Jesu o Ghwoghwo Kpahen Uvie na

Ọke i Jesu o bromarhame hin, ọye no ghwoghwo, nọ ta: ‘Ẹrhiọ Uvie Osolobrugwẹ o ti kẹrẹ ne.’ Idibo i Jesu i lelirie ọke ro ghwoghwo uvuẹn i Galilee ọrhẹ i Judea. Ọke i Jesu ọ ghwẹrioma riẹ Nazareth ro rhiẹ amwa yen, ọye no riẹ synagogue na, no rhie ukpitọbe Isaiah ọ yare, nọ se rie phia: ‘Jehova ọ yẹre mẹ ẹhẹn ọfuanfon ọnẹyen neneyo mi ghwoghwo iyẹnrẹn esiri na.’ Me yẹ ọrana o mevirhọ? Ọrana o mevirhọ taghene dedevwo ihworho i guọlọ mẹrẹn igbevwunu ri Jesu o ruẹ, oborẹ ọsoriẹ a vi yẹ ye ẹhẹn ọfuanfon na, yẹ ọrẹ ono ghwoghwo iyẹnrẹn esiri na. Ọke oru, nọ ta rẹn ihworho ra kerhọ ye: ‘Inyenana yẹ aruẹmẹrẹn ọnana o te orugba.’

Ọke oru, Jesu no riẹ Urhie i Galilee, avwaye yọ mẹrẹn idibo yi awan ẹne, ri rhiẹ ikpirhenrin. Ọye no se rẹ aye, nọ tare: ‘Are i leli mẹ, mi ne ru are rhiẹ ikpirhenrin ituakpọ.’ Idibo na yẹ Peter, Andrew, James, ọrhẹ John. Ogege, aye ni nyajẹ owian aye vwo, aye ne lele i Jesu. Aye ni ghwoghwo kpahen Uvie i Jehova lele ọsoso i Galilee. Aye ni ghwoghwori uvuẹn synagogue, uvuẹn eyi, ọrhẹ uvuẹn idumu sansan. Ihworho buebun ne lele i Jesu riẹ ekete ọ nyaren ephian. Ihworho buebun ni me rhon kpahen i Jesu, tobọ te ihworho ri ha uvuẹn Syria.

Ọke oru, Jesu nọ yẹ idibo yi ezẹko omẹgbanhon nẹ aye i sabu simi ihworho re kpomẹ jeghwai le ikpodje nẹ oma ihworho. Awọrọ i ji lele i Jesu ọke ro ghwoghwo nẹ amwa riẹ amwa ọrhẹ nẹ ọko riẹ ọko. Emẹse ezẹko jerẹ Mary Magdalene, Joanna, Susanna, ọrhẹ awọrọ ya hẹrote i Jesu ọrhẹ idibo yi.

Ọke i Jesu o yono idibo yi hin, nọ ta rẹn aye taghene aye i ye ghwoghwo. Aye ni ghwoghwori uvuẹn i Galilee, ihworho buebun ni me rhiẹ idibo i Jesu jeghwai bromarhame. Ihworho buebun i guọlọ rhiẹ idibo i Jesu, Jesu nọ ha rẹ aye dje ikebi ro te evuon ne. Jesu nọ tare: ‘Are i nẹrhomo vwe i Jehova no dje ihworho erọrọ rhe, nẹ aye i homaba are vun ewawọ na.’ Ọke oru, Jesu nọ djẹ idibo yi awan 70, nọ jeghwai ghalẹ aye eveva nẹ aye i ghwoghwo uvuẹn ọsoso i Judea. Aye ne yono aruo ihworho ephian kpahen Uvie na. Ọke idibo na a ghwẹrioma rhe, oma nọ jẹnjẹn aye rẹ aye ine gbikun oborẹ ọ phiare rẹn i Jesu. O vwo oborẹ i Dẹbolo ọnọ sabu ru, nọ dobọ owian aghwoghwo na ji-i.

Jesu ọ guọlọre taghene idibo yi, i ghwoghwo iyẹnrẹn esiri na ọke ephian ọrhọ tobọ ghwẹrioma riẹ odjuwu ne. Jesu nọ ta rẹn idibo yi: ‘Are i ghwoghwo iyẹnrẹn esiri na lele akpọ na ephian. Are i yono ihworho kpahen Ẹmro Osolobrugwẹ, nẹ are i bru aye rhẹ ame.’