PFUNZIRO 02

Bibliya Limbalewa Kuti Bzinthu Bzin’dzakhala Bwino Kutsogolo

Bukhu Lakucita Kudindidwa

Wanthu azinji pa dziko lentse la pantsi, akubonera na mabvuto yomwe yakuwacitisa kukhala wakusunama, wathupo na wakuwawidwa. Kodi bzimwebzi bzidakucitikiranimbo kale? Pinango imwepo mukubonera na matenda ayai mukubonera na msunamo thangwe ra kufedwa m’bale wanu. Pinango mungabzibvunze kuti: ‘Kodi mabvutoya yan’dzamala?’ Bibliya lina mtawiro wa mbvunzo umweyu.

1. Kodi ni cidikhiro ciponi cakutsogolo comwe Bibliya limbalewa?

Bibliya limbalewa thangwe race pa dzikoli padzala na mabvuto. Tsono iro limbatiuzambo bzinthu bzabwino ibzi: Mabvuto yentse yanimala tsapanopapa. Mafala ya m’Bibliya yangakucitiseni kukhala na ‘cidikhiro cabwino na tsogolo labwino.’ (Werengani Jeremiya 29:11, 12.) Mafalaya yambatithandiza kupirira mabvuto na kukhala na makumbukidwe yabwino. Bibliya limbalewambo kuti tingakhale wakukondwa mpaka kale-kale.

2. Kodi Bibliya limbalewa kuti bzinthu bzin’dzakhala tani kutsogoloku?

Bibliya limbalewa kuti ‘infa in’dzawoneka lini pomwe, pan’dzawoneka lini pomwe kulira, ayai kubuula ne kuwawidwa.’ (Werengani Cibvumbulutso 21:4.) Mabvuto yomwe yambacitisa wanthu kubonera ntsiku zino yomwe ni kusauka, kusaya cirungamo, matenda na infa, yan’dzawoneka lini pomwe. Bibliya limbalewa kuti wanthu an’dzakondwa na moyo wakusaya kumala m’Paraizo pa dziko la pantsi pano.

3. Kodi n’ciyani comwe cimbakutsimikizirani kuti bzentse bzomwe Bibliya limbalewa bzin’dzacitikadi?

Wanthu azinji ambafuna kuti bzinthu bzabwino bziwacitikire, koma iwo alibe citsimikizo cakuti bzin’dzacitikadi. Tsono bzomwe Bibliya limbalewa mpsakusiyana na bzomwe wanthu ambakumbuka. Imwepo mungakhale na citsimikizo cakuti bzentse bzomwe iro limbalewa bzin’dzacitikadi mukambapfunza ‘Bzinembo mwakusamala.’ (Mabasa 17:11) Kupfunza Bibliya kungakuthandizeni kuwona penu mungakhulupire bzomwe Bibliya limbalewa bza kutsogolo.

FUFUDZANI BZINANGO

Onani bzinthu bzinango bzomwe Bibliya limbalewa kuti bzin’dzacitika kutsogolo. Onanimbo momwe cidikhiro ca m’Bibliya cikuthandizira wanthu azinji ntsiku zino.

Bzithunzi-thunzi: Kumbuyo kwa bzithunzi-thunzi bzomwe bzikuwoneka bwino kuna bzinango bzomwe bzikulatiza mabvuto yomwe tikubonera nayo ntsiku zino. Ndipo bzomwe bziri kutsogolobzi bzikulatiza momwe moyo un’dzakhalira wakudekeza kutsogoloku.

4. Bibliya limbalewa kuti tingakhale na moyo wakusaya kumala na wakusaya mabvuto

Bzomwe bziri m’nyantsimu bzikulatiza bzomwe Bibliya limbalewa kuti bzin’dzacitika kutsogolo. Mpsiponi bzomwe mwakomedwa nabzo kwene-kwene? Ndipo thangwe ranyi?

Werengani bzinembo bzomwe bziri kutsogolo kwa bzinthu bzomwe bzin’dzacitika, ndipo mukamala cezeranani mibvunzo yakutewerayi:

Kodi mukuwona kuti bzinembobzi bzingakuthandizeni kukhala na cidikhiro? Kodi mukuwona kuti bzingathandize m’bale wanu ayai xamwali wanu?

Yezezerani kubziwona kuti muli m’dziko lomwe

PALIBE OMWE . . .	WENTSE . . .
an’dzawawidwa, an’dzabonera thangwe ra kukalamba ayai infa.—Zaiya 25:8.	an’dzawona pomwe abale wawo omwe akhadafa acikhala na moyo pa dziko la pantsi pano.—Juwau 5:28, 29.
an’dzaduwala ayai kupunduka.—Zaiya 33:24; 35:5, 6.	an’dzakhala na thanzi labwino na mphanvu.—Djobi 33:25.
an’dzacitiridwa bzinthu mwakusaya cirungamo.—Zaiya 32:16, 17.	an’dzakhala na cakudya cizinji, nyumba yabwino na basa lomwe lin’dzawakondwesa.—Psalymo 72:16; Zaiya 65:21, 22.
an’dzabonera thangwe ra nkhondo.—Psalymo 46:9.	an’dzadziwa mtendere wacadidi.—Psalymo 37:11.
an’dzasunama thangwe ra kukumbukira bzinthu bzakuipa.—Zaiya 65:17.	an’dzakhala na moyo wabwino na wakusaya kumala.—Psalymo 37:29.

Mwana omwe akhaduwala tsapano ana thanzi labwino ndipo akumbatira mai wace.

Mwamuna omwe akhali mkhalamba tsapano ni tswaka ndipo akugwinya cibara comwe cina bzisapo.

5. Bzomwe Bibliya limbalewa kuti bzin’dzacitika kutsogolo bzingacinje moyo wanu

Wanthu azinji ambakhala wakusunama na waukali kwene-kwene thangwe ra mabvuto yomwe yakucitika m’dzikoli. Winango ambacita nyongo kuti ayezere kucinja bzinthu kuti bzikhale bwino. Onani mafala ya m’Bibliya yomwe yambalewa momwe bzinthu bzin’dzakhalira bwino kutsogoloku, yakuthandizira wanthu winango ntsiku zino. Latizani VIDIYO, ndipo mukamala cezeranani mibvunzo yakutewerayi:

VIDIYO: Inepano Ndikhafuna Dziko Lacirungamo (4:07)

Bzinthunzi-thunzi: Mbali ya vidiyo ‘Inepano Ndikhafuna Dziko Lacirungamo.’ 1. Thimu la wanthu wa ntundu ubodzi, likubvuna thonje ndipo Rafika omwe akali mwana akubvuna nawo pabodzi. 2. Rafika adayenda pa ntsiku ya kutoma ku mtsonkhano wa cigawo wa Mboni za Yahova, iye adakomedwa kwene-kwene kuwona azungu na asenzi ali pabodzi.

Mu vidiyoyi, kodi n’kusaya cirungamo kuponi komwe Rafika akhakomedwa lini nako?
Kusaya cirungamo komwe Rafika akhakomedwa lini nako kulibe kumala, tsono Bibliya lidamuthandiza tani?

Tikakhulupira bzomwe Bibliya limbalewa kuti bzin’dzacitika kutsogolo, tingacepese msunamo ndipo tingakhale wakukondwa napo tikagumana na mabvuto. Werengani Mimwani 17:22 na Waroma 12:12, ndipo mukamala cezeranani mbvunzo wakutewerayu:

Kodi bzomwe Bibliya limbalewa kuti bzin’dzacitika kutsogolo, bzingakucitiseni kukhala na moyo wabwino ntsiku zino? Thangwe ranyi mukukumbuka tenepo?

WANTHU WINANGO AMBALEWA KUTI: “Bzomwe Bibliya limbalewa kuti bzin’dzacitika kutsogolo mpsabwino kwene-kwene, ndipopa nimbawona kuti mpsacadidi lini.”

Thangwe ranyi imwepo mukuwona kuti mpsakufunika kudziwa cadidi ca nkhaniyi?

KODI MWAPFUNZA CIYANI?

Bibliya limbalewa bzomwe bzin’dzacitika kutsogolo. Ndipo kudziwa bzinthu bzabwino bzomwe bzin’dzacitika kutsogoloku kumbaticitisa kupirira mabvuto.

Mibvunzo yakubwerezera

Thangwe ranyi wanthu akufuna tsogolo labwino?
Kodi Bibliya limbalewa ciyani bza kutsogolo?
Kodi bzomwe Bibliya limbalewa kuti bzin’dzacitika kutsogolo bzingakuthandizeni tani pa moyo wanu?

Ntsiku yomwe ndamaliza pfunziroli:

Citani ibzi

Werengani bzinembo bza m’Bibliya bzomwe bziri mu pfunziro lino kuti mudziwe bzomwe Bibliya limbalewa kuti bzin’dzacitika kutsogolo.

Cinthu cinango:

Your other goal

ONANI POMWE IBZI

Pfunzani momwe cidikhiro cingakuthandizireni mukakhala pa mabvuto.

“Cidikhiro—Kodi Mungacigumane Kuponi?” (Mukani!, 8 Maio, 2004)

Onani bzomwe Bibliya limbalewa kuti bzin’dzacitika kutsogolo, bzikuthandizira omwe akuduwala.

“Kodi Bibliya Lingakuthandizeni—Kupirira Matenda?” (Nkhani ya pa jw.org)

Pomwe mukuwona nyimbo ya vidiyoyi, yezerani kukumbukira imwepo na banja lanu muli wakukondwa m’paraizo ninga momwe Bibliya limbalewera.

Kumbukirani Nthawe Yomwe Bzinthu Bzin’dzakhala Bwino (3:37)

Werengani momwe munthu munango omwe akhakhotcerera ufulu bwa wanthu na bzirombo adacinjira pomwe adapfunza m’Bibliya bza cidikhiro cakutsogolo.

“Tsapano ndiribe makumbukidwe yakufuna kucinja bzinthu m’dzikoli” (Ntsanza ya Mulundiri, 1 Julho, 2013)