Jesu o ru Igbevwunu Buebun

Jesu ọ rhiẹ otọrakpọ na me ghwoghwo iyẹnrẹn esiri kpahen Uvie Osolobrugwẹ. Jehova ọ yẹ i Jesu ẹhẹn ọfuanfon na nọ sabu ru igbevwunu, no dje oborẹ ono ru ọke ro rhiẹ Orodje ne. Jesu ọ sabu simi aruo emiamo ephian. Ihworho re kpomẹ ne bru i Jesu riẹ ekete rọ nyaren ephian neneyo o simi aye, Jesu no ghini simi aye. Jesu o rurie neneyo ituẹro i mẹrẹn ude, idienrhọ i rhon ẹmro, ikpolo i sabu nya, ọ jeghwai le ikpodje nẹ ihworho oma. Ihworho i rha tobọ hobọte ejẹnjẹn ewun i Jesu, oma aye nọ gbanhan. Ihworho na nyalele i Jesu riẹ ekete rọ nyaren ephian. Ọke oma ọ tobọ ghwọghọ i Jesu, o le ihworho nẹ oma-a.

Ọke owu, ihworho ni kpare ọhworhare owu rọ vwọ sabu nya vwe i Jesu uvuẹn oghwa rọ havwọ. Ọrẹn, oghwa na ọ vuọnren rhẹ ihworho, aye arha mẹrẹn ekete ruẹ uvuie-en. Omarana, aye ni bru ophiọ rhẹ oberun oghwa na, aye ni nya oberun kpare ọhworhare na vwe i Jesu. Omarana, Jesu nọ ta rẹn ọhworhare na: ‘Vẹnrẹn ne wu nya.’ Ọke ọhworhare na ọ nya, no gbe ihworho unu.

Ọke ọrọrọ, ọke i Jesu ọ ruẹ amwa owu, ehworhare awan ikpe re kpomu oti, ni kpare unu se i Jesu, aye na ta: ‘Jesu, simi ame!’ Ọke ọrana, e vwe kwe nẹ ihworho re kpomu emiamo oti i ti kẹrẹ awọrọ-ọ. Jesu nọ ta rẹn aye taghene aye i riẹ oghwa ẹga na, jerẹ oborẹ Urhi Jehova ọ tare taghene ihworho re kpomu oti, i ru erhe simi aye ne. Ọke aye a nyarhẹn, emiamo aye no rieri. Ọke owuọwan usuẹn ihworho re kpomu oti na ọ mẹrẹnvwrurhe taghene omayen ọ gbanhon ne, nọ ghwẹrioma ya kpẹmẹ i Jesu jeghwai jiri Osolobrugwẹ. Owuọwan ọvo usuẹn awan ikpe na yọ ghwẹrioma ya kpẹmẹ i Jesu.

Ọmase owu ro kpomu te ẹgbukpe 12 ne, ọ guọlọre ne simie. Ọmase na, nọ nya oberhumu hobọte ejẹnjẹn ewun i Jesu uvuẹn ekete ihworho buebun i vuọnren. Ogege, omayen nọ gbanhonron. Ọke ọrana ọ phia hin, Jesu nọ nọren: “Ọrọmo yọ hobọte mẹ?” Ofẹn no mwu ọmase na, ọrẹn, ọmase na nọ ta urhomẹmro na rẹn i Jesu. Jesu nọ ha urhebro riẹn nyoma ọ ta: ‘Ọgbọtọ, nyarhẹn ọrẹ ufuoma.’

Isodja owu rẹ odẹ ye o rhiẹ i Jairus nọ ta rẹn i Jesu: ‘Biko rhiẹ oghwa mẹ! Ọmọ mẹ ọgbọtọ o kpomẹ gbangbanhon.’ Ọrẹn, bọmọke i Jesu o te oghwa i Jarius, ọmọyen ọgbọtọ na o hwu ne. Ọke i Jesu o te avwaye, nọ mẹrẹn ihworho buebun ri me lele ekrun na mwuomarhọ. Jesu nọ ta rẹn aye: ‘Are i vwa viẹ-ẹ; ọmọ na ọ merhẹn.’ Omarana, Jesu nọ mọrọn obọ ọgbọtọ na, nọ tare: “Ọmọ na, vẹnrẹn!” Ọgbọtọ na no vẹnrẹn siyẹ ogege, Jesu nọ ta rẹn ọsẹ ọrhẹ izu ọgbọtọ na, nẹ aye i yẹ ye emaren nọ re. Gba ha ẹhẹn roro kpahen oborẹ oma ọnọ merhen ọsẹ ọrhẹ izu ọgbọtọ na te!