Yono Nẹ Ẹmro Osolobrugwẹ
Me yọ nọ Phia Uvuẹn Ẹdẹ Ẹzenguon?
Urhomu-ẹmro ọnana ọ kpahenrhọ enọ wu sabu nọ ne, ọrhẹ ekete wu na mẹrẹn ẹkpahenrhọ aye uvuẹn i Baibol na. Oma ọnọ merhen Iseri Jehova aye ine leluo ta kpahen ẹkpahenrhọ na.
1. Me yẹ Ẹdẹ Ẹzenguon?
Jerẹ oborẹ a mẹrẹn uvuẹn ifoto rọ ha obọrhe na, ihworho buebun e roro taghene uvuẹn Ẹdẹ Ẹzenguon na, iduduru ihworho buebun ri hwu ne ine mevi obaro aga usun Osolobrugwẹ, na na ha aye guẹnzọn lele oborẹ aye i ruru vrẹn ne, na na yẹ ezẹko arhọ obẹ odjuwu, ji ha oja riẹ ezẹko uvuẹn amwa erhanren. Ọrẹn, Baibol na o djephia taghene a ha Ẹdẹ Ẹzeguon na mwu, na sabu simi ihworho nẹ abọ osehiẹn. (Psalm 96:13) Osolobrugwẹ ọ ha i Jesu mwu no rhiẹ oguẹnzọn ro no brorhiẹn ọsoso rẹn ituakpọ.—Se Isaiah 11:1-5; Acts 17:31.
2. Marhẹ Ẹdẹ Ẹzenguon na ono ru rhua orhienbro ọsoso rhe?
Ọke ọhworhare ọrukaro ọ ha arudo ruẹ ọdandan hasuẹ Osolobrugwẹ, no tiobọnẹ ọdandan, ojẹriọ, ọrhẹ uhwu rẹn emọyen ephian. (Romans 5:12) Ni Jesu ọ sabu kwaphiẹ erhirhiẹ ọrana rhọ, ọnọ rhọmọ iduduru ihworho nẹ uhwu rhe. Ọbe i Revelation o djephia taghene ọrana ọnọ phia uvwre usun i Kristi ọrẹ ẹgbukpe uriusionrin.—Se Revelation 20:4, 11, 12.
Ọke ọrana, na na ha ihworho guẹnzọn sekpahen oborẹ “ikpitọnbe” ri Revelation urhomu-ẹmro 20 ọ tare, ukperẹ ono rhiẹ oborẹ aye i ruru aye i ki hwu. (Romans 6:7) Jerẹ oborẹ ọnyikọ Paul ọ tare, usuẹn ihworho ra na rhọmọnuhwu ri ji vwo uphẹn aye ine yono kpahen Osolobrugwẹ, yẹ “evwata ọrhẹ eri vwe rhiẹ evwata.”—Se Acts 24:15.
3. Erere ego yẹ Ẹdẹ Ẹzenguon na ọnọ rhua rhe?
Ihworho ri vwa sabu yono kpahen i Jehova jeghwai ga ye aye i ki hwu, ine vwo uphẹn aye ina ghwẹriẹ jeghwai ruẹ oborẹ orhomurun. Aye i rhe ruẹ omaran, ẹrhọmọnuhwu aye no no rhiẹ “ẹrhọmọnuhwu ọrẹ arhọ.” Ọrẹn, ihworho ezẹko usuẹn era rhọmọnuhwu i kwe yono kpahen Osolobrugwẹ-ẹ. Ẹrhọmọnuhwu aye ono rhiẹ “ẹrhọmọnuhwu ọrẹ ẹzeguon.”—Se John 5:28, 29; Isaiah 26:10; 65:20.
Uvuẹn oba Ẹdẹ Ẹzenguon na ro no jiri tẹ ẹgbukpe uriusionrin, ọke ọrana Jehova o ruẹ ituakpọ ri huvwele yi gba ne. (1 Corinthians 15:24-28) Ọnana ifiẹrorhọ ro mwuẹro rẹn ituakpọ ephian ri huvwele! Uvuẹn ọke ọdamuni rọ kẹta, Osolobrugwẹ no no tiobọnẹ Echu nẹ ukpotọ ro vwo vwoba na, ọrẹn ọnọ daji avwaye ẹgbukpe uriusionrin vwẹre. Ọgbọrọrọ, Echu nọ nọ damoma riẹriẹ ihworho nẹ obọrẹ i Jehova, ihworho ri sabu tiẹn oriẹriẹme Echu ina riamerhen akpenyerẹn bẹmẹdẹ uvuẹn otọrakpọ na.—Se Isaiah 25:8; Revelation 20:7-9.
4. Ẹdẹ ẹzenguon ọrọrọ ọgo yọ nọ rhua erere vwe ituakpọ?
Baibol na ọ ji ha ẹmro na “ẹdẹ ẹzenguon,” dje oborẹ ọnọ phia rọ nọ ha enyerakpọ ọnana toba. Ẹdẹ ẹzenguon ọnana ọnọ rhiọ kpregede jerẹ Ukude Ẹdẹ ọrẹ i Noah, rọ ghwọghọ ọsoso uvwiẹ ọkon ọke ọrana. Ọrẹ omamerhomẹ, ‘evwọkon’ ra na ghwọghọ nie phẹrẹkpẹ, ọnọ rhua akpọ ọkpokpọ rhe rẹ ‘evwata ine rhirhiẹ.’—Se 2 Peter 3:6, 7, 13.