Mareferentsiya ya Kabukhu ka Mitsonkhano ka Moyo Wathu na Utumiki
3-9 MAIO
CUMA CA M’FALA LA MULUNGU | MIREWENGO 27-29
“Tewezerani Kusaya Tsankhulo Kwa Yahova”
Cuma Cauzimu
it-2 tsa. 528 ndi. 5
Ntsembe
Ntsembe za bzakumwa. Ntsembe za bzakumwa zikhambaperekedwa pabodzi na ntsembe zinango, maka-maka pambuyo pa Ajirayeri kukhazikika m’dziko lomwe Mulungu akhadawauza kuti angadawapasa. (Mirew 15:2, 5, 8-10) Ntsembe za bzakumwa zimwezi ikhali vinyu (‘cakumwa cakuledzeresa’) yomwe ikhambathululidwa pa guwa la ntsembe. (Mirew 28:7, 14; ndendemezerani na Kufuluka 30:9; Mirew 15:10.) Mpostolo Paulo adanembera Akristau wa ku Firipo kuti: ‘Napo ndikubzipereka ninga ntsembe yacakumwa, yomwe ikuthiridwa pa ntsembe na pa basa la kutumikira wanthu mwa kutsogoledwa na cikhulupiro, ndine wakukondwa.’ Pamwepa mpostoloyu adandendemezera ntsembe ya cakumwa na kubzipereka kwace kuti athandize abale wace Wacikristau. (Waf 2:17) Pomwe akhadasala pang’ono kufa, iye adanembera Timotio kuti: ‘Pakuti inepano ndikubzipereka kale ninga ntsembe yacakumwa, ndipo nthawe yakuti nditsudzuke iri pafupi.’—2Tim 4:6.
10-16 MAIO
CUMA CA M’FALA LA MULUNGU | MIREWENGO 30-31
“Mbatewezani Bzomwe Mudalumbira”
it-2 tsa. 1162
Lumbiro
Malumbiro Yakhali Yakubzifunira, Tsono Angayacita Akhafunika Kuyateweza. Malumbiro yakhali yakubzifunira. Napo bzikhali tenepo, mwamuna akalumbira kucita cinthu, mwakubverana na lamulo la Mulungu, iye akhafunika kucita bzomwe alumbirabzo bzinese bzitani. Tenepo munthu akabzilumbirira yekha akhalatiza kuti angadasaya kukwanisa bzomwe alumbirabzo angadalipira na moyo wace. (Mirew 30:2; onanimbo War 1:31, 32.) Munthu akalumbira moyo wace umbakhala pa ngozi, ndipopa bzinembo bzimbaticenjeza kuti tin’funika kusamala pomwe tikanati kulumbira ndipo tin’funikambo kuwonesesa penu tin’dzakwanisa kucita bzomwe tikufuna kulumbirabzo. Cakutonga cikhalewa kuti: ‘Ukalumbira kucita cinthu kwa Yahova . . . Mulungu wako, an’dzakusunda, ndipo ukasaya kucicita, in’dzakhala pikado kwa iwepo. Tsono ukasaya kucita lumbiro un’dzakhala lini na pikado.’—Bzak 23:21, 22.
w17 04 tsa. 3 ndi. 2
Mbatewezani Bzomwe Mumbapicira
Bibliya limbalewa kuti piciro lakuperekedwa kwa Mulungu ni cinthu cakufunika kwene-kwene. Mwa ciratizo, munthu angapicire kuna Yahova kuti an’dzacita cinthu cinango, kupereka mphaso inango, kupita basa la mtundu winango ayai kutcenkha kucita cinthu cinango. Munthu ambacita mapiciro mwakucita kufuna, sikuti mwakungingimizidwa. Tenepo, munthu akasankhula kucita piciro, Yahova ambawona cakusankhula caceco kukhala cakufunika kwene-kwene ndipo iye ambafuna kuti munthuyo ateweze piciro lacero. M’Bibliya, piciro ni cinthu cakufunika kwene-kwene ndipo liri ninga lumbiro. Lumbiro ni piciro lomwe munthu ambasankhula kucita ayai kusaya kucita cinthu cinango. (Ciyambo 14:22, 23; Wahebereu 6:16, 17) Bibliya limbalewa kuti tin’funika kuwona mapiciro yomwe timbacita kwa Mulungu kukhala yakufunika kwene-kwene.
Cuma Cauzimu
it-2 tsa. 28 ndi. 1
Djafeti
Munthu angadaperekedwa kwa Yahova kuti acite mabasa pa mbuto yakupambulika. Abereki ndiwo omwe akhana ugo bwakucita bzimwebzi. Samuyeri adakhala m’bodzi wa wanthu amwewa. Pomwe akhanati kubadwa, mayi wace Ana, adalumbira kuti iye angadadzakatumikira ku tendi la mkonkhano. Bayace Elikana adabvuma lumbiroli. Pomwe adandoti lekeni kumama, mayi wace, Ana, adakamupereka ku tendi la mkonkhano. Pomwe akhayenda naye, adayenda na cifuwo kuti cikaperekedwe ntsembe. (1Sam 1:11, 22-28; 2:11) Samusoni akhali mwana munango omwe adaperekedwambo kwa Mulungu kuti akhale m’Nazireu.—Way 13:2-5, 11-14; ndendemezerani na ugo bomwe pai akhanabo pa mwana wace wacikazi ninga momwe bzidanembedwera pa Mirew 30:3-5, 16.
17-23 MAIO
CUMA CA M’FALA LA MULUNGU | MIREWENGO 32-33
“Mukathamangise Mbumba Yentse ya m’Dzikolo”
it-1 tsa. 404 ndi. 2
Kanani
Djosuwe adacita bzinthu mwanzeru ndipo adacita bzentse mwakubverana na mafala yomwe Yahova adauza Mozeji yakulewa bza kupfudza Akanani. (Djos 11:15) Tsono Ajirayeri adasiya kubvera utsogoleri bwace bwabwino ndipo adasiya kupfudza wanthu omwe akhadzonga dzikolo. Akananiwo adapitiriza kukhala na Ajirayeriwo, bzimwebzi bzidacitisa kuti Ajirayeriwo atakanyidwe na makhalidwe yawo. Mwakusaya kupenukira bzimwebzi bzidacitisambo kuti wanthu azinji afe (ndipo m’dzikomo mukhacitikambo ciwembo, upombo na kunamata bzifanikiso). Tsono bzimwebzi bzingadacitika lini, bzingakhala kuti Ajirayeriwo adabvera lamulo lakupfudza Akanani wentse. (Mirew 33:55, 56; Way 2:1-3, 11-23; Psal 106:34-43) Yahova akhadacenjeza kale Ajirayeri kuti angadacita lini tsankhulo pakulanga Akanani penu Ajirayeriwo angadayamba kubverana na Akananiwo, mwa kumbacita mbverano wa malowozi, kusanganiza kunamata kwa kunama na kwacadidi, kutewezera makhalidwe yawo yakuipa pabodzi na bzizolowezi bzawo. Bzimwebzi bzingadacitisa kuti iwo abzibweresere okha cirango ca kupfudzidwa ndipo bzingadacitisambo kuti ‘asanzidwe na dzikolo.’—Kuf 23:32, 33; 34:12-17; Mwam 18:26-30; Bzak 7:2-5, 25, 26.
Cuma Cauzimu
it-1 tsa. 359 ndi. 2
Malire
Pambuyo pa mayereyo kulatiza mbuto yomwe dzinza liri-lentse lin’khala, bzikhafunika kulewa kuti dzikolo lin’khala likulu tani mwakuphatisa basa njira yaciwiri, yomwe ni kuwona kuwanda kwa wanthu wa m’dzinzalo. ‘Mun’funika kukagawanisa dzikolo kwa mabanja yanu mwakuphatisa basa mayere. Kwa dzinza lomwe lina wanthu azinji, imwepo mun’funika kuthumizira utaka bwawo ndipo kwa dzinza lomwe lina wanthu pang’ono mun’funika kucepesa utaka bwawo. Utaka bwa ali-wentse bunikhala komwe mayere yati yalatize.’ (Mirew 33:54) Mbuto yomwe dzinza likhapasidwa kuti likhale mwakucita mayere, ikhapitiriza kukhala ibodzi-bodzi, koma bzikhakwanisika kuicepesa ayai kuikuza. Tenepo, pomwe adawona kuti mbuto ya dzinza la Djuda ikhali ikulu kwene-kwene, adaigwata acipereka mbali inangoyo kwa dzinza la Simiyoni.—Djos 19:9.
24-30 MAIO
CUMA CA M’FALA LA MULUNGU | MIREWENGO 34-36
“Mbathawirani kwa Yahova”
Kodi Mumbawona Yahova Ninga Pakuthawira Panu?
Tsono n’ciyani comwe cikhacitika Mjirayeri akapha munthu mwa ngozi? Napo kuti iye wapha munthuyo mwa ngozi, iye akhakhala na mulandu thangwe ra kupha munthu wakusaya kuphonya. (Ciyambo 9:5) Koma pa cakucitika ninga cimweci, Yahova adalewa kuti nyakuphayo akhafunika kucitiridwa nsisi. Iye akhafunika kuthawa nyakubwezera mulopa ule, aciyenda ku mzinda ubodzi pa mizinda mitanthatu yakuthawira yomwe ikhalipo. Akapita mu mzindamo iye akhakhala wakukhotcerereka. Tsono iye akhafunika kukhala m’mwemo mpaka kufa kwa mkulu wa ansembe.—Mirewengo 35:15, 28.
Kodi Mumbawona Yahova Ninga Pakuthawira Panu?
Mjirayeri akapha munthu mwa ngozi, akhafunika kuthawira ku mzinda wakuthawira, ‘acikafotokozera nkhaniyo’ akulu-akulu wa kumweko pa cipata ca mzindayo. Ndipo akulu-akuluwo akhafunika kumutambira. (Djosuwe 20:4) Pambuyo pa nsiku zing’ono-ng’ono, akulu-akuluwo akhafunika kumubwezera ku mzinda omwe iye adaphera munthuyo, kuti akatongedwe na akulu-akulu wa kumweko. (Werengani Mirewengo 35:24, 25.) Akulu-akuluwo akawona kuti infayo idacitika mwa ngozi, akhamubwezera pomwe ku mzinda wakuthawira omwe iye akhadathawirayo.
Kodi Mumbawona Yahova Ninga Pakuthawira Panu?
Nyakupha munthu mwa ngozi ule akhakhala wakukhotcerereka akapita mu mzinda wakuthawira. Pakulewa bza mizindayi, Yahova adati: ‘Mizindayo in’dzakhala yakuti mumbathawire.’ (Djosuwe 20:2, 3) Yahova akhafuna lini kuti munthuyo adzatongedwe pomwe pa nkhani ibodzi-bodziyo. Ndipo nyakubwezera mulopa akhabvumizidwa lini kupita mu mzinda wakuthawirayo kuti akamuphe. Nyakuphayo akapita mu mzindamo akhakhotcereredwa na Yahova ndipo akhakhala wakutsudzuka. Iye akhaphata basa mu mzindamo, kuthandiza winango na kutumikira Yahova mwa mtendere. Ndipo akhakhalambo na moyo wabwino na wakukondwa!
Cuma Cauzimu
w91 15/2 tsa. 13 ndi. 13
Ntsembe ya Cakulombolera ya Wentse
Adamu na Eva alibe kugumana phindu na ntsembe ya cakulombolera. Cakutonga ca Mozeji cikhana nfundo yakuti: ‘Lekani kubvuma kutambira cakulombolera ca moyo wa munthu wakupha mwanzace omwe akufunikira kuphedwa.’ (Mirewengo 35:31) Adamu alibe kupumpsidwa tsono iye adaphonya utowa. (1 Timotio 2:14) Bzidakhala ninga kupha wana wace thangwe rakuti wanawo adatengera kuperewera kwace, bzimwebzi bzidacitisa kuti iwo ambafe. Kulewa cadidi, Adamu akhafunikira kufa, pakuti iye ninga munthu wakulungamiratu adasankhula kuphonya utowa lamulo la Mulungu. Yahova angadaphatisa basa cakulombolera kuti apulumusembo Adamu, iye angadakhala akuphonya mitemo yace yakulungama. Tsono kulipira pikado za Adamu kumbamalisa ciyeruzo ca infa kwa wana wa Adamu! (Waroma 5:16) Mwalamulo, mphanvu ya pikado ya Adamu idacosedwa kucokera ku muzi wace. Mpulumusi adafera wanthu wentse, acibonera thangwe ra wana wentse wa Adamu.—Ahebereu 2:9; 2 Wakolinto 5:21; 1 Pedru 2:24.
31 MAIO–6 JUNHO
CUMA CA M’FALA LA MULUNGU | BZAKUTONGA 1-2
“Kutonga ni Kwa Mulungu”
w96 15/3 tsa. 23 ndi. 1
Yahova Ambafuna Cirungamo
Akulu wa gwere ana udindo bwa kutonga pikado zikulu-zikulu. (1 Wakolinto 5:12, 13) Pakucita bzimwebzi iwo ambakumbukira kuti Mulungu ambacita cirungamo, tsono ambalatizambo ntsisi bzikafunikira. Pakakhala palibe mathangwe yakulatizira ntsisi, izo zimbalatizidwa lini. Mwa ciratizo munthu omwe akucita pikado tsono akukungula lini, iye an’funika lini kulatizidwa ntsisi. Tsono akulu ambacosa lini munthu mu gwere pakufuna kubwezera. M’mbuto mwace iwo ambadikhirira kuti munthuyo akacosedwa akungule acifuna kubwerera. (Ndendemezerani na Zakiyeri 18:23.) Mwakutsogoleredwa na Kristu, akulu wa gwere ambateweza cirungamo, ndipo thangwe ra bzimwebzi iwo ambakhala ninga ‘mbuto yakuthawira conzi.’ (Zaiya 32:1, 2) Ndipopa iwo an’funika kucita bzinthu mwakusaya tsankhulo na mwacikatikati.—Bzakutonga 1:16, 17.
7-13 JUNHO
CUMA CA M’FALA LA MULUNGU | BZAKUTONGA 3-4
“Malamulo ya Yahova Nganzeru na Yakulungama”
it-2 tsa. 1140 ndi. 5
Kubvesesa Bzinthu
Kupfunza Fala la Mulungu pabodzi na mitemo yace na kubziphatisa basa pa moyo wa ntsiku na ntsiku, bzimbacitisa munthu kukhala wanzeru kuposa wale omwe ambamupfunzisa na kudziwa bzinthu bzizinji kuposa acikulire. (Psal 119:99, 100, 130; ndendemezerani na Luka 2:46, 47.) Bziri tenepo thangwe ra kuti nzeru na kubvesesa bzinthu bzimbacokera m’malamulo yakucena na yakulungama ya Yahova. Ndipopa pomwe Ajirayeri akhabvera malamuloyo, wanthu wa mitundu inango akhawawona kuti iwo akhali ‘wanzeru ndipo akhabvesesa bzinthu.’ (Bzak 4:5-8; Psal 111:7, 8, 10; ndendemezerani na 1Wam 2:3.) Munthu omwe ambadziwa bzinthu ambazindikira kuti an’funika kuteweza Fala la Mulungu nthawe zentse. Iye ambawonesesa penu bzomwe akucita bzikubverana na Fala la Mulungu ndipo ambakumbira thandizo la Mulungu. (Psal 119:169) Iye ambabvuma kuti Fala la Mulungu limutokonye (Mat 13:19-23), ambanemba mafala ya Mulunguyo mu mtima mwace (Mim 3:3-6; 7:1-4) ndipo iye ambafika pakuwenga ‘njira iri-yentse yacinyengo’ (Psal 119:104). Pomwe Mwana wa Mulungu akhali pantsi pano, iye adalatiza kuti akhabvesesa bzinthu mwa kusaya kulamba kufa pamuti wakuzunzidwira thangwe Bzinembo bzingadakwanisa pa kufa mwa njira imweyi.—Mat 26:51-54.
w99 1/11 tsa. 20 ndi. 6-7
Pakakhala Pana Wanthu Azinji Wakupasa
Thangwe ra kudabwa na bzomwe adabva na kuwona mambo-mkaziyo adatawira kuti: ‘Wakukondwa ni atumiki wanuwa omwe ambakutumikirani pa maso panu nthawe zentse na kumbabva nzeru zanu.’ (1 Wamambo 10:4-8) Iye alibe kulewa kuti atumiki wa Salomau akhali wakukondwa thangwe akhali pa mbuto yacuma, napo bzikhalidi tenepo. M’mbuto mwace, atumiki wa Salomau akhali wakusimbidwa thangwe nthawe zentse akhabva nzeru zomwe Salomau adapasidwa na Mulungu. Mambo-mkaziyu ni ciratizo cabwino kwene-kwene kwa atumiki wa Yahova ntsiku zino, omwe ambabva nzeru za Mulengi caiyeyo na za Mwana wace Jezu Kristu.
Mafala yomwe mambo-mkazi adauza Salomau ngakudabwisa, iye adati: ‘Atumbizike Yahova Mulungu wanu.’ (1 Wamambo 10:9) Iye adawonadi kuti Yahova ndiye omwe adapasa Salomau nzeru pabodzi na cuma. Bzimwebzi bzikubverana na bzomwe Yahova akhadauza kale Ajirayeri. Iye adati: ‘Tewezani mitemo yangu,’ ‘thangwe mukacita bzimwebzi mun’dzakhala wanthu wanzeru na wakuzindikira bzinthu, pamaso pa wanthu wa mitundu omwe an’dzabva mitemo imweyi ndipo iwo an’dzalewa kuti: “Mtundu ukulu umweyu una wanthu wanzeru na wakuzindikira bzinthu.”’—Bzakutonga 4:5-7.
14-20 JUNHO
CUMA CA M’FALA LA MULUNGU | BZAKUTONGA 5-6
“Pfunzisani Wana Wanu Kuti Ambafune Yahova”
Cuma Cauzimu
Kodi Cakutonga ca Mozeji Cikhalatiza Tani Lufoyi na Cirungamo ca Yahova?
Pfunziro: Yahova ambawona mu mtima, ayai unthu bwathu bwa mkati sikuti mawonekedwe yathu yokha yakunja. (1 Samuweri 16:7) Palibe makumbukidwe na bzicito bzomwe bzingabisike kwa iye. Ndipo cakutsangalaza n’cakuti iye ambanyang’ana na kutilimbisa pa bzabwino bzomwe timbacita. Tsono iye ambafuna kuti tidziwe makumbukidwe yakuipa na kumbayatcenkha madzi yakali m’mabondo.—2 Nkhani 16:9; Mateu 5:27-30.
21-27 JUNHO
CUMA CA M’FALA LA MULUNGU | BZAKUTONGA 7-8
“Mun’funika Lini Kucita Nawo Mbverano Uli-wentse wa Malowozi”
28 JUNHO–4 JULHO
CUMA CA M’FALA LA MULUNGU | BZAKUTONGA 9-10
“Kodi n’Ciyani Comwe Yahova Mulungu Wanu Akufuna Kwa Imwepo?”
Cuma Cauzimu
it-1 tsa. 103
Mbadwe za Anaki
Mtundu wa wanthu omwe ukhali bzinzonzontali ndipo ukhakhala m’bzigawo bza m’mapiri mu dziko la Kanani na m’bzigawo bza m’mphepete mwa nyanza, maka-maka kummwera kwa bzigawobzo (sul). Pa nthawe inango, amuna wakubvekera wa mbadwe za Anaki omwe ni Ahimani, Sesai na Talimayi akhakhala ku Hebroni. (Mirew 13:22) Ni kumweko komwe azondi 12 wacihebereu adawona kakuyamba mbadwe za Anaki. Ndipo azondi khumi adakalewa bzinthu bzakugopswa pakulewa bza wanthu amwewa mwa kulewa kuti iwo akhali mbadwe za Anefiri omwe adakhala na moyo pomwe cigumula cikhanati kucitika ndipo pakundendemezera na iwo, Ajirayeri akhali ninga ‘tubziwala.’ (Mirew 13:28-33; Bzak 1:28) Thangwe ra misinkhu yawo, iwo akhandemezedwa na mitundu mikulu-mikulu ninga ya Aemimu na Arefaimu. Thangwe ra mphanvu zawo padalewedwa mwani wakuti: ‘Mbani angakhwimike kumenyana na wana wa Anaki?’—Bzak 2:10, 11, 20, 21; 9:1-3.