Ngimba Abakulumba Botutula Bulebule Nkipanga?

Igulu litu likaya na balongosi aba bikwambilila indalama. Loli, ufwana namuno syayilile na bakristu babwandilo, ‘abanyambala bobikiwa ukuya balindilili ba kutima ikipanga kya Kyala.’ (Imbombo Sya Batumiwa 20:28) Abanyambala aba bali nulwitiko lwamaka mwa Kyala, bo bobikiwa ukuya balindilili nkipanga. ‘Botima ikipanga kisita kufimbilisiwa, loli mbwighane bwabo bo muno Kyala olondela, ubutimi bwabo bungayagha bwa kukabilamo fimo mbuyanja.’ (1 Peteri 5:1-3) Ngimba mbombonki isi abakulumba bobomba?

Botufighilila. Abakulumba botulongosya nu kututula nkipanga ukuti tuleke upaghuka panjila ya bwanaloli. Tungibwagha ukuti Kyala abapele abanyambala aba imbombo yolondiwa fiyo. Abene botutula ukuti tuye nu bumi ubununu nukuti fitwendeleghe kanunu. (2 Bakorinti 1:24) Ufwana namuno untimi opakisya ing’osi, momuno bope abakulumba bobombela popakisya ubumi bwitu bwabukristu. Bakwinoghonela aliwesa nkipanga nubamanya kanunu bosa.—Isya Mbupingamu 27:23.

Botumanyisya muno tungabombela ubwighane bwa kyala. Sabata aliwesa abakulumba bolongosya pangomano ukuti bakasye ulusubilo lwitu mwa Kyala. (Imbombo Sya Batumiwa 15:32) Abakulumba aba bolongosya pambombo yakufumusya, nutumanyisya muno tungafumukisya.

Botukasya aliwesa pamwene. Ukuti bakasye ubumanyani bwitu na Yehova, utubalilo tumo abakulumba aba botwendela ku nyumba syitu lumo tukwaghana nabo ku Nyumba ya Bunyafyale. Abene botukasya ni fundo sya m’Baibolo.—Yakobu 5:14, 15.

Ukongelelapo pa mbombo syabo isi abakulumba bobomba nkipanga, bali nimbombo isingi isi silonda akabalilo kabo. Abene bobomba imbombo isi ukuti batule imbumba syabo. Nongwa yakuti bakwiyula pa mbombo yabo bolondiwa ughindikiwa.—1 Batesalonike 5:12, 13.

• Ngimba imbombo ya bakulumba nkipanga yo yiliku?

• Ngimba abakulumba botutula bulebule aliwesa pamwene?