Kodi Ndife Omwe Timbacitisa Mabvuto Yomwe Tikugumana Nayo?
Thangwe ranyi mpsakufunika kudziwa mtawiro wa mbvunzoyu?
Penu ndifepano omwe timbacitisa kuti tigumane na mabvuto pa moyo wathu, ndiye kuti tin’funika kucita ciri-centse kuti tiyacepese.
Kuti Mukumbukire
Kodi wanthu ndiwo omwe ambacitisa kuti bzinthu bzakuipa bzicitike? Kumbukirani bziratizo bzakutewerabzi.
Ciwembo.
Bungwe la Organização Mundial da Saúde (OMS) limbalewa kuti pa amuna anai, m’bodzi adacitiridwa kale ciwembo pomwe akhali mwana ndipo pa akazi atatu m’bodzi adacitiridwa kale ciwembo ayai kupswithidwa (ayai adacitiridwa bzentse bziwiri) pa moyo wawo.
Infa.
Mwakubverana na relatoriyo ya 2018 ya bungweri, “bzikuwoneka kuti mu 2016 wanthu wakukwana 477.000 adaphedwa pa dziko lentse la pantsi.” Ndipo bzikuwonekambo kuti mu gole libodzi-bodziri, wanthu winango wakukwana 180.000 adaphedwambo pa nkhondo.
Kudzongeka kwa thanzi.
Mu nkhani inango yomwe idacosedwa mu revista inango, munembi wakucemeredwa Fran Smith adanemba kuti: “Wanthu wakupitirira 1 bidyau ambafumali, ndipo fodya imbacitisa kuti wanthu aduwale matenda maxanu makulu-makulu yomwe yambabweresa infa, yomwe ni: nthenda ya mtima, kufa kwa bziwalo bza m’thupi, kankro ya m’masapi, kutazira kupuma mwakukwanira na cifuwa.”
Kusiyana kwa wanthu.
Nyakupfunza bza makumbukidwe ya wanthu adati: “Kusauka, kusiyana kwa wanthu, tsankhulo, kupondereza akazi ayai amuna, kubonera kwa wanthu omwe acoka dziko lawo na mpikisano wa bzikhalidwe, bzentsebzi bzimbathimizirisa mabvuto ya wanthu ninga thupo na msunamo.”
KUTI MUDZIWE BZINANGO
Onani pa saite ya jw.org. vidiyo yakuti Thangwe ranyi Mulungu adalenga dziko la pantsi?
Bibliya Limbati
Mabvuto mazinji yomwe yali pa dziko la pantsi ni wanthu omwe ambayacitisa.
Kawiri-kawiri, mabvuto yambacitisidwa na maboma yakusaya kukhulupirika, bzomwe bzimbacitisa kuti wanthu abonere m’mbuto mwakuti mabomayo yakhotcerere wanthuwo.
‘Munthu ambapweteka munthu mwanzace pakumutonga.’—MPALIZI 8:9.
Mpsakukwanisika kumalisa mabvuto yathu.
Mitemo ya m’Bibliya imbatithandiza kukhala na thanzi labwino na kukhala pa mtendere na anzathu.
‘Mtima wakuderekha ni moyo wa thupi, koma njiru imbabvundisa mafupa.—MIMWANI 14:30.
‘Musiyiretu kukoya cakumtima, kupsa mtima, ukali, kupopota, kutukwana pabodzi na kuipa kuli-kwentse.’—WAYEFEZO 4:31.