‘Kuyagha Nanine mu Paladaiso’

1. Bo Yesu asyele panandi ukufwa, ngimba alimbulile isyafiki umbombambibi uyu akomeliwe nawe pabupipi? (Luka 23:39-43)

YESU na babombambibi babili aba akomeliwe nabo pabupipi batamiwe fiyo bo basyele panandi ukufwa. (Luka 23:32, 33) Bosa bayobagha amasyu aghakunnyoza Yesu, yonongwa yake bakali bafundiwa bake. (Mat. 27:44; Mar. 15:32) Loli yumo achenjile akayilo kake. Umwene atile: “We Yesu ungumbukeghe bo kwingila Mbunyafyale bwako.” Yesu alimwamwile atile: “Naloli nikukubula une nikuti ghumusyughu kuyagha nanine mu Paladaiso.” (Belenga Luka 23:39-43.) Bukayapo ubuketi ubu bukunangisya ukuti umbombambibi uyu alitikisye amasyu agha Yesu afumusyagha bo ali pa kisu aghakuti, ‘Ubunyafyale bwa kumwanya buseghelile.’ Kangi Yesu akayobilepo ukuti umundu uyu isakwingila mu Bunyafyale bwa kumwanya. (Mat. 4:17) Yesu ayobagha isya Paladaiso wa nkyeni pa kisu kyapasi. Nongwa yafiki tubaghile ukuyoba bo ulu?

2. Ngimba findu fiki fikunangisya ukuti umbombambibi uyu alapile ali Muyuda?

² Umbombambibi uyu alapile abaghile ukuti ali Muyuda. Umwene alindalusisye unnine ukuti: “Nanuwe utikuntila Kyala, napa mufwene itolo ukufundiwa?” (Luka 23:40) Abayuda bamwiputagha Kyala yumoywene loli abandu abakufuma mfikolo ifingi basubilagha mu bakyala bingi. (Kuso. 20:2, 3; 1 Kor. 8:5, 6) Linga ababombambibi aba bakali Bayuda, umbombambibi yula ayagha pakulalusya ukuti, “Nanuwe utikubatila abakyala?” Mwakongelelapo, Yesu akatumiwe ku bandu abakufuma mfikolo loli kwene “ku kung’osi isobi isya nnyumba ya Israeli.” (Mat. 15:24) Kyala ababulile Abaisraeli ukuti isakubasyusya aba bafwile. Umbombambibi uyu alapile abaghile ukuti ayimenye ifundo iyi kangi amasyu agha ayobile ghanangisye ukuti Yehova isapakunsyusya Yesu ukuti asalaghileghe mu Bunyafyale bwa Kyala. Kangi umundu uyu ali nulusubilo losa ukuti Kyala isapakunsyusya.

3. Ngimba umbombambibi inong’onagha isyafiki bo Yesu ayobile isya Paladaiso? Lingania. (Ubwandilo 2:15)

³ Pakuya Muyuda, umbombambibi uyu alapile abaghile ukuti ayimenye inkhani ya Adamu na Eva na Paladaiso uyu Yehova abapele. Yonongwa yake umwene asubilagha ukuti Paladaiso uyu Yesu ayobagha wisakuya ngunda unnunu fiyo pa kisu kyapasi.​—Belenga Ubwandilo 2:15.

4. Ngimba amasyu agha Yesu alimbulile umbombambibi ghikutukasya ukuti twinong’oneleghe isyafiki?

⁴ Amasyu agha Yesu alimbulile umbombambibi ghikutukasya ukuti twinong’oneleghe isya muno ubumi bwisakuyila mu Paladaiso. Loli tubaghile ukumanyilako simo isyakufwana na Paladaiso ukufuma ku bulaghili ubununu ubwa Mwalafyale Solomoni. Kangi Ibaibolo likuyoba ukuti Yesu yo nkulumba fiyo ukukinda Solomoni. Tukughulila ukuti umwene isakubombagha pampene na aba isakulaghilagha nabo ukuti bakipele ikisu ukuya paladaiso unnunu fiyo. (Mat. 12:42) Bwanaloli ukuti “aba ng’osi isingi” bikulondiwa ukuya maso na isi bikubomba ukuti basafwanisye ukwikala nu bumi kwa bwila na bwila mu Paladaiso.​—Yoh. 10:16.

NGIMBA UBUMI BWISAKUYA BULEBULE MU PALADAISO?

5. Ngimba mukwinong’ona ukuti ubumi bwisakuya bulebule mu Paladaiso?

⁵ Ngimba mukwinong’ona ukuti ubumi bwisakuya bulebule mu Paladaiso? Lumo mukwinong’onela isya malo amanunu, bo ungunda wa Edeni. (Bwa. 2:7-9) Mubaghile ukukumbuka ubusololi ubu Mika alembile ubwakuti abandu ba Kyala bisakwitughalagha ndutengano “umundu wesa mmipiki yake iya mafilu niya mikuyu.” (Mika 4:3, 4) Mubaghile ukukumbuka kangi amavesi gha mu Baibolo agha ghikuyoba ukuti kwisakuya ifyakulya fingi. (Sal. 72:16; Yes. 65:21, 22) Inong’onela ukuti muli mungunda unnunu fiyo, mwikele patebulo ili lili nifyakulya fingi ifinunu. Mubaghile ukwinong’onela isya luma ulununu ulwa fyakumela namaluba. Kangi mukuhoboka ukwinong’onela isya ba mumbumba na bamanyani binu ukongelelapo aba bisakusyuka, mukuseka kangi mukuhoboka ukwangala pampene. Isi sikaya njosi itolo. Tuli nulusubilo losa ukuti ifindu ifi fisakubombiwa naloli pa kisu kyapasi. Kangi mu Paladaiso twisakuhobokagha ukubomba imbombo.

6. Ngimba twisakubombagha isyafiki mu Paladaiso? (Keta ikithuzi.)

⁶ Yehova atupelile ukuti tuhobokeghe ni mbombo yitu. (Ndumbi. 2:24) Twisakuya ni mbombo nyingi isyakubomba mubulaghili bwa fyinja 1,000 ubwa Kristu. Bosa aba bisakupona pabutolwe ubukulumba, ukongelelapo abandu bingi aba bisakusyuka, bisakulondiwa imyenda, ifyakulya namalo aghakwikala. Ukuti tusafwanisye ukubapa ifindu ifi, tukulondiwa ukwisakubomba imbombo nyingi isyakuhobosya. Mwakufwana itolo na Adamu na Eva aba bababulile ukuti balimeghe ungunda, nanuswe twisakuya ni mbombo iyakuhobosya fiyo iyakukipela ikisu ukuya paladaiso. Inong’onela kangi imbombo iyakuhobosya iyakwisa kubamanyisya abandu bingi aba bisakusyuka aba bakamenye nyingi isya Yehova nu bwighane bwake nukwisakubatula abandu abasubiliwa ukuti bamanye isi syabombiwe bo bafwile.

7. Ngimba tuli nulusubilo luliku kangi nongwa yafiki?

⁷ Tuli nulusubilo losa ukuti mu Paladaiso twisakwikalagha mwalutengano, twisakuya nakilikyosa iki tukulonda kangi twisakubombagha ifindu mu mbatiko. Nongwa yafiki? Panongwa yakuti Yehova atunangisye kale ikifwanikisyo ikya muno ubumi bwisakuyila mubulaghili bwa mwanake. Tubaghile ukuketa isi mu nkhani ya bulaghili bwa Mwalafyale Solomoni.

UBULAGHILI BWA MWALAFYALE SOLOMONI BUKUTUTULA UKUMANYA MUNO UBUMI BWISAKUYILA MU PALADAISO

8. Ngimba amasyu agha ghikwaghiwa pa Salimo 37:10, 11, 29 ghafwanisiwe bulebule bo Umwalafyale Davidi aghalembile? (Keta “Amalalusyo Aghakufuma ku Babelengi” mu magazini iyi.)

⁸ Umwalafyale Davidi abuliwe ukuti alembe isyakufwana namuno ubumi bwisakuyila linga umwalafyale uwamahala nunsubiliwa andile ukulaghila. (Belenga Salimo 37:10, 11, 29.) Utubalilo twingi tukubelenga Salimo 37:11 ukuti tuyobesanie na bandu isya Paladaiso wa nkyeni. Tuli nikifukwa ikinunu ikyakubomba bo ulu panongwa yakuti amasyu agha Yesu ayobile pabufumusi bwake bwapakyamba, ghikunangisya ukuti isi sili pilemba ili sisakufwanisiwa nkyeni. (Mat. 5:5) Loli amasyu gha Davidi ghanangisyagha kangi muno ubumi bwayagha pakuyila mmasiku gha Mwalafyale Solomoni. Pakabalilo aka Solomoni abalaghilagha Abaisraeli, abandu ba Kyala bahobokagha fiyo ukuya palutengano nifindu ifi bali nafyo nkisu “ikya mboto.” Kyala atile: “Linga mukusikonga indaghilo syangu . . . , ngwakubapa ulutengano nkisu, mukwakughonagha utulo utununu mwe basita ulutende ku mundu.” (Levi. 20:24; 26:3, 6) Ulufingo losa ulu lwafwanisiwe mubulaghili bwa Solomoni. (1 Syambu. 22:9; 29:26-28) Kangi Yehova afingile ukuti abandu ababibi aba biputagha ku bakyala abangi “batisakuyako.” (Sal. 37:10) Yonongwa yake amasyu agha ghikwaghiwa pa Salimo 37:10, 11, 29 ghafwanisiwe kunyuma kangi ghikuya pakufwanisiwa nkyeni.

9. Ngimba Umwalafyale unkikulu wa kisu kya Sheba ayobile isyafiki isyakufwana nubulaghili bwa Mwalafyale Solomoni?

⁹ Umwalafyale unkikulu wa kisu kya Sheba apilike isyakufwana nulutengano ni findu ifinunu ifya nkisu kya Israeli pakabalilo aka Solomoni ali mwalafyale. Umwene alyendile ubulendo ubutali ukubuka ku Yerusalemu ukuti akakete mwene muno ifindu fyayilile. (1 Banyaf. 10:1) Bo aketile ubunyafyale bwa Solomoni, umwene atile: “Amahala ghako nu bumanyi bwako bameghenyulagha itolo. . . . Naloli basangalufu abandu bako na babombi bako aba bikwima bwila nkyeni mmyako nukupilika amahala ghako” (1 Banyaf. 10:6-8) Loli ifyakubombiwa fya mubulaghili bwa Solomoni fyali kifwanikisyo itolo ikya ifi Yehova isakubabombela abandu pasi pa bulaghili bwa mwanake, Yesu.

10. Ngimba mo munjila siliku isi Yesu wapamwanya fiyo ukukinda Solomoni?

¹⁰ Yesu wapamwanya fiyo ukukinda Solomoni. Solomoni ali nsitabugholofu uyu abombile ubutulanongwa ubunywamu fiyo, isi syatwele indamyo ku bandu ba Kyala. Loli Yesu Ndongosi ngolofu uyu atikusobamo. (Luka 1:32; Hib. 4:14, 15) Umwene akindilile ukuya nsubiliwa kwa Yehova nalinga ukuti agheliwe fiyo na Setano. Kristu ikunangisya ukuti akabaghila ukutula inongwa pamo ukubomba ikindu kimo iki kibaghile ukubafulasya ababombi bake abasubiliwa. Tuli nulusako ulunywamu fiyo ukuya nu Mwalafyale unnunu bo uyu.

11. Ngimba bo banani aba bisakuntulagha Yesu ukulaghila?

¹¹ Yesu ikwakulaghilagha pampene na ba 144,000 ukuti basabatule abandu nukufwanisya ubwighane bwa Yehova pa kisu. (Ubuset. 14:1-3) Abene balifimbilisye ku ndamyo nyingi bo bali pa kisu yonongwa yake bisakumanya ifindu ifi abandu aba bisakwikala pa kisu bisakwaghanagha nafyo. Ngimba aba bikwakulaghilagha pampene na Yesu bisakuya nubudindo buliku?

NGIMBA ABAPAKIWA BISAKUYA NUBUDINDO BULIKU?

12. Ngimba mbombo yiliku iyi Yehova abapele aba 144,000?

¹² Yesu na aba isakulaghilagha nabo bali nimbombo nyingi fiyo ukukinda isi Solomoni ali nasyo. Umwalafyale Solomoni alondiwagha ukubapwelelela abandu bingi nkisu kimokyene itolo. Loli aba bikwakulaghilagha mu Bunyafyale bwa Kyala bisakubatula abandu bingi pa kisu kyosa kyapasi. Ukuyoba ubwanaloli, Yehova abapele aba 144,000 ubudindo ubunywamu fiyo.

13. Ngimba budindo buliku ubwakulondiwa ubu aba bisakulaghilagha na Yesu bisakuya nabo?

¹³ Mwakufwana itolo na Yesu, aba 144,000 bikwakubombagha bo banyafyale kangi baputi. (Ubuset. 5:10) Indaghilo isi Kyala abapele Abaisraeli ukwendela mwa Mose, abaputi bali nubudindo ubwakubafighilila abandu mwakumbili na mwambepo. Indaghilo isi “wali nsyungulu wa nunu isi sikwisagha,” yonongwa yake syakupilikiwa ukuyoba ukuti aba bisakulaghilagha pampene na Yesu bisakubatula abandu ba Kyala ukuti bakindilile ukuya numbili unnunu nukuya pabumanyani na Yehova. (Hib. 10:1) Tukulondiwa ukughulila ukuti tusakete muno abanyafyale na baputi aba bisakubombelagha ifindu na banyambala aba bisakusaliwa pa kisu. Mulimosa muno Yehova isakubombela, tuli nulusubilo losa ukuti mu Paladaiso, bosa aba bisakuya pa kisu bisakwambililagha ubulongosi ubu bikulondiwa.​—Ubuset. 21:3, 4.

NGIMBA “ABANG’OSI ISINGI” BIKULONDIWA UKUBOMBA ISYAFIKI UKUTI BASIKALE MU PALADAISO?

14. Ngimba bumanyani buliku ubu bulipo pakati pa “bang’osi isingi” na “katimo akanandi”?

¹⁴ Yesu ikubayoba aba isakulaghilagha nabo ukuya “katimo akanandi.” (Luka 12:32) Kangi ikuliyoba igulu lyabubili ukuya “bang’osi isingi.” Amagulu mabili agha ghikupanga untimo ghumowene uwakukolelana. (Yoh. 10:16) Amagulu mabili agha ghikubombela pampene amasiku agha kangi ghisakukindilila ukubombela pampene linga ikisu kisile ukuya Paladaiso. Pakabalilo ako, “akatimo akanandi” kisakuya kumwanya loli “abang’osi isingi” bisakuya nulusako ulwakuhoboka nu bumi pa kisu kwa bwila na bwila. Loli filipo ifindu fimo ifi “abang’osi isingi” bikulondiwa ukubomba ukuti basikale mu Paladaiso.

15. (a) Ngimba “abang’osi isingi” bikubomba bulebule na bakamu ba Kristu? (b) Ngimba mubaghile ukukonga bulebule ikifwanikisyo kya nkamu uyu ali mugulosale yakulisya unkota? (Keta ikithuzi.)

¹⁵ Umbombambibi uyu alapile, afwile bo akaya nulusako ulwakunangisya ukuti ikundaghisya isi Kristu alimbombile. Mwakukindana na isi, “abang’osi singi” bali nulusako ulunywamu lino ukuti banangisye muno bikunketela Yesu. Mwakifwanikisyo, tukunangisya ukuti tunganile ukufwana namuno tukubombela ifindu na bakamu bake abapakiwa. Yesu atile isakubalonga abang’osi isingi ukufwana namuno bikubombela ifindu na bakamu bake. (Mat. 25:31-40) Tubaghile ukubatula abakamu ba Kristu mwakwiyipa pambombo iyakufumusya nukupanga abamanyili. (Mat. 28:18-20) Yonongwa yake tukulondiwa ukubombela amabuku agha bikutupa ukuti tubamanyisyeghe abandu Ibaibolo, bo ibuku ilyakuti Amuhobokeghe nu Bumi kwa Bwila na Bwila. Linga mutikumanyila Ibaibolo nu mundu yumo, mukulondiwa ukwiyipa ukuti mumanyileghe na bandu bingi.

16. Ngimba lino tukulondiwa ukubomba isyafiki ukuti twitendekesye ukuti tusaye benekaya ba Bunyafyale bwa Kyala?

¹⁶ Tutikulondiwa ukughulila ukuti tusikale tasi mu Paladaiso ukuti tusaye mundu uyu Yehova ikulonda. Lino ko kabalilo akakuti tughelegheleghe ukuya basubiliwa mu isi tukuyoba nukubomba nukwikala ubumi ubusita kulonda ifindu fingi. Kangi tukulondiwa ukuya basubiliwa kwa Yehova, kumwinitu wambweghi na ku Bakristu abinitu. Linga lino tukumpilikila Yehova nkisu ikibibi iki, kwisakuya kupepe ukumpilikila mu Paladaiso. Tukulondiwa kangi ukukusya amaluso nutuyilo utununu ukunangisya ukuti tukwitendekesya ukwisakwikala mu Paladaiso. Keta inkhani iyakuti “Ngimba Mwitendekisye Ukwisa ‘Kukikaba Ikisu’?” yikwaghiwa mu magazini iyi.

17. Ngimba tukulondiwa ukuwa amaka panongwa yabutulanongwa ubu twabombile kunyuma? Lingania.

¹⁷ Tukulondiwa ukuleka ukwiyipa inongwa panongwa yabutulanongwa ubu twabombile kunyuma. Bwanaloli ukuti, panongwa ya kitabulilo tutikulondiwa “ukutula inongwa matingo.” (Hib. 10:26-31) Loli tuli nulusubilo ukuti linga tulapile ukufuma pasi pandumbula, tusumile ubutuli kwa Yehova na ku bakulumba bakipanga nukuchenja utuyilo twitu, umwene ikutuhobokela. (Yes. 55:7; Imbo. 3:19) Tukumbukeghe amasyu agha Yesu ababulile Abafarisai ukuti: “Ngisa kukubabilikila abagholofu mma loli ba batulanongwa.” (Mat. 9:13) Ikitabulilo kibaghile ukututula fiyo ukuti tuhobokeliwe ubutulanongwa bwitu bosa.

TUBAGHILE UKWIKALA KWA BWILA NA BWILA MU PALADAISO

18. Ngimba mukulonda ukuti musayobesanie isyafiki nu mbombambibi uyu afwile pabupipi na Yesu?

¹⁸ Ngimba mubaghile ukwinong’onela ukuti muli mu Paladaiso, mukuyobesania nu mbombambibi uyu ayobile na Yesu? Kisita kukayika twesa tubaghile ukundaghisya ikemo lya Yesu. Kangi mubaghile ukundalusya ukuti ababule nyingi isi syabombiwe bo ali pipi ukufwa namuno alipilikile bo Yesu amwile ilalusyo lyake. Kangi lumo abaghile ukubalalusya muno ifindu fyayilile mmasiku ghabumalikisyo nkisu kya Setano. Sisakuya syakuhobosya fiyo ukumanyila Amasyu gha Kyala na bandu bo umbombambibi uyu.​—Ef. 4:22-24.

19. Nongwa yafiki ubumi mu Paladaiso bwisakuya bwakuhobosya fiyo? (Keta ikithuzi kyapakikope.)

¹⁹ Ubumi mu Paladaiso bwisakuya bwakuhobosya fiyo. Akabalilo kosa twisakwaghanagha na bandu abanunu nukubomba imbombo inunu. Ukukinda fyosa, isiku lililyosa twisakufwanisyagha ukummanya kanunu Tata witu wakumwanya nukuhoboka ni findu ifi isakutupagha. Akabalilo kosa twisakumanyilagha ifindu fingi ifyakufwana na Yehova nikipeliwa kyake. Linga tuli mu Paladaiso twisakukindililagha ukukusya ulughano lwitu kwa Kyala. Tukunndaghisya fiyo Yehova na Yesu panongwa ya isi bafingile isyakuti tusikale mu Paladaiso kwa bwila na bwila.