Marhẹ Ame Ine ru Sabu Hẹrote I Kingdom Hall Na?

Odẹ ọfuanfon ọrẹ Osolobrugwẹ yẹ a ha se i Kingdom Hall Iseri Jehova ephian. Omaran na, ame erhe vwobọ rhẹ erufon, ẹro-ete, ọrhẹ ẹkwaphiẹ oghwa na, ọnana ọborẹ ọghanren uvuẹn ogame ọfuanfon ọrẹ ame. Ihworho ephian ena sabu vwobọ rhọ ye.

Homakpanhotọre ne wu vwobọ rhẹ erufon ọke rẹ uyono na orho fuen. Uyono orho fuen, ọrẹ omamerhomẹ imizu ehworhare rhẹ emẹse a homakpanhotọre ru i Kingdom Hall na fuan. Ukwọgbọ ọkprughwre, a dabu ha ọke ruie fuan. Ọkpako yanghene odibo owian yẹ o hẹrote owian na, nọ nyalele ọbe ro dje oborẹ ene ru. Owian erufon rẹ imizu a homakpanhotọre ruẹ yẹ; otọre oghwa ekwerhe, eghwe yi, ega ehionron rhẹ ẹkwaphiẹ aye rhọ, e tue ikuekwu fughwẹ, ehionron ivakpo rhẹ ijegbe uvuẹn oghwa na. Aye a je gbẹn otọre egodo na jeghwai kwerhe, ji ghwe ekete re kpitẹn aghwẹ. Ọrhọ kamu omamọ, ukwọgbọ ẹgbukpe, ne fi ẹdẹ owu rhotọre nẹ a dabu wian owian erufon na. A rha ha emọ ame boma uvuẹn ewian na ezẹko, nẹ ame a nyoma ọrana yono aye nẹ aye mwu ọghọ harẹn ekete ogame ọrẹ ame.—Ecclesiastes 5:1.

Homakpanhotọre wian ọke rẹ a kwaphiẹ ekwakwa ri biomurun. Kẹgbukpe kẹgbukpe, a dabu nẹ ọsoso i Kingdom Hall na sua, uvuien rhẹ otafe yi. Onifiotọre ọnana nọ lẹrhẹ ame sabu wian owian ẹro-ete yi phẹrẹ, nẹ ọ lerhẹ i Kingdom Hall na rhoma, ọvwọ rhọ lẹrhẹ ame ghwọghọ igho fughwẹ-ẹ. (2 Chronicles 24:13; 34:10) Kingdom Hall rọ fonron, a jeghwai hẹrote, ọnana ekete ofori ame ena ha ogame harẹn Osolobrugwẹ ame. Ame erhe vwobọ rhẹ owian ọnana, no dje phia taghene ame vwo ẹguọlọ kpahen i Jehova rhẹ ekete ame a ha ogame riẹn. (Psalm 122:1) Ọnana nọ jeghwai lẹrhẹ ihworho ta omamọ ẹmro kpahen ame uvuẹn amwa na.—2 Corinthians 6:3.

• Mesoriẹ o vwo fo taghene ame gbobọhiẹn erufon ekete ogame ọrẹ ame?

• Ẹkwaphiẹrhotọre ego ye haphiẹ re ne ru i Kingdom Hall na fon?