Kampanya Yakupambulika Yakuyambisa Mapfunziro ya Bibliya mu Setembro

M’mwezi wa Setembro, tin’dzaphata basa na nyongo kuti tidzayambise mapfunziro ya Bibliya kwa mwenekaciro mui ali-wentse, mwakuphatisa basa broxura lakuti Khalani na Moyo Wakukondwa Mpaka Kale-kale!. Apalizi angadzacite upainiya bwakuthandiza acisankhula kupereka maora 30 pa mwezi. Kodi tin’dzacita tani pa kampanya yakupambulika imweyi?

• Pa Ulendo Bwakuyamba: Phatisani basa tsamba lakumalizira la broxurali kuti mucitise munthu kufuna kudziwa bzizinji, ndipo mulatizeni momwe pfunzirolo limbacitikira. Kumbukirani wale omwe adalatiza kuti akufuna kudziwa bzizinji, pabodzi na maulendo yakubwereza. Napo kuti iwo pakuyamba adalamba kupfunza Bibliya, pinango angakomedwe na njira ipsa yakupfunza Bibliya na broxurali. Mabroxuraya yan’funika lini kusiidwa pamui pa wanthu omwe an’funa lini kudziwa bzizinji ayai kuwatumizira mu envelope. Komiti ya Utumiki ya Gwere ingakonze mitsonkhano inango ya utumiki m’mwezi umweyu.

• Mipata Minango: Penu gwere lanu limbaphatisa basa tungolo twa mabukhu, latizani broxura lakuti Khalani na Moyo Wakukondwa Mpaka Kale-kale!. Uzani wanthu omwe akufuna broxurali kuti akalitenga, tingapfunze nawo Bibliya fovolo. Mulatizeni momwe timbacitira pfunziro la Bibliya ayai mungadzamulatize nthawe inango. Nyakunyang’anira utumiki angasankhule apalizi kuti ayende kukapalizira m’mbuto za malonda na kuyambisa mapfunziro ya Bibliya. Mungayambe kupfunza Bibliya na anzanu wa ku basa ayai wanthu omwe mungaceze nawo pomwe mukucita upalizi bwakusaya kulinganizika.

Jezu adatiuza kuti ‘tikapfunzise wanthu . . . kuti akhale anyakupfunza wace.’ (Mat 28:19, 20) Tikufunisisa kuti kampanya imweyi itithandize kucita bzimwebzi, mwakuphatisa basa broxura lakuti Khalani na Moyo Wakukondwa Mpaka Kale-kale!.