Mareferentsiya ya Kabukhu ka Mitsonkhano ka Moyo Wathu na Utumiki
© 2024 Watch Tower Bible and Tract Society of Pennsylvania
1-7 JULHO
CUMA CA M’FALA LA MULUNGU MASALIMO 57-59
Yahova Ambakalipa na Wanthu Omwe Ambazunza Wanthu Wace
“Mpaka Mbuto Zakutali za pa Dziko la Pantsi”
14 Sitefano adapalizira mwakukhwimika pomwe akhanati kuphedwa na anyamadulanthaka wace. (Mabasa 6:5; 7:54-60) Pomwe Akristau adayamba “kuzunzidwa kwene-kwene,” anyakupfunza wentse kupambula apostolo adabalalikira m’bzigawo bza Djudeya na Samariya. Tsono bzimwebzi bziribe kuimisa basa lakupalizira. Mwa ciratizo, Filipi adayenda ku mzinda wa Samariya “aciyamba kupalizira wanthu wa kumweko bza Kristu” ndipo adakhala na bzakutewera bzabwino kwene-kwene. (Mabasa 8:1-8, 14, 15, 25) Kuthumizira bzimwebzi, Bibliya limbatiuza kuti: “Wanthu wentse omwe akhadabalalika na cizunzo comwe cikhadayamba thangwe ra Sitefano, adayenda mpaka ku Fenisiya, ku Xipre na ku Antiyokiya, tsono iwo akhapalizira Adjuda okha. Tenepo, amuna winango pakati pawo omwe akhali wa ku Xipre na ku Sirene, adabwera ku Antiyokiya ndipo adayamba kulewalewa kwa wanthu omwe ambalewalewa Cigerego mwa kuwapalizira mafala yabwino yakulewa bza Mbuya Jezu.” (Mabasa 11:19, 20) Pa nthawe imweyi, kuzunzidwa kwa Akristau kudacitisa kuti mafala yabwino ya Umambo yapaliziridwe.
15 Mu ntsiku zathu zino, bzinthu ninga bzimwebzi bzidacitikambo m’madziko yomwe kale-kale yakhadziwika na dzina lakuti União Soviética. Mboni za Yahova zizinji zidathamangisidwa ziciyendesedwa ku Sibéria m’magole ya 1950. Thangwe ra kuthamangisidwako, Mboni za Yahova zizinji zidakakhala ku mbuto zakutali kwene-kwene na kumui kwawo ndipo zidabalalikira m’bzigawo bzakusiyana-siyana bza kumweko. Bzimwebzi bzidacitisa kuti mafala yabwino yapaliziridwe ku Sibéria kwentse. Na tenepo, Mboni za Yahova zizinji zidakwanisa kupalizira mafala yabwino ku mbuto zakutali kwene-kwene, zomwe zikhali pa mtantho wa makilometro 10 000 kucokera kumui kwawo. Iwo angadakwanisa lini kugumana kobiri kuti ayende m’bzigawo bzimwebzi kuti akapalizire. Bzimwebzi bzidakwanisika thangwe rakuti boma ndiro lomwe lidawayendesa kumweko. M’bale munango adalewa kuti: “Bzomwe akulu-akulu wa boma adacitabzi, bzidacitisa kuti wanthu azinji wa mitima yabwino wa ku Sibéria adziwe cadidi.”
Cuma Cauzimu
w23.07 matsa. 18-19 ndi. 16-17
“Khalani Wakulimba na Wakusaya Kutekenyeka”
16 Citisani kuti mtima wanu ukhale wakukhazikika. Mambo Davide adalewa kuti angadasiya lini kufuna Yahova. Iye adaimba kuti:“Mtima wangu wakhazikika, imwe Mulungu.” (Salimo 57:7) Ifepanombo tingakhale na mtima wakukhazikika ticikhulupira Yahova. (Werengani Salimo 112:7.) Onani momwe bzimwebzi bzidathandizira Bob, omwe tamufotokoza kale ule. Pomwe iye adauzidwa kuti mulopayo ungadakhala pafupi pomwe angadacitidwa operasauyo, iye adalewa kuti penu mpsimwebzo angadacokeratu ku xipitaliko. Pomwe padapita nthawe, Bob adadzalewa kuti: “Inepano ndikhagopa lini ndipo ndikhacita lini thupo na cinthu ciri-centse.”
17 Bob akhana mtima wakukhazikika thangwe iye akhadasankhula kale bzomwe an’funa pomwe akhanati kuyenda ku xipitaliko. Cakuyamba, iye akhafuna kukondwesa Yahova. Caciwiri, iye adapfunza m’Bibliya na m’mabukhu yathu bzomwe Yahova ambafuna kuti ticite pa nkhani ya mulopa. Cacitatu, iye akhana citsimikizo centse cakuti kubvera malamulo ya Yahova kungadamubweresera bzisimbo bzizinji. Ifepano tin’funikambo kupitiriza kukhala na mtima wakukhazikika napo pomwe tikugumana na mabvuto mazinji.
8-14 JULHO
CUMA CA M’FALA LA MULUNGU MASALIMO 60-62
Yahova Ambatithandiza Kuti Tikhale Wakukhazikika na Wakukhotcerereka
it-2 tsa. 1118 ndi. 7
Ntsanza
Kuphatisidwa Basa mu Njira Yakuyezezera. Wale omwe ambakhala wakukhulupirika kwa Yahova na kumubvera ambakhala wakukhotcerereka ninga momwe Davide adaimbira. Iye adaimba kuti: “Imwe [Yahova] ndimwe mbuto yangu yakuthawira, ntsanza yakulimba yomwe imbandikhotcerera kwa anyamadulanthaka wangu.” (Sl 61:3) Wale omwe ambadziwa thandauzo la dzinalo, omwe ambalikhulupira na kulidziwisa mwakukhulupirika, ambacita lini mantha thangwe: “Dzina la Yahova ni ntsanza yakulimba. Nyakulungama ambathamangira m’mwemo, acikhotcereredwa.” — Mim 18:10; ndendemezerani na 1Sa 17:45-47.
it-2 tsa. 1084 ndi. 8
Tendi
Kazinji-kazinji “tendi” likhaphatisidwa basa mu njira inango yakuyezezera. Tendi yomwe munthu akhakhala, ikhali mbuto yomwe munthuyo akhagona ndipo ikhamukhotcerera ku mphanvu za cirengedwe. (Gen 18:1) Wanthu omwe akhatambiridwa na munthu mu tendi mwace, akhana citsimikizo centse cakuti angadasamaliridwa bwino, kutambiridwa bwino na kulemekezedwa. Na tenepo, cinembo ca Apokalipse 7:15 cikalewa bza thimu likulu lomwe Mulungu ‘an’dzalikonzera tendi kuti alikhotcerere,’ bzimwebzi bzikuthandauza kuti iye an’dzalisamalira na kulikhotcerera. (Sl 61:3, 4) Zaiya adalewa bzomwe mkazi wa Mulungu, Ziyoni, bzomwe an’funika kucita kuti akonzekere bza wana omwe an’dzakhala nawo. Mkaziyo adauzidwa kuti “akuze tendi lace kuti ikhale na mbuto ikulu.” (Zai 54:2) Mwa njira imweyi, iye angadathumizira mbuto yakukhotcerereka ya wana wace.
w02 15/4 tsa. 16 ndi. 14
Malamulo ya Mulungu Yambatipasa Phindu
14 Lamulo la Mulungu limbacinja lini. Mu ntsiku zakunesa zomwe tikukhala zino, Yahova ni tsendwa lakusaya kutekenyeka, lomwe liripo kucokera kale-kale ndipo lin’dzakhala liripo mpaka kale-kale. (Salimo 90:2) Iye adabzilewa yekha kuti: “Pakuti ine ndine Yahova; ndiribe kucinja.” (Malakiya 3:6) Malamulo ya Mulungu njakuthembeka ndipo yali lini ninga nzeru za wanthu zomwe zimbacinja-cinja. (Tiyago 1:17) Mwa ciratizo, adziwi akhalimbikisa wanthu kuti ambalere wana wawo mwa kuwalekerera, koma na kupita kwa nthawe adziwi winango adacinja makumbukidwe yamweya thangwe adawona kuti yakhali yakuphonyeka. Malamulo ya dzikoli pa nkhani imweyi yambacinja-cinja ndipo bzimbakhala ninga yakumbulusidwa na mphepo. Tsono Fala la Yahova limbacinja lini. Kwa magole mazinji, Bibliya limbapereka malango ya momwe abereki angalerere wana wawo mwa lufoyi. Mpostolo Paulo adanemba kuti: “Abereki, lekani kumbakalipisa wana wanu, koma mbawalerani mwa kuwalanga na kuwapfunzisa mwakubverana na kufuna kwa Yahova.” (Aefezo 6:4) Mpsakukondwesa kwene-kwene kudziwa kuti tingakhulupire malamulo ya Yahova thangwe iyo yambacinja lini!
Cuma Cauzimu
w06 1/6 tsa. 11 ndi. 6
Nfundo Zikulu-zikulu za Cigawo Caciwiri ca Bukhu la Masalimo
62:11. Mulungu ambathemba lini munthu kuti amupase mphanvu. Iye ni Mwenekaciro wa mphanvu. ‘Mphanvu zimbacokera kwa iye.’
15-21 JULHO
CUMA CA M’FALA LA MULUNGU MASALIMO 63-65
“Lufoyi Lanu Lacadidi Ndabwino Kuposa Moyo”
w01 15/10 matsa. 15-16 ndi. 17-18
Kodi Mbani Omwe Angatilekanise na Lufoyi la Mulungu?
17 Kodi lufoyi la Mulungu ndakufunika tani kwa imwepo? Mambo Davide adanemba kuti: “Thangwe lufoyi lanu lacadidi ndabwino kuposa moyo, ndipopa miromo yangu in’dzakutumbizani. Na tenepo nin’dzakutumbizani kwa moyo wangu wentse; nin’dzaimisa manja yangu pa dzina lanu.” Kodi imwepo mumbakumbukambo tenepoyo? (Salimo 63:3, 4) Kodi bzomwe dzikoli limbapereka bzingapose lufoyi lanu na uxamwali bomwe munabo na Mulungu? Mwa ciratizo, kodi nyongo yomwe mungacite kuti mukhale na kobiri zizinji ingapose mtendere omwe mungakhale nawo thangwe ra kukhala pa uxamwali bwakulimba na Mulungu? (Luka 12:15) Akristau winango adafunikira kusankhula pakati pa kusiya kutumikira Yahova ayai kuphedwa. Bzimwebzi bzidacitikira Mboni za Yahova zizinji zomwe zikhali mu tsasa ya Nazi pa nthawe ya Nkhondo Yaciwiri ya pa Dziko Lentse. Koma abale wathu azinji akhali wakutsimikiza kupitiriza kufuna Mulungu ndipo akhali wakukonzeka kuphedwa bzingadafunikira. Omwe ambapitiriza kukhala wakukhulupirika pa lufoyi la Mulungu angakhale na citsimikizo cakuti an’dzatambira tsogolo lakusaya kumala lomwe dzikoli lingapereke lini. (Marko 8:34-36) Tsono pana bzinthu bzizinji sikuti moyo wakusaya kumala okha.
18 Napo kuti mpsakukwanisika lini kukhala na moyo mpaka kale-kale mwakusaya Yahova, ndokumbukirani momwe moyo ungadakhalira pangadakhala palibe Mulengi wathu. Ungadakhala wakusaya kudekeza ndipo ungadakhala ulibe cakulinga ciri-centse. Mu ntsiku zakumalizira zino, Yahova adapasa basa labwino atumiki wace. Tingakhale na citsimikizo cakuti Yahova, Omwe Ambakwanirisa Mapolofesiya, akadzapereka moyo wakusaya kumala, un’dzakhala na bzinthu bzabwino na bzathandauzo kuti tidzabzipfunze na kubzicita. (Mpalizi 3:11) Napo kuti tin’dzapfunza bzinthu bzizinji kwa magole mazinji, tin’dzafika lini pa kubvesesa “nzeru zace na udziwi bwace mpsakusaya malire.” — Aroma 11:33.
‘Mbatendani pa Cinthu Ciri-Centse’
Cinthu cinango cakufunika kwene-kwene n’cakuti timbatende Mulungu. Mwakusaya kupenukira, nthawe na nthawe imwepo mumbakumbukira bzinthu bzabwino bzomwe Mulungu adakupasani ndipo akupitiriza kukupasani. (Bzakutonga 8:17, 18; Mabasa 14:17) Tsono m’mbuto mwakukumbukira kudeka mtima kwa Mulungu mwakuthamanga, tani kupambula nthawe kuti mukumbukire bzisimbo bzizinji bzomwe imwepo na wanthu omwe mumbawafuna mudabzitambira kale? Kukumbukira bza khalidwe la kupasa lomwe Mulengi wanu analo, kun’dzakucitisani kuti mumutende,ndipo cikhulupiro cakuti iye ambakufunani cin’dzathimizirika. — 1 Juwau 4:9.
w15 15/10 tsa. 24 ndi. 7
Pitirizani Kumbakumbukira Bzinthu Bzauzimu
7 Kuwerenga, mungakucite mwakusaya nyongo kwene-kwene, tsono kukumbukira kumbafuna tceru. Ndipopa wanthu wakuperewerafe timbapusidwa kusiya bzinthu bzomwe tikhakumbukirabzo, ticiyamba kukumbukira bzinthu bzinango. Tenepo, nthawe yabwino yakukumbukira ni pomwe tinkupuma na pomwe tiri pa mbuto yakusaya bzinthu bzakuticeukisa. Munembi munango wa salimo adawona kuti nthawe yabwino yakumbakumbukira ni pomwe akhasaya tulo usiku pa nthawe yakugona. (Salimo 63:3) Jezu, omwe akhana makumbukidwe yakulungamiratu, akhadziwa phindu la kunyang’ana mbuto yakuderekha kuti ambakumbukire na kupemba. — Luka 6:12.
w09 15/7 tsa. 16 ndi. 6
Tewezerani Jezu — Pfunzisani Mwalufoyi
6 Ifepano timbakomedwa kulewa bzinthu bzomwe timbabzifuna. Tikambalewa bzinthu bzomwe mtima wathu umbafuna, timbakhala wakukondwa ndipo nkhope yathu imbalatiza kuti tidakomedwa. Bzimwebzi bzimbacitika maka-maka tikakhala tikulewa bza munthu omwe timbamufuna. Kazinji-kazinji timbakomedwa kuuza wanthu winango bzinthu bzomwe timbadziwa pakulewa bza munthuyo. Ifepano timbamutenda, kumutumbiza na kumukhotcerera. Timbacita bzimwebzi thangwe timbafuna kuti wanthu winango ayambembo kumufuna na makhalidwe yace ninga momwe ifepano timbamufunira.
Cuma Cauzimu
w07 15/11 tsa. 15 ndi. 6
Kodi Imwepo Mumbatsangalaza Winango?
Mpsakupusa kwene-kwene kupfudza nyumba kuposa kuimanga pomwe. Nkhani yakupfudza na kumanga ikuphatambo basa pa nkhani ya momwe timbalewalewera. Ninga wanthu wakuperewera, tentsenefe timbaphonya. Mambo Salomau adalewa kuti: “Palibe munthu wakulungama pa dziko la pantsi omwe nthawe zentse ambacita bzabwino bzokha-bzokha acisaya kuphonya.” (Mpalizi 7:20) Mpsakupusa kuwona bzakuphonya bza wanthu winango na kulewa mafala yakuipa. (Salimo 64:2-4) Koma kulewa mafala yakulimbisa kumbafunikira luso.
22-28 JULHO
CUMA CA M’FALA LA MULUNGU MASALIMO 66-68
Yahova Ambanyamula Mtolo Wathu Ntsiku Iri-yentse
Kodi Yahova Ambatawira Tani Mipembo Yathu?
15 Mipembo yathu imbatawiridwa lini mwakudabwisa. Koma Yahova ambatipasa mitawiro yomwe imbatithandiza kuti tipitirize kukhala wakukhulupirika kwa iye. Ndipopa mbakhalani tceru kuti muwone momwe Yahova akutawirira mipembo yanu. Mpfumakazi yakucemeredwa Yoko ikhawona ninga kuti Yahova akhatawira lini mipembo yace. Tsono, iyo idayamba kumbanemba bzinthu bzomwe ikhakumbira Yahovayo. Pomwe padapita nthawe, iyo idatenga kaderno wace kuti iwone penu Yahova akhadatawira mipembo yaceyo. Iyo idakwanisa kuwona kuti Yahova akhadatawira mipembo yace mizinji napo ire yomwe iye akhadaiyebwa. Bzimwebzi bzin’funa kulewa kuti ifepano tin’funika kumbakhala na nthawe yakukumbukira momwe Yahova akutawirira mipembo yathu. — Salimo 66:19, 20.
w10 1/12 tsa. 23 ndi. 6
Mbakumbukirani Wale Omwe Akulera Okha Wana
Yahova adafulizira wanthu kuti anembe nyimbo ayai masalimo yomwe Ajirayeri akhambaimba pa kumunamata. Ndokumbukirani momwe amamsiwa na nkhungwa mu Jirayeri akhalimbikisidwira pa kuimba mafala yakucita kufuliziridwa na Mulungu na momwe mafalayo yakhawakumbusira kuti Yahova ni “baba” na “muyeruzi” kwa iwo ndipo bzimwebzi bzikhawatsimikizira kuti iye akhali wakukonzeka kuwathandiza. (Masalimo 68:5; 146:9) Ifepanombo tingalimbikise abereki omwe akulera okha wana. Iwo angakumbukire mafala yathuyo napo pacipita magole mazinji. Napo kuti papita magole 20, Ruth, omwe ni mai omwe ambalera yekha wana, akadakumbukira mafala yomwe adauzidwa na m’bereki waluso. M’berekiyo adamuuza kuti: “Imwepo mukulera bwino wana wanuwa. Pitirizani kucita bzimwebzi.” Ruth adalewa kuti: “Mafala yamweya yadandilimbikisa kwene-kwene.” Kulewa cadidi, “lirime lakuderekha ni muti wa moyo” ndipo lingalimbikise munthu mu njira yomwe tikhaidikhirira lini. (Mimwani 15:4) Kodi imwepo mungakumbukire mafala manango kuti mulimbikise wale omwe akulera okha wana?
w09 1/4 tsa. 31 ndi. 1
Baba wa Nkhungwa
“BABA wa nkhungwa . . . ni Mulungu omwe ambakhala pa mbuto yace yakucena.” (Salimo 68:5) Mafala yakufuliziridwaya yambatipfunzisa momwe Yahova Mulungu ambabvera na kuthandizira wale omwe akufunikira thandizo. Thupo lomwe iye analo kwa wana omwe adafedwa pai ayai mai, limbawonekera pa Lamulo lomwe iye adapasa Ajirayeri. Mbatiwoneni bzomwe Bibliya limbalewa pakulewa bza “nkhungwa” pa Ekisodo 22:22-24.
Yahova Akukuthandizani Kupirira
17 Werengani Salimo 40:5. Munthu omwe akukwira phiri kuti afike pa ntsonga, nthawe zinango iye angaime pang’ono m’mbuto zinango kuti awone bzinthu bzomwe bziri m’mphepete mwa phirilo pomwe akanati kufika pa ntsongapo. Mpsibodzi-bodzimbo na imwepo. Pomwe mukutumikira Yahova, nthawe zinango mbaimani mucimbakumbukira bzinthu bzabwino bzomwe iye akukucitirani kuti mukwanise kupirira mabvuto yomwe mukugumana nayo. Kuphampha kwa ntsiku iri-yentse mbabzibvunzani kuti: ‘Kodi n’ciyani comwe Yahova wandicitira lero? Napo kuti mabvuto yangu yakanati kumala, kodi Yahova wandithandiza tani kupirira mabvutoyo?’ Mbacitani nyongo kuti mukwanise kuwona cisimbo cibodzi cakucokera kwa Yahova comwe cikulatiza kuti iye akukuthandizani kupirira mabvuto yomwe mukugumana nayo.
Cuma Cauzimu
w06 1/6 tsa. 10 ndi. 5
Nfundo Zikulu-zikulu za Cigawo Caciwiri ca Bukhu la Masalimo
68:18 — Mu ntsiku za Ajirayeri, kodi ‘amuna omwe akhalewedwa kuti ni mphaso’ akhali yani? Amwewa akhali amuna omwe adatengedwa kuti akhale akapolo pa nthawe yomwe Ajirayeri akhamenya nkhondo kuti akhale mu Dziko Lakupiciridwa. Iwo adadzapasidwa basa lakuthandiza Alevi pa mabasa yawo. — Ezara 8:20.
29 JULHO–4 AGOSTO
CUMA CA M’FALA LA MULUNGU SALIMO 69
Bzomwe Bzidacitika pa Moyo wa Jezu Bzikhadanembedweratu pa Salimo 69
w11 15/8 tsa. 11 ndi. 17
Iwo Akhadikhirira Mesiya
17 Mesiya angadadzawengedwa mwakusaya mathangwe. (Salimo 69:4) Mwakubverana na mpostolo Juwau, Jezu adalewa kuti: “Bzingadakhala kuti iwo alibe kuwona mabasa yomwe ndidayacita pakati pawo yomwe palibe munthu omwe adayacita kale, iwo angadakhala alibe pikado; tsono iwo adandiwona, ndipo adawenga inepano pabodzi na Baba wangu. Tsono bzimwebzi bzidacitika kuti yakwanisike mafala yomwe yadanembedwa m’Malamulo yawo yakuti: ‘Iwo adandiwenga mwakusaya mathangwe.’” (Juwau 15:24, 25) Kazinji-kazinji fala lakuti “Malamulo” limbathandauza Bzinembo bzentse. (Juwau 10:34; 12:34) Mabukhu manai yakulewa bza moyo wa Jezu yambalatiza kuti Jezu adawengedwa na atsogoleri wa magereja wacidjuda. Kuthumizira bzimwebzi, Jezu adati: “Dziko liribe thangwe lakukuwengerani, koma iro limbawenga inepano thangwe nimbazimbula padeca kuti mabasa yace njakuipa.” — Juwau 7:7.
w10 15/12 tsa. 8 ndi. 7-8
Citani Nyongo pa Kunamata Kwacadidi
7 Bzomwe Jezu adacita pa dziko la pantsi pano bzidalatiziratu nyongo yomwe iye akhanayo. Jezu adayamba utumiki bwace pa nthawe ya Paskwa mu 30 EC. Jezu pabodzi na anyakupfunza wace adayenda ku Jeruzalemu ndipo adawona “anyakugulisa ng’ombe, mabira na nkhangaiwa pabodzi na anyakucinja kobiri adakhala m’mbuto zawo” mu templo. N’ciyani comwe adacita ndipo anyakupfunza wace adamuwona tani? — Werengani Juwau 2:13-17.
8 Bzomwe Jezu adacita na kulewa pa nthawe imweyire bzidacitisa kuti anyakupfunza wace akumbukire mafala yomwe yakhadanembedweratu pa salimo wa Davide: “Nyongo pa nyumba yanu yandidya.” (Salimo 69:9) Thangwe ranyi? Thangwe rakuti bzomwe Jezu adacitabzo bzidaikha moyo wace pa ngozi. Kuthumizira bzimwebzi, akulu-akulu wa mu templo omwe akhali antsembe, anembi na wanthu winango, ndiwo omwe akhalimbikisa wanthu kuti agulise bzinthu mu templo. Kuti amalise bzomwe iwo akhacitabzo, Jezu akhafunika kukhala ninga nyamadulanthaka wa magereja mu nthawe imweyire. Bzimwebzi bzidacitisa kuti anyakupfunza wace akwanise kuwona ‘nyongo yomwe iye akhanayo pa nyumba’ ya Mulungu ayai pa kunamata kwacadidi. Tsono, kodi nyongo n’ciyani? Kodi njakusiyana na kucita bzinthu mwakamfulumize?
g95 22/10 tsa. 31 ndi. 4
Kodi Munthu Angafe na Bvuto la Makumbukidwe?
Wanthu winango ambalewa kuti bzomwe bzidacitisa kuti Jezu afe ni bvuto lomwe akhanalo la makumbukidwe. Pakulewa bza iye, bzikhadanembedweratu kuti: “Mtima wangu wasweka thangwe ra kunyosedwa, ndipo cironda cace n’cakusaya kupola.” (Salimo 69:20) Kodi mafala yamweya yan’funika kubvesesedwa mu njira yakuyezezera? Pinango-pentse inde. Pa nthawe yomwe Jezu akhadasala pang’ono kuphedwa, iye alibe kuneseka kokha mu mtima koma adanesekambo m’makumbukidwe. (Mateu 27:46; Luka 22:44; Ahebereu 5:7) Cadidi n’cakuti “mulopa na madzi” bzomwe bzidacoka m’mbabvu mwa Jezu thangwe ra kulasidwa pambuyo pa iye kufa, pinango-pentse bzidacoka thangwe ra kuwawidwa mu mtima. Kuneseka kwa mtima kungacitise kuti mulopa uleke kuphata bwino basa ku mbuto yomwe imbakhotcerera mtima na masapi. Mbuto imweyi ikabowoka, ingacose bzinthu bzakundendemerana na “mulopa na madzi.” — Juwau 19:34.
it-2 tsa. 650
Muti wa Veneno
Pakulewa bza Mesiya bzikhadanembedweratu kuti iye angadadzapasidwa cakudya comwe ni “muti wa veneno”. (Sl 69:21) Bzimwebzi bzidacitika pomwe Jezu Kristu adapasidwa vinyu yomwe ikhadasanganizidwa na bzinthu bzakuwawa pa nthawe yomwe akhanati kufa. Tsono pomwe adalawidza iye adalamba kumwako thangwe vinyuyo ingadacitisa kuti aleke kubva kuwawa pomwe akhabonera. Pa kulewa bza kukwanisika kwa polofesiya imweyi, Mateu (27:34) adaphatisa basa fala la Cigerego lakuti kho·leʹ (bzinthu bzakuwawa), lomwe ni fala libodzi-bodzi lomwe limbagumanikambo mu Septuaginta yacigerego pa Salimo 69:21. Tsono, bukhu la Marko limbalewa bza mira (Mar 15:23), ndipo bzimwebzi bzidacitisa kuti wanthu azinji akumbuke kuti “muti wa veneno” ayai “bzinthu bzakuwawa” bzikhali “mira.” Kulewa kunango vinyu yakusanganiza na mankhwala pinango ikhadasanganizidwa na bzinthu bzakuwawa pabodzi na mira.
Cuma Cauzimu
w99 15/1 tsa. 18 ndi. 11
Kwizani Manja Yanu Yakukhulupirika pa Kupemba
11 Wanthu azinji ambapemba akakhala an’funa cinthu, tsono lufoyi lathu kwa Yahova Mulungu lin’funika kuticitisa kuti timbamutende na kumutumbiza pomwe tikucita mpembo patekha ayai pa thimu. Mpostolo Paulo adanemba kuti: “Lekani kucita thupo na cinthu ciri-centse, koma m’bzinthu bzentse mwa kupemba na kukumbira pabodzi na kutenda, citisani kuti bzakukumbira bzanu bzidziwike kwa Mulungu. Mukacita bzimwebzi, Mulungu an’dzakupasani mtendere wace omwe wanthu angaubvesese lini, ndipo mwa njira imweyi, Mulunguyo an’dzakhotcerera mitima yanu pabodzi na makumbukidwe yanu mwa Kristu Jezu.” (Afilipi 4:6, 7) M’mbuto mwakucita mpembo wakundokumbira, tin’funikambo kumbatenda Yahova thangwe ra bzisimbo bzauzimu na bzakuthupi bzomwe tinabzo. (Mimwani 10:22) Nyakunemba Salimo adanemba kuti: “Perekani ntsembe zakutenda kwa Mulungu, ndipo kwanirisani bzomwe mwapicira kwa Mulungu Mkululetu.” (Salimo 50:14) Ndipo nyimbo ya mpembo wa Davide ina mafala yakulimbikisa yakuti: “Nin’dzatumbiza dzina la Mulungu mwa kuimba nyimbo ndipo nin’dzamulemekeza mwakumutenda.” (Salimo 69:30) Kodi tin’funikambo lini kucita bzibodzi-bodzibzi pa kucita mpembo wa patekha ayai pa thimu?
5-11 AGOSTO
CUMA CA M’FALA LA MULUNGU MASALIMO 70-72
“Nin’dzauza M’badwo wa Kutsogolo” bza Boko Lamphanvu la Mulungu
w99 1/9 tsa. 18 ndi. 17
Maswaka — Pfunzisani Makumbukidwe Yanu!
17 Munthu kuti abzikhotcerere ku misampha ya Sathani ambafunika kukhala tceru ndipo nthawe zinango ambafunikambo kukhala wakukhwimika. Nthawe zinango, imwepo mungawone kuti ndimwe lini wakusiyana kokha na anzanu koma na wanthu wentse. Nyakunemba salimo adapemba kuti: “Ndimwe cidikhiro cangu, imwe Yahova Mbuya Mkululetu, nimbakukhulupirani kuyambira ndiri mwana. Imwe Mulungu mwandipfunzisa kutomera pa utswaka bwangu, ndipo mpaka pano ndikudziwisa bza mabasa yanu yakudabwisa.” (Salimo 71:5, 17) Davide ambadziwika thangwe ra kukhwimika kwace. Kodi ni lini pomwe iye adakulisa khalidwe limweri? Ni pomwe akhali tswaka! Napo pomwe iye akhanati kumenyana na Goliyati, iye akhadalatiza kale kuti akhali wakhwimika mwakukhotcerera mabira ya pai wace na mwakupha mphondolo na cimbalangondo. (1 Samuyeli 17:34-37) Davide adatumbiza Yahova pa bzentse bzomwe adacita, ndipopa adalewa kuti “nimbakukhulupirani kuyambira ndiri mwana.” Thangwe ra kuthemba Yahova, Davide alibe kukhala na mantha na mabvuto yomwe akhagumana nayo. Imwepo mukathemba Yahova, iye an’dzakuthandizani kuti mukhale wakukhwimika ndipo an’dzakupasani mphanvu kuti mukwanise ‘kukunda dziko.’ — 1 Juwau 5:4.
g04 8/10 tsa. 23 ndi. 3
Kodi Tin’funika Kumbawawona Tani Acikulire?
Nyakunemba salimo adapemba kuti: “Lekani kundisiya pa ukalamba bwangu; lekani kundisiya ndikamala mphanvu.” (Salimo 71:9) Mulungu ‘ambasiya lini’ atumiki wace wakukhulupirika napo iwo angawone ninga kuti mbakufunika lini pomwe thangwe ra magole yomwe anayo. Nyakunemba salimo akhawona lini kuti Yahova akumusiya, koma akhazindikira kuti akhafunika kuthemba kwene-kwene Mulengi wace Yahova pomwe iye akhakalamba. Yahova ambathandiza wanthu omwe ambamuthemba mwakuwasamalira pa moyo wawo wentse. (Salimo 18:25) Kazinji-kazinji thandizo limweri limbacokera kwa abale wathu wacikristau.
w14 15/1 tsa. 23 ndi. 4-5
Tumikirani Yahova Pomwe Ntsiku Zakuipa Zikanati Kufika
4 Penu imwepo mwacita bzinthu bzizinji pa moyo wanu, mungacite bwino kubzibvunza kuti: ‘Kodi ningaphatise tani basa moyo wangu pomwe ndikana mphanvu?’ Pakuti ndimwe Mkristau omwe mwacita bzinthu bzizinji pa moyo wanu, dziwani kuti muna mwayi omwe winango alibe. Mungauzembo maswaka bzomwe imwepo mudapfunza pakulewa bza Yahova. Ndipo imwepo mungalimbisembo winango na bzinthu bzomwe mudacita pakutumikira Mulungu. Mambo Davide adapemba kuti akhale na mwayi umweyu. Iye adalewa kuti: “Imwe Mulungu mwandipfunzisa kutomera pa utswaka bwangu . . . Napo ndikakalamba ndicikhala na invi, imwe Mulungu wangu, lekani kundisiya, mpaka nditauza m’badwo wa kutsogolo bza boko lanu lamphanvu na bza mphanvu zanu kwa wentse omwe an’dzabwera.” — Salimo 71:17, 18.
5 Kodi imwepo mungathandize tani winango na bzinthu bzomwe mudapfunza kwa magole mazinji? Tani mucicemera maswaka kuti yabwere kumui kwanu kuti mudzayalimbikise? Ayai kucoka nawo pabodzi mu utumiki kuti awone momwe imwepo mumbakhalira wakukondwa mu upalizi? Elihu adalewa kuti: “Msinkhu ulalewe ndipo magole mazinji yadziwise nzeru.” (Djobi 32:7) Mpostolo Paulo adauza mpfumakazi kuti zimbalimbikise maswaka na mafala yawo pabodzi na makhalidwe yawo. Iye adalewa kuti: “Akazi wacikulire . . . akhale apfunzisi wa bzinthu bzabwino.” — Tito 2:3.
Cuma Cauzimu
it-1 tsa. 768
Eufrate
Malire ya Dziko Lomwe Ajirayeri Adapasidwa. Pa mpangano omwe Mulungu adacita na Abalahamu iye adamuuza kuti angadadzapasa mbeu yace dziko “kucokera ku mkulo wa ku Edjipito mpaka ku mkulo ukulu wa Eufrate.” (Gen 15:18) Ajirayeri adauzidwambo bza piciro limweri. (Eki 23:31; Deu 1:7, 8; 11:24; Djs 1:4) Pa 1 Nkhani 5:9 pambalewa kuti pomwe Davide akhanati kutonga ninga mambo, mbadwa zinango za Rubeni zikhadamanga nyumba zawo mpaka ku “dambo pafupi na mkulo wa Eufrate.” Tsono, pakuti Eufrate una mtantho wa makilometro 800 kucokera “kumabvadzuwa kwa Jileyade” (1Nk 5:10), bzimwebzi bzikuthandauza kuti mbadwa za Rubeni zidamanga nyumba zawo kucokera kumabvadzuwa kwa Jileyade mpaka ku dambo la Asiriya lomwe limbafika ku Eufrate. (Bíblia Sagrada (1988; Edição Claretiana), Centro Bíblico Católico limbalewa kuti: “Mpaka komwe kumbayambira dambo lomwe limbafika ku Eufrate”; A Bíblia de Jerusalém (1987, nova edição, revista), Edições Paulinas limbalewa kuti: “Likhafika kufupi na dambo lomwe limbamalira ku Eufrate.”) Piciro limweri lidakwanisika bwino-bwino mu umambo bwa Davide na Salomau pomwe dziko lomwe Ajirayeri akhakhala lidakula liciphatanidza dziko la mambo wa ku Zoba. Ndipo mwa njira imweyi dzikolo likhafika m’ng’ambu inango ya mkulo wa Eufrate, mpaka ku mphimpha ya Siriya wa ku norte. (2Sa 8:3; 1Am 4:21; 1Nk 18:3-8; 2Nk 9:26) Thangwe ra kudziwika kwene-kwene, kumweko akhandokucemera kuti “ku Mkulo.” — Djs 24:2, 15; Sl 72:8.
12-18 AGOSTO
CUMA CA M’FALA LA MULUNGU MASALIMO 73-74
Bzomwe Tingacite Tikayamba Kuwenga Wanthu Omwe Ambatumikira Lini Mulungu
‘Yahova . . . Ambapulumusa Wale Omwe Atepa’
14 Munthu omwe adanemba Psalymo 73 akhali Mlevi. Iye akhana mwayi wakutumikira pa nyumba yakunamatira Yahova. Koma napo bzikhali tenepo, pa nthawe inango, iye adafika pa kutepa. Thangwe ranyi? Thangwe iye adayamba kucitira njiru wanthu wakuipa, na wanthu wakubzikuza. Sikuti thangwe ra kuti iye akhafuna kucita bzinthu bzakuipa, koma thangwe rakuti iye akhawona kuti wanthu wakuipawo akhana moyo wabwino kusiyana na moyo wace. (Psalymo 73:2-9, 11-14) Iwo akhawoneka ninga kuti adadala, ana moyo wabwino ndipo akucita lini thupo. Pomwe Mlevi ule adawona bzentsenebzi, iye adatepa kwene-kwene ndipo adalewa kuti: ‘Kulewa cadidi, ndidacenesa mtima wangu papezi ndipo ndidasamba m’manja mwangu mwakusaya kuphonya ciri-centse.’ Kulewa cadidi bzinthu bzimwebzi bzingadamucitisa kusiya kutumikira Yahova.
w20.12 matsa. 19-20 ndi. 15-16
‘Yahova . . . Ambapulumusa Wale Omwe Atepa’
15 Werengani Psalymo 73:16-19, 22-25. Mleviyo ‘adapita mu nyumba ya Mulungu.’ Pakuti m’nyumbamo mukhana anzace omwe akhanamatambo Yahova, iye adakwanisa kugwesa mtima pantsi, kukumbuka bwino, na kupemphera kuti akwanise kubvesesa bwino nkhaniyo. Bzimwebzi bzidamuthandiza kuwona kuti makumbukidwe yace yakhali yakuphonyeka, nakuti iye akhadayamba kufamba mu njira yakuphonyeka yomwe ingadamucitisa kutalikirana na Yahova. Ndipo iye adabvesesambo kuti wanthu wakuipa ambakhala pa ‘mbuto yamapseredu’ ndipo moyo wawo ‘umbawamalira kuipa.’ Mleviyo adadzayamba kuwona bzinthu ninga momwe Yahova ambawonera. Tenepo iye alibe kudzakhala pomwe wakutepa ndipo adasiya kucitira njiru wanthu omwe akhawoneka kuti akhana moyo wabwino. Bzomwe iye adacitabzi, bzidamuthandiza kuti akhale pomwe na mtendere, ndipo adakhala wakukondwa. Iye adalewa kuti: ‘Kupambula Yahova palibe comwe ndikukhumba pa dziko la pantsi.’
16 Bzomwe tikupfunza.Tin’funika lini kumbacitira njiru wanthu wakuipa omwe akuwoneka ninga kuti moyo ukuwafambira bwino. Cikondweso cawo n’cakusaya kukhalisa ndipo iwo alibe mwayi wakudzakhala na moyo wakusaya kumala kutsogolo. (Mpalizi 8:12, 13) Tikambawacitira njiru wanthuwo, ifepano tin’dzatepa, ndipo uxamwali bwathu na Yahova bun’dzamala. Tenepo, mukawona kuti mukuyamba kucitira njiru wanthu wakuipa, tewezerani bzomwe Mlevi ule adacita. Bverani malango yomwe Yahova ambatipasa mwa lufoyi, ndipo tsonkhanani na wanthu omwe ambacita bzomwe iye akufuna. Imwepo mukambafuna kwene-kwene Yahova kuposa cinthu ciri-centse, mun’dzagumana cikondweso cacadidi. Ndipo mun’dzagumana ‘moyo caiwo.’ — 1 Timotio 6:19.
w14 15/4 tsa. 4 ndi. 5
Tewezerani Cikhulupiro ca Mozeji
5 Kodi imwepo mungatcenkhe tani “kufuna kukondwa na bzinthu bza pikado bzakusaya kukhalisa”? Lekani kuyebwa kuti bzinthu bzakutsangalaza bza pikado mpsakusaya kukhalisa. Na maso ya cikhulupiro onani kuti “dziko lin’dzamala pabodzi na bzinthu bzace bzentse bzomwe wanthu ambabzifuna.” (1 Juwau 2:15-17) Mbakumbukirani bzomwe bzin’dzawacitikira. Iwo ali “pa mbuto yakuterera . . . ndipo moyo wawo umbafika kuphampha!” (Salimo 73:18, 19) Mukayezedwa kucita cinthu cakuipa, bzibvunzeni kuti: ‘Kodi ni tsogolo liponi lomwe ndikufuna kukhala nalo?’
w13 15/2 matsa. 25-26 ndi. 3-5
Cinthu Ciri-centse Cileke Kukutazisani Kutambira Ulemerero bwa Mulungu
3 Nyakunemba salimo akhakhulupira kuti Yahova angadamuphata boko lace lamadidi acimutsogolera ku ulemerero bwacadidi. (Werengani Salimo 73:23, 24.) Kodi Yahova ambacita tani bzimwebzi? Iye ambacita bzimwebzi mwakulemekeza atumiki wace wakubzicepesa mu njira zakusiyana-siyana. Yahova ambawasimba mwa kuwathandiza kubvesesa kufuna kwace. (1 Akolinto 2:7) Ndipo wale omwe ambateweza na kubvera Fala lace, iye ambawalemekeza mwa kukhala nawo pa uxamwali bwakulimba. — Tiyago 4:8.
4 Yahova ambalemekezambo atumiki wace mwakuwapasa mwayi wakupalizira mafala yabwino. (2 Akolinto 4:1, 7) Ndipo kucita basa limweri kumbaticitisa kuti tikhale na ulemerero. Wanthu omwe ambacita basa limweri na cakulinga cakufuna kulemekeza Yahova na kuthandiza winango, Yahova akuwapicira kuti: ‘Wale omwe ambandilemekeza, nin’dzawalemekezambo.’ (1 Samuyeli 2:30) Kazinji-kazinji wanthu amwewa ambakhala pa uxamwali bwakulimba na Yahova ndipo ambalemekezedwa na atumiki winango. — Mimwani 11:16; 22:1.
5 Kodi ni tsogolo liponi lomwe analo wale omwe “ambadikhirira Yahova aciteweza njira yace”? Yahova akuwapicira kuti: ‘Iye an’dzawakwiza kuti atambire dziko la pantsi. Pomwe wakuipa akuphedwa iwo an’dzawona.’ (Salimo 37:34) Iwo akudikhirira kudzatambira moyo wakusaya kumala. — Salimo 37:29.
Cuma Cauzimu
w06 15/7 tsa. 11 ndi. 1
Nfundo Zikulu-zikulu za Cigawo Cacitatu na Cacinai ca Bukhu la Masalimo
74:13, 14 — Kodi ni lini pomwe Yahova adaswa “msolo wa Nyakhoko”? “Farawo, mambo wa ku Edjipito,” ambacemeredwa “Cirombo cikulu ca m’madzi comwe ciri mu mkulo wa Nilo.” (Ezekiyeli 29:3) Nyakhoko pinango pentse akuimira “acikunda wa Farawo”. (Salimo 74:14) Kusweka kwa msolo wace kukuimira kukundidwa kwa Farawo na acikunda wace pomwe Yahova adatsudzula Ajirayeri ku ukapolo ku Edjipito.
19-25 AGOSTO
CUMA CA M’FALA LA MULUNGU MASALIMO 75-77
Thangwe Ranyi Tin’funika Lini Kukhala Wakubzikuza?
Khalani Wanthu Wakusiyana
4 Pambuyo pa mpostolo Paulo kulewa kuti wanthu angadadzakhala wakubzifuna wokha na wakufunisisa kobiri, iye adalewambo kuti wanthu angadadzakhala wakubzibva, wakubzikuza na wakusamwa. Wanthu wa makhalidwe yamweya, kawiri-kawiri ambabziwona kuti mbabwino kwene-kwene kuposa anzawo. Ambacita bzimwebzo thangwe ra kudeka kwawo, mabasa yomwe ambacita, bzinthu bzomwe anabzo pabodzi na maudindo yomwe anayo. Wanthu amwewa ambafunisisa kuti anzawo ambadabwe nawo. Pakulewa bza wanthu wa makhalidwe yamweya, mdziwi munango adati: “Mu mtima mwa wanthu amwewa muna kamphatso komwe iwo ambakagodamira kuti abzinamate wokha.” Winango ambalewa kuti kubzikuza kudaipa kwene-kwene, mwakuti wanthu wakubzikuza ambafuna lini kuwonana na anzawo omwe ambabzikuzambo.
5 Yahova ambawenga ‘maso yakubzikuza.’ (Mimwani 6:16, 17) Kubzikuza kumbacitisa kuti munthu atalikirane na Mulungu. (Psalymo 10:4) Kubzikuza ni mkhalidwe wa Sathani. (1 Timotio 3:6) Bzakupasa nsisi mpsakuti napo atumiki winango wakukhulupirika wa Yahova adalatizambo kale mkhalidwe wakubzikuza. Mwa ciratizo, mambo Uziya adakhulupirika kwa Yahova kwa magole mazinji. Tsono Bibliya limbati bza iye: ‘Pomwe adandokhala wamphanvu, mtima wace udabzikuza, mpaka kufika pakumudzonga. Tenepo, iye adacita bzinthu mwakusaya kukhulupirika kwa Yahova, Mulungu wace.’ Patsogolo pace, Mambo Uziyayo adayenda ku templo, acikatentha bzakununkhiza, napo akhathemera lini kucita bzimwebzo. Ndipo mambo Ezekiya, adalatizambo mzimu wakubzikuza, tsono iye adadzacinja. — 2 Nkhani 26:16; 32:25, 26.
w06 15/7 tsa. 11 ndi. 2
Nfundo Zikulu-zikulu za Cigawo Cacitatu na Cacinai ca Bukhu la Masalimo
75:4, 5, 10 — Kodi fala lakuti “nyanga” limbathandauza ciyani? Nyanga za bzirombo n’zamphanvu kwene-kwene. Na tenepo, fala lakuti “nyanga” likhaimira mphanvu. Yahova ‘ambakuza nyanga za wanthu wace’ ndipo ‘ambagwata nyanga za wanthu wakuipa.’ Timbacenjezedwa kuti ‘tileke kumbakuza nyanga yathu’ ayai kubzikuza. Pakuti Yahova ndiye omwe ‘ambatikwiza,’ ndipopa tin’funika kumbakumbukira kuti udindo bomwe tinabo m’gwere mudacokera kwa iye. — Salimo 75:7.
Cuma Cauzimu
w06 15/7 tsa. 11 ndi. 3
Nfundo Zikulu-zikulu za Cigawo Cacitatu na Cacinai ca Bukhu la Masalimo
76:10 — Kodi “ukali bwa munthu” bungatumbizise tani Yahova? Yahova akalekerera kuti wanthu alatize ukali bwawo kwa atumiki wace, bzimwebzi bzingawabweresere phindu. Bvuto liri-lentse lomwe tingagumane nalo lingatipfunzise cinthu cinango. Yahova ambabvuma kuti tibonere na cakulinga cakuti kubonerako kutipfunzise, tsono ana malire. (1 Pedru 5:10) ‘Ukali bunango bwa wanthu, Mulungu ndiye omwe an’dzabumalisa.’ Tsono tani tikabonera mpaka kufa? Bzimwebzi bzingatumbizisembo Yahova thangwe wale omwe ambawona kupirira kwathu kwakukhulupirika angayambembo kutumbiza Mulungu.
26 AGOSTO–1 SETEMBRO
CUMA CA M’FALA LA MULUNGU SALIMO 78
Kusaya Kukhulupirika kwa Ajirayeri ni Mcenjezo kwa Ifepano
w96 1/12 matsa. 29-30
“Pitirizani Kukumbukira Ntsiku za m’Mbuyo” — Thangwe Ranyi?
Bzakupasa ntsisi mpsakuti Ajirayeri kazinji-kazinji akhayebwa momwe Yahova akhawathandizira. Kodi bzimwebzi bzikhacitisa kuti iwo acite ciyani? Bzimwebzi bzikhacitisa kuti “mwakubwereza-bwereza, iwo amuyeze Mulungu, ndipo [akhamusunamisa] Wakucena wa Jirayeri. Iwo alibe kukumbukira bza mphanvu zace, pa ntsiku yomwe iye adawapulumusa kwa nyamadulanthaka wawo.” (Salimo 78:41, 42) Yahova adawalamba thangwe ra kuyebwa kuphatisa basa malamulo yace. — Mateu 21:42, 43.
Ciratizo cabwino pakulewa bza nkhaniyi ni bzomwe nyakunemba salimo adanemba, iye adati: “Inepano nin’dzakumbukira mabasa ya Yahova; inepano nin’dzakumbukira mabasa yanu yakudabwisa yomwe mudacita kale-kale. Nin’dzakumbukira pa mabasa yanu yentse ndipo nin’dzakumbukirambo bzicito bzanu.” (Salimo 77:11, 12) Kukumbukira lufoyi la Yahova na basa lakukhulupirika lomwe tidacita, bzimbaticitisa kuti tikhale wakulimba na wakutenda. Kuthumizira bzimwebzi, “kukumbukira ntsiku za m’mbuyo” kungaticitise kuti tileke kuneta ndipo kungaticitisembo kuti ticite ciri-centse comwe tingakwanise na kupirirambo mwakukhulupirika.
w06 15/7 tsa. 17 ndi. 16
‘Tcenkhani Kung’ung’udzika’
16 Munthu wakung’ung’udzika ambakumbukira bza iye yekha basi na mabvuto yomwe akugumana nayo ndipo ambawona lini bzisimbo bzomwe tinabzo ninga Mboni za Yahova. Kuti titcenkhe kung’ung’udzika, tin’funika kumbakumbukira bzisimbo bzomwe tinabzo. Mwa ciratizo, ali-wentse wa ifepano ana mwayi wakudziwika na dzina lace. (Zaiya 43:10) Ifepano tingakhale pauxamwali bwakulimba na kulewalewa na “Mbveseri wa mpembo” nthawe iri-yentse. (Salimo 65:2; Tiyago 4:8) Tina moyo wathandauzo thangwe timbadziwa nkhani yakulewa bza utongi bwa kudzulu ndipo timbadziwambo kuti ni mwayi wathu kukhala wakukhulupirika kwa Mulungu. (Mimwani 27:11) Nthawe zentse tingambapalizire mafala yabwino ya Umambo. (Mateu 24:14) Cikhulupiro cathu comwe tinaco pa ntsembe ya cakulombolera ya Jezu Kristu cimbatithandiza kuti tikhale na cikumbu-mtima cakucena. (Juwau 3:16) Tina bzisimbo bzimwebzi napo kuti timbapirira mabvuto yakusiyana-siyana.
w11 1/7 tsa. 10 ndi. 3-4
Kodi Yahova Ambakomedwa na Bzakucita Bzathu Ayai ne?
Nyakunemba salimo adalewa kuti: “Nthawe zizinji iwo akhambamupandukira m’dambo, acimbamukhumudwisa mu dambomo!” (Vesi 40) Ndipo vesi lakutewera limbalewa kuti: “Mwakubwereza-bwereza, iwo akhamuyeza Mulungu.” (Vesi 41) Onani kuti munembiyu adanemba bza kusaya kubvera komwe Ajirayeri adacita. Iwo alibe kucebwa kukhala na khalidwe lakuipali. Ndipo adayamba kukhala na khalidwe limweri mu dambo pambuyo pakutsudzulidwa ku Edjipito. Wanthuwo adayamba kung’ung’udzika bzomwe bzikhalatiza ninga kuti Yahova angadakwanisa lini kuwasamalira ayai kuti iye akhali lini wakukonzeka kucita bzimwebzo. (Numero 14:1-4) Bukhu linango lomwe limbathandiza wanthu omwe ambasandulizira Bibliya limbalewa kuti mafala yakuti “akhamupandukira” “yangasanduliziridwe kuti ‘iwo akhaumisa mitima yawo kwa Mulungu’ ayai ‘iwo “akhamulamba” Mulungu.’” Napo bziri tenepo, thangwe ra ntsisi zace, Yahova akhalekerera wanthu wace pomwe iwo akhalatiza kuti akungula. Tsono patsogolo pace iwo akhacita pomwe bzibodzi-bodzibzo, akhamuphindukira ndipo akhacita bzimwebzo mwakubwereza-bwereza. — Salimo 78:10-19, 38.
Kodi bzomwe iwo akhacitabzo bzikhacitisa kuti Yahova abzibve tani? Vesi 40 limbalewa kuti “iwo akhamukhumudwisa.” Bibliya linango lidasandulizira mafala yamweya kuti “iwo akhamusunamisa Mulungu.” Bukhu linango lomwe limbafotokoza bza nkhani za m’Bibliya limbalewa kuti: “Mafala yamweya yakuthandauza kuti bzomwe Adjuda akhacita bzikhasunamisa Yahova ninga momwe abereki ambabvera mwana wawo akhasaya kuwabvera ayai akawapandukira.” Ninga momwe mwana ambasunamisira abereki wace akasaya kuwabvera, Ajirayeri “[akhamusunamisa] Wakucena wa Jirayeri.” — Vesi 41.
Cuma Cauzimu
w06 15/7 tsa. 11 ndi. 4
Nfundo Zikulu-zikulu za Cigawo Cacitatu na Cacinai ca Bukhu la Masalimo
78:24, 25 — Thangwe ranyi mana yambacemeredwa kuti “tirigu yakucokera kudzulu” na “cakudya ca wanthu wamphanvu”? Mafalaya yakuthandauza lini kuti mana cikhali cakudya ca anjo. Ikhali “tirigu yakucokera kudzulu” bzomwe bzikuthandauza kuti ntsantsa yace ikhali kudzulu. (Salimo 105:40) Ndipo pakuti anjo ayai “wamphanvu” ambakhala kudzulu, mafala yakuti “cakudya ca wanthu wamphanvu” pinango pentse yangathandauze kuti mana yakhaperekedwa na Mulungu omwe ambakhala kudzulu. (Salimo 11:4) Ndipo mpsakukwanisika kuti Yahova adaphatisa basa anjo kuti apereke mana kuna Ajirayeri.