Acikulire, Pitirizani Kukhala Wakukondwa

1-2. Kodi Yahova ambawona tani atumiki wace wacikulire? (Salimo 92:12-14; onanimbo cithunzi-thunzi.)

WANTHU m’dzikoli ambawona kukalamba mu njira zakusiyana-siyana. Kodi imwepo mukukumbukira pomwe mudayamba kuwona katsisi kacena mu msolo mwanu? Pinango imwepo mudakumbuka bza kukazula kuti wanthu aleke kukawona. Tsono imwepo mudazindikira kuti kucita bzimwebzo kungadacitisa lini kuti tsisi linango licena lireke kumera. Bzimwebzi bzikulatiziratu kuti wanthu azinji ambafuna lini kukalamba.

² Tsono Baba wathu wakudzulu ambawona atumiki wace wakukalamba mu njira yakusiyana. (Mimwani 16:31) Kwa Yahova, iwo ali ninga miti yomwe imbabereka bzisapo bzizinji. (Werengani Salimo 92:12-14.) Thangwe ranyi iye akulewa tenepo? Kazinji-kazinji, miti yakupswipirira na ya maluwa yakununtcira njire yomwe iripo kwa magole mazinji. Mwa ciratizo, ku Japão kuna mtundu munango wa muti omwe umbakhala kwa magole mazinji. Inango mwa miti imweyi iripo kwa magole yakupitirira 1000 ndipo njakudeka kwene-kwene. Mwa njira ibodzi-bodziyi, atumiki wa Yahova wacikulire mbakufunika kwene-kwene kwa iye. Yahova ambawona makhalidwe yabwino yomwe acikulire anayo. Iwo akumutumikira kwa magole mazinji ndipo akupitiriza kukhala wakukhulupirika kwa iye pa nthawe zabwino na zakuipa.

3. Fotokozani momwe Yahova adaphatisira basa acikulire kuti akwanirise cakulinga cace.

³ Yahova ambapitiriza kutiwona kuti ndife wakufunika napo kuti tikukalamba.a Yahova adaphatisa basa acikulire kazinji kentse kuti akwanirise cakulinga cace. Mwa ciratizo, pomwe Sara akhana magole 90 adauzidwa na Mulungu kuti angadadzakhala na mwana ndipo kucokera mwa mwana umweyu kungadadzakhala na mtundu ukulu wa wanthu omwe ungadadzabadwira Mesiya. (Genesesi 17:15-19) Mozeji akhali wacikulire pomwe Yahova adamuuza kuti akacose Ajirayeri ku Edjipito. (Ekisodo 7:6, 7) Ndipo mpostolo Juwau akhalimbo wacikulire pomwe Yahova adamuphatisa basa kuti anembe mabukhu maxanu ya m’Bibliya.

4. Mwakubverana na Mimwani 15:15, n’ciyani comwe cingathandize acikulire kupirira mabvuto yomwe akugumana nayo? (Onanimbo cithunzi-thunzi.)

⁴ Wanthu wacikulire ambagumana na mabvuto mazinji. Mwa kukondwa mpfumakazi inango idalewa kuti: “Mpsakupusa lini kukhala wacikulire.” Tsono kukhala wakukondwab kungathandize acikulire kupirira mabvuto yomwe yambabwera thangwe ra kukalamba. (Werengani Mimwani 15:15.) Mu nkhani ino, tiniwona bzomwe acikulire angacite kuti apitirize kukhala wakukondwa. Ndipo tiniwonambo momwe abale na mpfumakazi m’gwere angawathandizire. Tsono cakuyamba mbatiwoneni kuti thangwe ranyi mpsakunesa kupitiriza kukhala wakukondwa pomwe tikukalamba.

MOMWE KUKALAMBA KUNGAKUTAZISIRENI KUKHALA WAKUKONDWA

5. Thangwe ranyi acikulire winango nthawe zinango angasuname?

⁵ Kodi ni bzinthu bzinango bziponi bzomwe bzingakusunamiseni? Pinango imwepo mungasuname thangwe rakuti mukukwanisa lini pomwe kucita bzinthu ninga momwe mukhacitira kale-kale. Ndipo pinango imwepo mungakumbukire pa nthawe yomwe mukhali tswaka na pomwe mukhana thanzi labwino. (Mpalizi 7:10) Mpfumakazi inango, yakucemeredwa Ruby, idalewa kuti: “Inepano nimbandokhalira kubva kuwawa ndipo nimbakwanisa lini kucita bzinthu ninga momwe ndikhacitira. Napo kucinja bzakubvala kumbandinesa. Ndipo kondodzusa mwendo wangu kuti ndibvale meya kumbandinesa. Manja yangu yambandiwawa kwene-kwene ndipo nimbakwanisa lini kuphatisa basa bwino-bwino bzala bzangu. Napo tumabasa tung’ono-tung’ono tumbakhala twakunesa kwa inepano.” Harold, omwe adatumikira pa Beteli, adalewa kuti: “Nthawe zinango inepano nimbabva ciya thangwe nimbakwanisa lini kuzindikira kuti ndine munthu wa mtundu wanyi tsapano. Pomwe ndikhali tswaka inepano ndikhana mphanvu kwene-kwene. Ndikhambafuna kwene-kwene kucita masenzeka ya bola. Wanthu akhambalewa kuti: ‘Pasirani bola Harold thangwe iye ambaphonya lini.’ Tsono tsapano ne ningakwanise lini kulithusa bolalo.”

6. (a) Kodi ni mathangwe manango yaponi yomwe yangacitise acikulire kusunama? (b) N’ciyani comwe cingathandize acikulire kuwona penu angapitirize ayai kuima kufambisa karo? (Onani mu revista ino nkhani ya msolo wakuti “Kodi Nin’funika Kusiya Kufambisa Karo?”)

⁶ Pinango imwepo mungasuname thangwe rakuti mukukwanisa lini pomwe kucita mwekha bzinthu. Ndipo bzimwebzi bzingacitike maka-maka bzikakhala kuti imwepo mukufunikira thandizo la munthu munango ayai kukhala na m’bodzi mwa wana wanu. Pinango mungakwanise lini kufambisa karo ayai kuyenda ku mbuto inango mwekha thangwe rakuti mulibe mphanvu ayai thangwe rakuti mukukwanisa lini kuwona bwino. Bzinthu bzimwebzi bzingakucitiseni kuti muleke kukhala wakukondwa! Tsono kumbukirani kuti bzomwe bzimbaticitisa kuti tikhale wakufunika kwa Yahova na kwa wanthu winango ni kubzisamalira lini tekha, kukhala tekha ayai kufambisa karo. Ndipo tingakhale na citsimikizo cakuti Yahova ambabvesesa momwe tikubvera. Yahova ambadziwa kuti timbamufuna na kufunambo abale wathu, ndipo bzimwebzi ndibzo bzomwe mpsakufunika kwa iye. — 1 Samuyeli 16:7.

7. Kodi n’ciyani comwe cingathandize wale omwe ana mantha kuti anifa pomwe Yahova akanati kupfudza dziko lakuipali?

⁷ Pinango imwepo mungasuname thangwe ra kukumbuka kuti pinango munifa pomwe Yahova akanati kupfudza dziko lakuipali. Penu bzimwebzi bzimbakusunamisani, n’ciyani comwe cingakuthandizeni? Kumbukirani kuti Yahova akudikhirira mwakupirira kuti adzapfudze dziko lakuipali. (Zaiya 30:18) Tsono kupirira kwa Yahova kuna cakulinga comwe ni kucitisa kuti wanthu azinji akhale na mwayi wa kumudziwa na kumutumikira. (2 Pedru 3:9) Ndipopa imwepo mukambasunama, mbayezerani kukumbukira kuti ni wanthu angasi omwe an’dzapulumusidwa thangwe ra kupirira kwa Yahova. Pinango winango wa iwo angakhale wanthu wa m’banja mwanu.

8. Kodi ni mabvuto manango yaponi yomwe yangabwere thangwe ra kukalamba?

⁸ Bziribe basa penu ndife tswaka ayai wacikulire, tikakhala tikuduwala ayai tikubva kuwawa bzingakhale bzakupusa kulewa ayai kucita bzinthu bzomwe tikhafuna lini. (Mpalizi 7:7; Tiyago 3:2) Mwa ciratizo, pomwe Djobi akhabonera adalewalewa bzinthu “mwakusaya kukumbuka bwino.” (Djobi 6:1-3) Kuthumizira bzimwebzi, bvuto la thanzi lingacitise munthu wacikulire kuleka ayai kucita bzinthu bzomwe angadabzicita lini. Tsono napo kuti tingakhale wacikulire ayai tingakhale na bvuto la thanzi bzingakhale lini bwino kumbacita bzinthu mwaukali ayai nthawe zentse kudikhira kuti wanthu ambaticitire bzinthu. Ndipo tikazindikira kuti tiribe kucitira bzinthu winango mwalufoyi tin’funika kuwapepesa. — Mateu 5:23, 24.

MOMWE MUNGAPITIRIZIRE KUKHALA WAKUKONDWA

9. Thangwe ranyi imwepo mun’funika kubvuma thandizo la winango? (Onanimbo bzithunzi-thunzi.)

⁹ Mbabvumani thandizo la wanthu winango. (Agalatiya 6:2) Pakuyamba bzimwebzi pinango bzingakhale bzakunesa. Mpfumakazi inango yakucemeredwa Gretl idalewa kuti: “Nthawe zinango bzimbandinesa kubvuma thandizo thangwe nimbafuna lini kupasa basa wanthu winango. Padatenga nthawe kuti inepano ndicinje makumbukidwe yangu na kubvuma mwakubzicepesa kuti ndikhafunikira thandizo.” Imwepo mukabvuma thandizo la winango mumbacitisa kuti iwo akhale wakukondwa thangwe ra kukuthandizaniko. (Mabasa 20:35) Kulewa cadidi, imwepo mun’dzakhala wakukondwa mukawona kuti winango ambakufunani na kucita namwe thupo.

10. Thangwe ranyi imwepo mun’funika lini kuyebwa kumbatenda? (Onanimbo bzithunzi-thunzi.)

¹⁰ Mbatendani. (Akolose 3:15; 1 Atesalonika 5:18) Wanthu winango akaticitira bzinthu bzabwino, ifepano timbatenda. Tsono nthawe zinango tingayebwe kucita bzimwebzo. Tikambamwetulira na kulewa kuti ndatenda, axamwali wathu ambakwanisa kuwona kuti bzentse bzomwe ambaticitira mpsakufunika. Leah, omwe ambasamalira acikulire ku Beteli, adalewa kuti: “Mpfumakazi ibodzi yomwe nimbaisamalira nthawe zentse imbatenda. Iyo imbandinembera tumafala pa katsamba. Ndipo napo kuti imbandondinembera tumafala twakucepa, tumbakhala twakulimbikisa. Nimbakomedwa kuwerenga bzomwe imbandinembera thangwe nimbadziwa kuti iyo imbatenda bzomwe nimbaicitira.”

11. Kodi imwepo mungathandize tani winango? (Onanimbo bzithunzi-thunzi.)

¹¹ Citani bzomwe mungakwanise kuti muthandize winango. Mukambamala nthawe mukukumbukira kuti muwone momwe mungathandizire winango mun’dzamala lini nthawe mukukumbukira bza mabvuto yanu. Tingandendemezere acikulire na mabukhu yomwe yambapfunzisa bzinthu bzakufunika. Tsono wanthu akasaya kuyawerenga angapfunze lini cinthu na mabukhuyo. Mwakundendemerana na bzimwebzi, maswaka yan’dzapfunza lini bzinthu bzakufunika imwepo mukasaya kumbaceza nawo na kuwauza bzinthu bzinango bzomwe imwepo mumbabzidziwa. Mbayacitani mibvunzo ndipo mbatetekerani bzomwe iyo yan’lewa. Patsogolo pace, imwepo mungayafotokozere momwe Yahova adakuthandizirani pa moyo wanu na momwe kubvera Yahova kun’dzawacitisira kuti akhale wakukondwa. Kulewa cadidi, imwepo mun’dzakhala wakukondwa mukambatsangalaza na kulimbikisa axamwali wanu omwe ni maswaka. — Salimo 71:18.

12. Mwakubverana na Zaiya 46:4, kodi Yahova akuwapicira ciyani acikulire? (Onanimbo bzithunzi-thunzi.)

¹² Pembani kwa Yahova kuti akupaseni mphanvu. Nthawe zinango, imwepo mungabzibve kukhala wakuneta na wakusaya mphanvu ndipo bzimwebzi bzingakusunamiseni. Tsono kumbukirani kuti Yahova ana mphanvu kwene-kwene. Bibliya limbalewa kuti iye “ambaneta lini ne kuthetha.” (Zaiya 40:28) Ndipopa iye angakupaseni mphanvu zentse zomwe mukufunikira. (Zaiya 40:29-31) Kulewa cadidi, Yahova akupicira kuti an’dzakuthandizani. (Werengani Zaiya 46:4.) Ndipo Yahova nthawe zentse ambakwanirisa bzomwe ambapicira. (Djoswa 23:14; Zaiya 55:10, 11) Imwepo mukambapemba, Yahova an’dzakupasani thandizo lomwe mukufunikira. Na tenepo, imwepo mun’dzakwanisa kuwona kuti Yahova ambakufunani ndipo bzimwebzi bzin’dzakucitisani kukhala wakukondwa kwene-kwene.

13. Mwakubverana na 2 Akolinto 4:16-18, kodi n’ciyani comwe tin’funika kukumbukira? (Onanimbo bzithunzi-thunzi.)

¹³ Mbakumbukirani kuti imwepo mun’dzakhala lini wacikulire mpaka kale-kale. Tikambakumbukira kuti mabvuto yomwe tikugumana nayo njakanthawe, bzimbakhala bzakupusa kupirira mabvutoyo. Bibliya limbalewa kuti kukalamba pabodzi na bvuto la thanzi bzin’dzawoneka lini pomwe. (Djobi 33:25; Zaiya 33:24) Na tenepo, imwepo mungakhale wakukondwa thangwe ra kudziwa kuti kutsogolo mun’dzakhala na thanzi labwino, wamphanvu na wakudeka kwene-kwene. (Werengani 2 Akolinto 4:16-18.) Tsono kodi winango angathandize tani?

MOMWE WANTHU WINANGO ANGATHANDIZIRE

14. Thangwe ranyi mpsakufunika kumbazungira acikulire na kumbawaligaliri?

¹⁴ Khalani na cizolowezi ca kumbazungira abale wacikulire na kumbawaligaliri. (Ahebereu 13:16) Acikulire azinji ambabzibva kuti ali cawokha. M’bale munango, omwe ambacoka lini pa mui wakucemeredwa Camille, adalewa kuti: “Nthawe zinango inepano nimbacita thupo ndipo ndimbabva ciya thangwe rakuti nimbakwanisa lini kucoka pa mui ndipo nimbakwanisa lini kucita bzizinji.” Tikambazungira acikulire timbalatiza kuti iwo mbakufunika kwa ifepano nakuti timbawafuna. Pinango pa nthawe inango bzidaticitikirambo kale tentsenefe kufuna kuzungira ayai kuligariri m’bale wacikulire wa m’gwere mwathu tsono patsogolo pace tiribe kudzacita bzimwebzo. Thangwe ra bzinthu bzomwe timbacita ntsiku na ntsiku bzimwebzi bzingaticitikire. Tsono n’ciyani comwe cingatithandize ‘kutsimikizira kuti mpsiponi bzinthu bzakufunika kwene-kwene,’ kuphatanidzambo kuzungira acikulire? (Afilipi 1:10) Cinthu comwe cingakuthandizeni ni kuikha pa ndondomeko yanu ntsiku yomwe mukufuna kudzatumiza mensaje kwa wacikulire wa m’gwere mwanu. Imwepo mungacitembo makonzedwe kuti mudzakawazungire. Sankhulani ntsiku ndipo lekani kuyebwa kudzawazungira.

15. Kodi ni bzinthu bziponi bzomwe maswaka na acikulire angacitire pabodzi?

¹⁵ Penu ndimwe tswaka, pinango mungacite thupo thangwe ra kusaya kudziwa bzomwe mungalewe ayai kucita na wanthu acikulire. Tsono napo bziri tenepo, mun’funika lini kucita thupo na bzimwebzi. Bzomwe mungacite ni kundokhala xamwali wabwino. (Mimwani 17:17) Yezerani kumbaceza na acikulire pomwe mitsonkhano ikanati kuyamba ayai pambuyo pa mitsonkhano. Pinango mungawabvunze kuti ni cinembo ciponi ca m’Bibliya comwe ambacifuna ayai mungawakumbire kuti akufotokozereni nkhani zakusekesa zomwe zidawacitikira pomwe akhali mwana. Imwepo mungawacemerembo kuti mudzawone nawo pabodzi JW Broadcasting^®. Kuthumizira bzimwebzi, imwepo mungabzipereke kuti muwathandize kucita bzinthu bzomwe iwo angakwanise lini kucita okha. Imwepo mungatsimikizire kuti tableti yawo ayai telefoni yawo ikuphata basa bwino nakuti anayo mabukhu yentse mapsa. Mpfumakazi inango, yakucemeredwa Carol, idalewa kuti: “Cemerani acikulire kuti mudzacite nawo pabodzi bzinthu bzomwe imwepo mumbafuna kubzicita. Inepano ndikudziwa kuti ndakalamba kale, tsono ndikadafuna kupfatsa na moyo. Inepano nimbafuna kugula bzinthu, kuyenda kukadya kumbuto inango na kumbawona cirengedwe.” Ndipo mpfumakazi inango, yakucemeredwa Maira, idalewa kuti: “Inepano ndina xamwali wangu omwe ana magole 90. Ifepano tidasiyana magole 57. Tsono inepano nimbakumbukira lini bzimwebzo thangwe timbakondwa kwene-kwene ndipo timbafuna kuwona mafilme pabodzi. Ndipo tikagumana na mabvuto ifepano timbathandizana.”

16. Thangwe ranyi mpsabwino kumbayenda na acikulire ku nyumba ya ulapi?

¹⁶ Mbaperekezani acikulire pomwe akuyenda ku nyumba ya ulapi. Kuthumizira pa kundoyenda kukawaperekeza, imwepo mungakhale nawo pabodzi kuti muwone penu akutenderidwi bwino ku nyumba ya ulapi ayai penu akutambira thandizo lomwe akufunikira. (Zaiya 1:17) Imwepo mungabziperekembo kuti munembe bzomwe dotoloyo anilewa. Mpfumakazi inango, yacikulire yakucemeredwa Ruth, idalewa kuti: “Kazinji-kazinji, inepano ndikayenda ndekha ku nyumba ya ulapi adotolo ambakhulupira lini bzomwe inepano nimbawauza. Adotolowo ambafika pakulewa kuti: ‘Imwepo mukuduwala lini; bzomwe mukulewabzi mpsa mumsolo mwanu.’ Tsono ndikayenda na munthu, adotolowo ambacita nande bzinthu mu njira yakusiyana. Nimbatenda kwene-kwene abale omwe ambapambula nthawe yawo kuti ayende nande pabodzi ku nyumba ya ulapi.”

17. Kodi mungapalizire tani pabodzi na acikulire?

¹⁷ Mbapalizirani pabodzi na abale wacikulire. Acikulire winango pinango angakwanise lini kucita upalizi bwa nyumba na nyumba. Kodi imwepo mungacemere acikulire kuti mukapalizire nawo mwakuphatisa basa kangolo? Pinango imwepo munganyamule kadera kuti iwo akacite kukhala. Cinthu cinango comwe imwepo mungacite ni kucemera m’bale wacikulire kuti akhale namwe pabodzi pomwe mukucitisa pfunziro la Bibliya ayai kuyenda kukacitisa pfunzirolo ku mui kwa m’bale wacikulireyo. Kuthumizira bzimwebzi, akulu wa gwere angawone penu bzingakhale bzakupusa kwa m’bale wacikulire kuyenda mu upalizi penu mtsonkhano wakukonzekera upalizi un’kacitikira ku mui kwace. Tikambacita nyongo yakulemekeza abale wacikulire Yahova ambakomedwa. — Mimwani 3:27; Aroma 12:10.

18. Kodi n’ciyani comwe tin’dzapfunza mu nkhani yomwe ikubwerayi?

¹⁸ Nkhani ino yatikumbusa kuti Yahova ambafuna kwene-kwene acikulire nakuti ambawona kuti iwo mbakufunika kwene-kwene kwa iye. Ndipo tentse m’gwere timbabzibvambo mwa njira ibodzi-bodziyi! Kukalamba n’kwakupusa lini, tsono na thandizo la Yahova imwepo mungakwanise kukhala wakukondwa. (Salimo 37:25) Ndipo imwepo mungadikhirire nthawe yomwe mun’dzakhala wakukondwa kwene-kwene! Tsono abale na mpfumakazi winango ambagumana na mabvuto yakusiyana na yamweya. Iwo ambasamalira adzinza wawo omwe mbakukalamba, mwana ayai xamwali wawo omwe akuduwala. Kodi n’ciyani comwe iwo angacite kuti apitirize kukhala wakukondwa? Bzimwebzi ndibzo bzomwe tin’dzapfunza mu nkhani yomwe ikubwerayi.