Kodi Imwepo Mumbaphata Bwino Basa na Anzanu?

“INEPANO ndikhali pambali pace ninga misiri. . . . ndikhakondwa pa maso pace nthawe zentsene.” (Mimwani 8:30) Mafalaya yakulatiza momwe ukhaliri moyo wa Mwana wa Mulungu pomwe adaphata basa na Babace kudzulu magole mazinji akanati kubwera pa dziko la pantsi. Onani kuti vesiri likulatizambo kuti Jezu akhabva tani pomwe akhaphata basa pabodzi na Mulungu; iye “akhakomedwa kwene-kwene.”

Jezu na Baba wace, Yahova, pomwe akhalenga kudzulu na dziko la pantsi.

Jezu adapfunza makhalidwe yomwe yadamucitisa kuphata bwino basa na wanthu winango pomwe akhali pa dziko la pantsi. Kodi tingagumane phindu liponi na ciratizo ca Jezu? Tikabvesesa bwino bzomwe iye adacita, tingawone nfundo zitatu zomwe zingatithandize kumbaphata bwino basa na anzathu. Nfundo zimwezi zin’tithandiza kumbafuna kuphata bwino basa na anzathu.

Jezu akutumiza anyakupfunza wace awiri kuti akapalizire. — Pitirizani kumbakumbukira ciratizo ca Yahova na Jezu, khalani wakukonzeka kuuzambo wanthu omwe mumbaphata nawo basa nzeru zanu na bzomwe mumbadziwa

NFUNDO 1: ‘MBALEMEKEZANANI’

Munthu omwe ambaphata basa bwino na anzace ambalemekeza wanthu winango ndipo ambabziwonesera lini. Makhalidwe yabwino yamweya ni yomwe Jezu adapfunzisidwa na Babace. Napo kuti Yahova ngwakuthemera kucemeredwa Mulengi, iye adalemekeza udindo bomwe adapasa Mwana wace bwakuti alenge naye pabodzi bzinthu. Timbawona bzimwebzi kucokera pa mafala yomwe iye adalewa. Iye adati: “Mbatikonze munthu m’cifanikiso cathu.” (Ciyambo 1:26) Ndipo bzikuwoneka kuti Jezu adatenda kwene-kwene kubzicepesa kwa Yahova.—Salimo 18:35.

Mkulu wa gwere akupfunzisa tswaka mabasa ya m’gwere.

Pomwe Jezu akhali pa dziko la pantsi, iye adalatizambo kuti akhali wakubzicepesa. Pomwe wanthu akhamutenda thangwe ra bzomwe akhacita, iye akhapasa mbiri Mulungu thangwe ndiye omwe akhathemera. (Marko 10:17, 18; Juwau 7:15, 16) Jezu adacita ciri-centse kuti akhale mwa mtendere na anyakupfunza wace ndipo akhawawona kuti akhali axamwali wace sikuti anyabasa wace. (Juwau 15:15) Ndipo mpaka iye adawatsuka minyendo kuti awapfunzise khalidwe la kubzicepesa. (Juwau 13:5, 12-14) Ifepanombo tin’funika kumbalemekeza omwe tikuphata nawo basa sikuti kuikha bzomwe tikufuna pa mbuto yakuyamba. Tikambalemekeza winango ticisaya kucita thupo lakuti tipasidwe mbiri ndifepano, tin’dzakwanisa kucita bzinthu bzizinji.—Aroma 12:10.

Munthu wakubzicepesa ambadziwa kuti “alangizi akawanda bzimbakwanisika.” (Mimwani 15:22) Napo kuti tingakhale na nzeru kwene-kwene ayai tingadziwe bzinthu bzizinji, koma tin’funika kumbakumbukira kuti palibe munthu omwe ambadziwa bzinthu bzentse. Napo Jezu akhadziwa kuti pana bzinthu bzinango bzomwe akhadziwa lini. (Mateu 24:36) Iye akhambafunambo kudziwa bzomwe anyakupfunza wace akhadziwa ayai kukumbuka. (Mateu 16:13-16) Ndipopa anyakupfunza wacewo akhambafuna kukhala pafupi na iye! Mpsibodzi-bodzimbo na ifepano, mwakubzicepesa tikambazindikira kuti timbadziwa lini bzinthu bzentse ndipo tikambakumbira wanthu winango kuti atiuze bzinthu bzinango, tin’dzakhala mwa mtendere na iwo ndipo pabodzi, “tin’dzacita bzinthu bzizinji.”

Maka-maka mpsakufunika kuna akulu kutewezera Jezu akakhala kuti akuphata basa pabodzi. Iwo an’funika kukumbukira kuti mzimu wakucena ungacitise mkulu ali-wentse wa m’bungwero kulewa mafala yabwino. Pomwe akulu akucita mitsonkhano yawo, ndipo akambacita ciri-centse kuti ali-wentse akhale wakutsudzuka kufotokoza nzeru zace, iwo an’dzacita bzinthu bzomwe bzin’dzakhala bza phindu kuna gwere.

NFUNDO 2: “MBALEKANI KUKHALA WAKUNESA”

Munthu omwe ambaphata basa bwino na anzace ambakhala lini wakunesa pomwe akucita bzinthu na wanthu winango. Iye ambacita bzinthu mwakuzindikira na mwakudeka mtima. Jezu adakhala na mwayi wakuwona kuti Babace ambanesa lini. Mwa ciratizo, Yahova adamutumiza kuti adzapulumuse wanthu napo kuti iwo akhathemera kufa thangwe ra bzomwe adacita.—Juwau 3:16.

Jezu akhalatiza kudeka mtima bzikafunikira ayai bzikakhala bzakuthemera. Kumbukirani momwe iye adathandizira mkazi wa ku Fenisiya napo kuti akhadatumizidwira wanthu wa m’nyumba ya Jirayeri. (Mateu 15:22-28) Iye akhalatizambo kuti akhanesa lini mwakusaya kukumbira anyakupfunza wace kuti acite bzinthu bzomwe angadakwanisa lini kucita. Napo kuti Pedru adamulamba pakati pa wanthu uko akhali xamwali wace, Jezu adakhala wakukonzeka kumulekerera. Na kupita kwa nthawe, iye adapasa Pedru udindo bukulu. (Luka 22:32; Juwau 21:17; Mabasa 2:14; 8:14-17; 10:44, 45) Bzomwe Jezu adacita bzikulatiza padeca kuti tingalatize kuti ndife wakudeka mtima mwa kuleka ‘kumbangingimira nzeru zathu.’—Afilipi 4:5.

Mpfumakazi ikupfunzisa inzace pa basa lakumanga-manga.

Kukhala wakusaya kunesa kumbatithandizambo kuphata basa na wanthu wakusiyana-siyana mwakusaya kuneseka. Jezu alibe kunesana na anyamadulanthaka wace omwe adamulewa kuti iye akhacita uxamwali na “anyakukhomesa mtsonkho na anyapikado” omwe akhabva mafala yace. (Mateu 11:19) Kodi ifepano, ninga Jezu, tingakwanisembo kucita bwino bzinthu na anzathu? M’bale Louis, omwe adamala magole mazinji akucita basa la kunyang’anira dera na kutumikira pa Beteli, aciphata basa na wanthu wakusiyana-siyana, adalewa kuti: “Ndikhacita ciri-centse kuti ndindendemezere wanthu omwe ndikhaphata nawo basa na minyala yakusiyana-siyana yakumangira parede. Imwepo mukadziwa kuphatisa basa bwino minyalayo, mun’dzacitisa kuti paredeyo ikhale yakukonzedwa bwino. Ndipo ndikhacita ciri-centse comwe ningakwanise kuti nimbabverane na wanthu omwe ndikhaphata nawo basawo.” Cimweci ni ciratizo cabwino kwene-kwene!

Munthu wabwino kuphata naye basa ambabisa lini cinthu ayai nkhani yomwe akudziwa kuti aidziwe ndiye yekha basi

Kodi ni nthawe iponi yomwe tingalatize kuti timbacita bzinthu mwakubverana na anzathu m’gwere? Timbakhala na mwayi wakucita bzimwebzi tikakhala tikupalizira na gulu lathu. Tingaphate basa na apalizi omwe ana udindo bwa m’banja bwakusiyana na bwathu ayai omwe ana magole yakusiyana na yathu. Kodi tingalatize kuti ndife wakusaya kunesa mwakucinja kapaliziridwe kathu kuti iwo akomedwe na upalizibo ayai kuti upalizibo bufambe bwino?

NFUNDO 3: “MBAUZANI ANZANU BZOMWE MUMBADZIWA”

Munthu wabwino kuphata naye basa ‘ambauza anzace’ bzomwe ambadziwa. (1 Timotio 6:18) Pomwe Jezu akhaphata basa pabodzi na Babace, iye adawona kuti Yahova akhabisa lini cinthu. Pomwe Yahova “adakonza kudzulu,” Jezu ‘akhali pamwepo’ ndipo akhawona kuti iye akhakonza tani. (Mimwani 8:27) Na kupita kwa nthawe, Jezu adakomedwa kuuzambo anyakupfunza wace “bzinthu bzentse bzomwe” adabva na Babace. (Juwau 15:15) Mwakubverana na bzimwebzi, ifepano tin’funikambo kukhala wakukonzeka kuuzambo winango nzeru zathu na bzomwe timbadziwa. Inde, munthu wabwino kuphata naye basa ambabisa lini cinthu ayai nkhani yomwe in’funika kudziwika na wanthu winango kuti ambaidziwe ndiye yekha basi. Iye ambakomedwa kuuzambo winango bzinthu bzabwino bzomwe apfunza.

Mkulu wa gwere akutetekera pomwe m’bale akukonzekera nkhani yace. Mkuluyo adaphata ka broxura kakuti “Kuwerenga na Kupfunzisa.”

Cinango n’cakuti tin’funikambo kumbauza omwe timbaphata nawo basa mafala yabwino. Munthu akawona nyongo yomwe tikuicita acititenda na mtima wace wentse, kodi ifepano timbakomedwa lini? Jezu akhapambula nthawe kuti auze omwe akhaphata naye basa bzinthu bzabwino bzomwe iwo akhacita. (Ndendemezerani na Mateu 25:19-23; Luka 10:17-20.) Ndipo iye adawauza kuti iwo “an’dzacita mabasa makulu kuposa” yomwe iye adacita. (Juwau 14:12) Usiku bwakuti mangwana yace an’phedwa, Jezu adatenda apostolo wace wakukhulupirika mwa kuwauza kuti: “Imwepo mulibe kundisiya napo pomwe ndikhagumana na mabvuto.” (Luka 22:28) Kulewa cadidi mafala yamweya yadawadekera ndipo yadawacitisa kukhala na mphanvu kuti apitirize kucita basa lomwe adawasiira! Tikambakhala na nthawe yakutenda omwe timbaphata nawo pabodzi basa, iwo an’dzakomedwa ndipo an’dzaphata basa na nyongo.

IMWEPO MUNGAPHATE BWINO BASA NA ANZANU

M’bale wakucemeredwa Kayode adalewa kuti: “Munthu an’funika lini kukhala wakulungama kuti akhale wabwino kuphata naye basa koma an’funika kukhala ule omwe ambacitisa wanthu kukomedwa na kucitisa kuti basalo lireke kukhala lakuwawa.” Kodi imwepo ndimwe munthu wa mtundu umweyu? Thangwe ranyi mun’saya kubvunza Akristau omwe mumbaphata nawo basa kuti akuuzeni kuti ndimwe munthu wa mtundu wanyi? Penu iwo ambakomedwa kuphata namwe basa, ninga momwe anyakupfunza wa Jezu akhakomedwera kuphata basa na Jezuyo, imwepo mungalewe mafala ninga yomwe mpostolo Paulo adayalewa yakuti: “Ndife anyabasa anzanu kuti mukhale wakukondwa.”—2 Akolinto 1:24.