Mareferensiya ya Kabukhu ka Mitsonkhano ka Moyo Wathu na Utumiki
3-9 FEVEREIRO
CUMA CA M’FALA LA MULUNGU | CIYAMBO 12-14
“Mpangano Omwe Umbatitokonya”
(Ciyambo 12:1, 2) Ndipo Yahova adauza Abramu kuti: “Coka m’dziko lako ndipo siya adzinza wako na nyumba ya baba wako kuti uyende ku dziko lomwe nin’dzakulatiza. 2 Inepano nin’dzakucitisa kukhala mtundu ukulu, ndicidzakusimba na kucitisa dzina lako kukhala likulu, ndipo iwepo un’dzakhala cisimbo kwa winango.
it-1 tsa. 522 ndi. 4
Mpangano
Mpangano na Abalahamu. Bzikuwoneka kuti mpangano na Abramu (Abalahamu), udayamba kuphata basa pomwe iye adayambuka mkulo wa Efrate pakuyenda ku Kanani. Mpangano wa Cakutonga udadzacitika pambuyo pa magole 430. (Wag 3:17) Yahova akhadalewalewa na Abalahamu pomwe akhakhala ku Mesopotamiya, ku Uri wa Akalideya mwa kumuuza kuti ayende ku dziko lomwe Mulungu angadamulatiza. (Mab 7:2, 3; Ciy 11:31; 12:1-3) Kufuluka 12:40, 41 ambatiuza kuti pambuyo pakukhala magole 430 ku dziko la Edjipito na ku dziko la Kanani, Ajirayeri omwe akhadakhala mu ukapolo ku Edjipito, adatsudzulidwa. Iwo adacoka ku Edjipito pa ntsiku ya Nisani 14, mu gole la 1513 pomwe Kristu akhanati kubwera yomwe ikhali ntsiku ya Paskwa. (Kuf 12:2, 6, 7) Bzimwebzi bzikulatiza kuti Abalahamu adayambuka mkulo wa Efrate aciyenda ku Kanani pa ntsiku ya Nisani 14, mu gole la 1943 pomwe Kristu akhanati kubwera, ndipo bzikuwoneka kuti ni pa ntsiku imweyi pomwe mpangano na Abalahamu udayamba kuphata basa. Ndipo Mulungu adawonekera pomwe kwa Abalahamu pambuyo pa iye kuyenda ku Kanani na kufika ku Sikemu, ndipo adathumizira kulewa kuti: ‘Nin’dzapereka dzikoli kwa mbeu yako,’ mwa njira imweyi akhalatiza kuti mpangano umweyu ukhabverana na bzomwe akhadalewa mu zunde la Edeni, ndipo bzikhalatiza kuti ‘mbeu’ imweyi ingadabwera kucokera ku mbadwe zace. (Ciy 12:4-7) Mafala yanango yakuthumizira yadadzalewedwa pomwe na Yahova ninga momwe cimbalewera cinembo ca Ciyambo 13:14-17; 15:18; 17:2-8, 19; 22:15-18.
(Ciyambo 12:3) Nin’dzasimba wale omwe an’dzakusimba ndipo nin’dzatemberera wale omwe an’dzakutemberera. Ndipo mabanja yentse ya pa dziko la pantsi yan’dzasimbidwa thangwe ra iwepo”
w89 1/7 tsa. 3 ndi. 4
Thangwe Race Imwepo Mun’funika Kudziwa Cadidi Pakulewa bza Abalahamu
Limweri ni lumbiro lakudabwisa, ndipo Abalahamu adabva pomwe bza lumbiroli pafupi-fupi kawiri. (Ciyambo 18:18; 22:18) Kuti bzimwebzi bzikwanisike, Mulungu an’dzalamusa wanthu winango omwe adafa. Kwa omwe an’dzalamusidwa, moyo un’dzakhala cisimbo cikulu, pakuti azinji wa iwo pakubwera kucoka ku thenje an’dzagumana paraizo wakundendemerana na ule omwe munthu wakuyamba adauluza. Patsogolo pace iwo an’dzapfunzisidwa momwe angagumanire cisimbo ca moyo wakusaya kumala.—Ciyambo 2:8, 9, 15-17; 3:17-23.
(Ciyambo 13:14-17) Pambuyo pa Abramu kumwazana na Loti, Yahova adati kwa Abramuyo: “Ndaphata minyendo, lamusa maso yako kucokera pomwe ulipo, ndipo nyang’anisa kumpoto, kummwera, kumabvadzuwa na kumadokero, 15 thangwe rakuti dziko lentse lomwe ukuliwonali nin’dzalipereka kwa iwepo na kwa mbeu yako, kuti likhale lanu mpaka kale-kale. 16 Ndipo nin’dzacitisa mbeu yako kukhala yakuwanda ninga mcenga, penu alipo omwe angakwanise kulewenga mcenga wa pantsi, ndiye kuti mbeu yako ingadalewengekambo. 17 Lamuka, zungulira dziko lentseli uwone kutalimpha na kufupika kwace, thangwe rakuti nin’dzalipereka kwa iwepo.”
it-2 tsa. 213 ndi. 3
Cakutonga
Mwakubverana na umboni bomwe bulipo, adziwi winango ambatawiriza kuti munthu akafuna kugulisa mbuto, cakuyamba akhalatiza nyakugulayo mbuto yentse pabodzi na malire yace. Ndipo nyakugulayo akalewa kuti “ndikuiwona” iye akhathandauza citsimikizo cakukwanira. Pomwe Yahova adauza Abalahamu kuti angadamupasa dziko la Kanani, cakuyamba adamuuza kuti anyang’anise mbali zentse zinai. Abalahamu alibe kulewa kuti “ndikuliwona”, pinango ni thangwe ra kuti Mulunguyo adamuuza kuti angadapereka Dziko Labwino kwa mbeu yace kutsogolo. (Ciy 13:14, 15) Pomwe Mozeji ninga nyakuimikira Jirayeri wakusankhulidwa, adauzidwa kuti “awone” dzikolo, na kuti bzomwe bzalewedwa m’mbuyomu mpsacadidi, bzikhalatiza kuperekedwa kwa dzikolo kwa Ajirayeri mwakutsogoleredwa na Djosuwe. (Bzak 3:27, 28; 34:4; onanimbo bzomwe Sathani adapasa Jezu pa Mateu 4:8.) Cakucitika cinango comwe cikhalatiza kuperekedwa kwa mbutoyo cikhali: kufamba na minyendo m’dzikolo ayai kupita m’mwemo na cakulinga cakulitenga. (Ciy 13:17; 28:13) Matsamba yanango yakale yambalatiza kuti mbogo ya miti yomwe ikhagumanika pa mbutopo, ikhambagulisidwa pabodzi na mbutoyo.—Yezezerani na Ciyambo 23:17, 18.
Kufufudza Cuma Cauzimu
(Ciyambo 13:8, 9) Tenepo, Abramu adauza Loti kuti: “Ndaphata minyendo, mbatileke kunesana iwepo na inepano, na pakati pa amuna omwe ambakonkhobza bzifuwo bzangu na bzako, thangwe rakuti mbubale bwathu. 9 Kodi dziko lentseli liri lini pamaso pako? Ndaphata minyendo, mbatimwazane. Penu iwepo uniyenda ku boko la madzere, inepano ndiniyenda ku boko la madidi; koma penu iwepo uniyenda ku boko la madidi, inepano ndiniyenda ku boko la madzere.”
Kumalisa Kusaya Kubvesesana na Mzimu wa Lufoyi
Nkhani inango ya m’Bibliya ya kulatiza momwe atumiki wa Mulungu adamalisira kusaya kubvesesana njakulewa bza Abalahamu na mzukulu wace Loti omwe tawafotokoza pakuyamba wale. Amuna awiriwa akhana bzifuwo, ndipo amakabusa wawo akhapokerana mbuto ya komwe akhadyesera bzifuwobzo. Pa kufuna kumalisa kunesanako, Abalahamu adawuza Loti kuti ayambe ni Lotiyo kusankhula mbuto yomwe angadafuna kukakhala. (Ciy. 13:1, 2, 5-9) Cimweci n’ciratizo cabwino kwene-kwene! Abalahamu adalinga mtendere, sikuti bzakufuna bzace. Kodi iye adaluza thangwe ra kupasa kwace? Ne na pang’onopo. Pambuyo pa cakucitikaci, Yahova adauza Abalahamu kuti angadamupasa bzisimbo bzizinji. (Ciy. 13:14-17) Mulungu an’dzalekerera lini atumiki wace kuti abonere mwa kuluza mpaka kale-kale kuti acite bzinthu mwakubverana na mitemo yace na kumalisa kusaya kubvesesana mu mzimu wa lufoyi.
(Ciyambo 14:18-20) Ndipo Merikizedeki mambo wa Salemu adabweresa mkate na vinyu; iye akhali wantsembe wa Mulungu Mkululetu.19 Tenepo adamusimba acilewa kuti: “Mulungu Wakudzulu, omwe adalenga kudzulu na dziko la pantsi, asimbe Abramu; 20 Ndipo atumbizidwe Mulungu wakudzulu, omwe apereka anyakukupondereza m’manja mwako!” Ndipo Abalahamu adam’pasa cakhumi ca bzentse.
(Wahebereu 7:4-10) Onani momwe munthuyu akhaliri mkulu kwene-kwene, mwakuti mbuya wathu Abalahamu adamupasa cakhumi pa bzinthu bzentse bzabwino bzomwe akhadapamba. 5 N’cadidi kuti mwakubverana na Cakutonga, wale omwe ali pakati pa wana wa Levi omwe ambakhala wantsembe adauzidwa kuti ambatambire cakhumi kwa mbumba, ayai kwa abale wawo, napo kuti iwo ni wana wa Abalahamu. 6 Koma munthu umweyu, omwe akhali lini wa dzinza lawo adatambira cakhumi kwa Abalahamu acisimba ule omwe akhadalumbiridwa. 7 Ndipo mpsakugazika lini kuti mng’ono ndiye omwe ambasimbidwa na mkulu. 8 Ku mbali ibodzi, omwe ambatambira cakhumi ni amuna omwe ambafa, koma ku mbali inango, ni ule omwe ambacitiridwa umboni bwakuti akupitiriza kukhala na moyo. 9 Ndipo bzingalewedwe kuti mwa Abalahamu, Levi caiyeyo adalipira cakhumi napo kuti ndiye omwe ambatambira cakhumico, 10 Thangwe rakuti iye akhanati kubadwa pomwe wadzinza waceyo adakagumana na Merikizedeki.
it-2 tsa. 683 ndi. 1
Wantsembe
Merikizedeeki mambo wa Salemu akhali wantsembe (ko·henʹ) wakupambulika. Bibliya limbafotokoza lini bza dzinza lace, bza kubadwa kwace ayai bza kufa kwace. Untsembe bwace bukhali lini utaka bwakucita kucokera ku dzinza, iye alibe kucita kupita nkhankha, ndipo nee iyembo alibe kudzapitidwa nkhankha pa udindobu. Merikizedeki adakhala bzentse bziwiri, mambo na wantsembe. Untsembe bwace bukhali bwapadzulu kuposa untsembe bwa Alevi, thangwe ra kuti Levi adapereka cakhumi kwa Merikizedeki; pakuti pomwe Leviyo akhanati kubadwa, Abalahamu omwe akhali wadzinza wace adapereka cakhumi kwa Merikizedeki ndipo adasimbidwa. (Ciy 14:18-20; Waheb 7:4-10) Natenepa, Merikizedeki akhaimira Jezu Kristu, omwe ni ‘wantsembe mpaka kale-kale ninga Merikizedeki.’—Waheb 7:17.
10-16 FEVEREIRO
CUMA CA M’FALA LA MULUNGU | CIYAMBO 15-17
“Thangwe Ranyi Yahova Adacinja Dzina la Abramu na Sarai?”
(Ciyambo 17:1) Pomwe Abramu akhana magole 99 yakubadwa, Yahova adafikira Abramu acimuuza kuti: “Ine ndine Mulungu Wamphanvu zentsene. Famba pamaso pangu ndipo ukhale wakulungama.
it-1 tsa. 817
Kuphonya, Kuwona Cakuphonya
Ku mbali inango, njira za wanthu na bzomwe iwo ambacita m’nthawe zizinji bzimbakhala bzakuphonyeka. Pikado na kumbacita bzinthu bzakuphonyeka ni bzinthu bzomwe munthu ali-wentse adabzitengera kwa Adamu. (War 5:12; Psal 51:5) Koma Yahova, omwe ni wakusaya pikado, ‘ambadziwa bwino kaumbidwe kathu, ambakumbukira kuti ndife pfumbi,’ ndipo ngwantsisi. (Psal 103:13, 14) Iye adawona Nowa omwe akhali munthu wakukhulupirika kukhala ‘wakusaya cakuphonya pakati pa wanthu wa m’nthawe yace.’ (Ciy 6:9) Iye adauza Abalahamu kuti, ‘Famba pamaso pangu ndipo ukhale wakulungama.’ (Ciy 17:1) Napo kuti amuna wentsewa akhali wakuperewera ndipo adafa, akhawonedwa na Yahova omwe ambawona mu mtima ninga wanthu wakusaya kuphonya. (1Sam 16:7; ndendemezerani na 2Wamambo 20:3; 2Nkhani 16:9.) Iye adauza Ajirayeri kuti: ‘Khala wakusaya mulandu pa maso pa Yahova Mulungu wako.’ (Bzak 18:13; 2Sam 22:24) Iye adapereka mwana wace wakulungamiratu (Waheb 7:26) ninga ntsembe ya cakulombolera ndipo na mwakuiphatisa basa, iye angawone kukhala ‘wakulungama’ ayai wakusaya kuphonya, wale omwe ambalatiza cikhulupiro na kubvera na pa nthawe ibodzi-dziyo acipitiriza kukhala muyeruzi wakulungama na wakusaya cakuphonya.—War 3:25, 26; onani INTEGRIDADE; PERFEIÇÃO.
(Ciyambo 17:3-5) Tenepo, Abramu adagodama acitsulimisa nkhope yace, ndipo Mulungu adapitiriza kulewalewa naye, aciti: 4 “Ona, mpangano wangu ndacita na iwepo, ndipo iwepo un’dzakhala baba wa mitundu mizinji. 5 Dzina lako lin’khala lini pomwe Abramu; koma lin’dzakhala Abalahamu, thangwe nin’dzakucitisa kukhala baba wa wanthu wa mitundu mizinji.
it-1 tsa. 31 ndi. 1
Abalahamu
Nthawe idapita. Ndipo akhali kale ku Kanani kwa magole khumi, ndipo Sara akhapitiriza kukhala ngomwa. Tenepo iye adawona kuti bzikhali bwino kupereka nyabasa wace wacikazi Hagari omwe akhali wa ku Edjipito kwa mwamuna wace kuti amubalire mwana. Abalahamu adabvuma. Tenepo, mu 1932 pomwe Kristu akhanati kubwera, pomwe Abalahamu akhana magole 86 yakubadwa, Jimayeri adabadwa. (Ciy 16:3, 15, 16) Idapita pomwe nthawe. Mu 1919, Kristu akhanati kubwera, pomwe Abalahamu akhana magole 99 yakubadwa, ninga cizindikiro ayai umboni bwa mpangano wakupambulika pakati pace na Abalahamu, Yahova adauza amuna wentse wa m’nyumba ya Abalahamu, kuti agwatidwe kakhanda kawo kakumaso. Pa nthawe ibodzi-bodziyo Yahova adacinja dzina lace lakuti Abramu licikhala Abalahamu, ‘thangwe nin’dzakucitisa kukhala baba wa wanthu wa mitundu mizinji.’ (Ciy 17:5, 9-27; War 4:11) Pambuyo pace, Abalahamu adatambira kumui kwace anjo atatu omwe akhadandendemerana na wanthu omwe akhaimira Yahova, acimuuza kuti Sara angadadzakhala na pathupi acibala mwana, inde, bzimwebzi bzingadadzacitika mu gole lakutewera lace!—Ciy 18:1-15.
(Ciyambo 17:15, 16) Tenepo Mulungu adauza Abalahamu kuti: “Pakulewa bza Sarai mkazi wako, leka kumucemera pomwe Sarai, thangwe rakuti dzina lace lin’dzakhala Sara. 16 Nin’dzamusimba iye, ndipo nin’dzakupasa mwana wa mwamuna kucokera mwa iye; nin’dzamusimba acikhala mai wa mitundu mizinji ya wanthu, na wamambo an’dzacokera mwa iye.”
Kufufudza Cuma Cauzimu
(Ciyambo 15:13, 14) Ndipo iye adauza Abramu kuti: “Khala na citsimikizo cakuti mbadwa zako zin’dzakhala ninga alendo m’dziko lomwe ndawo lini, ndipo mbumba ya m’dzikomo in’dzawayesa anyabasa na kuwaboneresa kwa magole 400. 14 Koma inepano ni’dzayeruza mtundu omwe an’dzautumikirawo, ndipo pambuyo pa bzimwebzo iwo an’dzacoka kumweko na bzinthu bzizinji.
it-1 matsa. 460-461
Bzomwe Bzidacitika mu Nthawe Zakusiyana-siyana
Yahova adauza Abramu (Abalahamu) kuti: ‘Khala na citsimikizo cakuti mbadwa zako zin’dzakhala ninga alendo m’dziko lomwe ndawo lini, ndipo mbumba ya m’dzikomo in’dzawayesa anyabasa na kuwaboneresa kwa magole 400.’ (Ciy 15:13; onanimbo pa Mabasa 7:6, 7.) Bzidalewedwa pomwe nyakutambira utaka wakulumbiridwa ayai ‘mbeu,’ omwe ni Izaki akhanati kubadwa. Mu 1932 pomwe Kristu akhanati kubwera, Hagari mtsikana wa ku Edjipito omwe akhali nyabasa wa Sara adabalira Abalahamu mwana wakucemeredwa Jimayeri, ndipo mu 1918 pomwe Kristu akhanati kubwera, Izaki adabadwa. (Ciy 16:16; 21:5) Tikabwerera magole 400 m’mbuyomo, kucokera pomwe Ajirayeri adafuluka ku Edjipito, komwe kudakhala kumala kwa ‘kuboneresedwa kwawo,’ (Ciy 15:14), bzimwebzi bzingatifikise mu gole la 1913 pomwe Kristau akhanati kubwera, ndipo pa nthaweyi, Izaki akhana magole maxanu yakubadwa. Bzikuwoneka kuti pinango-pentse ni pa nthawe imweyi pomwe Izaki adaletsedwa kumama, ndipo ninga mulendo ‘m’dziko lomwe’ likhali lini lace, adayamba kuboneresedwa na Jimayeri ninga momwe bzikhadalewedweratu kale mwa kumbamusinjirira, pomwe Jimayeri akhana magole 19 yakubadwa. (Ciy 21:8, 9) Napo kuti nthawe zino bzingawoneke ninga kuti kusinjirira komwe Jimayeri akhacitira Izaki omwe akhali nyakutambira utaka wa Abalahamu kukhali lini kwakuwawiratu kwene-kwene, koma bzikhali lini tenepo mu nthawe imweyire. Bzimwebzi bzikulatizidwa na momwe Sara adacitira bzinthu mwa kungingimira kwace, na kutawiriza komwe Mulungu adacitambo pakulewa bza nkhani ya Hagari na mwana wace Jimayeri omwe akhafunika kuti acoke ayende.(Ciy 21:10-13) Kunembedwa kwa cakucitikaci m’bzinembo, kukulatizambo kuyamba kwa magole 400 yomwe yakhadalewedweratu ya kuboneresedwa kwa mbadwe za Abalahamu yomwe yangadadzamala na kufuluka kwa Ajirayeri. —Wag 4:29.
(Ciyambo 15:16) Ndipo iwo an’dzabwerera kuno pa m’badwo wacinai, thangwe rakuti nthawe ya kulangidwa kwa mtundu wa Amori ikanati kukwana.”
it-1 tsa. 778 ndi. 4
Kufuluka
“Pa m’badwo wacinai.” Tin’funika kukumbukira kuti Yahova adauza Abalahamu kuti pa m’badwo wacinai, mbadwe zace zingadadzabwerera ku Kanani. (Ciy 15:16) Pa magole yentse yakukwana 430 kucokera pomwe mpangano wa Abalahamu udayamba kuphata basa mpaka pa nthawe yakufuluka, padapita mibadwo yakuposa minai; napo kuti moyo ukhali utali mu nthawe imweyire mwakubverana na bzinembo. Koma Ajirayeri adandokhala magole 215 basi ku Edjipito. Pambuyo pa Ajirayeri kupita mu Edjipito, mibadwo minai yomwe imbalewedwa, mwa ciratizo ingalewengedwe mwa kucokera mu dzinza libodzi basi la Ajirayeri, lomwe ni dzinza la Levi: (1) Levi, (2) Koate, (3) Amuramu, na (4) Mozeji.—Kuf 6:16, 18, 20.
17-23 FEVEREIRO
CUMA CA M’FALA LA MULUNGU | CIYAMBO 18-19
“‘Muyeruzi wa Dziko Lentse la Pantsi’ Adapfudza Sodoma na Gomora”
(Ciyambo 18:23-25) Ndipo Abalahamu adafendera acimubvunza kuti: “Kodi apa mun’pfudziratu wanthu wabwino pabodzi na wakuipa? 24 Tiyezezere kuti mu mzindamo mucigumanika wanthu wakulungama wakukwana 50. Kodi mun’dzalekerera lini mzindayo, ndipo mun’dzaupfudza pabodzi na wanthu 50 wakulungama omwe ali momwemowo? 25 Bzingakwanisike lini kwa imwepo kucita tenepoyo kupha munthu wakulungama pabodzi na wakuipa. Bzingakwanisike lini kuti nyakulungama awone bzakundendemera na nyakuipa. Imwepo mungacite lini bzimwebzo. Kodi Muyeruzi wa dziko lentse la pantsi an’dzacita lini mwakulungama?”
w17.04 tsa. 18 ndi. 1
Muyeruzi wa Dziko Lentse’ Ambacita Bzinthu Mwacirungamo Nthawe Zentse
NTHAWE inango Abalahamu adabvunza kuti: ‘Kodi Muyeruzi wa dziko lentse la pantsi an’dzacita lini bzinthu mwakulungama?’ (Ciyambo 18:25) Pomwe Abalahamu adacita mbvunzoyu sikuti akhapenukira, koma iye akhakhulupira kuti Yahova angadayeruza mizinda ya Sodoma na Gomora mwacirungamo. Iye akhadziwa kuti Yahova angadapha lini ‘munthu wakulungama pabodzi na wakuipa.’ Ndipo Yahova adabzilewa yekha kuti ni ‘Tsendwa, ndipo mabasa yace njakulungamiratu, pakuti njira zace zentse ni cirungamo. Iye ni Mulungu wakukhulupirika, ndipo si wakusaya kulungama. Iye ngwakulungama.’—Bzakutonga 31:19; 32:4.
(Ciyambo 18:32) Pakumalizira pace iye adati: “Yahova, ndaphata minyendo, lekani kukalipa nande, koma lekani ndilewelewe pomwe kabodzi basi: Tiyezezere kuti acikandowoneka wanthu khumi basi.” Iye adatawira aciti: “Nin’dzaupfudza lini thangwe ra wanthu khumiwo.”
Kupirira ni Kudikhira Kuti Bzinthu Bzin’khala Bwino
Yahova ni ciratizo cabwino kwene-kwene pa nkhani ya kupirira. (2 Pedru 3:15) Ndipo tikambawerenga m’Bibliya timbawona nkhani zakulewa momwe iye adalatizira kupirira. (Nehemiya 9:30; Zaiya 30:18) Kodi imwepo munkukumbukira momwe Yahova adacitira bzinthu pomwe Abalahamu adamubvunza kazinji kentse bza kupfudzidwa kwa Sodoma? Yahova alibe kugwata mafala pomwe Abalahamu akhalewalewa. M’mbuto mwace iye adatetekera mibvunzo yentse yomwe Abalahamu akhacita. Ndipo Yahova adalatiza kuti akhatetekera bzomwe Abalahamu akhafotokoza, ndipo adamutsimikizira kuti angadakapfudza lini Sodoma angadagumana wanthu khumi wakukhulupirika mu mzindamo. (Ciyambo 18:22-33) Yahova nthawe zentse ambatetekera mwa kupirira ndipo ambacita lini bzinthu mwakupitirira malire!
(Ciyambo 19:24, 25) Tenepo Yahova adabvumbisa enxofre na moto kucokera kudzaulu, bzicibvumbira Sodoma na Gomora. 25 Iye adapfudza mizindayi, napo cigawo centseco na wanthu wentse wa mizindayi pabodzi na bzakumera bza pantsi.
Kufufudza Cuma Cauzimu
(Ciyambo 18:1) Pambuyo pace Yahova adawonekera kwa iye pakati pa miti mikulu-mikulu ya ku Mamure pomwe akhadakhala pa msuwo wa tendi lace, pa nthawe ya masikati yomwe ikhali yakupsa kwene-kwene ya ntsikuyo.
(Ciyambo 18:22) Ndipo amunawo adacoka aciyendera ku mphimpha ya ku Sodoma, koma Yahova adasala na Abalahamu.
w88 15/5 tsa. 23 ndi. 4-5
Alipo Omwe Adawona Kale Mulungu?
Tsapano mpsakukwanisika kubvesesa thangwe race Abalahamu adalewa-lewa na anjo ule omwe akhaimira Mulungu ninga kuti akhalewa-lewa na Yahova Mulungu caiyeyo. Pakuti anjo ule adalewa-lewa na Abalahamu ndendende ninga momwe Mulungu akhafunira ndipo nakuti anjoyu akhaimira Mulunguyo, tenepo Bibliya lingalewe kuti: ‘Yahova’ adamuwonekera.—Ciyambo 18:1.
Ndokumbukirani kuti anjo omwe akhambaimira Mulungu angadalewa-lewa mafala ndendende ninga momwe mtedwe ayai radio ingafikisire mafala yathu kwa munthu winango. Tenepo, mpsakubveseseka kuti ni mwa njira iponi Abalahamu, Mozeji, Manowa na winango adalewa-lewera na anjo omwe akhana thupi laumunthu ninga kuti akhalewa-lewa na Mulungu caiyeyo. Napo kuti iwo akhawona anjowo na umbiri bwa Yahova mwa iwo, koma iwo angadakwanisa lini kumuwona Mulungu caiyeyo. Tenepo, bzimwebzi bzikupitana lini na mafala ya Juwau yomwe yambati: ‘Palibe munthu omwe adawona kale Mulungu’ (Juwau 1:18) Amuna amwewa adandowona anjo zomwe zikhaimira Mulungu, sikuti Mulungu caiyeyo.
(Ciyambo 19:26) Koma mkazi wa Loti omwe akhali m’mbuyo mwace, adaceukira m’mbuyo, ndipo iye adasanduka culu ca munyu.
Thandizani Winango Kulimbana na Thupo Lawo
Loti adacita cakusankhula cakuipa pomwe adayenda kukakhala mu mzinda wa Sodoma, thangwe wanthu wa mu mzindayo akhacita bzinthu bza unzazi. (Werengani 2 Pedru 2:7, 8.) Mzindayo ukhali wa citukuko, koma Loti adagumana na mabvuto mazinji thangwe ra kuyenda kumweko. (Ciyambo 13:8-13; 14:12) Ndipo bzinkuwoneka kuti mkazi wace akhadafika pakufuna kwene-kwene mzindayo ayai wanthu winango omwe akhakhala nawo m’mwemo. Ndipopa pomwe Yahova adafuna kupfudza mzindayo mwakucita kuutentha na moto wa enxofre, mkazaceyo alibe kubvera cenjezo lomwe Yahova adapereka ndipo adafera m’mwemo. Kumbukiranimbo bza wana awiri wacikazi wa Loti. Iwo akhali pa umakhadzi na amuna omwe adaferambo mu mzindamo. Tenepo, Loti adaluza nyumba yace, bzinthu bzomwe akhanabzo, ndipo cinthu comwe cidamuwawa kwene-kwene kuposa bzense ni kufedwa mkazace. (Ciyambo 19:12-14, 17, 26) Pa nthawe yakunesayi, kodi Yahova adaleka kukhala wakupirira na Loti? Ne na pang’onopo.
24 FEVEREIRO–1 MARÇO
CUMA CA M’FALA LA MULUNGU | CIYAMBO 20-21
“Yahova Ambakwanirisa Bzomwe Ambalewa”
(Ciyambo 21:1-3) Ndipo Yahova adakumbukira Sara ninga momwe akhadamuuzira kale, ndipo Yahovayo adacitira Sara ninga momwe akhadamulumbirira. 2 Tenepo, Sara adakhala na pathupi acibalira Abalahamu mwana pa nthawe ya unkhalamba bwace, ndipo bzidacitika pa nthawe yomwe Yahova akhadamulumbira ire. 3 Tenepo, Abalahamu adapasa mwana wace, omwe Sara adamubalirayo dzina lakuti Izaki.
(Ciyambo 21:5-7) Abalahamu akhana magole 100 yakubadwa pomwe mwana wace Izaki, adabadwa. 6 Tenepo, Sara adalewa kuti: “Mulungu andipasa thangwe rakuti ndisekere; ali-wentse omwe an’bva bzimwebzi an’dzaseka nande pabodzi.” 7 Ndipo Sara adathumizira kulewa kuti: “Mbani omwe akhadziwa kuti ‘Sara angadadzamamisa mwana’, acimuuza Abalahamu bzimwebzo? Tsono onani, ndamuberekera mwana Abalahamu pa unkhalamba bwace.”
(Ciyambo 21:10-12) Tenepo, Sara adati kwa Abalahamu: ‘Muthotheni kapoloyu pabodzi na mwana waceyu, pakuti iye an’dzatambira lini utaka pabodzi na mwana wangu Izaki!’ 11 Tsono Abalahamu alibe kudekedwa nabzo bzomwe Sara akhadalewa thangwera mwana wace. 12 Tsono Mulungu adati kwa Abalahamu: ‘Leka kuipidwa na bzomwe Sara ankulewa bza mwana wako pabodzi na mdzakazi wako. Mutetekere, pakuti womwe an’dzacemeredwa mbeu yako, an’dzacokera kwa Izaki.
(Ciyambo 21:14) Tenepo Abalahamu adabesera acitenga mkate na combo ca madzi ndipo adabzipereka kuna Hagari acimuikhira paphewa lace ndipo adamuuza kuti ayende na mulumbwanayo. Tenepo iye adayenda acimbandodzungaira m’dambo la Beriseba.
Kufufudza Cuma Cauzimu
(Ciyambo 20:12) Kusiya bzimwebzi, iye ni m’bale wangudi, mwana wa baba wangu, koma sikuti mwana wa mai wangu, ndipo iye adadzakhala mkazi wangu.
(Ciyambo 21:33) Pambuyo pa bzimwebzi, iye adabzala muti wa tamarigera ku Beriseba, ndipo pa mbutoyi adacemera pa dzina la Yahova, omwe ni Mulungu wa nthawe zentse.
w89 1/7 tsa. 20 ndi. 9
Abalahamu—Ciratizo kwa Wentse Omwe Ambafuna Kukhala pa Uxamwali na Mulungu
Abramu adalatiza pomwe cikhulupiro mwa njira inango. Ninga momwe bzimbalatizidwira: ‘Iye adakonzera Yahova mphatso pamwepo.’ (Ciyambo 12:7) Nakuti, fala lacihebereu lakuti ‘mphatso’ limbathandauza ‘mbuto yakuperekera ntsembe’. Ndipo kutsogolo kwace Abalahamu adzabwerezera kucita bzibodzi-bodzibzi m’mbuto zinango za m’dzikomo. Kuthumizira bzimwebzi, iye akhambacemera ‘pa dzina la Yahova’ (Ciyambo 12:8; 13:18; 21:33) Fala Lacihebereu lakuti ‘kucemera pa dzina’ limbathandauzambo ‘kufotokoza (kupalizira) dzina.’ Adzinza wa Abalahamu pabodzi na akanani mwakusaya kupenukira akhambabva pomwe iye akhambapalizira bza Mulungu wace, Yahova. (Ciyambo 14:22-24) Mu njira ibodzi-bodziyi, wentse wale omwe ambafuna kukhala pa uxamwali na Mulungu m’ntsiku zino, an’funika kumbacemera mu dzina lace na cikhulupiro. Bzimwebzi bzimbaphatanidza, kucita upalizi, Mwa mwakupitiriza ‘kupereka kwa Mulungu ntsembe za citumbizo, zomwe ni bzisapo bza miromo yathu yomwe imbadziwisa padeca dzina lace.’—Waheb 13:15; War 10:10.