Marhẹ Yẹ Ilaibrari Ọrẹ I Kingdom Hall Ọnọ Sabu Yẹ Ọwan Erere?

Wu guọlọ rhe otọre emru neneyo irherhe i Baibol ọnọ o bunrhọ? O vwo udjaghwẹ i Baibol yanghene ohworho, ekete, ọrhẹ emru ra ha unu te uvuẹn i Baibol na wu guọlọ rhe kpahen? Yanghene we roro sẹ Ẹmro Osolobrugwẹ ọnọ sabu ha userhumu wẹn rhẹ obẹnbẹn omobọ wu vwori? Gbe riẹ ilaibrari uvuẹn i Kingdom Hall na.

O vwo ẹbe ra ha guọlọ otọre emru uvuẹn avwaye. Ọkezẹko, we vwo ẹbe ephian rẹ Iseri Jehova i fomu phia uvuẹn edjadjẹ ọnọ-ọ. Jọrẹn ilaibrari uvuẹn i Kingdom Hall na o vwo ẹbe ekpokpọ buebun. Ọnọ je sabu vwo i Baibol erhianrhian sansan, omamọ idishọnari, rhẹ ekwakwa erọrọ ra ha guọlọ otọre emru. Wu na sabu ha ilaibrari na wian bọmọke uyono ọnọ tonrhọ yanghene orho fuen ne. Orho rhianẹ ikọmputa ọ ha avwaye, ọnọ sabu vwo i Watchtower Library uvuien. Watchtower Library na o vwo ẹbe ame buebun, rẹ akwaphiẹrhọ wu na sabu mẹrẹn urhomẹmro ẹmro, ẹmro yanghene udjaghwẹ i Baibol phẹphẹrẹ.

Ọ yẹ emọ Isukuru Uvie na userhumu. Wu rhe rhiẹ ọmọ Isukuru Uvie na, ilaibrari uvuẹn i Kingdom Hall na, ọnọ ha userhumu wẹn mwegbe ẹmro a ghalẹ wẹn. Ọrọ hẹrote isukuru na, yẹ ọ je hẹrote ilaibrari na. Owian yen, ọyẹ ọnọ mẹriẹn taghene ẹbe ekpokpọ ri rhere e ha uvuẹn ilaibrari na, a je dabu kwaphiẹ aye rhọ. Ọye yanghene ohworho ro lele owẹwẹ yono i Baibol ena sabu ha userhumu wẹn mẹrẹn oborẹ wa guọlọ. Oborẹ ọ havwọ a vwa ha ẹbe ilaibrari nẹ uvuẹn Kingdom Hall na-a. Habaye, ame a dabu hẹrote ẹbe na, e vwe ji fi oka owuorowu rhẹ uvuẹn aye-e.

Baibol na ọtare taghene nẹ a sabu ‘mẹrẹn irherhe Osolobrugwẹ’ ame ine ghini vwo oruru guọliẹ jerẹ ‘ekwakwa eghoghanren ri tiomanu.’ (Proverbs 2:1-5) Ilaibrari uvuẹn i Kingdom Hall na, ọnọ yẹ owẹwẹ userhumu ne wu tuẹn otọre emru ẹ guọlọ ọnọ rhọ.

• Ekwakwa ego ra ha guọlọ otọre emru yere ha uvuẹn ilaibrari Kingdom Hall na?

• Ọrọmo yẹ ọnọ sabu ha userhumu wẹn dabu rhe oborẹ wu na ha ilaibrari na wian lele?