NKHANI YAKUPFUNZA 38
Maswaka, Kodi Moyo Wanu Un’dzakhala Tani Mukadzakula?
“Kuzindikira kun’dzakukhotcerera.” — MIMWANI 2:11.
NYIMBO 135 Mwa Lufoyi, Yahova Ankukumbira kuti: “Mwanangu, Khala Wanzeru”
BZOMWE TIN’PFUNZAa
1. Thangwe ranyi bzinthu bzikhali bzakunesa kwa Jehowasi, Uziya na Josiya?
KODI imwepo mungabzibve tani muciikhidwa kuti mukhale mambo wa wanthu wa Mulungu pomwe mukali mwana ayai tswaka? Kodi mungaphatise tani basa udindo bwanubo? Bibliya limbafotokoza bza amambo winango omwe adayamba kutonga mu umambo bwa Djuda pomwe akhali wana. Mwa ciratizo, Jehowasi akhana magole 7 pomwe adayamba kutonga, Uziya akhana magole 16 ndipo Josiya akhana magole 8. Bzikuwonekeratu padeca kuti bzinthu bzikhali bzakunesa kwa iwo! Napo kuti bzinthu bzikhali lini bzakupusa pa moyo wawo, Yahova pabodzi na wanthu winango adawathandiza kuti akunde mabvuto yomwe iwo akhagumana nayo na kuti acite bzinthu bzabwino.
2. Kodi tingapfunze ciyani na Jehowasi, Uziya na Josiya?
2 Napo kuti ifepano ndife lini amambo, tingapfunze bzizinji na bzomwe amambo amwewa adacita. Tingapfunze na bzakusankhula bzabwino bzomwe iwo adacita pabodzi na bzakusankhula bzakuipa bzomwe iwo adacita. Na bziratizo bzawo, tin’pfunza momwe tingasankhulire axamwali wabwino, momwe tingapitirizire kukhala wakubzicepesa na momwe tingapitirizire kupfunza kuti tidziwe bzomwe Yahova ambafuna kuti ticite.
MBASANKHULANI AXAMWALI WABWINO
Mpsakukwanisika kutewezera Jehowasi mwa kumbabvera malango ya axamwali wabwino (Onani ndime 3, 7)c
3. Kodi Mkulu wa Antsembe Jehoyada adathandiza tani Jehowasi kucita bzakusankhula bzabwino?
3 Tewezerani Jehowasi mwa kumbacita bzakusankhula mwanzeru. Pomwe Mambo Jehowasi akhali mwana, iye adacita cakusankhula canzeru. Pakuti Jehowasi akhalibe pai, iye adaphatisa basa malango yomwe akhapasidwa na Mkulu wa Antsembe wakukhulupirika, Jehoyada. Mkulu wa antsembeyo adamupfunzisa Jehowasi ninga mwana wace caiye. Jehowasi adabvera malangoyo ndipo bzimwebzi bzidacitisa kuti iye atumikire Yahova na kuthandizambo wanthu winango kutumikirambo Yahovayo. Ndipo Jehowasi adacita makonzedwe kuti mbali zakudzongeka za templo zikonzedwe. — 2 Nkhani 24:1, 2, 4, 13, 14.
4. Kodi kubvera malamulo ya Yahova kungatithandize tani? (Mimwani 2:1, 10-12)
4 Penu imwepo mukupfunzisidwa na abereki wanu ayai munthu munango kuti mumbafune Yahova na kubvera malamulo yace, dziwani kuti umweyu ni mwayi ukulu kwene-kwene. (Werengani Mimwani 2:1, 10-12.) Abereki wanu angakupfunziseni mu njira zizinji. Onani momwe pai wace wa Katya adamuthandizira kuti acite bzakusankhula bzanzeru. Ntsiku zentse pai wacewo akayenda kukamusiya ku xikola, iwo akhambayamba acezerana vesi la ntsiku. Iye adalewa kuti: “Maceza yomwe tikhambacitayo yadandithandiza kuti nimbacite bzinthu bzabwino ntsiku zentse ndikagumana na bvuto.” Abereki wanu angakupaseni malamulo yomwe yakubverana na nfundo za m’Bibliya, tsono imwepo mungayambe kumbawona ninga kuti malamuloyo yakukutazisani kucita bzinthu bzomwe mumbafuna. Mpfumakazi inango yakucemeredwa Anastasia ikukumbukira kuti abereki wace akaipasa malamulo, iwo akhambamufotokozera thangwe lomwe lawacitisa kuikha malamuloyo. Iye adalewa kuti: “Bzimwebzi bzikhandithandiza kubvesesa kuti iwo akhaikha malamuloyo thangwe rakuti ambandifuna sikuti thangwe rakuti akhafuna lini kuti ndikhale wakupfatsa.”
5. Kodi abereki wanu pabodzi na Yahova an’dzabzibva tani imwepo mukacita bzakusankhula bzanzeru? (Mimwani 22:6; 23:15, 24, 25)
5 Abereki wanu an’dzakomedwa kwene-kwene imwepo mukambabvera malango yakucokera m’Bibliya yomwe iwo ambakupasani. Ndipo cinthu cinango comwe n’cakufunika kwene-kwene n’cakuti Yahova an’dzakomedwambo kwene-kwene. Bzimwebzi bzin’dzacitisambo kuti uxamwali bwanu na iye bukhale bwakulimba kwene-kwene. (Werengani Mimwani 22:6; 23:15, 24, 25.) Yamweya ni mathangwe yabwino yakuti mutewezerere ciratizo ca Jehowasi pomwe iye akhali tswaka.
6. Pomwe Jehoyada adafa, kodi Jehowasi adabvera malango ya mbani, ndipo adagumana na mabvuto yaponi? (2 Nkhani 24:17, 18)
6 Pfunzani na bzakusankhula bzakuipa bzomwe Jehowasi adacita. Pomwe Jehoyada adafa, Jehowasi adakhala na axamwali wakuipa ndipo iwo adamucitisa kuti acite bzinthu bzakuipa. (Werengani 2 Nkhani 24:17, 18.) Iye adabvera bzomwe adauzidwa na nduna za umambo bwace zomwe zikhafuna lini Yahova. Jehowasi akhafunikira kukhala kutali na wanthu amwewa thangwe akhacita bzinthu bzakuipa. (Mimwani 1:10) Tsono iye alibe kucita bzimwebzi, ndipo adabvera bzomwe axamwali wace wakuipawo adamuuza. Ndipo pomwe mwana wa tiu wace, Zakariya, adayezera kumutsimula, Jehowasi adamupha. (2 Nkhani 24:20, 21; Mateu 23:35) Bzimwebzi bzidakhala bzakuipa kwene-kwene! Jehowasi adayamba bwino moyo wace, tsono iye adadzakhala mpanduki na nyakupha. Pakumalizira pace, iye adaphedwa na atumiki wace caiwo. (2 Nkhani 24:22-25) Bzinthu bzingadamufambira bwino kwene-kwene iye angadapitiriza kubvera Yahova na wanthu omwe akhafuna Yahovayo! Kodi mukupfunza ciyani na ciratizoci?
7. Kodi ni wanthu aponi omwe mun’funika kuwasankhula kuti akhale axamwali wanu? (Onani cithunzi-thunzi.)
7 Cinthu cibodzi comwe tingapfunze na bzakusankhula bzakuipa bzomwe Jehowasi adacita n’cakuti tin’funika kumbasankhula axamwali omwe ambafuna Yahova na omwe ambafuna kumukondwesa. Axamwali amwewa an’dzatithandiza kuti timbacite bzinthu mwanzeru. Ifepano tingakhale pa uxamwali napo na wanthu omwe mbakulu na ifepano. Kumbukirani kuti Jehowasi akhali mng’ono kwene-kwene na Jehoyada. Pakulewa bza axamwali, mbabzibvunzani kuti: ‘Kodi axamwali wangu ambandithandiza kuti ndilimbise uxamwali bwangu na Yahova? Kodi iwo ambandilimbikisa kuti nimbabvere mitemo ya Yahova? Kodi iwo ambalewa bza Yahova na bzinthu bzomwe apfunza m’Bibliya? Kodi iwo ambandipasa malango bzikafunikira, ayai ambandondiuza bzinthu bzomwe bzimbandidekera basi?’ (Mimwani 27:5, 6, 17) Kulewa cadidi, penu axamwali wanu ambafuna lini Yahova, imwepo mun’funika kumalisa uxamwalibo. Tsono penu axamwali wanuwo ambafuna Yahova, iwo an’dzakuthandizani nthawe zentse. — Mimwani 13:20.
8. Penu imwepo mumbaphatisa basa mbuto zakucezera za pa interneti, kodi n’ciyani comwe mun’funika kumbabzibvunza?
8 Ntsiku zino, kuna mbuto zakucezera za pa interneti zakusiyana-siyana zomwe tingaphatise basa kuti timbaceze na famidya zathu pabodzi na axamwali wathu. Napo bziri tenepo, wanthu azinji ambaphatisa basa mbuto zakucezera zimwezi kuti alatize wanthu foto zawo na mavidiyo ya bzinthu bzomwe acita ayai kugula. Penu imwepo mumbaphatisa basa mbuto zimwezi, bzibvunzeni kuti: ‘Kodi nimbalatiza foto zangu na cakulinga cakufuna kubziwonesera? Kodi ndikundofuna kulatiza wanthu winango cinthu cabwino ayai ndikufuna kubziwonesera kwa iwo? Kodi kakumbukidwe kangu, kalewelewedwe kangu na bzakucita bzangu bzikulatiza kuti ndikutewezera wanthu omwe ambaphatisambo basa njira zimwezi?’ M’bale Nathan Knorr, omwe adatumikira m’Bungwe Lakutonga, adatipasa malango yakuti: “Lekani kuyezera kukondwesa wanthu. Thangwe mukacita bzimwebzo, imwepo mun’dzakondwesa lini munthu ali-wentse. Koma mukakondwesa Yahova, imwepo mun’dzakondwesambo wentse omwe ambafuna Yahovayo.”
TIN’FUNIKA KUKHALA WAKUBZICEPESA
9. Kodi Yahova adathandiza Uziya kuti acite ciyani? (2 Nkhani 26:1-5)
9 Tewezerani bzakusankhula bza nzeru bzomwe Uziya adacita. Pomwe Mambo Uziya akhali mwana, iye akhali wakubzicepesa. Iye adapfunza “kugopa Mulungu wacadidi.” Iye adakhala na moyo magole 68, ndipo Yahova adamusimba pa bzentse bzomwe akhacita. (Werengani 2 Nkhani 26:1-5.) Uziya adakunda mitundu mizinji ya anyamadulanthaka wace, ndipo adacita ciri-centse kuti mzinda wa Jeruzalemu ukhale wakukhotcerereka. (2 Nkhani 26:6-15) Uziya adakomedwa kwene-kwene na bzomwe Yahova adamuthandiza kucita. — Mpalizi 3:12, 13.
10. Kodi n’ciyani comwe cidacitikira Uziya?
10 Pfunzani na bzakusankhula bzakuipa bzomwe Uziya adacita. Mambo Uziya akhadazolowera kuuza wanthu malango ya Yahova. Pinango bzimwebzi ndibzo bzomwe bzidamucitisa kuti iye awone kuti angadacita ciri-centse comwe akhafuna. Ntsiku inango, Uziya adapita mu templo ya Yahova ndipo adayezera kutentha bzakununtcirisa pa guwa la ntsembe. Amambo akhabvumizidwa lini kucita bzimwebzi. (2 Nkhani 26:16-18) Mkulu wa Antsembe Azariya adayezera kumuletsa kucita bzimwebzo, tsono Uziya adakalipa kwene-kwene. Bzakupasa ntsisi mpsakuti Uziya alibe kupitiriza kukhala wakukhulupirika, ndipo Yahova adamulanga mwa kumucitisa kuti akhale na mapere. (2 Nkhani 26:19-21) Iye angadapitiriza kukhala wakubzicepesa, bzinthu bzingadamufambira bwino kwene-kwene pa moyo wace!
M’mbuto mwa kubzitumbiza pa bzinthu bzomwe takwanisa kucita, tin’funika kutenda Yahova pa bzomwe takwanisa kucitabzo (Onani ndime 11)d
11. N’ciyani comwe cingalatize penu ndife wakubzicepesa ayai ne? (Onani cithunzi-thunzi.)
11 Pomwe Uziya adawona kuti umambo bwace bukhadakhazikika, iye alibe kukumbukira bzinthu bzabwino bzomwe Yahova adamucitira. Kodi tikupfunza ciyani na bzimwebzi? Tin’funika kumbakumbukira kuti udindo bwentse na bzisimbo bzomwe tinabzo bzimbacokera kwa Yahova. M’mbuto mwa kubzitumbiza pa bzomwe takwanisa kucita, tin’funika kumbatenda Yahova pa bzimwebzo.b (1 Akolinto 4:7) Tin’funika kumbazindikira mwakubzicepesa kuti ndife wakuperewera ndipo tin’funika kumbauzidwa bzakucita. M’bale munango omwe ana magole 60 adalewa kuti: “Ndidazindikira kuti ndikhafunikira lini kukalipa ayai kuwofoka anzangu akazindikira bzakuphonya bzangu. Ndikatsimulidwa thangwe ra bzakucita bzangu bzakusaya kukumbuka bwino, nimbacita ciri-centse kuti ndileke kubwerera m’mbuyo, koma ndipitirize kutumikira Yahova.” Tikabvera Yahova na kupitiriza kukhala wakubzicepesa, timbakhala wakukondwa pa moyo wathu. — Mimwani 22:4.
CITANI NYONGO KUTI MUKHALE AXAMWALI WA YAHOVA
12. Kodi Josiya adalatiza tani kuti akhafuna kukhala pa uxamwali na Yahova pomwe akhali tswaka? (2 Nkhani 34:1-3)
12 Tewezerani bzakusankhula bza nzeru bzomwe Josiya adacita. Josiya akhana magole 16 pomwe adayamba kucita nyongo yakuti akhale xamwali wa Yahova. Iye akhafunisisa kumudziwa Yahova na bzomwe iye ambafuna. Napo bziri tenepo, bzinthu bzikhali lini bzakupusa pa moyo wace. Pa nthawe imweyire, wanthu azinji akhanamata mirungu yakunama. Ndipopa Josiya akhafunika kukhala wakukhwimika kuti aletse wanthuwo kucita bzimwebzo, ndipo iye adakwanisadi kucita bzimwebzo. Josiya adayamba kucosa mirungu yakunama mu Jirayeri pomwe akhanati kukwanisa magole 20. — Werengani 2 Nkhani 34:1-3.
13. Kodi moyo wanu un’dzakhala tani mukabzipereka kwa Yahova?
13 Napo penu imwepo ndimwe tswaka, mungakwanise kutewezera Josiya mwa kupitiriza kupfunza bzizinji bza Yahova pabodzi na makhalidwe yace. Mukacita bzimwebzi, imwepo mun’dzabzipereka kwa Yahova. Kodi kubziperekako kun’dzakuthandizani tani pa moyo wanu? Luke, omwe adabatizidwa pomwe akhana magole 14, adati: “Kuyambira lero kuyenda kutsogolo, nin’dzaikha Yahova pa mbuto yakuyamba pa moyo wangu, ndipo nin’dzacita ciri-centse kuti ndimukondwese.” (Marko 12:30) Penu imwepo mukufuna kucitambo bzimwebzi, dziwani kuti bzinthu bzin’dzakufambirani bwino kwene-kwene pa moyo wanu!
14. Fotokozani bziratizo bza momwe maswaka manango yakutewezerera Mambo Josiya.
14 Kodi ni mabvuto yaponi yomwe maswakamwe mungagumane nayo pomwe mukutumikira Yahova? Johan, omwe adabatizidwa pomwe akhana magole 12, adalewa kuti anzace wa ku xikola akhamungingimiza kuti afumali. Kuti Johan akunde mayezo yamweya, iye adakumbukira kuti kufumaliko kungadadzonga thanzi lace na kudzongambo uxamwali bwace na Yahova. Rachel, omwe adabatizidwa pomwe akhana magole 14, adafotokoza bzomwe bzidamuthandiza kuti akwanise kukunda mabvuto yomwe akhagumana nayo ku xikola. Iye adati: “Nimbayezera kuwona bzinthu bzomwe bzimbandikumbusa bza Bibliya na Yahova. Mwa ciratizo, cakucitika cinango cingandikumbuse bza nkhani inango ya m’Bibliya ayai polofesiya. Ayai nthawe zinango ndikakhala ndikuceza na munthu ku xikola, nimbakumbuka bza vesi la m’Bibliya lomwe ningaceze naye.” Mabvuto yomwe imwepo mungagumane nayo yangakhale yakusiyana na yomwe Mambo Josiya adagumana nayo. Tsono imwepo mungacite bzinthu mwanzeru na kupitiriza kukhala munthu wakukhulupirika ninga momwe iye adacitira. Mukakwanisa kulimbana na mabvuto yomwe mukugumana nayo pomwe muli tswaka, mun’dzakwanisambo kulimbana na mabvuto makulu yomwe mungadzagumane nayo kutsogolo.
15. N’ciyani cidathandiza Josiya kuti atumikire Yahova mwakukhulupirika? (2 Nkhani 34:14, 18-21)
15 Pomwe Mambo Josiya adayamba kukonza-konza templo, iye akhana magole 26. Pa nthawe yomwe basali likhacitidwa, “bukhu la Malamulo lomwe lidanembedwa na Mozeji” lidagumanidwa. Pomwe mambo adabva bzomwe bukhulo likhalewa, iye mwakamfulumize adacinja bzinthu, ndipo adabvera bzomwe bukhulo likhalewa. (Werengani 2 Nkhani 34:14, 18-21.) Kodi imwepo mukufuna kumbawerenga Bibliya ntsiku zentse? Penu imwepo mumbayezera kucita bzimwebzi, mukucita bwino kwene-kwene. Tsono kodi mukukomedwa na kuwerengako? Kodi imwepo mumbakoya mavesi yomwe mun’funa kumbayaphatisa basa pa moyo wanu? Luke, omwe tamufotokoza ule, ambanemba nfundo zakufunika zomwe ambazigumana pa kuwerenga Bibliya. Kucita bzinthu ninga bzimwebzi, kungakuthandizeni kuti mumbakumbukire mavesi ya m’Bibliya ayai nfundo zomwe mwapfunza pa kuwerengapo. Imwepo mukambalidziwa na kulifuna Bibliya, mun’dzafunambo kwene-kwene kumutumikira Yahova. Ndipo Fala la Mulungu lin’dzakuthandizanimbo kucita bzabwino, ninga momwe lidathandizira Josiya.
16. Thangwe ranyi Josiya adacita bzinthu bzakuphonyeka, ndipo tikupfunza ciyani na bzimwebzo?
16 Pfunzani na bzakusankhula bzakuipa bzomwe Josiya adacita. Pomwe Josiya akhana magole 39, iye adacita bzinthu bzakuphonyeka bzomwe bzidacitisa kuti afe. Iye adabzithemba yekha, m’mbuto mwakuthemba kutsogoleredwa na Yahova. (2 Nkhani 35:20-25) Kodi n’ciyani comwe tikupfunza na nkhani imweyi? Tikupfunza kuti bziribe basa kuti tina magole mangasi ayai tina nthawe itali tani tikupfunza Bibliya, tin’funika kupitiriza kucita nyongo kuti tidziwe bzomwe Yahova ambafuna kuti ticite. Kuti tikwanise kucita bzimwebzi, tin’funika kumbapemba kawiri-kawiri kuti Yahova atitsogolere, kupfunza Fala lace na kumbabvera malango yomwe timbapasidwa na Akristau wakukhwima mwauzimu. Bzimwebzi bzin’dzatithandiza kuti tileke kucita bzakusankhula bzakuipa ndipo tin’dzakhala wakukondwa. — Tiyago 1:25.
MASWAKA, IMWEPO MUNGADZAKHALE NA MOYO WABWINO MUKAKULA
17. Kodi tapfunza ciyani na amambo atatu wa umambo bwa Djuda?
17 Pana bzinthu bzizinji bzabwino bzomwe imwepo mungacite pomwe mukali tswaka. Nkhani zakulewa bza moyo wa Jehowasi, Uziya na Josiya zikulatiza kuti maswaka yangacite bzakusankhula bza nzeru yaciteweza malango yomwe yangakondwese Yahova. Tsono, ninga momwe tawonera, bzimwebzi bziribe kupusa. Napo bziri tenepo, tingatewezere bzinthu bzabwino bzomwe amambo amwewa adacita na kutcenkha bzinthu bzakuipa bzomwe iwo adacita. Tikacita bzimwebzi, ifepano tin’dzakhala na moyo wakukondwa.
Pomwe Davide akhali tswaka, iye adakhala pa uxamwali bwakulimba na Yahova. Iye adakondwesa Yahova ndipo adadzakhala na moyo wabwino pomwe adakula (Onani ndime 18)
18. Kodi ni bziratizo bziponi bza m’Bibliya bzomwe bzikulatiza kuti mungadzakhale na moyo wabwino mukadzakula? (Onani cithunzi-thunzi.)
18 M’Bibliya muna nkhani zizinji za maswaka manango yomwe yadakhala pa uxamwali bwakulimba na Yahova, yadabvumidwa na iye ndipo yadakhala na moyo wabwino. Davide akhali m’bodzi wa maswaka yamweya. Pomwe akhali tswaka, iye adasankhula kutumikira Yahova, ndipo patsogolo pace adadzakhala mambo wakukhulupirika. Tsono nthawe inango, Davide adacita bzinthu bzakuphonyeka. Koma napo bziri tenepo, Yahova adawona kuti Davide akhali wakukhulupirika. (1 Amambo 3:6; 9:4, 5; 14:8) Imwepo mukapfunza bza Davide, ciratizo cace cin’dzakuthandizani kuti mutumikire Yahova mwakukhulupirika. Ayai imwepo mungapfunze bza Marko ayai Timotio. Iwo adayamba kutumikira Yahova pomwe akhali wana, ndipo adapitiriza kumutumikira mwakukhulupirika. Iwo adasankhula kutumikira Yahova ndipo bzimwebzi bzidamukondwesa kwene-kwene Yahovayo. Ndipo iwo adakhalambo wakukondwa.
19. Kodi moyo wanu un’dzakhala tani mukadzakula?
19 Bzomwe imwepo mumbacita pa moyo wanu tsapano ndibzo bzin’dzacitisa kuti bzinthu bzidzakufambireni bwino mukadzakula. Imwepo mukathemba Yahova sikuti kubzithemba mwekha, iye an’dzakuthandizani kuti mucite bzakusankhula bza nzeru. (Mimwani 20:24) Imwepo mungakhale na moyo wakukondwa na bzisimbo bzizinji. Kumbukirani kuti Yahova ambatenda bzomwe imwepo mumbamucitira. Ndipo palibe cinthu cabwino kwene-kwene kuposa kuphatisa basa moyo wanu kuti mutumikire Baba wanu walufoyi, Yahova.
NYIMBO 144 Pitirizani Kudikhirira Mabaibai!
a Maswaka, Yahova ambadziwa kuti nthawe zinango bzingakhale bzakunesa kucita bzinthu bzabwino mucipitiriza kukhala xamwali wace. Kodi mungacite tani bzakusankhula bza nzeru bzomwe bzingakondwese Baba wanu wa kudzulu? Tin’cezerana bziratizo bza wanthu atatu omwe adakhala amambo wa Djuda. Onani bzomwe imwepo mungapfunze na bzakusankhula bzawo.
b Onani kwadru yakuti “Musamanamizire kuti ndinu wodzichepetsa’” yomwe iri mu nkhani ya mu jw.org yakuti “Kodi Kukhala Munthu Wotchuka pa Intaneti Kuli Ndi Phindu?” (Chichewa).
c BZOMWE BZIKUCITIKA PA CITHUNZI-THUNZI: Mpfumakazi yakukhwima mwauzimu ikupereka malango ya nzeru kwa mpfumakazi yacitswaka.
d BZOMWE BZIKUCITIKA PA CITHUNZI-THUNZI: Mpfumakazi yomwe ina mbali pa mtsonkhano ikuthemba Yahova ndipo ikumutenda pa bzomwe yakwanisa kucita.