INKHANI IYAKUMANYILA 22
ULWIMBO 15 Lumbani Mwana Wakwamba wa Yehova
Ingamu ya Yehova Yakulondiwa Fiyo kwa Yesu
“Une mbafumukisye ingamu yako, kangi nisakuyifumusyagha.”—YOH. 17:26.
IFUNDO INYWAMU
Tukuya pakuketa inongwa iyi Yesu ayobile ukuti ayifumwisye ingamu ya Yehova, ayikemesisye kangi muno anangisye ukuti nyikemo.
1-2. (a) Ngimba Yesu abombile isyafiki ikilo ikyakuti kilabo ikuya pakufwa? (b) Ngimba tukuya pakuyobesania amalalusyo ghaliku munkhani iyi?
PALI pakina pakilo, Nisani 14, 33 C.E., kangi Yesu asyele panandi ukubikiwa mmaboko gha balughu, ukulongiwa, ukunyoziwa nukughoghiwa. Umwene amalile itolo ukulya ifyakulya fya namayolo nkipinda kya mmwanya na batumiwa bake abasubiliwa. Bo bamalile, Yesu ababulile amasyu ghamo aghakukasya fiyo. Kangi bo basyele panandi ukusoka nkipinda kila, Yesu alimile kangi aliputile ulwiputo ulwakulondiwa fiyo. Untumiwa Yohani alembile ulwiputo ulu kangi tubaghile ukulwagha mu chaputala 17 mu buku lya Yohani.
2 Munkhani iyi tukuya pakuketa isi tukumanyilako ku lwiputo lwa Yesu. Ngimba umwene apasyagha isyafiki bo asyele panandi ukufwa? Ngimba ulwiputo lwake lukunangisya bulebule ifindu ifi fyali fyakulondiwa fiyo kumyake pakabalilo aka ali pakisu? Isagha tuyobesanie amaansala gha malalusyo agha.
“UNE MBAFUMUKISYE INGAMU YAKO”
3. Ngimba Yesu ayobile isyafiki isyakufwana ningamu ya Yehova kangi asanusyagha isyafiki? (Yohani 17:6, 26)
3 Ndwiputo lwake Yesu atile, “Une mbafumukisye ingamu yako.” Tusimenye ukuti isi syali syakulondiwa kwa Yesu panongwa yakuti asiyobile amabulendo mabili. (Belenga Yohani 17:6, 26.) Ngimba asanusyagha isyafiki? Ngimba umwene alondiwagha ukubabula abafundiwa bake isi ingamu ya Kyala yasanusyagha? Abafundiwa ba Yesu bali Bayuda kangi abene bayimenye ingamu ya Kyala, ukuti yo Yehova. Ingamu iyi yaghiwagha mu mabuku gha Kihiburi mmalo amasauzandi mingi fiyo. Pakabalilo aka Yesu ayobagha isya ngamu ya Yehova ayobagha isya isi yimilagha. Yesu abatulile abafundiwa bake ukummanya kanunu Yehova. Kangi isi sikongelelapo ubwighane bwake ku kisu iki na ku bandu, isi ingamu iyi yikusanusya, isi abombile nutuyilo twake utununu. Yesu yo mwene uyu ammenye kanunu Yehova.
4-5. (a) Ngimba tubaghile ukulingania bulebule ukuti tunangisye ukuti tummenye kanunu umundu yumo? (b) Ngimba mo munjila yiliku iyi abafundiwa ba Yesu bayimenye kanunu ingamu ya Yehova?
4 Inong’onela isi, tufwanikisye ukuti nkipanga kyinu muli unkulumba yumo uyu ingamu yake yo David kangi yo dokotala. Mummenye dokotala uyu kwa fyinja fingi fiyo. Kangi isiku limo mubinile fiyo kangi ubumi bwinu buli pangozi. Babukile nanumwe ku kipatala kuno unkamu yula ikubomba, mwanakalinga umwene ikubombela amaluso ghake nukubatula ukuti mubumbuluke. Mukuya pakwanda ukungana fiyo unkamu uyu, kangi linga mukupilika ingamu yake mukukumbuka isi ababombile. David akaya nkamu itolo kumyinu; loli yo dokotala uyu abupokile ubumi bwinu.
5 Mwakufwana itolo abafundiwa ba Yesu bayimenye ingamu ya Yehova. Loli bamenye ukuti ingamu iyi yakulondiwa fiyo panongwa yakuti Yesu abatulile ukuti bammanye kanunu Yehova. Nongwa yafiki tukuyoba bo ulu? Panongwa yakuti Yesu ankongagha Tata wake mu isi ayobagha nukubomba. Abafundiwa bake balimmenye kanunu Yehova mwakupilikisya ku isi amanyisyagha kangi muno abombelagha ifindu na bandu.—Yoh. 14:9; 17:3.
“MUNGAMU YAKO IYI UMBELE”
6. Ngimba mo munjila yiliku iyi Yehova alimpele Yesu ingamu yake? (Yohani 17:11, 12)
6 Ndwiputo lwake Yesu abiputile abafundiwa bake atile: “Ubalindilileghe mungamu yako iyi umbele.” (Belenga Yohani 17:11, 12.) Ngimba isi sikusanusya ukuti Yesu ikuya pakumanyiwagha ni ngamu yakuti Yehova? Hayi. Ndwiputo lwake Yesu ayobile ukuti “mungamu yako.” Isi sikusanusya ukuti ingamu iyakuti Yehova yikali ya Yesu. Po lelo ngimba Yesu asanusyagha isyafiki apa ayobagha ukuti ingamu ya Kyala yipeliwe kumyake? Ikyakwanda, Yehova alintumile Yesu ukuya wakumwimila. Umwene alisile mungamu ya Tata wake nukubomba nyingi ukwendela mungamu iyi. (Yoh. 5:43; 10:25) Ikyabubili, ingamu iyakuti Yesu yikusanusya “Yehova Mpoki.” Ingamu ya Yesu yikongelelapo ingamu ya Yehova.
7. Ngimba mo munjila yiliku iyi Yesu ayobile mmalo mwa Yehova? Yoba ikifwanikisyo.
7 Tufwanikisye bo ulu, undaghili abaghile akuntuma umundu yumo uwakumwimila ukuti akanjobele. Polelo amasyu gha uyu ikumwimila undaghili ghabaghile ukuya namaka aghakufwana itolo na gha ndaghili. Mwakufwana itolo, Yesu alimwimile Yehova nukuyoba ku bandu mungamu yake.—Mat. 21:9; Luka 13:35.
8. Nongwa yafiki Yehova atile ingamu yake yili mwa Yesu napakabalilo aka umwene ali kumwanya? (Ukusoka 23:20, 21)
8 Ibaibolo likunjoba Yesu ukuya “Isyu”panongwa yakuti Yehova alintumile umwene ukuti ababule abandumi na bandu isi balondiwagha ukumanya nukubomba. (Yoh. 1:1-3) Yesu ali yo wandumi uyu Yehova alintumile ukuti akabapweleleleghe Abanyaisraeli pakabalilo aka bali ndungalangala. Bo ikubabula ukuti bampilikileghe uwandumi yula, Yehova ababulile kangi inongwa yake, atile: “Namanga une ndi mmyake.”a (Belenga Ukusoka 23:20, 21.) Ingamu ya Yehova yali mwa Yesu uyu imilagha Tata wake kangi nukuyikemesya ingamu ya Tata wake.
“WE TATA UYIPEGHE UBUKULUMBA INGAMU YAKO”
9. Ngimba ingamu ya Yehova yali yakulondiwa bulebule kwa Yesu? Lingania.
9 Ukufwana namuno tuketile, ingamu ya Yehova yali yakulondiwa kwa Yesu bo akali nukwisa pakisu. Yonongwa yake sikaya syakuswighisya ukuti bo isile pakisu anangisye mu fyosa isi abombagha ukuti ingamu iyi yali yakulondiwa fiyo kumyake. Bo asyele panandi ukumalisya ububombeli bwake pakisu, Yesu alinsumile Yehova ukuti: “We tata uyipeghe ubukulumba ingamu yako.” Mwanakalinga amasyu amakulumba ghafumile kumwanya kangi ghatile: “Njipele ubukulumba kangi nikwandisyagha ukuyipa ubukulumba.”—Yoh. 12:28.
10-11. (a) Ngimba mo munjila yiliku iyi Yesu ayitufyagha ingamu ya Kyala? (Keta kangi ikithuzi.) (b) Nongwa yafiki ingamu ya Yehova yikulondiwa ukukemesiwa nukwelusiwa?
10 Yesu ayipele ubukulumba ingamu ya Tata wake. Bulebule? Injila yimo iyi abombile isi kokubabulako abangi isya mbombo syake isyapamwanya isi abombile kangi nutuyilo utununu utu ali nato. Loli abombile kangi isingi. Yesu alondiwagha ukunangisya ukuti Yehova abombile ifindu fyosa kanunu kangi ukuti ingamu yake nyikemo.b Yesu anangisye isi pakabalilo aka abamanyisyagha abafundiwa bake ulwiputo lwa mwalafyale. Umwene atile: “Tata witu wakumwanya, ingamu yako yikemesiweghe.”—Mat. 6:9.
11 Nongwa yafiki ingamu ya Yehova yikulondiwa ukukemesiwa? Panongwa yakuti kunyuma mungunda wa Edeni Setano ayobile isyabutungulu isyakufwana na Yehova Kyala. Setano ayobile ukuti Yehova ikufisa ifindu fimo ifinunu kwa Adamu na Eva. (Bwa. 3:1-5) Mwakubomba isi Setano anangisyagha ukuti Yehova atikubomba kanunu ifindu. Panongwa yakuti Setano ayobile isyabutungulu isyakufwana na Yehova, abandu babaghile ukwanda ukwinong’ona ukuti umwene mbibi. Nkabalilo ka Yobu, Setano ayobile kangi ukuti aba bikumbombela Yehova bikubomba isi panongwa ya findu ifinunu ifi umwene ikubapa. Isi ayobile syongelelangapo ukuti akayapo umundu uyu abaghile ukukindilila ukumbombela Yehova linga aghene nindamyo. (Jobu 1:9-11; 2:4) Palondiwagha akabalilo ukuti untungulu amanyiwe, linga yo Setano pamo Yehova.
Yesu abamanyisye abafundiwa bake ukulondiwa kwakuyikemesya ingamu ya Kyala (Keta ipalagilafu 10)
“NIKUBUTAGHA UBUMI BWANGU MBUFWE”
12. Ngimba findu fiki ifi Yesu alondagha ukwiyipa ukubomba panongwa ya lughano lwake kwa Yehova?
12 Panongwa ya lughano lwake kwa Yehova, Yesu alondagha ukubomba syosa isi abaghile ukufwanisya ukuti ingamu ya Yehova yikemesiweghe. Umwene ayobile ukuti, “nikubutagha ubumi bwangu mbufwe”. (Yoh. 10:17, 18) Yesu alitendekisye ukufwa nubwighane ubwakuti anangisye ukuti Yehova mwikemo kangi syosa isi ikubomba nunu.c Abandu abagholofu abakwanda balinsambukile Yehova kangi bakolelene na Setano. Mwakukindana numwene, Yesu aliyipile ukwisa pakisu ukuti asanangisye ukuti anganile fiyo Yehova. Yesu abombile isi mwakuyoba nukubomba kilikyosa iki kyakolelanagha na Yehova. (Hib. 4:15; 5:7-10) Umwene akindilile ukuya nsubiliwa ukufika apa afwilile pampiki uwakutamiliwapo. (Hib. 12:2) Ukubomba bo ulu, anangisye ulughano kwa Yehova ningamu yake.
13. Nongwa yafiki Yesu ali pa malo amanunu aghakunangisya ukuti Setano ntungulu? (Keta kangi ikithuzi.)
13 Bo ali pakisu, Yesu anangisye munjila yiliyosa ukuti Setano ntungulu komma Yehova. (Yoh. 8:44) Yesu ammenye kanunu Yehova ukukinda umundu aliwesa. Linga isi Setano ayobile isyakufwana na Yehova syali syabwanaloli, angali Yesu asimenye. Yonongwa yake Yesu abikilepo indumbula ukuyifighilila ingamu ya Kyala. Napakabalilo aka Yehova alekile ukumfighilila Yesu akalinsambukile loli asalile ukukindilila ukuya nsubiliwa kwa Yehova, Tata wake walughano.—Mat. 27:46.d
Isi Yesu abombile bo ali pakisu sikunangisya ukuti Setano yo uyu ntungulu komma Yehova (Keta ipalagilafu 13)
“IMBOMBO IYI WALIMBELE UKUTI NJIBOMBE. . . YO NJIMALILE”
14. Ngimba Yehova alinsayile bulebule Yesu panongwa yabusubiliwa bwake?
14 Bo ikwiputa ikilo ikyakuti ikuya pakughoghiwa, umwene atile: “Imbombo iyi walimbele ukuti njibombe, yo njimalile.” Umwene asimenye ukuti Yehova ikuya pakunsaya panongwa yakuya nsubiliwa. (Yoh. 17:4, 5) Kangi Yesu abombile kanunu fiyo ukunsubila Tata wake. Yehova akalitikisye ukuti Yesu akindilile ukuya mwipumba. (Imbo. 2:23, 24) Alinsyusisye Yesu kangi alimpele ubudindo bwapamwanya fiyo kumwanya. (Filip. 2:8, 9) Mwanakalinga, Yesu alyandile ukulaghila pakuya Mwalafyale wa Bunyafyale bwa Kyala. Ngimba Ubunyafyale ubu bukuya pakufwanisya ukubomba isyafiki? Yesu ikutubula ansala wake mulwiputo ulwa Mwalafyale ukuti: “Ubunyafyale bwako bwiseghe. Ubwighane bwako bubombiweghe pasi apa bo kumwanya.”—Mat. 6:10.
15. Ngimba findu fiki ifingi ifi Yesu isakufwanisya ukubomba?
15 Nkyeni, Yesu isakulwa nabalughu bosa ba Kyala kangi isakubapyuta abandu bosa ababibi pa Armagedoni. (Ubuset. 16:14, 16; 19:11-16) Linga isi sibombiwe, mwanakalinga Yesu isakunsopa Setano “mbwina bwa ngisi isolofu,” muno atisakufwanisya ukubomba kilikyosa. (Ubuset. 20:1-3) Yesu ikuya pakulaghila kwa fyinja 1,000 kangi isakughomokesya ulutengano pakisu nukubatula abandu ukuya bagholofu. Isakubasyusya abafwe. Isakukipela ikisu kyosa ukuya paladaiso. Pakabalilo ako ubwighane bwa Yehova bwisakufwanisiwa.—Ubuset. 21:1-4.
16. Ngimba ubumi bwisakuya bulebule kubumalilo bwa Bulaghili bwa fyinja 1,000?
16 Ngimba ifindu fisakuya bulebule nkabalilo aka Yesu isakulaghilagha kwa Fyinja 1,000? Ubutulanongwa nubusitabugholofu fitisakuyangako kangi. Abandu batisakulondiwagha ukusuma ukuti bahobokeliwe imbibi syabo kangi batisakulondiwa abaputi ukubasumila kwa Yehova ukuti baye nawe pabumanyani. Kangi “undughu wabumalikisyo ukupyutiwa bo bu bufwe.” Mmapumba mutisakuya akandu nakamo. Bosa aba bafwile bisakusyuka. Aliwesa pakisu isakuya ngolofu.—1 Kor. 15:25, 26.
17-18. (a) Ngimba findu fiki ifi fisakubombiwa kubumalilo bwa Bulaghili bwa fyinja 1,000? (b) Ngimba Yesu isakubomba isyafiki linga amalile ukulaghila? (1 Kor. 15:24, 28) (Keta kangi ikithuzi.)
17 Ngimba findu fiki ifingi ifi fisakubombiwa kubumalilo bwa Bulaghili bwa fyinja 1,000? Pakabalilo ako ikindu kimo ikyapadela fiyo kisakubombiwa. Atisakuyapo uyu isakukayikila ukuti Yehova mwikemo kangi Kyala wanaloli. Nongwa yafiki? Mu ngunda wa Edeni Setano ayobile ukuti Yehova ntungulu kangi ukuti atikubalaghila abandu mwalughano. Ukwanda pakabalilo kala ababombi bake bingi bikuyikemesya ingamu yake. Yonongwa yake kubumalilo bwa fyinja 1,000 ifya bulaghili bwa Kristu ingamu ya Yehova yisakukemesiwa kwa bwila na bwila. Umwene isakunangisya pabwelu ukuti yo Tata walughano fiyo.
18 Linga ubulaghili bwa fyinja 1,000 bukindile, aliwesa isakumanya ukuti isi Setano ayobile syali syabutungulu. Ngimba Yesu isakubomba isyafiki linga amalile ukulaghila? Ngimba isakubomba muno Setano abombile nukunsambukila Yehova? Hayi. (Belenga 1 Bakorinti 15:24, 28.) Yesu isakughomokesya Ubunyafyale kwa Tata wake. Isakunangisya ukupilikila kubulaghili bwa Yehova. Mwakukindana na Setano, Yesu isakubomba isi kisita kwilumbusya panongwa yakuti anganile fiyo Tata wake.
Yesu ikughomokesya Ubunyafyale kwa Yehova panyuma pa Bulaghili bwake ubwa Fyinja 1,000 (Keta ipalagilafu 18)
19. Ngimba ingamu iyakuti Yehova yikusanusya isyafiki?
19 Syakupilikiwa ukuti Yehova alimpele Yesu ingamu yake. Yesu anangisye pabwelu ukuti afwene na Tata wake kangi yo wakumwimila nnunu. Po lelo ngimba ingamu ya Yehova yikusanusya isyafiki kwa Yesu? Yakulondiwa fiyo ukukinda ikindu kilikyosa. Umwene afwile panongwa ya ngamu iyi, kangi ikuya pakughomokesya fyosa kwa Yehova pabumalilo bwa fyinja 1,000. Ngimba tubaghile ukunkonga bulebule Yesu? Twisakuyobesania ansala wa ilalusyo ili munkhani iyakukongapo.
ULWIMBO 16 Lumbani Ya Chifukwa cha Mwana Wake Wakuphakazgika
a Utubalilo tumo abandumi bamwimilagha Yehova linga abatumile ukuyoba amasyu ghamo. Yonongwa yake utubalilo tumo mu Baibolo abandumi bikuyobiwa ukuti Yehova nalinga ali yo wandumi uyu ayobagha. (Bwa. 18:1-33) Nalinga ukuti Amalemba ghikuyoba ukuti Mose alyambilile Ululaghilo ukufuma kwa Yehova, loli amavesi ghamo ghikufumbula ukuti Yehova abombile abandumi.—Levi. 27:34; Imbo. 7:38, 53; Gal. 3:19; Hib. 2:2-4.
b ISI AMASYU GHAMO GHIKULINGANIA: “Ukuyikemesya” kukusanusya ukuyighindika. “Ukuyelusya” kukusanusya ukuyipangisya imbili ya mundu yumo ukweluka ku nkhani syabutungulu isi sipilikiwe kangi ukuti simanyiwe ukuti umwene mundu nnunu itolo.
c Inifwa ya Yesu yitulile kangi ukuti abandu bahobokeliwe ubutulanongwa ni nifwa nukwisakwikala kwa bwila na bwila.
d Keta “Amalalusyo Aghakufuma ku Babelengi” mu Ingasya ya Ndindilili iya Epulelo 2021, peji 30-31.