-
Kodi Umambo bwa Mulungu n’Ciyani?Khalani na Moyo Wakukondwa Mpaka Kale-kale!—Bukhu Lomwe Lingakuthandizeni Kubvesesa Bibliya
-
-
PFUNZIRO 31
Kodi Umambo bwa Mulungu n’Ciyani?
Nkhani ikulu yomwe imbafotokozedwa m’Bibliya imbalewa bza Umambo bwa Mulungu. Yahova an’dzaphatisa basa Umambobu kuti an’dzakwanirise bzomwe akhafuna pakuyamba pomwe adalenga dziko la pantsi. Kodi Umambo n’ciyani? Kodi timbabziwa tani kuti Umambobo bukutonga kale? Kodi Umambobo bwacita kale ciyani? Ndipo bun’dzacita ciyani kutsogoloku? Mu pfunziro lino na lakutsogolo tiniwona mitawiro ya mibvunzoyi.
1. Kodi Umambo bwa Mulungu n’ciyani ndipo Mambo wace ni mbani?
Umambo ni boma lomwe lidakhazikisidwa na Yahova Mulungu. Ndipo Mambo wa Umambobo ni Jezu Kristu ndipo akutonga kudzulu. (Mateu 4:17; Juwau 18:36) Pakulewa bza Jezu, Bibliya limbati: “Iye an’dzatonga . . . mpaka kale-kale.” (Luka 1:32, 33) Pakuti Jezu ni Mambo wa Umambo bwa Mulungu, iye an’dzatonga dziko lentse la pantsi.
2. Kodi mbani omwe an’dzatonga pabodzi na Jezu?
Jezu an’dzatonga lini yekha. Iye an’dzatonga pabodzi na wanthu wakucokera ku “dzinza liri-lentse, cirewedwe ciri-centse, mtundu uli-wentse . . . ndipo iwo an’dzakhala amambo acidzatonga dziko la pantsi.” (Apokalipse 5:9, 10) Kodi mbangasi omwe an’dzatonga pabodzi na Kristu? Kuyambira pomwe Jezu adabwera pa dziko la pantsi, Akristau azinji akukhala ateweri wace. Kodi ni wentse omwe an’dzatonga naye? Ne, koma ni Akristau wakukwana 144 000 okha basi. (Werengani Apokalipse 14:1-4.) Ndipo Akristau wentse omwe an’dzayenda lini kudzulu an’dzakhala mzika za Umambobo pa dziko la pantsi pano. — Salimo 37:29.
3. Thangwe ranyi boma la Mulungu ndabwino kwene-kwene kuposa maboma ya wanthu?
Napo atongi wa maboma ya wanthu ambayezera kucita bzinthu bzabwino, iwo ambakwanisa lini kucita cinthu ciri-centse comwe ambafuna thangwe alibe mphanvu. Ndipo atongi winango omwe ambadzapita nkhankha yawo ambakhala wanthu omwe ambafuna kuti bzentse bzikhale bzawo ndipo ambakhala alibe basa na wanthu omwe akuwatonga. Tsono Jezu omwe ni Mtongi wa Umambo bwa Mulungu, an’dzapitidwa lini nkhankha na munthu ali-wentse. Thangwe Mulungu “an’dzakhazikisa umambo bomwe cipo bucidzapfudzidwa.” (Daniyeli 2:44) Jezu an’dzatonga dziko lentse la pantsi, ndipo iye an’dzacitira wanthu wentse bzabwino sikuti kucita kunyang’ana nkhope. Iye ngwalufoyi, wakudeka mtima na wacirungamo ndipo an’dzapfunzisa wanthu kuti adzalatizembo makhalidwe yamweya kuna anzawo. — Werengani Zaiya 11:9.
FUFUDZANI BZINANGO
Onani bzomwe bzimbalatiza kuti Umambo bwa Mulungu n’bwabwino kwene-kwene kuposa maboma ya wanthu.
4. Boma lamphanvu kwene-kwene lin’dzatonga dziko lentse la pantsi
Jezu Kristu ngwamphanvu kwene-kwene kuposa mtongi ali-wentse. Werengani Mateu 28:18, ndipo mukamala cezeranani mbvunzo wakutewerayu:
Kodi n’kusiyana kuponi komwe kulipo pakati pa mphanvu za Jezu na za atongi wa wanthu?
Maboma ya wanthu yambacinja-cinja ndipo boma liri-lentse limbatonga mkati mwa malire yace. Tsono tani pakulewa bza Umambo bwa Mulungu? Werengani Daniyeli 7:14, ndipo mukamala cezeranani mibvunzo ikutewerayi:
Thangwe ranyi mpsakudekeza kudziwa kuti Umambo bwa Mulungu “bun’dzapfudzidwa lini”?
Thangwe ranyi mpsakudekeza kudziwa kuti Umambobo bun’dzatonga dziko lentse la pantsi?
5. Maboma ya wanthu yangakwanise lini kumalisa mabvuto yathu
Thangwe ranyi Umambo bwa Mulungu bun’dzapfudza maboma ya wanthu? Onani VIDIYO, ndipo mukamala cezeranani mbvunzo wakutewerayu.
Kodi n’ciyani comwe cacitika na utongi bwa wanthu?
Werengani Mpalizi 8:9, ndipo mukamala cezeranani mbvunzo wakutewerayu:
Kodi imwepo mumbakumba kuti Umambo bwa Mulungu bungapfudze maboma ya wanthu? Thangwe ranyi?
6. Umambo bwa Mulungu buna atongi omwe ambatibvesesa
Pakuti mambo wathu Jezu adakhala na moyo pa dziko la pantsi pano, iye “[angatibvesese] bzakuphonya bzathu.” (Ahebereu 4:15) Yahova adasankhula amuna na akazi wakukhulupirika wakukwana 144 000 omwe an’dzakatonga pabodzi na Jezu, iwo ni wanthu wakucokera ku “dzinza liri-lentse, cirewedwe ciri-centse, mtundu uli-wentse na dziko liri-lentse.” — Apokalipse 5:9.
Kodi mwakomedwa kudziwa kuti Jezu pabodzi na omwe an’katonga naye kudzulu adakhalambo pa dziko la pantsi pano? Thangwe ranyi?
Yahova adasankhula amuna na akazi wakusiyana-siyana kuti akatonge pabodzi na Jezu
7. Umambo bwa Mulungu buna malamulo yabwino kwene-kwene kuposa malamulo ya wanthu
Maboma ya wanthu yambakonza malamulo yacikumbuka kuti yanibweresa phindu na kukhotcerera wanthu wa m’dziko lawo. Ndipo Umambo bwa Mulungu bunayombo malamulo yomwe mzika zace zin’funika kuyateweza. Werengani 1 Akolinto 6:9-11, ndipo mukamala cezeranani mibvunzo ikutewerayi:
Kodi imwepo mukukumbuka kuti bzinthu bzin’dzakhala tani wanthu wentse akadzateweza malamulo ya Mulungu?a
Kodi imwepo mukukumbuka kuti Yahova ambafuna kuti mzika za Umambobu ziteweze malamuloya? Thangwe ranyi?
Kodi n’ciyani comwe cikulatiza kuti wanthu omwe ambabvera lini malamuloya angacinje? — Onani vesi 11.
Maboma yambakonza malamulo kuti yakhotcerere na kuthandiza wanthu wawo. Umambo bwa Mulungu buna malamulo yabwino kwene-kwene yomwe yambakhotcerera na kuthandiza wanthu wace
WANTHU WINANGO AMBALEWA KUTI: “Kodi Umambo bwa Mulungu n’Ciyani?”
Kodi mungatawire tani?
KODI MWAPFUNZA CIYANI?
Umambo bwa Mulungu ni boma lakudzulu ndipo lin’dzatonga dziko lentse la pantsi.
Mibvunzo yakubwerezera
Kodi mbani omwe an’dzatonga mu Umambo bwa Mulungu?
Thangwe ranyi Umambo bwa Mulungu n’bwamphanvu kwene-kwene kuposa bwa wanthu?
Kodi Yahova ambafuna kuti mzika za Umambobo zicite ciyani?
ONANI POMWE IBZI
Onani bzomwe Jezu adapfunzisa kuti Umambo buli kuponi.
“Kodi Umambo bwa Mulungu ni Cinthu Comwe Ciri mu Mtima Mwathu?”(Nkhani ya pa jw.org)
Thangwe ranyi Mboni za Yahova zimbakhulupira Umambo bwa Mulungu mʼmbuto mwa kukhulupira mautongi ya wanthu?
Onani bzomwe Bibliya limbalewa pa nkhani ya wanthu wakukwana 144 000 omwe Yahova adawasankhula kuti akatonge pabodzi na Jezu.
“Kodi ni Mbani Omwe An’dzayenda Kudzulu?” (Nkhani ya pa jw.org)
Kodi n’ciyani comwe cidatsangalaza mkazi munango m’kawoko kudziwa kuti ni Mulungu yekha omwe an’dzabweresa cirungamo pa dziko?
“Ndidadzadziwa Omwe Angamalise Kusaya Cirungamo” (Mukani! wa Novembro, 2011)
-
-
Umambo bwa Mulungu Bukutonga!Khalani na Moyo Wakukondwa Mpaka Kale-kale!—Bukhu Lomwe Lingakuthandizeni Kubvesesa Bibliya
-
-
PFUNZIRO 32
Umambo bwa Mulungu Bukutonga!
Umambo bwa Mulungu budayamba kutonga kudzulu mu 1914. Limweri ni gole lomwe ntsiku zakumalizira za utongi bwa wanthu zidayamba. Kodi tikudziwa tani bzimwebzi? Tiniwona bzomwe Bibliya likhadaleweratu, bzomwe bzikucitika ntsiku zino na momwe makhalidwe ya wanthu yaliri kuyambira mu 1914.
1. Kodi n’ciyani comwe Bibliya likhadaleweratu?
Bukhu la Daniyeli limbatithandiza kubvesesa kuti Umambo bwa Mulungu bungadadzayamba kutonga kuphampha kwa nthawe yomwe imbacemeredwa “nthawe zakukwana 7.” (Daniyeli 4:16, 17) Pomwe padapita magole mazinji, Jezu adacemerambo nthawe ibodzi-bodziyi kuti “nthawe zakuikhidwiratu za wanthu wa mitundu,” ndipo iye adapfunzisa kuti nthawe imweyi ikhanati kumala. (Luka 21:24) Ninga momwe tiniwonera, nthawe zakukwana 7 zidamala mu 1914.
2. Kodi n’ciyani comwe cikucitika kuyambira mu 1914?
Anyakupfunza wa Jezu adamubvunza kuti: “Cizindikiro ca kuwonekera kwanu na cakumala kwa dzikoli cin’dzakhala ciponi?” (Mateu 24:3) Pakuwatawira, Jezu adalewa bzinthu bzizinji bzomwe bzingadadzacitika, iye akadzayamba kutonga kudzulu ninga Mambo wa Umambo bwa Mulungu. Bzinango mwa bzinthubzo ni nkhondo, njala na bziteke-teke. (Werengani Mateu 24:7.) Bibliya likhadaleweratu kuti makhalidwe ya wanthu mu “ntsiku zakumalizira” yangadadzacitisa moyo ‘kukhala wakunesa’ kwene-kwene. (2 Timotio 3:1-5) Bzinthu bzimwebzi bzidayamba kuwonekera bwino-bwino mu 1914.
3. Thangwe ranyi bzinthu bzaipiratu kuyambira pomwe Umambo bwa Mulungu budayamba kutonga?
Pomwe Jezu adakhala Mambo wa Umambo bwa Mulungu, iye adamenyana na Sathani pabodzi na madimonyo yace kudzulu. Tsono Sathani adaluza nkhondoyo. Bibliya limbalewa kuti “iye adathusidwa pa dziko la pantsi ndipo anjo wace adathusidwambo naye pabodzi.” (Apokalipse 12:9, 10, 12) Sathani adakalipa kwene-kwene thangwe akudziwa kuti tsapanopapa an’pfudzidwa. Ndipopa iye akucitisa mabvuto mazinji pa dziko la pantsi pano. Bzimwebzi bzimbatithandiza kubvesesa kuti thangwe ranyi bzinthu bzaipiratu ntsiku zino! Tsono Umambo bwa Mulungu bun’dzamalisa mabvuto yentse.
FUFUDZANI BZINANGO
Pfunzani kuti timbadziwa tani kuti Umambo bwa Mulungu budayamba kutonga mu 1914 ndipo bzimwebzi bzikuthandauza ciyani kwa ifepano.
4. Mapolofesiya ya m’Bibliya yambalatiza kuti Umambo bwa Mulungu budayamba kutonga mu 1914
Mulungu adacitisa Nabukadinazori, mambo wa ku Babiloniya wakale-kale kulota bzakutsogolo. Ndipo pakuthumbudzula bzomwe adalotabzo, Daniyeli adalatiza kuti bzimwebzi bzingadadzakwanisika mu umambo bwa Nabukadinazoriyo na mu Umambo bwa Mulungu. — Werengani Daniyeli 4:17.a
Werengani Daniyeli 4:20-26, ndipo mukamala phatisani basa kwadru kuti mutawire mibvunzo ikutewerayi:
(A) Kodi Nabukadinazori adalota ciyani? — Onani vesi 20 na 21.
(B) N’ciyani comwe cingadadzacitika na cimutico? — Onani vesi 23.
(C) N’ciyani cingadadzacitika kuphampha kwa “nthawe 7”? — Onani vesi 26.
Kodi Maloto ya Cimutico Yakubverana Tani na Umambo bwa Mulungu?
POLOFESIYA (Daniyeli 4:20-36)
Umambo
(A) Cimuti cikulu
Umambo budasiya kutonga
(B) “Gwesani cimutico,” ndipo papite “nthawe zakukwana 7”
Umambo bungadadzayamba pomwe kutonga
(C) “Imwepo mun’dzabwezeredwa pomwe umambo bwanu”
Kukwanisika kwakuyamba kwa polofesiyayi . . .
(D) Kodi cimutico cikuimira mbani? — Onani vesi 22.
(E) Kodi ni lini pomwe iwo adasiya kutonga? — Werengani Daniyeli 4:29-33.
(F) Kodi n’ciyani cidacitikira Nabukadinazori kuphampha kwa “nthawe zakukwana 7”? — Werengani Daniyeli 4:34-36.
KUKWANISIKA KWAKUYAMBA
Umambo
(D) Nabukadinazori Mambo wa ku Babiloniya
Umambo budasiya kutonga
(E) Pambuyo pa 606 AEC, Nabukadinazori adakhala nyamsala ndipo alibedi kudzatonga kwa magole 7 caiyo
Umambo bungadadzayamba pomwe kutonga
(F) Nabukadinazori adadzakhala bwino aciyamba pomwe kutonga
Kukwanisika kwaciwiri kwa polofesiyayi . . .
(G) Kodi cimutico cikuimira mbani? — Werengani 1 Nkhani 29:23.
(H) Kodi ni lini pomwe iye adasiya kutonga? Kodi timbadziwa tani kuti umambobo bukhanati kuyamba kutonga napo pomwe Jezu akhali pa dziko la pantsi pano? — Werengani Luka 21:24.
(I)Kodi ni lini pomwe umambobo budayamba pomwe kutonga, ndipo budayamba kutongera kuponi?
KUKWANISIKA KWACIWIRI
Umambo
(G) Amambo wa Jirayeri akhaimira utongi bwa Mulungu
Umambo budasiya kutonga
(H) Jeruzalemu adapfudzidwa, ndipo palibe mambo wa Jirayeri omwe adatonga magole 2520
Umambo bungadadzayamba pomwe kutonga
(I) Jezu adayamba kutonga kudzulu ninga Mambo wa Umambo bwa Mulungu
Kodi nthawe zakukwana 7 zikhali magole mangasi?
Mavesi manango ya m’Bibliya yambatithandiza kubvesesa bwino-bwino mavesi manango. Mwa ciratizo, bukhu la Apokalipse limbalewa kuti magole matatu na meya ni ntsiku zakukwana 1260. (Apokalipse 12:6, 14) Tenepo nthawe zakukwana 7 ni ntsiku zakukwana 2520. M’Bibliya kawiri-kawiri ntsiku imbaimira gole. (Ezekiyeli 4:6) Tenepo ntsiku zakukwana 7 zomwe zimbalewedwa mu bukhu la Daniyeli, zimbayimira magole 2520.
5. Dziko lacinja kwene-kwene kuyambira mu 1914
Jezu adaleweratu momwe bzinthu bzingadadzakhalira pa dziko la pantsi iye angadayamba kutonga ninga Mambo kudzulu. Werengani Luka 21:9-11, ndipo mukamala cezeranani mbvunzo wakutewerayu:
Kodi ni bzinthu bziponi bzomwe mumbawona ayai kubva kuti bzikucitika?
Mpostolo Paulo adaleweratu bza makhalidwe yomwe wanthu angadadzakhala nayo mu ntsiku zakumalizira za utongi bwa wanthu. Werengani 2 Timotio 3:1-5, ndipo mukamala cezeranani mbvunzo wakutewerayu:
Kodi imwepo mumbawona kuti wanthu ana makhalidwe yamweya ntsiku zino?
6. Latizani kuti mumbakhulupira kuti Umambo bwa Mulungu bukutonga
Werengani Mateu 24:3, 14, ndipo mukamala cezeranani mibvunzo ikutewerayi:
Kodi ni basa liponi lomwe likulatiza kuti Umambo bwa Mulungu bukutonga?
Kodi imwepo mungathandizirembo tani basa limweri?
Umambo bwa Mulungu bukutonga kale kudzulu ndipo ntsiku yakuti buyambembo kutonga pa dziko la pantsi pano yasala pang’ono. Werengani Ahebereu 10:24, 25, ndipo mukamala cezeranani mbvunzo wakutewerayu:
Kodi n’ciyani comwe tin’funika kucita “pomwe tikuwona kuti ntsikuyo ikufendera”?
Mucidziwa cinthu cinango comwe cingapulumuse moyo wa wanthu winango, kodi n’ciyani comwe mungadacita?
WANTHU WINANGO AMBALEWA KUTI: “Thangwe ranyi Mboni za Yahova zimbalewa kuti gole la 1914 ni gole lakufunika kwene-kwene?”
Kodi mungati tani?
KODI MWAPFUNZA CIYANI?
Mapolofesiya ya m’Bibliya na momwe bzinthu bziriri pa dziko la pantsi bzikulatizira kuti Umambo bwa Mulungu bukutonga. Timbalatiza kuti timbakhulupira bzimwebzi tikambapalizira na kumbagumanika pa mitsonkhano ya gwere.
Mibvunzo yakubwerezera
Kodi n’ciyani comwe cidacitika kuphampha kwa nthawe zakukwana 7 zakulewedwa mu bukhu la Daniyeli?
Kodi n’ciyani cimbakutsimikizirani kuti Umambo bwa Mulungu budayamba kutonga mu 1914?
Kodi mungalatize tani kuti mumbakhulupira kuti Umambo bwa Mulungu bukutonga?
ONANI POMWE IBZI
Onani bzomwe afotokozi wa nkhani za kale na wanthu winango ambalewa bza kucinja kwa bzinthu kuyambira mu 1914.
“Nthawe Yomwe Makhalidwe ya Wanthu Yadacinja Kwene-kwene” (Mukani! wa Abril, 2007)
Werengani kuti muwone momwe polofesiya yakugumanika pa Mateu 24:14 idacinjira moyo wa mwamuna munango.
“Ndikhafuna Kwene-kwene Masenzeka ya Beizebol Kuposa Ciri-centse!” (Ntsanza ya Mulindiri N.° 3 2017)
Kodi timbadziwa tani kuti polofesiya yakunembedwe pa Daniyeli kapitulo 4 imbakhala ikulewa bza Umambo bwa Mulungu?
Kodi n’ciyani cimbalatiza kuti “nthawe zakukwana 7” zomwe zimbalewedwa mu Daniyeli kapitulo 4 zidamala mu 1914?
a Onani nkhani ziwiri zakumalizira pa mbali yakuti Onani pomwe ibzi mu pfunziro lino.
-
-
Kodi n’Ciyani comwe Umambo bwa Mulungu Bun’dzacita?Khalani na Moyo Wakukondwa Mpaka Kale-kale!—Bukhu Lomwe Lingakuthandizeni Kubvesesa Bibliya
-
-
PFUNZIRO 33
Kodi n’Ciyani Comwe Umambo bwa Mulungu Bun’dzacita?
Umambo bwa Mulungu bukutonga kale. Ndipo tsapanopapa bunicinja bzinthu pa dziko la pantsi. Mbaticezeraneni bzinthu bzabwino bzomwe bzin’dzacitika pomwe Umambobo bun’dzakhala bukutonga pa dziko la pantsi.
1. Kodi Umambo bwa Mulungu bun’dzabweresa tani mtendere na cirungamo pa dziko la pantsi?
Jezu omwe ni Mambo wa Umambo bwa Mulungu, an’dzapha wanthu wakuipa na kupfudza maboma ya wanthu pa nkhondo ya Armagedo. (Apokalipse 16:14, 16) Pa nthaweyo in’dzakwanirisidwa polofesiya ya m’Bibliya yakuti: “Kandosala ka nthawe pang’ono, ndipo anyakuipa an’dzawoneka lini pomwe.” (Salimo 37:10) Jezu an’dzaphatisa basa Umambo kuti atsimikizire kuti dziko lentse lina mtendere na cirungamo. — Werengani Zaiya 11:4.
2. Kodi moyo un’dzakhala tani Mulungu akadzakwanirisa cakulinga cace pa dziko la pantsi?
Mu utongi bwa Umambo bwa Mulungu, “anyakulungama an’dzatambira dziko la pantsi, acidzakhala m’mwemo mpaka kale-kale.” (Salimo 37:29) Kumbukirani kukhala m’dziko lomwe munthu ali-wentse ambacita bzinthu bzabwino, ambafuna Yahova na anzace. Palibe omwe an’dzaduwala ndipo munthu ali-wentse an’dzakhala mpaka muyaya.
3. Kodi n’ciyani comwe Umambo bwa Mulungu bun’dzacita bukadzamala kupha wanthu wakuipa?
Pambuyo pakupha wanthu wakuipa, Jezu an’dzatonga magole 1000 ninga Mambo. M’magole yamweya, iye na wa 144 000 omwe an’dzatonga naye pabodzi an’dzathandiza wanthu kukhala wakulungama pa dziko la pantsi. Kuphampha kwa magole 1000, dziko lentse lin’dzakhala paraizo wakudeka ndipo wanthu wentse an’dzakhala wakukondwa thangwe iwo an’dzakhala akubvera malamulo ya Yahova. Yakadzamala magole 1000 Jezu an’dzapereka Umambobo kwa pai wace, Yahova. Pa nthawe imweyo, dzina la Yahova “[lin’dzacenesedwa.]” (Mateu 6:9, 10) Bzimwebzi bzikadzacitika bzin’dzalatiza kuti Yahova ni mtongi wabwino omwe ambasamalira wanthu wace. Yahova an’dzapha Sathani, madimonyo na munthu ali-wentse omwe an’dzapandukira utongi bwace. (Apokalipse 20:7-10) Bzinthu bzabwino bzomwe Umambo bwa Mulungu bun’dzacita bzin’dzakhala mpaka muyaya.
FUFUDZANI BZINANGO
Onani bzinthu bzomwe bzingatithandize kukhulupira kuti Mulungu an’dzaphatisa basa Umambo bwace kuti adzakwanirise bzomwe Bibliya limbalewa.
4. Umambo bwa Mulungu bun’dzapfudza maboma ya wanthu
“Munthu ambaboneresa mwanzace pakumutonga.” (Mpalizi 8:9) Yahova an’dzaphatisa basa Umambo bwace kuti amalise kusaya cirungamo.
Werengani Daniyeli 2:44 na 2 Atesalonika 1:6-8, ndipo mukamala cezeranani mibvunzo ikutewerayi:
Kodi n’ciyani comwe Yahova na Mwana wace, an’dzacita na maboma ya wanthu pabodzi na omwe ambayathandizira?
Kodi bzomwe mwapfunza pakulewa bza Yahova na Jezu bzimbakutsimikizani tani kuti bzomwe iwo anʼdzacita bzin’dzakhala bzacilungamo?
5. Jezu ni Mambo wabwino
Ninga Mambo wa Umambo bwa Mulungu, Jezu an’dzathandiza wanthu pa dziko la pantsi mu njira zakusiyana-siyana. Onani VIDIYO kuti muwone momwe Jezu adalatizira kuti ambafuna kuthandiza wanthu ndipo onanimbo momwe Mulungu adamupasira mphanvu kuti acite bzimwebzo.
Pomwe Jezu akhali pantsi pano adalatiza bzomwe Umambo bun’dzacita. Kodi ni bzisimbo bziponi bzomwe mukuwona m’nyantsimu bzomwe mumbabzikumbukira? Werengani mavesi yakuteweraya kuti yakuthandize kudziwa bwino bzisimbobzi.
POMWE JEZU AKHALI PANTSI PANO, IYE . . .
KUCOKERA KUDZULU, JEZU . . .
adaimisa conzi. — Marko 4:36-41.
an’dzakonza bzinthu bzentse bzomwe bzidadzongeka. — Zaiya 35:1, 2.
adadyesa wanthu azinji. — Mateu 14:17-21.
an’dzamalisa njala.— Salimo 72:16.
adapoza matenda yakusiyana-siyana. — Luka 18:35-43.
an’dzamalisa matenda. — Zaiya 33:24.
adalamusa anyakufa. — Luka 8:49-55.
an’dzamalisa infa. — Apokalipse 21:3, 4.
6. Umambo bwa Mulungu bun’dzabweresa tsogolo labwino
Umambo bun’dzapasa wanthu moyo wabwino omwe Mulungu akhaufuna. Iwo an’dzakhala na moyo mpaka muyaya m’paraizo pa dziko la pantsi. Onani VIDIYO kuti muwone momwe Yahova akuphatisira basa Mwana wace, Jezu, kuti akwanirise cakulinga cace.
Werengani Salimo 145:16, ndipo mukamala cezeranani mbvunzo wakutewerayu:
Kodi imwepo mumbabva tani thangwe ra kudziwa kuti Yahova an’dzapasa ali-wentse comwe akufuna?
WANTHU WINANGO AMBALEWA KUTI: “Tentsenefe tingadaphata basa pabodzi, tingadakwanisa kumalisa mabvuto m’dzikoli.”
Kodi ni mabvuto yaponi yomwe maboma ya wanthu yatazira kumalisa koma yan’dzamalisidwa na Umambo bwa Mulungu?
KODI MWAPFUNZA CIYANI?
Umambo bwa Mulungu bun’dzacita bzomwe Mulungu akufuna. Bun’dzasandusa dziko la pantsi kukhala paraizo, lomwe lin’dzakhala na wanthu wabwino omwe an’dzatumikira Yahova mpaka muyaya.
Mibvunzo yakubwerezera
Kodi Umambo bwa Mulungu bun’dzacenesa tani dzina la Yahova?
Kodi n’ciyani comwe cikutitsimikizira kuti Umambo bwa Mulungu bun’dzakwanirisa bzomwe Bibliya limbalewa?
Kodi imwepo mukudikhirira kuti Umambo budzakucitireni ciyani?
ONANI POMWE IBZI
Onani kuti Armagedo n’ciyani.
Werengani nkhani yakulewa bza bzinthu bzomwe bzinʼdzacitika pa nthawe yomwe Jezu adaicemera kuti “citsautso cikulu.” — Mateu 24:21.
Onani bzomwe mabanja yangacite kuti yambakumbukire pabodzi bzomwe Umambo bun’dzacita m’paraizo.
Mu nkhani yakuti “Ndikhana Mibvunzo Mizinji Koma Ndikhagumana Lini Mitawiro Yace,” onani momwe munthu munango wa ndale adagumanira mitawiro ya mibvunzo yace.
“Bibliya Limbacinja Moyo wa Wanthu” (Ntsanza ya Mulindiri ya 1 Janeiro, 2012)
-