Papita Magole 100 Umambo bwa Mulungu Bunkutonga!

‘Tsapano Mulungu wa mtendere . . . wakukonzekeresani na cinthu ciri-cense cabwino kuti mucite kufuna kwace.’​—WAHEB. 13:20, 21.

NYIMBO: 136, 14

PA MAGOLE 100 YAPITAYA . . .

Kodi ni bzinthu bziponi bzomwe bzakhala bzin’kuphatisidwa basa kuti tipalizire bzipsa bzabwino bza Umambo?

Kodi ni njira ziponi zakusiyana-siyana zatsapano zomwe zakhala zinkuphatisidwa basa pa kupalizira?

Kodi atumiki wa Yahova akhala ankutambira mapfunziro yaponi?

1. Kodi kulewa bza Umambo bwa Mulungu kukhali kwakufunika kwa Jezu? Fotokozani.

JEZU akhambafuna kwene-kwene kulewa bza Umambo bwa Mulungu. Mwakubverana na bzomwe bzidanembedwa m’Bibliya, iye adalewa kwene-kwene bza Umambo bwa Mulungu kuposa nkhani iri-yense. Ndipo adalewa mwakubwereza-bwereza bza Umambo kwa maulendo yakukwana 100 mu utumiki bwace. Bzimwebzi bzinkulatiziratu kuti Jezu akhalemekeza Umambo bwa Mulungu na mtima wace wense.​—Werengani Mateu 12:34.

2. Kodi pakhana wanthu angasi pomwe Jezu adapereka lamulo lomwe liri pa Mateu 28:19, 20, ndipo thangwe ranyi tingalewe tenepo?

² Patapita nthawe pang’ono pambuyo pa kulamusidwa kwa Jezu, iye adawonekera kwa wanthu wakupitirira 500 womwe adadzakhala apalizi wa Umambo. (1Wak. 15:6) Pinango ni nthawe yomwe iye adapereka lamulo lakuti bzipsa bzabwino bza Umambo bzin’funika kupaliziridwa kwa ‘wanthu wa mitundu yense,’ basa lomwe likhawoneka ninga lakusaya kukwanisika pa nthawe imweyo.a Ndipo Jezu akhadaleweratu kuti basa likulu limweri lingadadzacitika mpaka ‘kuphampha kwa mkonzedwe uno wa bzinthu,’ ndipo bzimwebzi ndibzo bzomwe bzinkucitika. Mpsacidziwikire kuti imwepo munkucitambo mbali pa kuteweza lamulo limweri lomwe ni polofesiya ya m’Bibliya.​—Mat. 28:19, 20.

3. Kodi ni njira zitatu ziponi zomwe Mulungu ankutikonzekeresa kuti ticite bwino pa basa lakupalizira bzipsa bzabwino?

³ Pambuyo pa kupereka lamulo lakupalizira, Jezu adawatsimikizira ateweri wace kuti: ‘ine ndiri pabodzi na imwe.’ (Mat. 28:20) Tenepo, basa lakupalizirali limbacitidwa mwakutsogoleredwa na iye. Ndipo Mulungu wathu, ankutikonzekeresa na ‘cinthu ciri-cense cabwino’ kuti tikwanise kucita bwino basa limweri. (Waheb. 13:20, 21) Mu nkhani ino, tin’fotokozerana bzinthu bzabwino bzitatu: (1) bzinthu bzakuphatisira basa bzomwe tinkupasidwa, (2) njira zakusiyana-siyana zomwe tinkuphatisa basa, na (3) mapfunziro yomwe tinkutambira. Cakuyamba, bwerani tifotokozerane bzinthu bzinango bzomwe takhala tikubziphatisa basa, pa magole 100 yapitaya.

MAMBO ANKUWAPASA BZINTHU BZAKUTI AKAPHATISE BASA PAKUPALIZIRA

4. Thangwe ranyi takhala tin’kuphatisa basa bzinthu bzakusiyana-siyana pa basa lathu lakupalizira?

⁴ Jezu adandendemezera ‘fala la Umambo’ na mbeu zomwe zimbabzalidwa pa mataka yakusiyana-siyana. (Mat. 13:18, 19) Mulimi ambaphatisa basa bzinthu bzakusiyana-siyana pomwe ambakhala ankukonza munda wace kuti akabzale. Mpsibodzi-bodzimbo, kwa magole mazinji, Mambo wathu, wakhala an’kutipasa bzinthu bzakusiyana-siyana bzomwe bzimbatithandiza kukonzekeresa mitima ya wanthu bzulu na bzulu kuti watambire bzipsa bzabwino bza Umambo. Bzinthu bzinango bzidaphatisidwa basa kwa magole khumi yokha, koma bzinango bzinkupitiriza kuphatisidwa basa kwa magole mazinji. Koma bzinthu bzensebzi bzakhala bzakuthandiza kukulisa luso lathu mu utumiki.

5. Kodi khadi la umboni likhali ciyani, ndipo likhaphatisidwa basa tani?

⁵ Cinthu cibodzi comwe cidathandiza azinji kuyamba kupalizira ni khadi la umboni, lomwe lidayamba kuphatisidwa basa na apalizi wa Umambo kuyambira mu gole la 1933. Ndipo khadiri likhali la 13 cm kutalika kwace na 8 cm kufupika kwace, ndipo likhana mafala yakucepa ya m’Bibliya. Nthawe na nthawe pakhacosedwa makhadi yatsapano. Makhadiya yakhanesa lini kuyaphatisa basa. Charles W. Erlenmeyer akhana magole khumi yokha pomwe adayamba kumbaphatisa basa njira imweyi ya kupalizira. Iye adafotokoza kuti: “Azinji tikhadazolowera kuyamba na mafala yakuti: ‘Ndaphata minyendo, mungawerenge khadiri?’ Mweneciro nyumba akawerenga, pambuyo pace tikhamupasa mabukhu, ndipo tikamala tikhacoka ticiyenda nyumba inango.”

6. Thangwe ranyi khadi la umboni likhali lakuthandiza?

⁶ Khadi la umboni lidathandiza mu njira zakusiyana-siyana. Apalizi winango, napo akhafuna kwene-kwene basa lakupalizira, iwo akhana mantha ndipo akhadziwa lini bzomwe angadalewa. Ndipo winango akhana bzizinji bzakulewa. Mu mphindi zakucepa, iwo akhauza mweneciro nyumba bzense bzomwe akhadziwa, ndipo nthawe zense akhambakwanisa lini kulewalewa mwa luso. Mwakusiyana na bzimwebzi, mafala yakucepa yakusankhulidwa bwino yomwe yakhali mu khadi la umboni, ndiyo yomwe yakhalewalewa m’mbuto mwa apaliziwo.

7. Kodi ni mabvuto yaponi yomwe abale wathu adagumana nayo pomwe akhaphatisa basa khadi la umboni?

⁷ Tsono, njira yakucitira umboni imweyi ikhana mabvuto yacembo. Grace A. Estep ni mpfumakazi yomwe yakhala inkutumikira Yahova kwa magole mazinji. Pakukumbukira bza nthawe imweyi mpfumakaziyo idati: “Nthawe zinango akhambatibvunza kuti: ‘Kodi khadi limweri linkulewa ciyani? Imwepo mungaleke kundiuza?’” Kuthumizira bzimwebzi, winango wakhakwanisa lini kuwerenga khadiro. Ndipo winango, akhakumbuka kuti ankupasidwa, akhalitenga m’manja mwa mpalizi acifungiratu msuwo. Mweneciro nyumba akakhala nyakutsutsa, nthawe zinango akhang’ambiratu khadiro. Napo bzikhali tenepo, abale wathu akhapfunza momwe angacitire bzinthu na wanthu na kubzidziwikisa ninga aimikiri wa Umambo bwa Mulungu.

8. Fotokozani momwe jiradisko ya m’manja ikhaphatisidwira basa. (Onani cithunzi-thunzi cakuyambirira.)

⁸ Cinthu cinango comwe cidakhala cinkuphatisidwa basa m’magole ya 1930 mpaka kumayambiriro kwa m’magole ya 1940 ikhali jiradisko ya m’manja. Abale winango akhambaicemera kuti Aroni, thangwe rakuti ndiyo yomwe ikhambalewalewa m’mbuto mwawo. (Werengani Kufuluka 4:14-16.) Mweneciro nyumba akabvumiza, mpalizi akhaikha nkhani ya m’Bibliya kuti iwo abvesere kwa mphindi zinai na pakati ndipo pakumalizira akhamugawira mabukhu. Nthawe zinango banja lense likhatsonkhana pabodzi kuti litetekere nkhani yakugravaridwi ya m’Bibliya. Mu 1934, bungwe la Sociedade Torre de Vigia (dos E.U.A.) lidayamba kukonza majiradisko ya m’manja na cakulinga cakuti yaphatisidwe basa mu utumiki. Pakumalizira padagravaridwi nkhani zakusiyana-siyana zakukwana 92.

9. Kodi jiradisko idathandiza tani pa basa lakupalizira?

⁹ Munthu munango wakucemeredwa Hillary Goslin adabvesera nkhani yakugravaridwi ya m’Bibliya. Iye adakumbira mpalizi kuti abakamusiyire jiradisko kwa mdzinga ubodzi, na cakulinga cakuti auzembo wanthu omwe ambakhala nawo pafupi bzipsa bza Umambo. Pomwe mpaliziyo adadzabwerera pa nyumba ire, adagumana wanthu azinji womwe akhamudikhirira ndipo wakhafunisisa kudziwa bzizinji. Na kupita kwa nthawe, azinji mwa iwo adabzipereka kwa Yahova, ndipo wana awiri wacikazi wa Hillary adayenda ku Xikola ya Gileyade acitumizidwa kuti akatumikire m’madziko ya kunja. Ninga momwe bzikhaliri na khadi la umboni, jiradisko idathandizambo kwene-kwene apalizi kuti ayambe kupalizira. Patsogolo pace, Mambo Jezu adawapfunzisa kulewalewa mwa kuphatisa basa Xikola ya Utumiki bwa Mulungu.

TINKUPHATISA BASA NJIRA ZAKUSIYANA-SIYANA KUTI TIFIKIRE WANTHU WENSE

10, 11. (a) Kodi majornal na cikasi ca mphepo bzikhaphatisidwa basa tani pakudziwisa cadidi ca m’Bibliya? (b) Thangwe ranyi njira zimwezi zidakhala zakuthandiza?

¹⁰ Mwa kutsogoleredwa na Mambo, wanthu wa Mulungu adaphatisa basa njira zakusiyana-siyana kuti afikire wanthu azinji na bzipsa bzabwino. Bzimwebzi bzikhali bzakufunika kwene-kwene thangwe ‘anyabasa akhali ang’ono-ng’ono.’ (Werengani Mateu 9:37.) Kumayambiriro kwa magole ya 1900 majornal ndiyo yakhaphatisidwa basa kuti afikire wanthu azinji womwe wakhakhala ku mbuto zomwe kukhana atumiki wa Yahova wakucepa. Mdzinga uli-wense m’bale Charles Taze Russell akhafotokoza nkhani zomwe zikhaperekedwa ku mbuto zakumwazira nkhani. Ndipo iwombo akhazipereka nkhanizo kuti zikanembedwe mu majornal ya ku Estados Unidos, Canadá na Europa. Bzinkuwoneka kuti mu 1913 nkhani za m’bale Russell zidanembedwa mu majornal yakukwana 2.000 ndipo zidawerengedwa na wanthu wakukwana 15.000.000.

¹¹ Pambuyo pa kufa kwa m’bale Russell, njira inango yakuthandiza basa lakupalizira bzipsa bzabwino idayamba kuphata basa. Pa nsiku ya 16 Abril 1922, m’bale Joseph F. Rutherford adafotokoza nkhani yace yakuyamba mwakuphatisa basa nyumba ya mphepo yomwe idafikira wanthu pafupi-pafupi 50.000. Patsogolo pace, pa nsiku ya 24 Fevereiro 1924, gulu la Yahova lidayamba kuphatisa basa nyumba ya mphepo yakucemeredwa WBBR. Pakulewa bza njira yatsapano yakufikira wanthu azinjiyi, Nsanza ya Mulindiri ya Dezembro 1, 1924, yacingerezi idalewa kuti: “Tinkukhulupira kuti kuphatisa basa cikasi ca mphepo kumbadzonga lini kobiri zizinji ndipo n’kwakuthandiza kuti tifikire wanthu azinji na bzipsa bzabwino.” Ninga momwe bzikhaliri na jornal, cikasi ca mphepo cakhala cakuthandiza kuti tifikire wanthu azinji ku mbuto zomwe kuna apalizi wakucepa.

12. (a) Kodi imwepo mumbakomedwa na mtundu uponi wa upalizi? (b) Kodi n’ciyani cingatithandize kumalisa mantha pomwe tinkucita upalizi bwa padeca?

¹² Nsiku zino, tinkulimbikira kwene-kwene na upalizi bwapadeca. Timbacita bzimwebzi mu mbuto zakupakirira kanderendere, mbuto zakuimira xitima, mbuto zakucezera na m’misika. Penu mumbafuna kuphatisa basa njira zimwezi, koma mumbacita thupo pa kucita upalizi pa ibodzi mwa mbuto zimwezi, pembani kwa Yahova. Ndipo kumbukiranimbo mafala yomwe yadalewedwa na nyakunyang’anira dera wakucemeredwa Angelo Manera, omwe wakhala ankutumikira kwa magole mazinji. Iye adati: “Tikapasidwa utumiki bunango tikhawona kuti ni njira inango yakuti titumikire Yahova, na yakulatiza kukhulupirika kwathu kwa iye. Ndipo tikhali wakufunisisa kukatumikira kuli-kwense komwe Yahova angadafune kutitumiza.” Tikatambira utumiki bwatsapano, pinango bomwe bungaticitise kucoka pa mbuto yabwino yomwe tinkukhala, bzimwebzi bzimbatithandiza kukulisa cikhulupiro cathu kwa Yahova na kulimbisa moyo wathu wauzimu.​—Werengani 2 Wakolinto 12:9, 10.

13. Kodi n’ciyani cakhala cakukwanisika thangwe ra kuphatisa basa webisaite yathu, ndipo kodi imwepo mudakhala na bzakugumana nabzo bziponi pomwe mukhauza wanthu bza webisaite yathu?

¹³ Apalizi azinji ambakomedwa kuuza wanthu kuti apite pa webisaite yathu ya jw.org, pomwe angawerenge na kucosa mabukhu yakufotokoza Bibliya mu bzirewedwe bzakupitirira 700. Nsiku iri-yense wanthu wakukwana 1.6 milhões ambapita pa webisaite yathu. Ninga momwe bzikhaliri na cikasi ca mphepo, nsiku zino webisaite yathu inkufikira wanthu azinji na bzipsa bzabwino napo ku mbuto zakutali.

ATUMIKI WA BZIPSA BZABWINO ANKUPFUNZISIDWA

14. (a) Kodi apalizi wa Umambo akhafunika kupfunzisidwa ciyani? (b) Kodi ni xikola iponi yomwe idathandiza apalizi kukhala apfunzisi waluso?

¹⁴ Tawona bzinthu na njira zakusiyana-siyana bzomwe bzakhala bzinkuphatisidwa basa pa kupalizira bzipsa bzabwino. Tsono, kodi ni mapfunziro yaponi yomwe takhala tinkuyatambira? Pa nthawe imweyire, tindokumbukire kuti mweneciro nyumba an’funa kucita mibvunzo pa bzomwe wabva mu jiradisko ayai an’funa kudziwa bzizinji pa bzomwe wawerenga pa khadi la umboni. Apalizi wakhafunika kudziwa momwe angatawirire mwa luso na kupfunzisa wanthu womwe ana mitima yabwino yakufuna kudziwa bzizinji. M’bale Nathan H. Knorr mwa kutsogoleredwa na mzimu wakucena, adawona kuti apalizi akhafunika kupfunzisidwa kulewalewa mwa luso na wanthu akakhala ali mu utumiki. Ndipo kodi n’ciyani cidadzacitika? Xikola ya Utumiki bwa Mulungu idalinganizidwa ndipo idayamba kuphata basa m’magwere kuyambira mu 1943. Xikolayi yathandiza apalizi kukhala apfunzisi waluso.

15. (a) Kodi apalizi winango akhabva tani pomwe adayamba kutenga mbali pa Xikola ya Utumiki bwa Mulungu? (b) Kodi mafala ya Yahova yomwe yadanembedwa pa Psalymo 32:8 yankukwanisika tani kwa imwepo?

¹⁵ Kwa apalizi azinji, padatenga nthawe ikulu kuti azolowere kumbalewalewa na wanthu. Mwa ciratizo, m’bale Julio S. Ramu adafotokoza nkhani yace yakuyamba ya mu xikola ya utumiki bwa Mulungu mu 1944. Kodi nkhani yaceyo ikhalewa bza ciyani? Ikhalewa bza Doegi, mwamuna wakufotokozedwa mu mavesi maxanu yokha ya m’Bibliya! Imweyi ndiyo mbali yomwe Julio adaiphatisa basa pa kufotokoza nkhani yaceyi. Iye adalewa kuti: “Mabondo na manja yangu yakhanjenjemera, ndipo miromo yangu ikhatetemera.” Iye adalewa pomwe kuti: “Ndidapasidwa nkhani ya mphindi zitatu zokha. Ndipo kukhali kuyamba kufotokoza nkhani pa pulatifomu, koma ndiribe kubwerera m’mbuyo.” Wana akhatengambo mbali mu xikola, napo bzikhawanesa kulewalewa pamaso pa gwere lense. Angelo Maneca omwe tamufotokoza kale ule, adakumbukira nkhani yakuyamba ya mulumbwana winango. Iye adati: “Iye adayamba kubva mantha pomwe akhayamba kufotokoza nkhani yace. Iye alibe kubwerera m’mbuyo, napo misozi iri cucucu, iye adamaliza nkhani yaceyo.” Kodi apa tani imwepombo? Kodi mumbabva mantha kupereka mitawiro pa mitsonkhano ayai kubva manyazi thangwe ra kubzibva kuti mun’kwanisa lini? Penu bziri tenepo, kumbirani Yahova kuti akuthandizeni kumalisa mantha yanu. Imwepo mun’dzawona kuti Yahova an’dzakuthandizani, ninga momwe adathandizira anyakupfunza wakuyambirira wa Xikola ya Utumiki bwa Mulungu.​—Werengani Psalymo 32:8.

16. (a) Kodi cakulinga ca Xikola ya Gileyade cikhali ciponi, mu nthawe za kumbuyo? (b) Ndipo n’ciponi, kuyambira mu 2011?

¹⁶ Mapfunziro yomwe atumiki wa Yahova ankutambira yambalekezera lini pa Xikola ya Utumiki bwa Mulungu. Mamisiyonario na abale winango ambagumana phindu pakuyenda ku Xikola ya Gileyade. Mwakubverana na mafala yomwe yadalewedwa na mpfunzisi wa xikolayi, iye adalewa kuti cibodzi mwa cakulinga ca xikolayi, ni “kuthandiza anyakupfunza kukulisa cikhumbo cawo pa basa lakupalizira.” Xikola ya Gileyade idayamba mu gole la 1943, ndipo kuyambira pamwepo anyakupfunza wakupitirira 8.500 adapita xikolayi. Madziko yakukwana 170 yadatambira mamisiyonario yakucokera ku Gileyade. Kuyambira mu gole la 2011, kuti munthu ayende ku Gileyade, an’funika kukhala ali kale mu utumiki bwa nthawe zense bwakupambulika. Abale na mpfumakazi omwe angayende ku xikolayi ni wale omwe ankutumikira kale ninga apainiya wakupambulika, anyakunyang’anira dera, atumiki wa pa Beteli, na mamisiyonario yomwe yakanati kupita xikola ya Gileyade.

17. Kodi xikola ya Gileyade yathandiza tani?

¹⁷ Kodi ni phindu liponi lomwe lawoneka thangwe ra xikola ya Gileyade? Bwerani tiwone ciratizo cibodzi. Mu Agosto 1949, ku dziko la Japão kukhana apalizi omwe akhakwana lini khumi. Kuphampha kwa gole limweri, mamisiyonario yakucokera ku Gileyade yakukwana 13 yadayamba kucita nyongo pa basa lakupalizira mu dzikolo. Nsiku zino ku Japão kuna apalizi wakukwana 216.000, ndipo pa apalizi amwewa, 42% ankutumikira ninga apainiya.

18. Kodi ni xikola zinango ziponi zomwe zathandiza atumiki wa Yahova kukula mwauzimu?

¹⁸ Xikola zinango, zathandiza atumiki wa Yahova kukula mwauzimu na kukhala na maluso mu utumiki. Ninga, Xikola ya Utumiki bwa Umambo, Xikola ya Utumiki bwa Upainiya, Xikola ya Apalizi wa Umambo, Xikola ya Anyakunyang’anira dera na Akazi wawo, na Xikola ya abale omwe ali mu Komiti ya Nthambi na Akazi wawo. Mwakusaya kupenukira, Mambo Jezu, ankupitiriza kupfunzisa nzika zace.

19. Kodi m’bale Charles Taze Russell adalewa ciyani pakulewa bza basa lakupalizira, ndipo thangwe ranyi bzomwe adalewabzo bzikhali bzacadidi?

¹⁹ Tsapano papita magole 100 kuyambira pomwe Umambo bwa Mulungu budabadwa. Mambo wathu Jezu Kristu, ankupitiriza kutipfunzisa. M’bale Charles Taze Russell akanati kufa mu 1916, adalewa mafala yomwe yakhalatiza kuti akhali munthu wakuzindikira. Iye adauza m’bodzi mwa anzace womwe akhanawo bzakufuna kuyendesa patsogolo basa lakupalizira. Iye adati: “Basali linkukula mwakamfulumize ndipo lin’pitiriza kukula, ndipo pana basa likulu lakupalizira ‘bzipsa bzabwino bza umambo’ lomwe lin’funika kucitika pa dziko lense la pansi.” (Faith on the March, [Kuthumizirika kwa Cikhulupiro] by A. H. Macmillan, tsa. 69) Iye akhalewa cadidi. Tinkutenda kwene-kwene Mulungu wathu wa mtendere pa kupitiriza kutipfunzisa kucita basa lakufunikali. N’cadidi, iye ankutipasa ‘cinthu ciri-cense cabwino’ comwe tin’funika kuti tikwanise kucita kufuna kwace!

[Mafala ya m’nyansi]

[Cithunzi-thunzi pa tsamba 31]

Apalizi azinji ambacita basa lakupalizira ndipo ambakondwa kuuza wanthu kuti wapite pa webisaite yathu ya jw.org (Onani ndime 12, 13)