristu na wanjo wace wamphanvu m’cirambirambi ca moto, kun’dzacitisa kuti wanthu wakuipa na nkonzedwe wawo wa bzinthuyu apfudzidwe kwa muyaya.—2Pe 3:5-7, 10-13; 2Wat 1:6-10; ndendemezerani na Zaiya 66:15, 16, 22, 24.
(2 Watesalonika 2:2) lekani kufulumiza kuzunguzika nzeru zanu, ne kugopa mafala yakufuliziridwa, ayai mafala yakulewedwa, ayai tsamba lakuwoneka ninga linkucokera kwa ife, lakulewa kuti nsiku ya Yahova yafika.
it-1 tsa. 1206 ndi. 5
Kufuliziridwa
Mafala ya Paulo yankulatiziratu padeca kuti pana ‘mafala yakufuliziridwa’ yacadidi na yakunama. Pa 1 Timotio 4:1, iye adalewa bza mbali zense ziwirizi. Iye adati: ‘Tsono mafala yakulewedwa mwa mzimu yambaleweratu bza nthawe zakutsogoloku zomwe wanthu winango an’dzasiya cikhulupiro cawo, acitetekera mafala yakupandusa pabodzi na bzipfunziso bza madimonyo.’ Bzimwebzi bzinkulatiza kuti ‘mafala yakufuliziridwa’ yakunama yambacokera kwa madimonyo. Ndipo bzimwebzi bzimbabveranambo na matsomphenya ya mpostolo Juwau, omwe adawona ‘mafala yakufuliziridwa matatu yakunyansa, yakukhala ninga acule,’ yankucokera m’kamwa mwa cinyoka, mwa cirombo na mwa mpolofeta wakunama. Mpostoloyu adalewa kuti mafalaya ‘yakhadafuliziridwa na madimonyo,’ ndipo cakulinga cace n’cakukonkhanisira wamambo wa pa dziko la pansi ku nkhondo ya Armagedo.—Cibv 16:13-16.
22-28 JULHO
CUMA CA M’FALA LA MULUNGU | 1 TIMOTIO 1-3
“Citani Nyongo Kuti Muthemere Kucita Basa Labwino”
(1 Timotio 3:1) Mafalaya njacadidi. Penu munthu ali-wense ankucita nyongo kuti akhale nyakunyang’anira, iye ankulinga basa labwino.
Kodi Mumbawona Kufunika Kwa Kuyenda Patsogolo Mwauzimu?
Werengani 1 Timotio 3:1. Mpostolo Paulo adatenda abale omwe ‘akhalimbikira’ kuti akhale anyakunyang’anira. Kuti munthu afikire cinthu comwe ciri patali, iye an’funika kucita nyongo ndipo pinango kufuthula boko lace kuti aciphate. Tsapano ndokumbukirani kuti m’bale munango ankufuna kuti athemere kukhala mtumiki wakuthandiza. Iye ankuzindikira kuti an’funika kucita nyongo kuti akhale na makhalidwe yabwino yacikristau. Tsono, akayamba kutumikira ninga mtumiki wakuthandiza, iye an’funika kupitiriza kuphata basa na nyongo kuti athemere kukhala wakunyang’anira.
(1 Timotio 3:13) Pakuti amuna wakutumikira bwino ambakhala na mbiri yabwino, na ufulu bwa kulewalewa m’cikhulupiro mwakubverana na Kristu Jezu.
km 9/78 tsa. 4 ndi. 7
Wale Omwe ‘Ambakhala na Mbiri Yabwino’
Mpsakupusa kubvesesa, thangwe ranyi Paulo adalewa kuti amuna amwewa ‘ambakhala na mbiri yabwino.’ Paulo akhalewa lini bza kukhala na mpando ukulu m’gereja ninga momwe wanthu winango ambakumbukira. M’mbuto mwace atumiki wakuthandiza omwe ‘ambatumikira bwino’ ambapenukira lini kuti Yahova na Jezu ambawasimba, na kuti gwere lense limbawalemekeza na kuwathandiza. Tenepo, iwo ambakhala na ‘ufulu bwa kulewalewa m’cikhulupiro mwakubverana na Kristu Jezu.’ Pakuti ambakhala na moyo mwakubverana na udindo bwawo, Akristau anzawo ambawatenda pa basa labwino lomwe ambacita, iwo mbakulimba m’cikhulupiro, ndipo ambalewambo bza cikhulupiro cawoco mwakutsudzuka.
Kufufudza Cuma Cauzimu
(1 Timotio 1:4) ne kubvera nkhani zakunama na za mibadwo ya abereki. Bzimwebzi bzimbathandiza lini, koma bzimbandoyambisa mibvunzo ndipo bzimbapfunzisa lini wanthu ciri-cense cakucokera kwa Mulungu cakulewa bza cikhulupiro.
it-1 matsa. 914-915
M’badwo wa Abereki
Kulimbikira kupfunza na kumbanesana pa nkhani zimwezi kukhali kwakusaya phindu, ndipo bzimwebzi ni bzomwe bzikhacitika kwene-kwene pa nthawe yomwe mpostolo Paulo adanembera Timotio. Bzikhali lini pomwe bzakufunika kukoya bzakunembedwa bza mibadwo ya abereki pakufuna kumbadzalatiza mzera wakubadwira wa munthu, pakuti Mulungu akhawona lini pomwe kusiyana pakati pa Mjuda na munthu wa mitundu inango, m’gwere lacikristau. (Wag 3:28) Bzakunembedwa bza mibadwo ya abereki bzikhadalatiza kale mzera omwe Kristu angadabadwira, omwe ukhali wa mambo Davide. Pomwe Paulo adanembera Timotio mafalaya, pakhadandosala pang’ono kuti mzinda wa Jeruzalemu upfudzidwe, pabodzi na bzakunembedwa bza madzinza yacijuda. Ndipopa mpostolo Paulo akhafunisisa kuti Timotio pabodzi na magwere yale, aleke kumbadzonga nthawe yawo pakufufudza na kumbanesana pa nkhani ya mzera omwe munthu adabadwira, bzomwe bzingadalimbisa lini cikhulupiro cacikristau. M’badwo wa abereki wa Jezu wakugumanika m’Bibliya, ngwakukwanira pakufuna kutsimikizira kuti Jezu akhalidi Mesiya, ndipo imweyi ni nkhani ibodzi yokha yakufunika kwa Akristau pa nkhani yakulewa bza m’badwo wa abereki. Mizera ya mibadwo inango yakufotokozedwa m’Bibliya, imbatsimikizira kulondoza kwa nkhani zomwe zimbafotokozedwa m’Bibliyamo.
(1 Timotio 1:17) Kwa Mambo wa muyaya, wakusaya kufa, wakusaya kuwoneka, Mulungu m’bodzi yekha, apasidwe ulemu na umbiri kwa nthawe zense. Ameni.
cl tsa. 12 ndi. 15
“Onani, Uyu Ndiye Mulungu Wathu”
Dzina linango la ulemu lomwe Yahova ambacemeredwa nalo, ndipo ndakuthemera iye yekha, ni ‘Mambo wa nthawe zense.’ (1 Timotio 1:17; Cibvumbulutso 15:3) Kodi dzinali limbathandauza ciyani? Mpsakunesa kubvesesa pakuti tina makumbukidwe yakuperewera, tsono Yahova ni wa nthawe zense, kuyambira kale-kale m’mbuyomo, ndipo an’pitiriza kukhala mpaka kale-kale. Psalymo 90:2 ambalewa kuti: ‘Kucokera kwa nthawe yakusaya kumala mpaka kwa nthawe yakusaya kumala imwe ndimwe Mulungu.’ Ni Yahova yekha omwe alibe ciyambi, ndipo an’khala mpaka kale-kale. Ndipopa mwakuthemera ambacemeredwa kuti ‘Wansiku Zizinji,’ ndipo iye alipo kuyambira kale-kale pomwe pakhanati kukonzedwa cinthu ciri-cense, m’cirengedweci! (Danyeri 7:9, 13, 22) Mbani omwe angapenukire penu iye ngwakuthemera kucemeredwa Mbuya Mkululetu?
29 JULHO–4 AGOSTO
CUMA CA M’FALA LA MULUNGU | 1 TIMOTIO 4-6
“Mungasankhule Kutumikira Yahova ayai Cuma?”
(1 Timotio 6:6-8) Inde, kukhala wakubzipereka kwa Mulunguko na kukhala wakukomedwa na bzomwe tinabzo, ni njiradi yakugumanira phindu likulu. 7 Pakuti tiribe kubweresa cinthu m’dzikomu, ndipo tinganyamule lini cinthu cakuyenda naco. 8 Tenepo, kukhala na cakudya, bzakubvala na pakugona, tin’dzakomedwa na bzimwebzo
(1 Timotio 6:9) Tsono, omwe ankufunisisa kukhala wakudala ambagwera m’mayezo na m’sampha, pabodzi na bzikhumbo bzizinji bzakuipa na bzakudzonga ndipo ambacita bzinthu mwa kusaya nzeru, bzinthu bzimwebzi bzimbawadzonga bziciwabweresera mabvuto.
(1 Timotio 6:10) Thangwe lufoyi pa kobiri ni muzu wa bzinthu bzense bzakupweteka, ndipo winango pakukuza lufoyiro, adapambusidwa pa cikhulupiro ndipo adabzibweresera bzakuwawa bzizinji;
Kufufudza Cuma Cauzimu
(1 Timotio 4:2) Bzimwebzi bzin’dzacitikambo thangwe ra cinyengo ca wanthu omwe ambalewalewa magunkha, omwe cikumbu-mtima cawo ciri ninga cipsazi cakuwoneka thangwe ra kudindidwa na simbi yakupsa.
Kodi Tingapitirize Tani Kukhala na Cikumbu-mtima Cabwino?
Mpostolo Pedru adanemba kuti: ‘Pitirizani kukhala na cikumbu-mtima cabwino.’ (1 Pedru 3:16) N’cisimbo cikulu kukhala na cikumbu-mtima cakucena pa maso pa Yahova. Cikumbu-mtima cimweci n’cakusiyana kwene-kwene na ca wanthu wazinji nsiku zino. Paulo adalewa bza wanthu womwe ‘cikumbu-mtima cawo ciri ninga cipsazi cakuwoneka thangwe ra kudindidwa na simbi ya moto.’ (1 Timotio 4:2) Simbi ya kupsa imbasiya cipsazi pa thupi ra munthu. Azinji ana cikumbu-mtima cakufa, comwe cimbawapasisa lini manyazi, cimbawacenjeza lini pomwe, ndipo cimbawaboneresa lini akacita bzinthu bzakuipa. Lero wanthu azinji ambabvera lini cikumbu-mtima cawo cikakhala cinkuwamanga mulandu.
(1 Timotio 4:13) Pomwe unkundidikhirira, pitiriza kukhala wakubzipereka pa kuwerenga pa maso pa wanthu, pa kuwadandaulira na pa kuwapfunzisa.
it-2 tsa. 714 ndi. 1-2
Kuwerenga pa Maso pa Wanthu
Mu Gwere Lacikristau. Mu nthawe ya Akristau wakuyambirira, ni wanthu wakucepa omwe akhana mipukutu ya Bibliya, ndipopa pakhafunika kuti bzinembo bzimbacite kuwerengedwa pa maso pa wanthu. Mpostolo Paulo adakumbira kuti matsamba yace yambawerengedwe pa maso pa wanthu wense pa mitsonkhano ya gwere yacikristau. (Wakol 4:16; 1Wat 5:27) Paulo adauza tswaka Timotio omwe akhatumikira ninga nyakunyang’anira kuti ‘apitirize kukhala wakubzipereka pa kuwerenga pa maso pa wanthu, pa kuwadandaulira na pa kuwapfunzisa.’—1Tim 4:13.
Munthu akambawerenga pa maso pa wanthu an’funika kumbawerenga mwakubveka bwino. (Hab 2:2) Pakuti cakulinga ca kuwerenga pa maso pa wanthu ni kuthandiza abveseri, muwerengi an’funika kubvesesa bzomwe ankuwerengabzo, kuzindikira cakulinga ca mnembi wa mafalayo, acimbasamala pomwe ankuwerengapo kuti abveseri aleke kubva mu njira yakuphonyeka nkhaniyo. Mwakubverana na Cibvumbulutso 1:3, wale omwe ambawerenga mwakukuwa mafala ya polofesiya, kuphatanidzambo omwe ambabvesera mafalayo, an’dzakhala wakukondwa.