KUYAMBISA MACEZA
PFUNZIRO 1
Mbacezani Nkhani Zomwe Zingadekere Wanthu wa m’Gawo Lanu
Vesi: “Lufoyi . . . limbacita lini bzakufuna bzace bzokha.” — 1 Ako. 13:4, 5.
Kodi n’Ciyani Comwe Jezu Adacita?
1. Onani VIDIYO, ayai werengani Juwau 4:6-9. Patsogolo pace kumbukirani mibvunzo iyi:
Kodi Jezu adawona ciyani kwa mkazi Msamariya pomwe akhanati kuyamba kuceza naye?
Jezu adati: “Ndikukumbirambo madzi yakumwa.” Thangwe ranyi imweyi idakhala njira yabwino yakuyambisira maceza?
Kodi Tikupfunza Ciyani na Bzomwe Jezu Adacita?
2. Tingakhale na maceza yabwino na wanthu tikambaceza nawo nkhani yomwe ingawacitise kufuna kutetekera.
Tewezerani Jezu
3. Mbacinja-cinjani. Lekani kungingimira kuyambisa maceza pa nkhani yomwe imwepo mwakonzekera. Koma mbayambisani maceza pa nkhani yomwe yacitika ndipo wanthu akuidziwa. Bzibvunzeni kuti:
‘Kodi ni nkhani ziponi zomwe zikulewedwa mu notisiya?’
‘Kodi ni nkhani ziponi maka-maka zomwe avizinyu wangu, anzangu wa kubasa na anzangu wa kuxikola akuzifotofoza?’
4. Mbakhalani wakuzindikira. Bzibvunzeni kuti:
‘Kodi n’ciyani comwe munthuyo akucita? Kodi n’ciyani comwe iye akukumbuka?’
‘Kodi bzakubvala bzace, mawonekedwe yace na nyumba yace bzikulatiza kuti iye ambakhulupira ciyani ndipo ngwacikhalidwe ciponi?’
‘Kodi ino ni nthawe yakuthemera kuti ndiceze naye?’
5. Mbatetekerani.
Tcenkhani kumbalewalewa kwene-kwene.
M’mbuto mwa kulewalewa kwene-kwene, mbacitisani munthuyo kufotokozambo makumbukidwe yace. Ndipo bzikafunikira, mbacitani mibvunzo.