Mukuya Pakusayiwa Panongwa Yakuntila Kyala

1-2. Ngimba ndamyo siliku isi Abakristu bikwaghana nasyo amasiku agha ukufwana na Loti?

LINGA tukuketa utuyilo utubibi utwa bandu amasiku agha, tukwipilika bo muno abombile Loti uyu ali ngolofu. Umwene “lwampelagha ubusulumanie ulwendo lwa bilandaghilo nabalufu kubulowe,” papo asimenye ukuti Tata wake uwakumwanya atubengile utuyilo utubibi. (2 Pet. 2:7, 8) Ukuntila nu kungana Kyala kwalimpangisye Loti ukutubenga utuyilo utubibi utwa bandu ba mmasiku ghake. Nanuswe tukwikala nabandu aba batikukonga utuyilo utununu utwa Yehova. Nalinga sili bo ulu, tubaghile ukuya nutuyilo utununu linga tukukindilila ukungana nu kuntila Kyala.​—Mbu. 14:2.

² Yehova ikututula ukuti tufwanisye ukubomba isi ukwendela mmasyu aghakukasya agha ghikwaghiwa mu buku ilya Isya Mbupingamu. Abakristu bosa, abanyamba na bakikulu, abana na bakangale, babaghile ukusayiwa fiyo linga bikwinong’onela ubulongosi ubwa mahala ubu bukwaghiwa mu buku ili.

UKUNTILA KYALA KUKUTUFIGHILILA

3. Ukufwana na Isya Mbupingamu 17:3, ngimba kifukwa kimo kiliku iki tukulondiwa ukuyifighilila indumbula yitu? (Keta kangi ikithuzi.)

³ Ikifukwa ikinunu iki tukulondiwa ukuyifighilila indumbula yitu iyakufwanikisya, kyo kyakuti Yehova ikuketa isi sili mundumbula yitu. Isi sikusanusya ukuti umwene ikuketa nyingi ukukinda isi abangi babaghile ukuketa kangi ikumanya muno tuyilile. (Belenga Isya Mbupingamu 17:3.) Umwene ikuya pakutughana linga tukwinong’onela isya bulongosi bwake ubu bubaghile ukututula ukuti tusikale kwa bwila na bwila. (Yoh. 4:14) Ukufuma apo, tutikuya pakubomba utuyilo utubibi nukusyobiwa nubutungulu bwa Setano nabandu ba nkisu kyake. (1 Yoh. 5:18, 19) Bo tukuseghelela fiyo kwa Yehova, ulughano lwitu kumyake lukuya pakukula kangi tukuya pakungindika. Panongwa yakuti tutikulonda ukunkalalisya Tata witu, tukuya pakughabenga aminong’ono aghabutulanongwa. Linga tukugheliwa ukuti tubombe ifindu ifibibi, twilalusyeghe ukuti, ‘Ngimba mbaghile ukunkalalisya bulebule Kyala mwadala uyu anangisye ulughano?’​—1 Yoh. 4:9, 10.

4. Ngimba ukuntila Yehova kwalimfighilile bulebule umulumbu yumo ukuti aleke ukubomba ifindu ifibibi?

⁴ Marta, umulumbu wa ku Croatia uyu agheliwe ukuti abombe ifindu ifyabulowe atile: “Kwali kukafu fiyo ukwinong’ona kanunu nukulimbana nikinyonywa ikyakuti mbombe ikindu kimo ikibibi. Loli panongwa yakuntila Yehova nafighililiwe.”b Ngimba kwalintulile bulebule? Marta ayobile ukuti inong’onelagha ifindu ifibibi ifi fyayagha pakubombiwa linga abombile ifyabulowe. Nanuswe tubaghile ukubomba mwakufwana itolo. Linga tukubomba ifindu ifibibi, tubaghile ukunkalalisya Yehova nukuleka ukumbombela.​—Bwa. 6:5, 6.

5. Ngimba tukumanyilako isyafiki kwa Leo?

⁵ Linga tukuntila Yehova, tukabaghila ukubomba utuyilo utubibi. Leo uyu ikwikala ku Congo, amanyilepo simo. Bo pakindile ifyinja 4 ukufuma apa alyosiwe, alipabumanyani na bandu aba babombagha ifindu ifibibi. Umwene inong’onagha ukuti linga atikubombako utuyilo utubibi, ko kuti atikummonangila Yehova. Loli bo akabalilo kakindilepo, abamanyani bake aba bali nutuyilo utubibi balimpangisye ukuti ande ukunwa ubwalwa nu kubomba ubulowe. Alyandile ukwinong’onela pa isi abapapi bake balimmanyisye nulusekelo ulu ali nalo bo ikumbombela Yehova. Ngimba ifyakukongapo fyake fyali fyo filiku? Umwene alyandile ukubomba ifindu ifinunu. Bo abakulumba bakipanga bantulile, aghomokile kwa Yehova. Lino ali nulusekelo pakuya nkulumba nkipanga kangi mpayiniya wapadela.

6. Ngimba kifwanikisyo kiliku ikya bakikulu babili iki tukuya pakuyobesania?

⁶ Isagha tuyobesanie ichaputala 9 ikya buku lya Isya Mbupingamu, iki kikutubula isya bakikulu babili aba bikwimila amahala nu bukonyofu. (Fwanikisya na Baroma 5:14; Bagalatia 4:24.) Bo tukumanyila isi sili mu chaputala iki, tukumbukeghe ukuti ikisu kya Setano kibughanile fiyo ubulowe ni fithuzi fyamwiko. (Ef. 4:19) Yonongwa yake kwakulondiwa fiyo ukuti tuntileghe Kyala nu kwepuka ku findu ifibibi. (Mbu. 16:6) Twesa, kali tuli banyambala pamo bakikulu, tubaghile ukusayiwa na isi ichaputala iki kikuyoba. Aliwesa mwa bakikulu babili aba, ikuyobiwa ukuti ankolelagha umundu unsitamahala pamo ukuti “unkonyofu.” Aliwesa atighi, ‘Ingila nnyumba yangu ulyemo ifyakulya.’ (Mbu. 9:1, 5, 6, 13, 16, 17) Loli ifi fyabombiwe ku aba bakoleliwe, fyakindene fiyo.

TUKANEGHE LINGA UKINKULU UNKONYOFU IKUTUKOLELA

7. Ukufwana na Isya Mbupingamu 9:13-18, ngimba findu fiki fyabombiwe ku aba bapilikile bo unkikulu unkonyofu ikukolela? (Keta kangi ikithuzi.)

⁷ Inong’onela amasyu gha “nkikulu unkonyofu.” (Belenga Isya Mbupingamu 9:13-18, NWT.) Unkikulu uyu ikubakolela abandu abasitamahala mwakukwesya amasyu ukuti, “isagha kuno” nu kwikyela nanine. Ngimba syafiki syababonekile? “Mu nkikulu yuyuyu mo balimo abandu abafwe.” Lumo mukumbwike amasyu aghakufwanikisya agha tughaghile kubwandilo bwa buku lya Isya Mbupingamu. Tusokiwe isya “nkikulu undowe” nu “nkikulu uwa mwalwe.” Tubuliwe ukuti: “Injila yake yikwikilila ukulabila ku bufwe.” (Mbu. 2:11-19) Pa Isya Mbupingamu 5:3-10 pikutusoka isya “nkikulu undowe” uyu ‘amalundi ghake ghikwikilila ukubuka ku bufwe.’

8. Ngimba tukulondiwa ukusala isyafiki?

⁸ Aba bikupilika amasyu gha “nkikulu unkonyofu” bikulondiwa ukusala ukwitika pamo ukukana. Nanuswe tukulondiwa ukusala ikyakubomba pankhani iyi. Ngimba tubaghile ukubomba isyafiki linga umundu yumo ikulonda ukuti tubombe ubulowe pamo linga mwangozi tuketile ifithuzi fyamwiko?

9-10. Ngimba fifukwa fimo filiku ifi tukulondiwa ukukana utuyilo twabulowe?

⁹ Filipo ififukwa ifinunu ifi tutikulondiwa ukubomba utuyilo twabulowe. “Unkikulu unkonyofu” ikuyobiwa ukuti: “Amisi gha mbuhiyi gho ghikunogha.” Ngimba “amisi gha mbuhiyi” findu fiki? Ibaibolo likufwanikisya ukughonana kwa nnyambala nu nkasi wake na misi agha ghikupa ubutusyo. (Mbu. 5:15-18 NWT) Unnyambala nu nkikulu aba beghene mwakukonga indaghilo bo aba bikwitikisiwa ukughonana. Loli ngimba fikindene bulebule na “misi gha mbuhiyi”? Amasyu agha ghikuyoba isya kughonana uku kukukanisiwa. Isi sikubombiwa mwakwibilila bo muno unhiyi ikubombela pakwiba ifindu. “Amisi gha mbuhiyi” ghabaghile ukufwana ghikunogha linga aba bikubomba isi bikuketa ukuti bafisile ubutulanongwa bwabo. Syakitima fiyo papo bikwisyoba bene. Loli Yehova ikuketa kilikyosa. Ukonanga ubumanyani bwitu na Yehova, kyo kindu ikyakubaba fiyo kangi ukubomba isi kukaya ‘kununu’ napanandi. (1 Kor. 6:9, 10) Loli silipo kangi indamyo isingi.

¹⁰ Ukubomba ubulowe, kubaghile ukumpangisya umundu ukukosiwa isoni, ukwiketa ukuti ukaya wakulondiwa, ukuya nulwanda ulu akalughulilagha nu konanga ubumanyani naba mumbumba yake. Kwakulondiwa fiyo ukukana linga unkikulu unkonyofu ikutukolela ukuti twingile “nnyumba” yake nukulya nawe ifyakulya. Ukongelela pakonanga ubumanyani na Yehova, bingi aba bikubomba ubulowe, bikwegha imbungo isi sikubapangisya ukuti bafwe. (Mbu. 7:23, 26) Ivesi 18 mu chaputala 9 likumalisya na masyu aghakuti: “Unkikulu yuyuyu mo balimo abandu abafwe.” Loli nongwa yafiki abandu bingi bikwitika bo unkikulu unkonyofu uyu ikubakolela nu kubalongolela ku findu ifi fikupela ikitima?​—Mbu. 9:13-18.

11. Nongwa yafiki ukuketelela ifindu fyamwiko kubibi fiyo?

¹¹ Ikipingo iki Setano ikubombela fiyo imbombo iki tukulondiwa ukwepuka ko kuketelela ifindu fyamwiko. Bamo bikwinong’ona ukuti ukuketelela ifindu fyamwiko kukaya kubibi. Loli ifindu fyamwiko fikubafulasya abandu, fikubapangisya ukuti bangaghindikiwagha kangi kukafu fiyo ukuleka ukuketelela ifindu ifi. Linga abandu bafibwene ifithuzi ifibibi, kukuya kukafu ukwibwa. Ifindu fyamwiko fikubapangisya abandu ukuti bayeghe ni finyonywa ifibibi kangi fyamaka fiyo. (Kolos. 3:5; Yak. 1:14, 15) Bwanaloli ukuti bingi aba bikuketelela ifindu fyamwiko bikukindilila ukubomba ifindu fyabulowe.

12. Ngimba tukunangisya bulebule ukuti tukwepuka ukuketelela ifithuzi ifi fibaghile ukutupangisya ukuya naminong’ono aghabulowe?

¹² Ngimba tukulondiwa ukubomba isyafiki pakuya Bakristu linga tuketile ifithuzi fyamwiko mwangozi? Tukulondiwa ukuleka mwanakalinga ukufiketa. Kubaghile ukuya kupepe ukubomba bo isi linga tukukumbuka ukuti ubumanyani bwitu na Yehova bwakulondiwa fiyo. Ifithuzi ifi fikufwana fikaya fyamwiko, fyope fibaghile ukukusya ikinyonywa kya kughonana. Nongwa yafiki tukulondiwa ukwepuka ukuketa ifithuzi ifi? Panongwa yakuti tutikulonda napanandi ukuya naminong’ono aghabulowe mundumbula yitu. (Mat. 5:28, 29) David, unkulumba wa ku Thailand atile: “Nalilalusisye ukuti: ‘Nalinga ifithuzi fikaya fyamwiko, ngimba Yehova ikuya pakuhoboka linga ngukindilila ukufiketelela?’ Ilalusyo ili likundula ukuti mbombeghe ifindu mwamahala.”

13. Ngimba findu fiki fibaghile ukukututula ukuti tubombeghe ifindu mwamahala?

¹³ Ukutila ukubomba kilikyosa iki kibaghile ukunkalalisya Yehova, kukututula ukuti tubombeghe ifindu mwamahala. Ukuntila Kyala “ko kwanda kwa mahala.” (Mbu. 9:10) Tuketile isi kubwandilo bwa chaputala 9 mu buku lya Isya Mbupingamu apa “amahala” ghikufwanikisiwa nu nkikulu uyungi.

TWITIKEGHE LINGA UKINKULU UWAMAHALA IKUTUKOLELA

14. Ngimba tukumanyilapo isyafiki pilemba lya Isya Mbupingamu 9:1-6?

¹⁴ Belenga Isya Mbupingamu 9:1-6. Pilemba ili tukubelenga isya mahala aghakufuma kwa Yehova, uyu yo Mpeli witu kangi yo mwenemahala. (Mbu. 2:6; Rom. 16:27) Ilemba ili likulingania isya nyumba inywamu iya mbanda 7. Isi sikunangisya ukuti Yehova wakupa kangi ikulonda ukuti twesa tumanyileghe kumyake ukuti tuye bamahala.

15. Ngimba Kyala ikulonda ukuti tubombeghe isyafiki?

¹⁵ Yehova wakisa kangi ikupa fiyo. Ku kifwanikisyo kya nkikulu uyu ikwimila “amahala gha naloli” mu chaputala 9 kya buku lya Isya Mbupingamu, tukumanyilako ukuti Yehova wakisa kangi ikutupa ifindu fingi ifinunu. Inkhani iyi yikuyoba ukuti unkikulu uwakufwanikisya uyu atendekisye ifyakulya ifinyafu fiyo ifi alyongenie inyama nu bwalwa. (Mbu. 9:2.) Mwakongelelapo, ivesi lya 4 na 5, likuti: “Umwamahala [uyu ikwimila amahala gha naloli] ikunkolela aliwesa unsita mahala ukuti: ‘Isagha kuno kumyangu, wise ulye ifindu.’” Nongwa yafiki tukulondiwa ukwitika ukubuka kunyumba ya nkikulu wamahala uyu? Yehova ikulonda ukuti abanake bayeghe bamahala kangi bafighililiweghe. Umwene atikulonda ukuti tubombeghe ifindu ifibibi ifi fibaghile ukutufulasya. Yonongwa yake “ikubapa amahala ukufuma muno alundike.” (Mbu. 2:7) Linga tukuntila Yehova, tukuya pakunhobosya fiyo. Tukupilikila ubulongosi bwake ubwamahala kangi tukuhoboka ukubukonga.​—Yak. 1:25.

16. Ngimba ukuntila Kyala kyalintulile bulebule Alain ukusala mwamahala, kangi ifyakukongapo fyake fyali fyo filiku?

¹⁶ Inong’onela muno ukuntila Kyala kwalintulile Alain ukusala ifindu mwamahala. Umwene nkulumba wakipanga kangi mmanyisi wa sukulu. Alain atile: “Abinangu bingi baketelelagha amafilimu ghamwiko ukuya njila yimo iyakumanyisya isya kughonana.” Loli umwene amenye ukuti sikali sya bwanaloli. Umwene atile: “Panongwa yakuti nguntila Yehova nukungindika, mwamaka nakanile ukuketelela amafilimu agha. Kangi nabalingenie abinangu ikifukwa iki nakanilagha.” Umwene akongile ubulongosi ubwa “mahala mwakusokamo nkilundilo kya basitamahala.” (Mbu. 9:6) Panongwa yakuti Alain ali nkifu, bamo mwabamanyisi abinake lino bandile ukumanyila Ibaibolo nukufika pangomano.

17-18. Ngimba lusayo luliku ulu bikulwagha abandu aba bikwitika bo “amahala gha naloli” ghikukolela kangi bikughulila isyafiki nkyeni? (Keta kangi ikithuzi.)

¹⁷ Yehova ikubombela ififwanikisyo fya bakikulu babili ukuti atunangisye muno twisakulwaghila ulusekelo nkyeni. Aba bikwitika bo “unkikulu unkonyofu” ikukolela bikuketa ukuti ubulowe bukaya bubibi. Loli batikusyaghania ukuti isi bikubomba sikupalamasya ubumi bwabo bwa nkyeni. Imbombo syabo sikuya pakubalongolela “mwipumba.”​—Mbu. 9:13, 17, 18.

¹⁸ Aba bikwitika bo unkikulu uyu ikwimila “amahala gha naloli” ikukolela, bisakuya nubumi ubununu nkyeni. Kangi bali nulusekelo panongwa yakuti bali nafyo fyosa ifi bikulondiwa ukuti baye pabumanyani ubununu na Yehova. (Yes. 65:13) Ukwendela mu nsololi Yesaya, Yehova atile: “Amupilikisye kumyangu, kangi mubombeghe isi nikubabula une, po lelo mwisakwikyelagha ukulya ifyakulya ifinyafu fiyo.” (Yes. 55:1, 2) Tukulondiwa ukufighana ifi Yehova afighanile nu kufibenga ifi afibengile. (Sal. 97:10) Kangi tuli balusekelo ukubabulako abangi ukuti bope bamanyileghe ukufuma ku “mahala gha naloli.” Tufwene itolo nababombi aba “bikukolela pa buyo bwake ubwa pamwanya ukuti: ‘Amwingileghe mwesa mwe basita mahala, yope na uyu akaya ni nyinong’ono.’” Ulusayo ulu tukulwagha uswe na bandu aba bikwitika linga tukubakolela, lukaya lwakabalilo akapimba. Kangi twisakuya “nubumi” kwa bwila na bwila bo tukuyikonga “injila iyabumanyi.”​—Mbu. 9:3, 4, 6.

19. Ukufwana na Undumbilili 12:13, 14, ngimba tukulondiwa ukubomba isyafiki? (Keta kangi ibokosi ilyakuti “Tukusayiwa Panongwa Yakuntila Kyala.”)

¹⁹ Belenga Undumbilili 12:13, 14. Ukuntila fiyo Yehova kukuya pakutufighilila nu kututula ukuti tuyeghe nutuyilo utununu nukuseghelela kumyake mmasiku amabibi aghabumalikisyo agha. Tukuya pakukindilila ukubakolela abandu bingi ukuti baghalondeghe “amahala gha naloli” nukusayiwa panongwa yakuti tunganile kangi tukungindika Yehova nindumbula yitu yosa.