NKHANI YA PA TSAMBA LAKUYAMBA | KODI MULUNGU AMBAIWONA TANI NKHONDO?

Momwe Mulungu Akhaiwonera Nkhondo Mu Nthawe Ya Apostolo

Wanthu akhaponderezedwa. Mwakusaya kupenukira, ninga anyamuya wawo, Wajuda wa mu nthawe ya apostolo akhapemba kazinji kense kwa Mulungu kukumbira thandizo, pakuti nthawe imweyo iwo wakhaponderezedwa na Umambo bwa Roma. Patsogolo pace iwo wadabva bza Jezu, ndipo adakhulupira kuti akhali Mesiya wakupiciridwa. Mpsakudabwisa lini kuti azinji akhadikhira kuti ‘munthu umweyu ndiye an’dzapulumusa Jirayeri’ m’manja mwa Aroma. (Luka 24:21) Tsono thandizolo liribe kubwera. M’mbuto mwace, mu 70 E.C., acikunda wa Roma wadabwera ndipo wadapfudza Jeruzalemu pabodzi na templwo yace.

N’ciyani cidacitika? Thangwe ranyi Mulungu alibe kumenyera nkhondo wanthu wace ninga momwe akhacitira kale-kale? Ayai thangwe ranyi iye alibe kuwabvumiza kuti wamenye nkhondo kuti wabzipulumuse pa kuponderezedwa kwawo? Kodi mawonedwe ya Mulungu pa nkhani ya nkhondo yakhadacinja? Ne. Koma cinthu cinango cikhadacinja pa moyo wa Wajuda. Iwo wadalamba Mwana wa Mulungu Jezu ninga Mesiya. (Mabasa 2:36) Tenepo ninga mtundu, iwo wadaluza uxamwali bwawo bwakupambulika na Mulungu.​—Mateu 23:37, 38.

Mtundu Wacijuda na Dziko lace Lakupiciridwa, ukhakhotcereredwa na Mulungu, koma tsapano, iye akhawakhotcerera lini pomwe, ndipo iwo wangadalewa lini pomwe kuti nkhondo zawo zikhali zakubvumidwa ayai zikhathandizidwa na Mulungu. Ninga momwe Jezu akhadaleweratu, bzisimbo bzomwe iwo wakhatambira thangwe ra kukhala mtundu wa Mulungu, bzikhadacosedwa kwa Jirayeri wakuthupi, bziciperekedwa kwa mtundu upsa, omwe ni mtundu wauzimu, ndipo na kupita kwa nthawe udadzacemeredwa m’Bibliya kuti ‘Jirayeri wa Mulungu.’ (Wagalata 6:16; Mateu 21:43) Gwere la Akristau wakudzozedwa na mzimu, lidalatiza kukhala Jirayeri wauzimu wa Mulungu. M’nthawe za apostolo, iwo wadauzidwa kuti: ‘Tsapano ndimwe mtundu wa wanthu wa Mulungu.’​—1 Pedru 2:9, 10.

Pakuti tsapano Akristau wakuyambirira ndiwo wakhali ‘wanthu wa Mulungu,’ kodi Mulunguyo angadawamenyera nkhondo kuti awapulumuse m’manja mwa Aroma? Ayai iye adawabvumiza kuti amenye nkhondo thangwe ra kuponderezedwa kwawo? Ne. Thangwe ranyi? Ninga momwe yalatizira nkhani yamalayi, Mulungu ndiye akhasankhula kuti ni lini pomwe nkhondo ikhafunika kuti icitidwe. Mulungu alibe kumenyera nkhondo Akristau wakuyambirira, ne kuwabvumiza kuti wacite nkhondo. Mpsakuwonekeratu kuti mu nthawe ya Akristau wakuyambirira ikhali lini nthawe yakuti Mulungu amenye nkhondo thangwe ra uipi na kuponderezedwa kwa atumiki wace.

Tenepo, ninga atumiki wakale wa Mulungu, Akristau wakuyambirira wakhafunika kudikhira mpaka nthawe yomwe Mulungu angadamalisa uipi na kuponderezedwa. Pakuti Mulungu akhalibe kuwabvumiza, iwo wangadabzitongera lini wokha kumenya nkhondo na anyamadulanthaka wawo. Bzipfunziso bza Jezu Kristu bzimbabvekesa nkhani imweyi. Ninga ciratizo, iye alibe kupereka malango kwa ateweri wace kuti wambamenye nkhondo; m’mbuto mwace iye adawauza kuti: ‘Pitirizani kufuna anyamadulanthaka wanu mucipembererambo womwe ankukuzunzani.’ (Mateu 5:44) Pomwe adaleweratu bza kupfudzidwa kwa Jeruzalemu na wacikunda waciroma mu nthawe ya Akristau wakuyambirira, iye alibe kuwauza kuti wakhafunika kudzamenyana nawo, koma wakhafunika kuthawa​—ndipo ni bzomwe iwo wadacita.​—Luka 21:20, 21.

Kuthumizira bzimwebzi, mpostolo Paulo mwakufuliziridwa na Mulungu adanemba kuti: ‘Lekani kumbabwezera . . . pakuti bzidanembedwa kuti: “Kubwezera n’kwangu; ndin’dzabwezera ndinepano,” alewa bzimwebzo Yahova.’ (Waroma 12:19) Mpostolo Paulo akhalewa bzomwe Mulungu akhadalewa magole mazinji m’mbuyomo m’mabukhu ya Mwambo 19:18 na Bzakutonga 32:35. Ninga momwe tawonera mu nkhani yamalayi, mu nthawe zakale njira ibodzi yomwe Mulungu akhakhotcerera nayo wanthu wace ikhali kuwathandiza kumenya nkhondo na anyamadulanthaka wawo. Tenepo, mafala ya mpostolo Paulo yambalatiza kuti mawonedwe ya Mulungu pa nkhani ya nkhondo yakhalibe kucinja. Mulungu akhapitiriza kuwona nkhondo ninga njira ibodzi yakubvumizika yakuti abwezere anyamadulanthaka wa atumiki wace acimalisa uipi na kuponderezedwa kwawo. Tsono ninga momwe bzikhaliri mu nthawe za kale, Mulungu ndiye akhasankhula nthawe yomwe nkhondoyo ingadacitidwa na omwe angadatenga mbali.

Bzinkuwonekeratu padeca kuti Mulungu alibe kubvumiza Akristau wakuyambirira kumenya nkhondo. Tsono tani bza nsiku zino? Kodi Mulungu ambabvumiza thimu linango la wanthu kuti limenye nkhondo? Ayai kodi ino ni nthawe yakuti Mulungu amenyere nkhondo atumiki wace? Kodi Mulungu ambawona tani nkhondo nsiku zino? Nkhani inkutewerayi in’pereka mtawiro wa mibvunzoyi.