PFUNZIRO 47
Kodi Mwakonzeka Kuti Mubatizidwe?
Pa pfunziro lanu la Bibliya imwepo mwapfunza bzinthu bzizinji pakulewa bza Yahova. Ndipo pinango imwepo mwacinja bzinthu bzizinji pakuphatisa basa bzomwe mwapfunza. Koma pinango pana cinthu comwe cikukucitisani kuti muleke kubzipereka kwa Yahova na kubatizidwa. Mu pfunziro lino tiniwona mphitca zinango zomwe zingakuphingizeni kuti muleke kubatizidwa na momwe mungakundire mphitcazo.
1. Kodi mun’funika kudziwa bzentse bza m’Bibliya kuti mubatizidwe?
Kuti mubatizidwe mun’funika kukhala “na cidziwiso caico cacadidi.” (1 Timotio 2:4) Bzimwebzi bzin’funa lini kulewa kuti mun’funika kudziwa kutawira mbvunzo uli-wentse pakulewa bza Bibliya pomwe mukanati kubatizidwa. Napo Akristau omwe adabatizidwa kale-kale akupitiriza kupfunza bza Yahova. (Akolose 1:9, 10) Tsono imwepo mun’funika kudziwa bzipfunziso bzakuyambirira bza m’Bibliya. Akulu wa gwere an’dzakuthandizani kuwona penu bzomwe mwapfunzabzo mpsakukwanira kuti mubatizidwe.
2. Kodi ni bzinthu bziponi bzomwe mun’funika kucita pomwe mukanati kubatizidwa?
Pomwe mukanati kubatizidwa imwepo mun’funika “kukungula na kuzungunuka.” (Werengani Mabasa 3:19.) Bzimwebzi bzin’funa kulewa kuti mwakungula na mtima wentse pikado zentse zomwe mukhacita ndipo mwakumbira Yahova kuti akulekerereni. Ndipo bzikuthandauzambo kuti ndimwe wakutsimikiza kukhala na moyo mwakubverana na kufuna kwa Yahova mucitcenkha bzinthu bzomwe Yahovayo ambalewa kuti mpsakuipa. Cinthu cinango comwe mun’funika kucita ni kutsonkhana na kupalizira pabodzi na gwere ninga mpalizi wakusaya kubatizidwa.
3. Thangwe ranyi mun’funika lini kugopa kubatizidwa?
Winango ambagopa kuti angadzakwanise lini kucita bzomwe alumbira kwa Yahova. N’cadidi kuti nthawe zinango mungaphonye, napo amuna na akazi wakukhuluipirika omwe ambalewedwa m’Bibliya akhaphonyambo. Tsono kumbukirani kuti Yahova ambadikhirira lini kuti atumiki wace akhale wakulungamiratu. (Werengani Salimo 103:13, 14.) Iye ambakomedwa mukambacita bzomwe mungakwanise. Iye an’dzakuthandizani. Kulewa cadidi, Yahova ambatitsimikizira kuti palibe cinthu “ciri-centse cingatilekanise na lufoyi” lace. — Werengani Aroma 8:38, 39.
FUFUDZANI BZINANGO
Pfunzani momwe kudziwa bwino Yahova na kubvuma thandizo lace kungakuthandizireni kukunda mphitca iri-yentse yomwe ingakutaziseni kubatizidwa.
4. Mudziweni bwino Yahova
Kodi mun’funika kumudziwa bwino Yahova mpaka paponi pomwe mukanati kubatizidwa? Imwepo mun’funika kumudziwa bwino Yahova mpaka kufika pa kumufuna na kumbamukondwesa. Onani VIDIYO kuti muwone momwe anyakupfunza winango wa Bibliya wa pa dziko lentse la pantsi ambacitira bzimwebzi. Ndipo mukamala cezeranani mbvunzo wakutewerayu.
Mu vidiyoyi, n’ciyani comwe cidathandiza wanthu winango kuti abatizidwe?
Werengani Aroma 12:2, ndipo mukamala cezeranani mibvunzo ikutewerayi:
Kodi imwepo mumbapenukira bzomwe Bibliya limbapfunzisa ayai penu Mboni za Yahova zimbapfunzisa cadidi?
Penu mukupenukira, n’ciyani comwe mungacite?
5. Kukunda mphitca iri-yentse yomwe ingakutaziseni kubatizidwa
Tentsenefe tikasankhula kubzipereka kwa Yahova na kubatizidwa, timbagumana na mphitca. Kuti muwone ciratizo, onani VIDIYO, ndipo mukamala cezeranani mibvunzo ikutewerayi.
Mu vidiyoyi, kodi Narangerel adafunika kukunda mphitca ziponi kuti atumikire Yahova?
Kodi lufoyi lace kwa Yahova lidamuthandiza tani kukunda mphitcazo?
Werengani Mimwani 29:25 na 2 Timotio 1:7, ndipo mukamala cezeranani mbvunzo wakutewerayu:
Kodi n’ciyani comwe cingatithandize kuti tikhale wakukhwimika ticikunda mphitca?
6. Thembani thandizo la Yahova
Yahova an’dzakuthandizani kuti mucite bzinthu bzakumukondwesa. Onani VIDIYO, ndipo mukamala cezeranani mibvunzo ikutewerayi.
Mu vidiyoyi, n’ciyani cikhacitisa nyakupfunza wa Bibliya kuzeza kubatizidwa?
N’ciyani cidamuthandiza kuthemba Yahova?
Werengani Zaiya 41:10, 13, ndipo mukamala cezeranani mbvunzo wakutewerayu:
Thangwe ranyi mungakhale na citsimikizo centse cakuti mun’dzakwanirisa lumbiro lanu lomwe mudacita pomwe mudabzipereka kwa Yahova?
7. Thumizirani kutenda lufoyi la Yahova
Kukumbukira lufoyi lomwe Yahova analo kwa imwepo, kunkucitisani kuthumizira kutenda kwanu na kufuna kumutumikira mpaka kale-kale. Werengani Salimo 40:5, ndipo mukamala cezeranani mbvunzo wakutewerayu:
Kodi ni bzisimbo bziponi bza Yahova bzomwe mumbatenda kwene-kwene?
Mpolofeta Jeremiya akhafuna Yahova na fala lace ndipo akhatenda kwene-kwene mwayi wakutumikira Yahovayo. Iye adati: “Fala lanu limbakondwesa mtima wangu, pakuti inepano nimbacemeredwa na dzina lanu, imwe Yahova Mulungu.” (Jeremiya 15:16) Tawirani mibvunzoyi:
Thangwe ranyi ni mwayi ukulu kwene-kwene kukhala m’bodzi wa Mboni za Yahova?
Kodi mun’funa kubatizidwa kuti mukhale Mboni ya Yahova?
Kodi pana cinthu comwe cikukutazisani kucita bzimwebzo?
Kodi mukuwona kuti n’ciyani comwe mun’funika kucita kuti mubatizidwe?
WANTHU WINANGO AMBALEWA KUTI: “Inepano nin’funa lini kubatizidwa thangwe ndikucita mantha kuti kutsogolo ningadzacite pikado.”
Kodi imwepo mumbakumbukambo tenepo?
KODI MWAPFUNZA CIYANI?
Na thandizo la Yahova, imwepo mungakunde mphitca iri-yentse kuti mubatizidwe.
Mibvunzo yakubwerezera
Kodi mun’funika kudziwa bzentse bza m’Bibliya kuti mubatizidwe?
Kodi ni bzinthu bziponi bzomwe mun’funika kucita pomwe mukanati kubatizidwa?
Thangwe ranyi mun’funika lini kugopa kubatizidwa?
ONANI POMWE IBZI
Onani thangwe likulu lomwe lingakucitiseni kuti mubatizidwe.
“Kodi Mwakonzeka Kuti Mubatizidwe?” (Ntsanza ya Mulindiri ya Março, 2020)
Pfunzani mphitca zinango zomwe zingakucitiseni kusaya kufuna kubatizidwa.
“Kodi N’ciyani Cikunditazisa Kubatizidwa?” (Ntsanza ya Mulindiri ya Março, 2019)
Onani momwe munthu munango adakundira mphitca zikulu-zikulu kuti abatizidwe.
Pakuyamba, munthu munango dzina lace Ata akhazeza kubatizidwa. Onani bzomwe bzidamucitisa kuti afike pakusankhula kubatizidwa.