NKHANI YA PA TSAMBA LAKUYAMBA | KODI KUPEMBA KUMBATHANDIZADI?

Kupemba​—Kodi Kungakuthandizeni Tani?

Pomwe mukanati kuyamba kucita cinthu ciri-cense, imwepo mungabzibvunze kuti: ‘Kodi cinthu cimweci cingandibweresere phindu liponi?’ Kodi kungakhale kuphonyeka kupembera cinthu cimweco? Ne. Ifepano mwacibadwa timbafuna kudziwa penu cinthu ciri-cense n’cabwino ayai ne. Napo munthu wabwino Djobi, adabvunzambo kuti: ‘Kodi ndicimucemera, anganditawire?’​—Djobi 9:16.

Mu nkhani zapitazi, tawona kuti tin’funika lini kundopemba thangwe ra kukhala wa cipembedzo ayai kuphatisa basa mpemboyo ninga mtundu wa ulapi. Koma tidziwe kuti Mulungu wacadidi ambatetekeradi mipemboyo. Tikapemba mu njira yakuthemera, ticipemberambo bzinthu bzakulungama, iye an’dzatibvesera na tceru. Ndipo iye ambatiuza kuti timufenderere. (Tiyago 4:8) Tenepo, n’ciyani comwe tingadikhirire tikambapemba pa moyo wathu? Mbatiwoneni phindu lace.

Mtendere mu mtima.

Kodi mumbacita thupo kwene-kwene mukawonekeredwa na mabvuto pa moyo wanu? Bibliya limbatirimbisa kuti pa nthawe zimwezo, timbapembe, ticidziwisa bzineso bzathu kwa Mulungu. (1 Watesalonika 5:17; Wafiripo 4:6) Bibliya limbatitsimikizira kuti tikamufenderera Mulungu mwa kumupemba, ‘mtendere wa Mulungu, omwe umbaposa makumbukidwe yense, un’dzasunga mitima yathu pabodzi na luso lathu lakukumbuka.’ (Wafiripo 4:7) Bzakukumbuka bzathu bzingaderekhesedwe tikakhuthula thupo lathu kwa Baba wathu wa kudzulu. Kulewa cadidi, iye ambatirimbisa kuti ticite bzimwebzo mwakulewa kuti: ‘Pereka thupo lako kuna Yahova, ndipo iye an’dzakuthandiza.’​—Psalymo 55:22.

Pa dziko lense la pansi, wanthu wazinji wagumana mtendere umweyu. Hee Ran wa ku dziko la Coréia do Sul, adati: “Napo ndina mabvuto makulu, ndikayapembera mabvutoyo, ndimbapepukidwa, ndicikhalambo na mphanvu kuti ndipirire.” Cecilia wa ku Filipinas adalewa kuti: “Pakuti ndine mai, ndimbacita thupo kwene-kwene na wana wangu wacikazi pabodzi na mai wangu omwe tsapano wankukwanisa lini kundizindikira thangwe ra kuduwala. Tsono thangwe ra kupemba, inepano ndimbakwanisa kukhala na thupo pang’ono pa moyo wangu wa nsiku na nsiku. Ndin’dziwa kuti Yahova an’dzandithandiza kuti ndikwanise kuwasamalira.”

Mtsangalazo na mphanvu tikagumana na bzineso.

Kodi imwepo munkubvutika kwene-kwene mu mtima, ayai munkulimbana na bzineso pa moyo wanu? Kupemba kwa ‘Mulungu omwe ambatitsangalaza mu njira iri-yense’ kungatithandize. Bibliya limbalewa kuti iye ‘ambatitsangalaza pa matsautso yathu yense’. (2 Wakolinto 1:3, 4) Mwa ciratizo pa nthawe inango Jezu adatsautsika kwene-kwene, ‘ndipo iye adagodama, aciyamba kupemba.’ Pakumalizira pace n’ciyani cidacitika? ‘Anjo wa kudzulu adabwera kuna iye acimulimbisa.’ (Luka 22:41, 43) Mwamuna winango wakukhulupirika omwe dzina lace ni Nehemiya, iye adagopswedwa na wanthu wakuipa womwe wakhayezera kumuimisa kucita basa la Mulungu. Iye adapemba kuti: ‘Tsapano, limbisani manja yangu.’ Bzomwe bzidadzacitika patsogolo pace bzimbalatiza kuti Mulungu adamuthandizadi kukunda mantha yace na kukwanisa kumaliza basalo. (Nehemiya 6:9-16) Reginald, wa ku Gana, adafotokoza momwe kupemba kumbamuthandizira pakulewa kuti: “Ndikambapemba, maka-maka pa nthawe za mabvuto, bzimbakhala ningati ndauza munthu mwanzangu bza mabvuto yanguyo, omwe angakwanise kundithandiza, ndipo ambanditsimikizira kuti palibe mathangwe yakucitira mantha.” Inde, Mulungu angatitsangalazedi tikambapemba kwa iye.

Nzeru za Mulungu.

Bzakusankhula bzinango bzomwe timbacita bzimbatokonya ifepano na wale womwe timbawafuna. Kodi tingasankhule tani bzinthu mwa nzeru? Bibliya limbati: ‘Penu alipo omwe ankusaya nzeru, apitirize kukumbira kwa Mulungu, ndipo an’dzamupasa, pakuti iye ambapasa wense mwakukoma mtima, na mwakusaya kutombodzera.’ (Tiyago 1:5) Tikakumbira nzeru kwa Mulungu mwa kumupemba, iye angaphatise basa mzimu wace wakucena kuti utitsogolere, ticicita bzakusankhula bza nzeru. Ndipo ifepano tingamukumbire mzimu wakucena thangwe Jezu adatitsimikizira kuti ‘Baba kudzulu, an’dzapereka mzimu wakucena kwa wense womwe wanimukumbira!’​—Luka 11:13.

Napo Jezu caiye adawona kufunika kwa kukumbira Baba wace kuti amuthandize kucita bzakusankhula bzikulu-bzikulu. Bibliya limbatiuza kuti pomwe iye akhafuna kusankhula amuna 12 kuti watumikire ninga wapostolo wace, Jezuyo ‘adaphuphudza usiku bwense acipemba kwa Mulungu.’​—Luka 6:12.

Ninga Jezu, wazinji lero wambaderekhesa mtima wawo wakawona kuti Mulungu awatawira mipembo yawo kuti awathandize kucita bzakusankhula bza nzeru. Regina, wa ku Filipinas, ambalewa bza mabvuto mazinji yomwe adagumana nayo, ninga ya kubzisamalira iye pabodzi na banja lace pambuyo pa infa ya bayace, kuluza basa na kuneseka pa kulera wana wace awiri wacikazi. Kodi n’ciyani cidamuthandiza kucita bzakusankhula bza nzeru? Iye adalewa kuti: “Inepano ndimbakhulupira thandizo la Yahova mwa kumupemba.” Kwabena, wa ku Gana ankulewa thangwe lomwe ambakumbirira Mulungu kuti amuthandize, mwakulewa kuti: “Ndidaluza malipiro yabwino pa basa la kumanga nyumba.” Pakukumbukira bzinango bzomwe angadacite, iye adati: “Ndikhapemba nthawe zense kwa Yahova kuti anditsogolere, ndicicita cakusankhula cabwino.” Iye adathumizirambo kuti: “Ndimbakhulupira na mtima wense kuti Yahova adandithandizadi kusankhula basa lomwe limbandithandiza kusamalira bzakusaya bzangu bzauzimu na bza kuthupi.” Imwepo mungatsogoledwembo na Mulungu mukambapemba, mucimuuza bzinthu bzomwe bzingafune kupitira pa uxamwali bwanu na iye.

Tandolewa bzinthu bzing’ono-ng’ono bzomwe bzalatiza momwe mpembo ungatithandizire. (Kuti muwone bziratizo bzinango, onani kwadru yakuti “Phindu la Kupemba.”) Tsono kuti mugumane phindu na mipemboyo, bzin’funika cakuyamba mudziwe Mulungu pabodzi na kufuna kwace. Penu mun’funa bzimwebzi, tinkukulimbisani kuti muceze na Mboni za Yahova kuti zikuthandizeni kupfunza Bibliya.a Imweyi ingakhale njira yakutoma kuti mumufenderere ‘Mbveseri wa mpembo.’​—Psalymo 65:2.

[Mafala ya m’nyansi]

[Mafala yakutsindika pa tsamba 7]

‘Pereka thupo lako kuna Yahova, ndipo iye an’dzakuthandiza.’​—Psalymo 55:22

[Kwadru pa tsamba 7]

Phindu la Kupemba

Mtendere wa mu mtima ‘Lekani kumbacita thupo na cinthu ciri-cense, koma pa ciri-cense na mpembo na kudandaulira pabodzi na kutenda, bzakukumbira bzanu bzidziwike kuna Mulungu; ndipo mtendere wa Mulungu, womwe umbaposa makumbukidwe yense un’dzasunga mitima yanu pabodzi na luso lanu lakukumbuka mwa Kristu Jezu.’​—Wafiripo 4:6, 7.

Mtsangalazo wa Mulungu ‘Atumbizidwe Mulungu na Baba wa Mbuya wathu Jezu Kristu, Baba wansisi zikulu na Mulungu womwe ambatitsangalaza mu njira iri-yense, womwe ambatitsangalaza pa matsautso yathu yense.’​—2 Wakolinto 1:3, 4.

Utsogoleri kuti ticite bzakusankhula bza nzeru ‘Tenepo, penu alipo omwe ankusaya nzeru, apitirize kukumbira kwa Mulungu, ndipo an’dzamupasa, pakuti iye ambapasa wense mwakukoma mtima, na mwakusaya kutombodzera.’​—Tiyago 1:5.

Thandizo kuti tireke kupumpsidwa ‘Mbapembani kuti muleke kupumpsidwa.’​—Luka 22:40.

Kulekereredwa pikado ‘Ndipo wanthu womwe wambacemeredwa na dzina langu, wakabzicepswa, wacipemba na kulinga nkhope yangu na kusiyambo njira zawo zakuipa, inepano ndin’dzawabva na kudzulu kuno, ndiciwalekerera pikado yawo na kuciza dziko lawo.’​—2 Nkhani 7:14.

Ni njira yakuthandizira winango ‘Mpembo wakudandaula wa munthu wakulungama umbaphata basa mwa mphanvu kwene-kwene.’​—Tiyago 5:16.

Kulimbisidwa na kutawiridwa kwa mipemboyo ‘Ndipo Yahova adamuuza [Salomau] kuti: ‘Ndabva mpembo wako na mkumbiro wakukumbira cifundo kwa inepano.’’​—1 Wamambo 9:3.