NKHANI YA PA TSAMBA LAKUYAMBA | KODI KUPEMBA KUMBATHANDIZADI?
Thangwe Ranyi Mulungu Ambatiuza Kuti Timupembe?
Mulungu an’funa kuti tikhale xamwali wace.
Axamwali wambaceza kawiri-kawiri kuti walimbise uxamwali bwawo. Bzibodzi-bodzimbo, Mulungu ankutiuza kuti ifepano timbalewelewe naye, kuti tikhale pa uxamwali bwakulimba na iye. Iye ambalewa kuti: ‘Imwepo mun’dzandicemera, ndipo mun’dzabwera, mucindipemba, ndipo inepano ndin’dzakutetekerani.’ (Jeremiya 29:12) Mukambalewalewa na Mulungu kawiri-kawiri, imwepo ‘mun’dzamufenderera [iye], ndipo iye an’dzakufendereranimbo.’ (Tiyago 4:8) Bibliya limbatitsimizira kuti: ‘Yahova ali pafupi na wense womwe wambamucemera.’ (Psalymo 145:18) Tikambapemba kawiri-kawiri, ni pomwe uxamwali bwathu na iye bumbakhala bwakulimba.
Mulungu an’funa kukuthandizani.
Jezu adati: ‘Mbani wa imwepo, omwe mwana wace acimukumbira mkate, iye angamupase mwala? Ayai acimukumbira nsomba, kodi angamupase nyoka? Tenepo, penu imwe, napo ndimwe wanthu wakuipa mumbadziwa kupasa bzinthu bzabwino wana wanu, ndiye tani Baba wanu wa kudzulu, omwe ambapasa bzinthu bzabwino kwa wense womwe wambamukumbira!’ (Mateu 7:9-11) Inde, Mulungu ambakuuzani kuti mumupembe thangwe iye ‘ambakusamalirani’ ndipo an’funa kukuthandizani. (1 Pedru 5:7) Ndipo iye an’funa kuti mumbamufenderere mukambakhala na mabvuto yanu. Bibliya limbalewa kuti: ‘Lekani kumbacita thupo na cinthu ciri-cense, koma pa ciri-cense na mpembo na kudandaulira pabodzi na kutenda, bzakukumbira bzanu bzidziwike kuna Mulungu.’—Wafiripo 4:6.
Mwacibadwa wanthu wambafuna bzinthu bzauzimu.
Wanthu womwe wambapfunza bza cirengedwe ca munthu, wadawona kuti wanthu bzulu na bzulu wambafuna kupemba. Napo wale womwe wambakhulupira lini Mulungu na wale womwe wambapenukira kuti Mulunguyo alipo, wambafunambo kupemba.a Bzimwebzi bzimbalatiza kuti wanthufe tidalengedwa kuti timbafune kulewalewa na Mulungu. Jezu adati: ‘Wan’kondwa ni wale womwe wambazindikira bzakusaya bzawo bzauzimu.’ (Mateu 5:3) Njira ibodzi yakumalisa kusaya kwauzimuko, ndiyo yakumbalewalewa kawiri-kawiri na Mulungu.
Tikabvuma mcemo wa Mulungu kuti timbamupembe, n’ciyani comwe tingadikhirire?
[Mafala ya m’nyansi]
a Kafukufuku kakucitidwa ku Estados Unidos, mu 2012 na gulu la Pew Research Center, kadalatiza kuti pa wanthu 100 womwe wambakhulupira lini Mulungu, pabodzi na womwe wambapenukira kuti Mulungu alipo, wanthu 11 wambapemba kabodzi pa mwezi.
[Mafala yakutsindika pa tsamba 5]
‘Yahova ali pafupi na wense womwe wambamucemera.’—Psalymo 145:18
[Kwadru pa tsamba 5]
Kodi Kupemba Kumbaphatanidza Ciyani?
Bibliya limbalatiza kuti ifepano tingapembere cinthu ciri-cense pa moyo wathu. Kupembako kungaphatanidze kucita bzinthu ibzi:
Kubweka: ‘Ndidabweka pikado yangu kwa imwepo; ndiribe kubisa kuphonya kwangu.’—Psalymo 32:5.
Kutenda: ‘Mpsabwino kukutendani imwe Yahova.’—Psalymo 92:1.
Kutumbiza: ‘Ndin’dzamutumbiza Yahova nthawe zense; citumbizo cin’dzakhala pa kamwa pangu, pa nthawe iri-yense.’—Psalymo 34:1.
Kukumbira utsogoleri: ‘Nditsogolereni mu njira ya bzakutonga bzanu, Pakuti ndadekedwa nayo.’—Psalymo 119:35.
Kukumbira Mphanvu: ‘Ndizungunukireni, mucindidekera mtima. Ndipaseni mphanvu mtumiki wanune.’—Psalymo 86:16.