2. Thangwe Ranyi Wanthu Wabwino Ambabonera?

Thangwe ranyi mpsakufunika kudziwa mtawiro wa mbvunzoyu?

Bziri lini bwino kuti wanthu wabwino ambabonere. Ndipopa wanthu winango ambawona kuti bziribe phindu kulimbikira kuti akhale munthu wabwino.

Kuti Mukumbukire

Wanthu winango ambakhulupira kuti munthu akafa, ambakabadwa papsa ku dziko linango. Iwo ambalewa kuti munthu omwe ambacita bzinthu bzabwino ambabadwa papsa na moyo wabwino, tsono munthu omwe ambacita bzinthu bzakuipa ambabadwa papsa na moyo wakubonera. Mwakubverana na nzeru imweyi, napo munthu wabwino angabonere thangwe ra cinthu cakuphonyeka comwe adacita kale-kale pa “moyo wace.” Tsono . . .

• Kodi cakulinga cakubonerako cingakhale ciponi pakuti munthuyo akukumbukira lini bzomwe adacitabzo?

• Thangwe ranyi timbacita thupo kwene-kwene na thanzi lathu na kufuna kukhotcerera moyo wathu pakuti bzinthu bzentse bzomwe bzin’ticitikira bzidakonzedwa kale mwakubverana na bzomwe tidacita kale-kale?

  KUTI MUDZIWE BZINANGO

  Onani pa webisaite ya jw.org vidiyo yakuti Thangwe Ranyi Mulungu Ankulekerera Kubonera?

Bibliya Limbati

Kubonera ni cirango lini ca Mulungu.

Kawiri-kawiri, mabvuto yambatigwera thangwe ra kukhala pa mbuto na nthawe yakuphonyeka.

‘Ndidawonambo cinthu cinango pantsi pano kuti, nyakuthamanga kwene-kwene ndiye lini omwe nthawe zentse ambakunda pa mapici, wanthu wamphanvu ndiwo lini omwe nthawe zentse ambakunda pa nkhondo, wanthu wanzeru ndiwo lini omwe nthawe zentse ambagumana cakudya, adziwi ndiwo lini omwe nthawe zentse ambagumana cuma, ndipo omwe ana cidziwiso ndiwo lini omwe nthawe zentse ambafunidwa, pakuti nthawe ya matsoka na bzinthu bzakusaya kudikhirika bzimbagwera wanthu wentse.’—MPALIZI 9:11.

Pikado ni cinthu cibodzi comwe cimbaticitisa kuti tibonere.

Kawiri-kawiri, wanthu akalewa fala lakuti ‘pikado’ ambakhala akulewa cinthu cakuphonyeka comwe munthu wacita. Koma Bibliya limbaphatisa basa fala lakuti pikado pakufuna kulewa bza khalidwe lomwe wanthu wentse analo, bziribe basa kuti munthuyo ngwabwino ayai ngwakuipa.

‘Ine ndidabadwa wakuphonya kale, ndipo ndine wapikado kuyambira pomwe mai wangu adakhala na mimba.’—PSALYMO 51:5.

Pikado idabweresa mabvuto mazinji kwene-kwene kuna wanthu.

Pikado idadzonga uxamwali bomwe tikhanabo na Mulungu, idadzongambo mbverano wa wanthufe kuphatanidzambo cirengedwe. Bzimwebzi bzimbabweresa mabvuto kuna munthu ali-wentse payekha na kwa wanthu wentse.

‘Pomwe ndikufuna kucita cabwino, cakuipa cimbandibwerera.’—WAROMA 7:21.

‘Cirengedwe centse cikubuula pabodzi, ndipo cikubva kuwawa mpaka pano.’—WAROMA 8:22.