NKHANI YA PA TSAMBA LAKUYAMBA | KODI KUPEMBA KUMBATHANDIZADI?

Kodi Alipo Omwe Ambatetekera Mipembo?

Wanthu winango wambawona kupemba ninga kutaya nthawe, nakuti palibe omwe ambatetekera. Winango wadayezera kale kupemba, koma wadawona kuti walibe kutawiridwa. Munthu munango omwe ambakhulupira lini Mulungu, adapemba kuti: “Ndondilizirani ka muluzi kang’ono basi.” Tsono iye adalewa kuti Mulungu adapitiriza “kunyamala.”

Tsono, Bibliya limbatitsimikizira kuti kuna Mulungu omwe ambabva mipembo. M’Bibliya muna mafala yomwe yadanembedwa kale-kale yakuti: ‘Iye [Mulungu] an’dzakudekera mtima thangwe ra kulira kwako pakukumbira thandizo; akadzandobva kulira kwakoko, iye an’dzakutawiriratu.’ (Zaiya 30:19) Ndipo vesi linango la m’Bibliya limbalewa kuti: ‘Mpembo wa wanthu wakulungama, umbamudekera.’​—Mimwani 15:8.

Bibliya limbalewambo bza wanthu womwe wadapemba, wacibvedwa. Vesi libodzi limbalewa kuti Jezu adapereka ‘mipembo yakudandaulira . . . kwa Ule omwe angadakwanisa kumupulumusa’ na kuti iye ‘adabvedwa thangwe ra kugopa kwace Mulungu.’ (Wahebereu 5:7) Bziratizo bzinango bzimbagumanika pa Danyeri 9:21 na 2 Nkhani 7:1.

Tsono thangwe ranyi wanthu winango wambawona kuti mipembo yawo imbatawiridwa lini? Kuti mipembo yathu ibvedwe, ifepano tin’funika kupemba kwa Yahovaa yekha basi, omwe ni Mulungu wa m’Bibliya, sikuti kwa mulungu munango ali-wense ayai kwa anyamuya. Mulungu ambafunambo kuti ifepano timbamukumbire bzinthu ‘mwakubverana na kufuna kwace.’ Tikambapemba mwa njira imweyi, Mulungu ambatitsimikizira kuti ‘iye ambatibva.’ (1 Juwau 5:14) Tenepo, kuti mipembo yathu imbabvedwe na Mulungu, tin’funika kumudziwa bwino Mulungu wa m’Bibliya, ticipfunzambo bza kufuna kwace.

Wanthu wazinji wambakhulupira kuti bzin’funika lini kukhala na cipembedzo kuti wambapembe, koma cinthu cikulu n’cakuti Mulunguyo ambatetekere mipemboyo na kuyitawira basi. Izaki, wa ku Kenya, adalewa kuti: “Inepano ndidapemba kuti ndithandizidwe kubvesesa Bibliya. Ndipo, mu nthawe ing’ono-ng’ono, munthu adabwera, acindiuza kuti akhafuna kundithandiza kubvesesa Bibliyalo.” Ku dziko la Filipinas, Hilda akhafuna kusiya kumbafumali. Pambuyo pakuyezera kusiya, koma acimbatazira, bayace adamuuza kuti: “Kodi un’sairanyi kupemba kuti Mulungu akuthandize?” Iye adacita bzimwebzo, acidzalewa kuti: “Ndidadabwa na momwe Mulungu adandithandizira. Ndidawona kuti cikhayamba kumala cikalo cangu. Ndipo ndidakwanisa kusiya kufumaliko.”

Kodi Mulungu an’funadi kukuthandizani na bzinthu bzomwe bzimbakunesani, bzicikhala bzakubverana na kufuna kwace?

[Mafala ya m’nyansi]

[Mafala yakutsindika pa tsamba 4]

Jezu adapemba kwa Baba wace, ‘ndipo iye adabvedwa.’​—Wahebereu 5:7