Kodi Tingacite Tani Kuti Tikhale na Mpfatso Caiwo?

1. Thangwe ranyi kunamata Mulungu kumbatithandiza kukhala wakukondwa?

MPFATSO caiwo ni cinthu lini comwe timbandokhala naco mu kanthawe kakucepa tikamala ticipsoma. Koma ni cinthu comwe tingakhale naco moyo wathu wentse. Kodi bzimwebzi bzingakwanisike? Inde. Jezu adafotokoza bzomwe tingacite kuti tikhale na mpfatso caiwo, pomwe akhafotokoza Nkhani yace ya pa Phiri. Iye adati: “An’kondwa mbale omwe ambadziwa kuti an’funika kutsogoleredwa na Mulungu.” (Mateu 5:3) Jezu akhadziwa kuti wanthufe tidalengedwa na mtima wa kufuna kudziwa Mulengi wathu, Yahova Mulungu, na kumunamata. Yahova ni “Mulungu wakukondwa,” ndipopa wanthu omwe ambamunamata angakhalembo wakukondwa.  —  1 Timotio 1:11.

2-3. (a) Kodi ni wanthu wa moda wanyi omwe Jezu adalewa kuti angakhale wakukondwa? (b) Kodi tin’pfunza ciyani mu nkhani ino, ndipo thangwe ranyi kupfunza bzimwebzi n’kwakufunika?

² Kodi mpfatso caiwo tingakhale nawo thangwe rakuti bzinthu bziri bwino pa moyo wathu basi? Ne. Pa nkhani yace ya pa Phiri, Jezu adalewa pomwe cinthu cinango cakudabwisa. Iye adalewa kuti “[wanthu] omwe akulira” angakhale wakukondwa napo penu iwo akulira thangwe ra kubzipasa mulandu na pikado zawo, ayai mabvuto yomwe akugumana nayo. Ndipo Jezu adalewambo bzibodzi-bodzibzi kwa omwe “akuzunzidwa thangwe ra kucita cirungamo” na ‘kutukwanidwa’ thangwe ra kukhala ateweri wa Kristu. (Mateu 5:4, 10, 11) Tsono bzingakwanisike tani kuti munthu omwe akugumana na mabvuto yamweya akhale na mpfatso caiwo?

³ Bzomwe Jezu akhafuna kupfunzisa mpsakuti tingakhale lini na mpfatso caiwo thangwe rakuti bzinthu bziri bwino pa moyo wathu basi. Koma timbakhala nawo tikadziwa Yahova na kukhala pa uxamwali bwakulimba na iye. (Tiyago 4:8) Tsono tingacite tani bzimwebzi? Mu nkhani ino, tin’pfunza bzinthu bzitatu bzomwe tin’funika kucita kuti tikhale na mpfatso caiwo.

MBAPFUNZANI FALA LA MULUNGU

4. Kodi ni cinthu ciponi cakutoma comwe tin’funika kucita kuti tikhale na mpfatso caiwo? (Salimo 1:1-3)

⁴ CAKUTOMA: Kuti tikhale na mpfatso caiwo tin’funika kumbawerenga Fala la Mulungu. Jezu adandendemezera Fala la Mulungu na cakudya. Ifepano timbadziwa kuti wanthufe na bzirombo timbafunikira kudya kuti tipitirize kukhala na moyo. Tsono ni wanthu okha omwe angapfunze Fala la Mulungu, ndipo iro ndakufunika kwa ifepano. Jezu adalewa kuti: “Munthu ambakhala lini na moyo na cakudya cokha, koma na mafala yentse yakucokera mkamwa mwa Yahova.” (Mateu 4:4) Ndipopa tin’funika kumbawerenga Fala la Mulungu, Bibliya, ntsiku zentse. Nyakunemba Salimo adalewa kuti: ‘Wakukondwa ni munthu omwe ambawerenga Malamulo yace acimbayakumbukira usiku na masikati.’  —  Werengani Salimo 1:1-3.

5-6. (a) Kodi n’ciyani comwe tingapfunze m’Bibliya? (b) Kodi kuwerenga Bibliya kungatithandize tani?

⁵ Yahova ambatifuna ndipopa adatipasa malango yace, mwakuphatisa basa Bibliya, kuti yatithandize kukhala na moyo wabwino. Bibliya limbatiuza bzomwe iye an’funa kuti ticite, bzomwe tingacite kuti tikhale naye pa uxamwali na bzomwe tingacite kuti iye atilekerere pikado zathu. Ndipo Bibliya limbatithandizambo kudziwa bzomwe Mulungu an’funa kudzaticitira kutsogolo. (Jeremiya 29:11) Cadidi ca m’Bibliya comwe timbapfunza cimbatithandiza kuti tikhale na moyo wabwino.

⁶ Ifepano tikudziwa kuti Bibliya lina malango yomwe yangatithandize. Tikambateweza malango yamweya tingakhale na mpfatso caiwo. Tikakhala tawofoka thangwe ra mabvuto yomwe timbagumana nayo, tingawerenge Fala la Yahova na kukumbukira mwakamderekho bzomwe tawerengabzo. Jezu adati: “Wakusimbidwa ngule omwe ambabva mafala ya Mulungu aciyakoya!”  —  Luka 11:28.

7. Kodi n’ciyani comwe tingacite kuti bzomwe tikuwerenga mu Fala la Mulungu bzimbatithandize?

⁷ Pomwe mukuwerenga Fala la Mulungu khalani na nthawe ya kubva goso la bzomwe mukuwerengabzo. Tiyezezere tenepa: Pinango bzidakucitikiranimbo kale kuti mwanzanu adaphika cakudya comwe mumbacifuna kwene-kwene. Tsono mudacidya mwakamfulumize thangwe rakuti mukhathamangira kukacita cinthu cinango ayai nzeru zanu zikhali kunango. Pomwe mudamala kudyako, pinango mudawona kuti mulibe kubva goso la cakudyaco. Bzibodzi-bodzibzi bzingacitikembo pomwe tikuwerenga Bibliya. Nthawe zinango tingawerenge mwakamfulumize mwakuti tingabve lini na cinthuco. Ndipopa pomwe mukuwerenga Bibliya khalani na nthawe yakuti mumbakumbukire ayai kuyezera kuwona bzomwe mukuwerengabzo bzikucitika. Mukacita tenepoyo, imwepo mun’dzakhala na mpfatso caiwo.

8. Kodi “kapolo wakukhulupirika na wanzeru” ambakonza tani cakudya cauzimu? (Onani mafala ya m’nyantsi.)

⁸ Jezu adasankhula “kapolo wakukhulupirika na wanzeru” kuti ambatipase cakudya pa nthawe yace, ndipo ifepano timbadyesedwa bwino mwauzimu.b (Mateu 24:45) Kapolo wakukhulupirikayu ambaphatisa basa Bibliya kuti akonze cakudya cauzimu comwe ambapereka. (1 Atesalonika 2:13) Cakudya cauzimu cimweci cimbatithandiza kumudziwa bwino Yahova na kudziwa nzeru zace zomwe zimbafotokozedwa m’Bibliya. Ndipopa ifepano timbawerenga marevista ya Ntsanza ya Mulindiri na Mukani! na nkhani za pa jw.org. Timbakonzekerambo mitsonkhano ya pakati pa sumana na ya kuphampha kwa sumana. Ndipo timbawona programa ya JW Broadcasting^® mwezi uli-wentse. Tikambapfunza Bibliya, ifepano tin’dzakwanisa kucita cinthu caciwiri comwe cingatithandize kukhala na mpfatso caiwo.

MBABVERANI MITEMO YA YAHOVA

9. Kodi n’ciyani cinango comwe tingacite kuti tikhale na mpfatso caiwo?

⁹ CACIWIRI: Kuti tikhale na mpfatso caiwo tin’funika kuteweza mitemo ya Mulungu. Nyakunemba Salimo adalewa kuti: “Wakupfatsa ni munthu omwe ambagopa Yahova, omwe ambafamba mu njira Zace.” (Salimo 128:1) Kugopa Yahova kumbathandauza kumulemekeza kwene-kwene mwa kutcenkha kucita cinthu comwe ambakomedwa lini naco. (Mimwani 16:6) Ndipo tin’funika kucita nyongo ya kubvera mitemo ya Mulungu yomwe iri m’Bibliya pa nkhani ya cabwino na cakuipa. (2 Akolinto 7:1) Ifepano tin’dzakhala na mpfatso caiwo tikambacita bzinthu bzomwe Yahova ambakomedwa nabzo na kutcenkha kucita bzomwe ambawenga.  —  Salimo 37:27; 97:10; Aroma 12:9.

10. Kodi n’ciyani comwe tin’funika kucita? (Aroma 12:2)

¹⁰ Werengani Aroma 12:2. Munthu angadziwe kuti Yahova ana ugo bwakulewa kuti ici n’cabwino ici n’cakuipa, tsono iye an’funika kuteweza bzomwe Yahova akufuna. Kuti tibvesese, tingayezezere bzimwebzi na malamulo ya pa mseu. Munthu angadziwe kuti boma limbaletsa kuthamangisa kwene-kwene karo mu mseu. Tsono iye angafune lini kuteweza lamulo limweri ndipo angambathamangise basi karo yace. Mpsibodzi-bodzimbo na ifepano. Makhalidwe yathu ndiyo yambalatiza kuti timbakhulupira kuti mitemo ya Yahova njakulungama ayai ne. (Mimwani 12:28) Davide akhawona kuti malamulo ya Yahova ngakulungama. Ndipopa iye adalewa kuti: “Imwepo mudandidziwisa njira ya moyo. Pan’khala imwe pana cikondweso cokha-cokha; ku boko lanu ladidi kuna cikondweso mpaka muyaya.” —  Salimo 16:11.

11-12. (a) Kodi tin’funika kucita mphole na ciyani tikakhala tapswoma? (b) Kodi mafala yomwe yali pa Afilipi 4:8 yangatithandize tani kusankhula mwanzeru bzinthu bzakupfatsa nabzo?

¹¹ Tikakhala tikugumana na mabvuto ayai tidapswoma, tingafune cinthu cinango kuti cititsangalaze. Bzimwebzi mpsabwino. Tsono tin’funika kucita mphole kuti tireke kucita cinthu comwe Yahova ambawenga.  —  Aefezo 5:10-12, 15-17.

¹² Mu tsamba lomwe mpostolo Paulo adanembera Akristau wa ku Filipi, iye adawalimbikisa kuti apitirize kumbakumbukira bzinthu bzomwe “mpsakulungama . . . mpsakucena . . . bzomwe bzimbafunidwa, [na] bzomwe mpsabwino.” (Werengani Afilipi 4:8.) N’cadidi kuti Paulo akhaleweratu lini bzinthu bzakupfatsa nabzo pomwe adalewa mafalaya. Koma bzomwe adalewabzi bzingatithandize kusankhula mwanzeru bzinthu bzakupfatsa nabzo. Thangwe ranyi tikulewa tenepoyo? Yezerani kucita ibzi: Cosani fala lakuti “bzinthu” lomwe liri pa vesiri muciikha fala lakuti “nyimbo,” “mavidiyo,” “novela” ayai “vidiyo-geime.” Kucita bzimwebzi kungakuthandizeni kudziwa bzinthu bzakupfatsa nabzo bzomwe Mulungu angakomedwe nabzo. Thangwe ifepano tikufuna kuteweza mitemo ya Mulungu pa moyo wathu. (Salimo 119:1-3) Tikamala kucita bzimwebzi, tin’dzakwanisa kucita cinthu cacitatu comwe cingatithandize kukhala na mpfatso caiwo.  —  Mabasa 23:1.

KUTUMIKIRA YAHOVA KUKHALE CINTHU CAKUFUNIKA KWA IMWEPO

13. Kodi ni cinthu cacitatu ciponi comwe tin’funika kucita kuti tikhale na mpfatso caiwo? (Juwau 4:23, 24)

¹³ CACITATU: Onesesani kuti kunamata Yahova kuli pa mbuto yakutoma pa moyo wanu. Pakuti Yahova ni Mulengi wathu, ifepano tin’funika kumunamata. (Apokalipse 4:11; 14:6, 7) Ndipopa cinthu cakufunika pa moyo wathu cin’funika kukhala kumunamata “mu mzimu na cadidi.” Ndipo iye ambakomedwa na kunamata kumweku. (Werengani Juwau 4:23, 24.) Ifepano tikufuna kuti mzimu wakucena umbatitsogolere pakunamata kwathu kuti kunamata kwathuko kubverane na cadidi comwe ciri m’Fala lace. Tin’funika kuwona kuti kutumikira Yahova ni kwakufunika pa moyo wathu, napo penu tikukhala m’dziko lomwe basa lathu ndakuletsedwa. Tikulewa pano, abale na mpfumakazi wakupitirira 100 ali m’kawoko thangwe ra kukhala Mboni za Yahova.c Napo bziri tenepo, iwo akupitiriza kupemba kwa Yahova, kupfunza Fala lace na kuuzambo wanthu winango bza Mulungu na Umambo bwace. Wanthu akambatinyoza ayai kutizunza, ifepano timbapitiriza kukhala wakukondwa thangwe ra kudziwa kuti Yahova an’tithandiza ndipo an’dzatibaira.  —  Tiyago 1:12; 1 Pedru 4:14.

BZOMWE BZIDACITIKIRA M’BALE M’BODZI

14. Kodi n’ciyani cidacitikira m’bale m’bodzi wa ku Tajiquistão, ndipo thangwe ranyi?

¹⁴ Abale na mpfumakazi zathu winango akugumana na mabvuto makulu kwene-kwene. Koma akupitiriza kukhala na mpfatso caiwo thangwe akucita bzinthu bzitatu bzomwe tapfunzabzi. Onani bzomwe bzidacitikira m’bale omwe ana magole 19 wa ku dziko la Tajiquistão, wakucemeredwa Jovidon Bobojonov. Iye adalamba kucita basa la ucikunda. Ndipopa pa ntsiku ya 4 Outubro, 2019, iye adamangidwa aciyendesedwa m’kawoko. Iye adamala minyezi ali m’kawokomo. Ndipo m’mwemo, iye akhawonedwa ninga kambowa. Atolankhani wa madziko yakusiyana-siyana adalewa bzinthu bzakusaya cirungamo bzomwe m’baleyu adacitiridwabzi. Bzimbalewedwa kuti iye adamenyedwa pomwe akhayezera kumungingimiza kucita lumbiro la acikunda na kubvala fardamento yawo. Pomwe bzimwebzi bzidamala, nyumba ya mphala idalewa kuti iye ana mulandu ndipo adayenda kukaphata basa na anyam’kawoko winango. Iye adakhala kumweko mpaka pomwe prezidenti wa dzikolo adalewa kuti iye acosedwe m’kawokomo. Pa nthawe yentseneyi m’bale Jovidon adapitiriza kukhala wakukhulupirika na kukhala na mpfatso caiwo. Kodi adakwanisa tani kucita bzimwebzi? Iye adakwanisa kucita bzimwebzi thangwe rakuti nthawe zentse akhadziwa kuti akhafunika kutsogoleredwa na Mulungu.

15. Kodi m’bale Jovidon adapitiriza tani kupfunza bza Yahova pomwe akhali m’kawoko?

¹⁵ Pomwe m’bale Jovidon akhali m’kawoko, iye adapitiriza kupfunza bza Yahova napo akhalibe Bibliya na mabukhu yathu. Kodi akhapfunza na ciyani? Abale na mpfumakazi omwe akhamuyendesera cakudya akhambanemba pa plástico yomwe ikhana cakudyayo vesi la ntsiku. Ndipopa iye akhambakwanisa kuwerenga vesi la ntsiku na kumbalikumbukira mwakamderekho ntsiku zentse. Pomwe adadzacosedwa m’kawoko, iye adapereka malango aya kwa omwe akanati kuikhidwa kale m’kawoko: “Mpsakufunika kupfunza kwene-kwene bza Yahova mwa kumbawerenga Fala lace na mabukhu yathu.”

16. Kodi n’ciyani comwe m’bale Jovidon akhambakumbukira kwene-kwene?

¹⁶ M’bale wathuyu adapitiriza kuteweza mitemo ya Yahova. Iye alibe kukhala na nzeru zakuphonyeka ne kucita cinthu cakuipa. Koma adapitiriza kukumbukira bzomwe Yahova akufuna. M’bale Jovidon ambakomedwa kwene-kwene kuwona bzomwe Mulungu adalenga. Macibese yali-yentse, iye akhambakomedwa kutetekera kuimba kwa tumbalame. Ndipo usiku, iye akhambakomedwa kuwona mwezi na nyenyezi. Iye adati: “Bzinthu bzomwe Yahova adatipasabzi bzidandithandiza kukhala na mpfatso caiwo na kundilimbikisa.” Tikambatenda bzomwe Yahova ambatipasa kuti tikhale na moyo na malango yentse yakucokera m’Bibliya, ifepano tin’dzakhala na mpfatso caiwo ndipo mpfatsoyo un’dzatithandiza kupirira mabvuto.

17. Thangwe ranyi nthawe zinango munthu ambafunikira kuyezedwa ninga momwe bzidacitikira na Jovidon? (1 Pedru 1:6, 7)

¹⁷ M’bale Jovidon akhaikha kunamata Yahova pa mbuto yakutoma. Iye akhadziwa kufunika kwa kupitiriza kukhala wakukhulupirika kwa Mulungu wacadidi. Jezu adalewa kuti: “Yahova Mulungu wako, ndiye omwe un’funika kumunamata, ndipo ndiye yekha omwe un’funika kumutumikira.” (Luka 4:8) Acikunda pabodzi na akulu-akulu wawo akhafuna kuti iye asiye kukhala Mboni ya Yahova. Tsono iye alibe kubvuma. Ndipo akhapemba kwa Yahova usiku na masikati acimbakumbira Yahovayo kuti amuthandize kukhala wakukhulupirika na kuleka kubwerera m’mbuyo. Napo kuti adacitiridwa bzinthu bzakusaya cirungamo, iye adapitiriza kukhala wakukhulupirika kwa Mulungu. Ntsiku zino iye akukomedwa thangwe rakuti adamangidwa, adamenyedwa na kufungiridwa m’kawoko, koma adapitiriza kukhala wakukhulupirika. M’bale Jovidon ana cikhulupiro cakulimba thangwe ico cidayezedwa kale.  —  Werengani 1 Pedru 1:6, 7.

18. N’ciyani comwe mungacite kuti mukhale na mpfatso caiwo?

¹⁸ Yahova ambadziwa bzomwe timbafunikira kuti tikhale na mpfatso caiwo. Ndipopa mukacita bzinthu bzitatu bzomwe tapfunza mu nkhani ino, mun’dzapitiriza kukhala na mpfatso caiwo, napo mucikhala mukugumana na mabvuto. Ndipo mun’dzalewambo mafala yakuti: “An’kondwa ni wale omwe Mulungu wawo ni Yahova!”  —  Salimo 144:15.