DZIKO LOMWE LIRI PA MABVUTO

3 | Mbabveranani na Famidya Zanu

THANGWE RANYI BZIMWEBZI MPSAKUFUNIKA?

Mu dziko lakudzala na mabvutoli, wanthu azinji ambakhala na thupo. Thangwe ra bzimwebzi, wanthu winango ambalekerera kuti mabvutoyo yadzonge uxamwali bomwe iwo anabo na anzawo.

Wanthu ambalekerera kuti uxamwali bomwe anabo na anzawo bumale.
Mabanja yambandokhalira kunesana.
Abereki ambakhala alibe basa na mabvuto yomwe wana wawo akugumana nayo.

Bzomwe Mun’funika Kudziwa

Axamwali mbakufunika kwene-kwene thangwe iwo angakuthandizeni pomwe mukugumana na mabvuto.
Bzinthu bzomwe bzikucitika m’dzikoli bzingacitise kuti banja lanu ligumane na mabvuto.
Wana akambabva na kuwona bzinthu bzakuipa m’manotisiya, iwo angacite mantha kwene-kwene.

Bzomwe Mungacite

Bibliya limbalewa kuti: “Xamwali wacadidi ambakufuna nthawe zentse, ndipo iye ni m’bale omwe adabadwira kuti akuthandize pakawoneka mabvuto.” — Mimwani 17:17.

Axamwali angatithandize ndipo angatipase malango yabwino. Imwepo mukadziwa kuti muna xamwali omwe ambakufunani bzin’dzakuthandizani kukhala wakulimba mukagumana na mabvuto.

MOMWE MUNGABZIKHOTCERERERE—Bzinthu Bzomwe Bzingakuthandizeni

Mukagumana na mabvuto, bzinthu bzimwebzi bzingakuthandizeni kubverana na famidya zanu

LIMBISANI BANJA LANU

Limbisani Banja Lanu

Bibliya limbalewa kuti: “Awiri ambaposa m’bodzi . . . M’bodzi wa iwo akagwa, munangoyo angamuthandize kuima.” (Mpalizi 4:9, 10) Mwamuna na mkazi wakulowolana an’funika kukhala ninga anyakufambisa ndeke ibodzi omwe cakulinga cawo n’cibodzi, sikuti ninga anyakufambisa ndeke ziwiri zomwe zin’funa kugudzana.

Lekani kumbatulira ciya canu mwanzanu wa m’banja. Yezerani kukhala wakupirira.
Sumana iri-yentse, mbacezeranani mabvuto yomwe mukugumana nayo. Kumbukirani kuti nkhani ikulu n’kumalisa nkhaniyo sikuti kunesana.
Mbapambulani nthawe kuti mumbacite pabodzi bzinthu bzomwe mwentse mumbafuna.
Kumbukirani bzinthu bzabwino bzomwe mudacita pabodzi mwakuwona foto zanu za pa kazamento ayai za bzinthu bzinango bzomwe mukhacita pabodzi.

“Napo kuti mungakhale na nzeru zakusiyana pa bzinthu bzinango, koma mungapitirize kucita bzinthu mwakubverana. Banja lingacite cakusankhula pabodzi ndipo liciphata basa pabodzi kuti bzomwe lasankhulabzo bzikwanisike.” — David.

LIMBISANI UXAMWALI BWANU NA WINANGO

Limbisani Uxamwali Bwanu Na Winango

M’mbuto mwakundombafuna kuti axamwali wanu akuthandizeni, mbacitani ciri-centse kuti mumbawathandizembo. Mukambalimbisa winango, imwepo mumbakhalambo wakulimba.
Mbawaligalirini axamwali wanu kuti mubve kuti ali tani.
Bvunzani axamwali wanu momwe iwo adalimbanira na mabvuto yakundendemerana na yomwe imwepo mukugumana nayo.

“Nthawe zakunesa zimbandendemezeredwa na conzi ca mphanvu. Pa nthawe ningati zimwezi, axamwali wanu angakuthandizeni. Axamwali ambacita namwe thupo ndipo ambadziwa kuti imwepo mumbacita nawombo thupo.” — Nicole.

THANDIZANI WANA WANU

Thandizani Wana Wanu

Bibliya limbalewa kuti: ‘Mbafulumizani kubvesesa, mucimbacedwa kulewalewa.’ (Tiyago 1:19) Pakuyamba bzingakhale bzakunesa kuti wana wanu akuuzeni bza mabvuto yawo, tsono mukawatetekera mwakupirira bzin’dzacitisa kuti iwo ambakuuzeni bzomwe akugumana nabzo.

Citisani kuti wana wanu ambakhale wakutsudzuka kukuuzani momwe iwo akubvera. Wana winango ambakhala wakutsudzuka akakhala ali m’karo ayai akufamba mu njira, mbuto mwakuceza nawo nkhope na nkhope ku mui.
Lekani kulekerera kuti wana wanu ambawone nkhani zomwe zingawasokoneze.
Adziwiseni wana wanu bzinthu bzomwe mwacita kuti mukhotcerere banja lanu
Konzekerani bzinthu bzomwe bzingacitike mwadzidzidzi ndipo yezerani kubzicita na wana wanu.

“Cezani na wana wanu ndipo asiyeni afotokoze momwe iwo akubvera. Bzingakhale bzakunesa kwa iwo kukuuzani penu ana mantha ayai penu ana ciya. Auzeni kuti imwepo mumbakhalambo na makumbukidwe yamweyo ndipo auzenimbo momwe mudalimbanira nayo.” — Bethany.