Akazi omwe adayenda ku thenje la Jezu adadabwa kwene-kwene thangwe alibe kukagumana thupi lace! Tenepo, Mariya Madalena adathamanga aciyenda komwe kukhana ‘Simau Pedru, na nyakupfunza winango, ule omwe Jezu akhambamufuna kwene-kwene.’ Nyakupfunzayo akhali Juwau. (Juwau 20:2) Tsono akazi anango omwe akhadasala ku thenje wale adawona anjo, ndipo mkati mwa thenjemo mukhana anjo pomwe munango ‘omwe akhadabvala mkanjo mcena.’—Marko 16:5.

Anjo m’bodzi adauza akaziwo kuti: ‘Imwepo lekani kugopa! Ndin’dziwa kuti munkulinga Jezu, omwe akhadamukhomerera pa muti. Tsono mulibe muno. Iye walamuka kwa anyakufa, ninga momwe akhadalewera. Bwerani mudzawone pa mbuto pomwe akhadamugonesa. Ndipo ndokoni mwakamfulumize mukauze anyakupfunza wace kuti iye alamusidwa kwa anyakufa, mwakuti atsogola kale kuyenda ku Galileya.’ (Mateu 28:5-7) Tenepo akaziwo adathamanga, aciyenda kukauza anyakupfunza wa Jezu bzomwe bzikhadacitikabzo, ndipo ‘akhatetemera kwene-kwene na mantha.’—Marko 16:8.

Pa nthaweyo, Mariya akhadagumana kale Pedru na Juwau. Ali kasa-kasa, iye adawauza kuti: ‘Amucosa Mbuya m’thenje mule, ndipo tin’dziwa lini komwe iwo akamuikha.’ (Juwau 20:2) Pomwe Pedru na Juwau adabva bzimwebzo, iwo adalikobola liwiro aciyenda ku thenjeko. Juwau adathamanga kwene-kwene, ndipo ndiye adayamba kufika. Pomwe adafika adandolingirira m’thenjemo, ndipo adawonambo nguwo zomwe akhadatsedengera nazo Jezu zire koma iye alibe kupita mkatimo.

Pedru adandofikira kupita mkatimo, ndipo adawonambo nguwo zomwe akhadatsedengera nazo Jezu zire, pabodzi na nguwo yomwe akhadatsedengera nayo msolo wace. Juwau adadzapitambo ndipo iye adatsimikiza kuti bzomwe Mariya akhadalewa bzikhali bzacadidi. Napo kuti Jezu akhadawauza kale kuti an’dzalamusidwa, pa nthaweyo iwo akhalibe kuzindikira kuti iye akhadalamusidwadi. (Mateu 16:21) Iwo adabwerera kumui pomwe nzeru zawo zidabalalika. Tsono pomwe Mariya adabwerera ku thenjeko, iye alibe kucoka mwakamkulumize.

Pomwe bzimwebzi bzikhacitika, akazi anango wale akhali mu njira acimbayenda kukauza anyakupfunza winango kuti Jezu akhadalamusidwa. Pomwe akhathamanga, iwo adagumana na Jezu ndipo adawamusa kuti: ‘Muli tani?’ Akaziwo adagodama pa minyendo yace ‘acitsulimisa nkhope zawo.’ Ndipo Jezu adawauza kuti: ‘Lekani kugopa! Ndokoni mukauze abale wangu kuti ayende ku Galileya; an’kandiwona kumweko.’—Mateu 28:9, 10.

Acikunda omwe akhalindira ku thanje ‘adatetemera ndipo adakhala ningati afa,’ thangwe ra citeke-teke comwe cikhadacitika pabodzi na kuwona wanjo. Pomwe iwo adaphephuka adapita mu mzinda ndipo ‘adakauza akulu-akulu wa ansembe bzense bzomwe bzikhadacitika.’ Akulu-akulu wa ansembewo adayenda kukacezerana na akulu-akulu wa Ajuda, ndipo adabverana kuti apereke kobiri kwa acikundawo. Adacita bzimwebzo kuti pomwe wanthu angadabvunza acikundawo bza nkhaniyo iwo aname kuti: ‘Anyakupfunza wawo adabwera kudzamuba usiku pomwe ife tikhadagona.’—Mateu 28:4, 11, 13.

Acikunda wa Roma akhaphedwa pomwe akhagumanidwa adagona pa mbuto yawo ya basa. Tsono wansembe adawapicira kuti: ‘Mtongi akadziwa bzimwebzi [kuti akhagona pa nthawe ya basa], lekani kucita thupo ifepano tin’dzakalewalewa naye.’ (Mateu 28:14) Acikundawo adatambira kobirizo ndipo adacita ninga momwe wansembewo adawauzira. Tenepo nkhani yakuti anyakupfunza wace adaba thupi la Jezu idabveka kwa Ajuda azinji.

Mariya akhalira ndipo akhanati kucoka ku thenje kule. Pomwe iye adalingirira pomwe m’thenjemo, adawona wanjo awiri omwe akhadabvala bzakubvala bzicena. M’bodzi akhadakhala komwe kukhana msolo wa Jezu, pomwe winango akhadakhala komwe kukhana minyendo yace. Wanjowo adamubvunza kuti: ‘Mkaziwe, n’thangwe ranyi unkulira?’ Mariya adawatawira kuti: ‘Atenga Mbuya wangu, ndipo ndikudziwa lini komwe akamuikha.’ Tsono pomwe Mariya adazungunuka, adawona munthu kumbuyo kwace. Ndipo munthuyo adamubvunza ninga momwe akhadamubvunzira wanjo wale, ndipo munthuyo adathumizira mbvunzo unango kuti: ‘Kodi ukunyang’ana yani?’ Mariya akhakumbuka kuti munthuyo akhali mulindiri wa m’zundemo, ndipopa adamuuza kuti: ‘Penu ndimwe mwamucosa, ndiuzeni komwe mwakamuikha kuti ndikamutenge.’—Juwau 20:13-15.

Tsono Mariya akhadziwa lini kuti akhalewalewa na Jezu omwe akhadamusidwa. Pomwe adamucemera kuti: ‘Mariya!’ Mariyayo adazindikira kuti munthuyo akhali Jezu, thangwe ra kuzolowera momwe Jezuyo akhambamucemerera. Mariya adatawira mwakukondwa kuti: “Rabboni!” (kuthandauza kuti, “Mpfunzisi!”), ndipo adamuphatirira mwamphanvu, pakuti akhakumbuka kuti Jezuyo angadayenderatu kudzulu nthawe imweyire. Tsono Jezu adamuuza kuti: ‘Leka kundiphatirira. Pakuti ndikanati kubwerera kwa Babangu. Tsono ndoko ukauze abale wangu kuti: “Inepano ndikukwira kwa Babangu na Baba wanu, kwa Mulungu wangu na kwa Mulungu wanu.”’—Juwau 20:16, 17.

Tenepo Mariya adathamanga aciyenda komwe kukhadatsonkhana apostolo na anyakupfunza winangowo. Atafika adawauza kuti: ‘Ndawonana na Mbuya!’ ndipo bzomwe Mariya adalewa bzidakhala umboni bwakuthumizirika pa bzomwe akhadalewa kale akazi winango wale. (Juwau 20:18) Tsono anyakupfunzawo akhawona ninga kuti bzomwe akaziwo akhalewa bzikhali ‘bzakusaya basa.’—Luka 24:11.

Pakufika pa nsiku ya mdzinga pa Nisani 16, anyakupfunza wa Jezu akhadasunama kwene-kwene. Iwo akhabvesesa lini thangwe ranyi alibe kugumana mtembo wa Jezu m’thenje. (Mateu 28:9, 10; Luka 24:11) Patsogolo pace, nsiku imweyo anyakupfunza awiri akhacoka ku Jeruzalemu aciyenda ku Emausi, omwe ukhali mtantho wa makilometro 11 kucokera ku Jeruzalemuko. Ndipo m’bodzi wa anyakupfunzawo akhali Kliyofa.

Pomwe akhali m’njira akhacezerana bzomwe bzikhadacitikabzo. Patsogolo pace, adagumana na munthu munango ndipo adayamba kufamba naye pabodzi. Munthuyo adawabvunza kuti: ‘Kodi ni nkhani yanyi yomwe munkucezerana pomwe munkufamba mu njira muno?’ Kliyofa adamubvunza kuti: ‘Kodi iwepo unkukhala wekha-wekha mu Jeruzalemu muno ninga mulendo, ndipo unkudziwa lini bzomwe bzacitika mu mzinda muno nsiku zapitazi?’ Munthuyo adabvunza pomwe kuti: ‘Kodi ni bzinthu bzanyi?’—Luka 24:17-19.

Anyakupfunzawo adatawira kuti: ‘Bza Jezu Mnazaleti, ife tikhadikhira kuti munthu umweyu ndiye an’dzapulumusa Jirayeri.’—Luka 24:19-21.

Kliyofa pabodzi na nyakupfunza munangoyo adayamba kufotokozera munthu ule bzomwe bzidacitika nsiku imweyo. Iwo adamuuza kuti akazi winango akhadayenda ku thenje pa nthutu ya Jezu koma alibe kugumana mtembo wace ndipo akaziwo adawona wanjo awiri omwe adawauza kuti Jezu walamusidwa. Adamuuza pomwe kuti wanthu winango adayendambo ku thenjeko ndipo ‘adawona kuti bzikhali tenepo, ninga momwe akazi wale akhadalewera.’—Luka 24:24.

Anyakupfunza awiriwo akhawoneka kuti akhabvesesa lini ndipo akhadasokonezeka makumbukidwe na bzomwe bzidacitikabzo. Tsono munthuyo adalewalewa nawo mwamphanvu ndipo adawathandiza kucinja makumbukidwe yawo yakuphonyeka yomwe yakhawacitisa kukhumudwa. Munthuyo adawauza kuti: ‘Anyakusaya nzerumwe na anyakupenukira pa bzense bzomwe apolofeta adalewa! Kodi bzikhali lini bzakufunika kuti Kristu abve bzakuwawa bzensenebzi acipita mu umbiri bwace?’ (Luka 24:25, 26) Iye adawafotokozera pomwe bzinembo bzizinji bzakulewa bza Kristu.

Pakumalizira pace wense atatu adafika pafupi na mzinda wa Emausi. Anyakupfunza awiriwo akhafunisisa kubva bzizinji, tenepo iwo adauza munthuyo kuti: ‘Mbatikhaleni pabodzi, thangwe kunkudoka ndipo nsiku inkumala kale.’ Munthu ule adabvuma ndipo adadya naye pabodzi. Pomwe akhadyapo munthu ule adapemba ndipo adatenga mkate aciubedulabedula patsogolo pace adawapasa kuti adye. Atacita bzimwebzi, anyakupfunzawo adazindikira kuti munthuyo akhali Jezu, tenepo iye adanyembereka. (Luka 24:29-31) Tsapano anyakupfunzawo akhana umboni bwakuti Jezu walamusidwadi!

Anyakupfunza awiriwo adadekedwa kwene-kwene ndipo adayamba kucezerana bzomwe bzidacitikabzo kuti: ‘Kodi si pale mitima yathu ikhatetemera pomwe akhalewalewa nafe mu mseu na kutifotokozera bzinembo mwakubveka bwino?’ (Luka 24:32) Patsogolo pace iwo adabwerera ku Jeruzalemu ndipo pomwe adafika kumweko adagumana apostolo akhana wanthu winango. Pomwe Kliyofa akhanati kuyamba kufotokoza bzomwe bzidawacitikira iwo adabva wanthu winango ankulewa kuti: ‘N’cadidi, Mbuya amukadi kwa anyakufa ndipo awonekera kwa Simau!’ (Luka 24:34) Kliyofa na nyakupfunza munango ule adafotokozambo bzomwe bzidawacitikira. Pakuti iwo akhalimbo ninga mboni thangwe adacita kuwona wokha kuti Jezu walamusidwadi.

Koma patsogolo pace padacitika cinthu cinango comwe cidadabwisa wanthu wense. Jezu adawonekera m‘cipinda comwe cikhana wanthuwo. Bzimwebzi bzikhali bzakudabwisa thangwe misuwo yense ikhadafunga. Wanthuwo adabzikhiyira m’cipindamo thangwe akhagopa Ajuda. Wanthu wense omwe akhali m’mwemo adawona Jezu. Iye adawauza mwakugwa mpfuwa kuti: ‘Mtendere ukhale namwe.’ Koma wanthuwo adacita mantha thangwe ‘akhakumbuka kuti awona mzimu,’ ninga momwe bzidacitikira pa nthawe yomwe Jezu adafamba pa nyanza.—Luka 24:36,37; Mateu 14:25-27.

Pakufuna kuthandiza anyakupfunzawo kudziwa kuti akhali lini mzimu koma munthu, Jezu adawawonesa manja na minyendo yace ndipo adawauza kuti: ‘Thangwe ranyi munkubonera m’makumbukidwe ndipo thangwe ranyi munkupenukira mu mtima mwanu? Onani manja na minyendo yanguyi, kuti mutsimikizire kuti ndinedi. Ndiphateni muwone, thangwe mzimu ulibe mnopfu na mafupa ninga yomwe munkuyawonaya.’ (Luka 24:36-39) Wanthuwo adakondwa kwene-kwene ndipo adadabwa, koma adapenukira pomwe pang’ono.

Pakufuna kuwathandiza kuti asiye kupenukira, Jezu adawabvunza kuti: ‘Kodi muna cakudya ciri-cense? Adamupasa kadutswa ka nsomba yakuwotca ndipo adadya. Patsogolo pace adawauza kuti: ‘Yamweya ni mafala yomwe ndidakuuzani pomwe ndikhanamwe pabodzi, [ndikanati kufa] kuti bzinthu bzense bzomwe bzidanembedwa pakulewa bza ine mu Cakutonga ca Mozeji, mu bzomwe Apolofeta adanemba na m’Mapsalymo bzin’funika bzikwanisike.’—Luka 24:41-44.

Pomwe Jezu adawonekera kwa Kliyofa pabodzi na nyakupfunza munango ule adawathandiza kubvesesa bzinembo, ndipo bzimwebzi ndibzo bzomwe adacita kuna wense omwe akhadatsonkhana m’cipinda mule. Iye adawauza kuti: ‘Bzidanembedwa kale kuti Kristu an’dzazunzika acidzamuka kwa anyakufa pa nsiku ya citatu, ndipo mu dzina lace m’mitundu yense mun’dzapaliziridwa bza kukungula kuti alekereredwe pikado. Ndipo imwepo mun’dzakhala mboni za bzimwebzi kuyambira ku Jeruzalemu.’—Luka 24:46-48.

Pa thimu la wanthu omwe akhadatsonkhana m’cipinda mule mpostolo Thomasi pakhalibe. Koma wanthu omwe akhalipowo atagumana naye adamuuza mwakukondwa kuti: ‘Ife tawona Mbuya!’ Thomasi adalewa kuti: ‘Kulewa cadidi ndikasaya kuwona bzipsazi bza perego m’manja mwace na kuikha cala cangu mu bzipsazibzo, pabodzi na kuikha boko langu m’mbali mwa mimba yace, inepano ndinikhulupira lini.’—Juwau 20:25.

Patapita nsiku 8, anyakupfunzawo adagumana m’cipinda cinango ndipo adakhiya pomwe misuwo yense, koma pa nthawe imweyi Thomasi akhalipo. Jezu adawonekera pomwe na thupi ninga munthu ndipo adawamusa kuti: ‘Mtendere ukhale namwe.’ Patsogolo pace Jezu adauza Thomasi kuti: ‘Ikha cala cako apa, ndipo wona m’manja mwangu, ndipo ikha boko lako m’mbali mwa mimba yanguyi, ndipo leka kupenukira koma khulupira.’ Thomasi adatawira kuti: ‘Mbuya wangu na Mulungu wangu.’ (Juwau 20:26-28) Tsapano Thomasi adakhulupira kuti Jezu walamusidwadi na thupi la uzimu ndipo ankuimira Yahova.

Jezu adamuuza kuti: ‘Kodi wakhulupira thangwe wandiwona? Wakusimbidwa ni ule omwe ambakhulupira napo alibe kuwona.’—Juwau 20:29.