Iseri Jehova i vwo emẹse ri rhiẹ iyono?

Ee, uvuẹn akpọ na ephian, Iseri Jehova i vwo iduduru emẹse ri rhiẹ iyono. Emẹse re ghwoghwo iyẹnrẹn esiri Uvie Osolobrugwẹ i bunrun omamọ. Psalm 68:11 nọ mẹraro kpahen aye: “Jehova yọ tariẹ; emẹse re ghwoghwo iyẹnrẹn esiri na i bunrun omamọ.”

Ọrẹn, owian aghwoghwo emẹse Iseri Jehova ọrhẹ owian aghwoghwo emẹse ri rhiẹ ilori ẹga uvuẹn ẹga erọrọ, rhẹ owu-u. Ovẹnẹ ọduado ọ havwiẹ. Izede ego yẹ aye a vẹnẹ?

Ihworho aye e ghwoghwo riẹn yi vẹnẹren. Ilori ẹga emẹse ri ha uvuẹn ẹga efian e suẹn ihworho ri ha uvuẹn ẹga aye, omarana ihworho ri ha uvuẹn ẹga aye yẹ aye e yono. Ọrẹn, harẹn emẹse Iseri Jehova ra wian owian aghwoghwo na, ihworho ri vwa ha uvuẹn ukoko aye yẹ aye e ghwoghwo riẹn, aye e ruẹ ọnana nyoma aghwoghwo ọrẹ nẹ oghwa riẹ oghwa ọrhẹ izede erọrọ.

Izede ọrọrọ rẹ emẹse Iseri Jehova ri rhiẹ iyono a vẹnẹ ilori ẹga emẹse ri ha ẹga erọrọ, yẹ owian aye a wian uvuẹn ukoko na. Ilori ẹga emẹse ri ha uvuẹn ẹga efian ya kobaro jeghwai yono awọrọ uvuẹn ishọshi aye. Ọrẹn, emẹse Iseri Jehova i vwe yono uvuẹn ukoko aye udaro ehworhare ri bromarhame ne-e. Ehworhare ra ha mwu ni rhiẹ iyono ọvo ya wian owian ọnana.—1 Timothy 3:2; James 3:1.

Baibol na ọ tare taghene ehworhare ọvo yi ne rhiẹ ekpako ukoko. Djokarhọ udje rẹ ọnyikọ Paul o dje rhotọre ọke rọ ya ileta vwe ọkpako ọrọrọ, Titus: “Mi nyajovwo obẹ i Crete neneyo wu . . . ha ekpako mwu uvuẹn amwa owu riẹ ọrọrọ.” Paul nọ habaye taghene ọhworhare ra ha mwu ono rhiẹ ohworho rọ “vabọ ukperi, rọ rọnmọ ọmase owu.” (Titus 1:5, 6) Paul ọ ji ha aruẹ ọkpọvi ọnana rẹn i Timothy uvuẹn ileta owu rọ ya vwe yi: “Orhianẹ ọhworhare o ruẹ riaro ro no rhiẹ oniruo, omamọ owian yo vwo ẹhẹn kpahen. Oniruo na ọ vabọ upe, o vwo ane owu, . . . o mwuovwan ro no yono awọrọ.”—1 Timothy 3:1, 2.

Mesoriẹ owian oniruo uvuẹn ukoko na o rhenrhen vi ehworhare ọvo? Paul nọ tare: “Mia ha uphẹn rẹn ọmase nọ ha uyono phia yanghene sun ọhworhare-e, ukpomaran ono vi kudu. Fọkime Adam ya kiki ma, a ki ma Eve.” (1 Timothy 2:12, 13) Omarana, oborẹ Osolobrugwẹ ọ ma ekwakwa lele, o dje oborẹ ọsoriẹ o tiobọnẹ owian uyono ọrhẹ oniruo rẹn ehworhare.

Era kobaro uvuẹn ukoko i Jehova a hẹrokele udje Osun aye, ro rhiẹ Jesu Kristi. Odibo Luke nọ ta kpahen owian aghwoghwo i Jesu: “No nẹ amwa owu riẹ ọrọrọ, nẹ ọko riẹ ọko, ro ghwoghwo jeghwai ta kpahen iyẹnrẹn esiri ọrẹ Uvie Osolobrugwẹ.” Ọke oru, Jesu no ji dje idibo yi ya wian owian ọnana: “Aye ni ruẹ okogho na nẹ ọko riẹ ọko, rẹ aye e ghwoghwo iyẹnrẹn esiri na.”—Luke 8:1; 9:2-6.

Inyenana, ehworhare ọrhẹ emẹse Iseri Jehova, e vwobọrhọ owian ọnana vuọnvuọn ri Jesu ọ mẹraro kpahen: “Ene ghwoghwo iyẹnrẹn esiri Uvie na lele ọsoso ekete re rhirhiẹ uvuẹn akpọ na no rhiẹ oseri harẹn egbamwa na, oba na nọ nọ ki rhe.”—Matthew 24:14.