Tukulondiwa ukusuma ubutuli linga tutikupilikisya ubusololi bumo ubwa mu Baibolo. Inong’onela ikifwanikisyo iki. Tufwanikisye ukuti mukubuka kumalo ghamo aghakihesya loli ummanyani winu uyu mukubuka nawe amenyeko kanunu. Bo mukwenda, ikumanya apa mufikile nakuno unsebo ghulighosa ghukubuka. Tukusubila ukuti mubaghile ukuhoboka panongwa yakubuka nummanyani winu uyu. Yehova afwene itolo nummanyani winu uyu ikubatula. Umwene asimenye isi sikuya pakubombiwa nkyeni. Yonongwa yake ukuti tupilikisye kanunu ubusololi bwa mu Baibolo, tukulondiwa ukusuma mwakwiyisya kwa Yehova ukuti atutule. (Dan. 2:28; 2 Pet. 1:​19, 20) Mwakufwana itolo numpapi, Yehova ikulonda ukuti abanake bayeghe nulusubilo ulununu ulwa nkyeni. (Yere. 29:11.) Loli mwakukindana numpapi aliwesa, Yehova ikutubula isi sisakubombiwa nkyeni kangi utubalilo tosa ikuyoba ubwanaloli. Yehova abasalile abandu ukuti balembe ubusololi Mmasyu ghake ukuti tufimanye ifyakubombiwa ifyapadela ifi fisakubombiwa nkyeni. (Yes. 46:10).—Yes. 46:10. w23.08 8 ¶3-4

Kyala ampele Yesu amaka aghakumasya indamyo syosa sya bandu. Ukwendela mfika, Yesu anangisyagha amaka ghake ukuti abaghile ukumasya indamyo syosa isi tukabaghila ukumalana nasyo patwibene. Mwakifwanikisyo, umwene ali namaka aghakutwabula kubutulanongwa ubu twalyambwile kangi nindamyo isi tukwaghana nasyo panongwa yabutulanongwa bo, ububine ninifwa. (Mat. 9:​1-6; Rom. 5:​12, 18, 19) Ifika fyake fyanangisyagha ukuti abaghile ukubumbulusya imbungo “syosa” nukusyusya abandu aba bafwile. (Mat. 4:23; Yoh. 11:​43, 44) Kangi ali namaka aghakubatamisya umbelo wamaka nukubabumbulusya abandu kumbepo inyali. (Mar. 4:​37-39; Luka 8:2) Syakukasya fiyo ukumanya ukuti Yehova ampele umwanake amaka bo agha. tubaghile ukuya nulusubilo losa ukuti ifindu ifinunu ifi afingile nkyeni mu Bunyafyale bwa Kyala fisakufwanisiwa. Ifika ifi Yesu abombagha bo ali pakisu, fikutumanyisya isi isakubomba pakisu kyosa panongwa yakuti umwene Mwalafyale wa Bunyafyale bwa Kyala kumwanya. w23.04 3 ¶5-7

Linga ikipanga kyinu kili nabafumusi bingi, kangi mukuketa ukuti batikubasala, mubaghile ukuleka ukwinusya. Loli mungawagha amaka mukulondiwa ukughelaghela ukuti mwamulengepo. Mwitendekisye ifundo nyingi isyakuti mukamulepo. Linga batikubasala kubwandilo bwa kimanyilo, mubaghile ukuya nulusako ulwakwamulapo kubumalilo. Bo mukwitendekesya Ingasya ya Ndindilili, mwinong’oneleghe muno ipalagilafu yiliyosa yikukolelana numutu wa nkhani. Linga mubombile isi, mukuya pakuya nifundo inunu isyakuti mwamulepo pakimanyilo kyosa. Mwakongelelapo, mubaghile ukwitendekesya ukuti mukamule ifundo inywamu isya mu Baibolo isi sikuya ngafu ukusilingania. Nongwa yafiki? Panongwa yakuti abandu abakwamulapo babaghile ukuya banandi pakighaba iki. Bule linga mukuketa ukuti pangomano nyingi mutikuya nulusako ulwakwamulapo? Mubaghile ukuyobesania na uyu ikulongosya bo ingomano sikali ukwanda nukumbula ilalusyo ili mukulonda ukwamula. w23.04 21-22 ¶9-10