BAIBOL NA O WENE AKPENYERẸN

“Uvwre ẹgbukpe buebun ni mie roro, ‘Mesoriẹ a ma ituakpọ?’—ROSALIND JOHN

• ẸGBUKPE RE VWIẸ YE: 1963

• ẸKWOTỌRE RO NURHE: BRITAIN

• IKUEGBE YI: Ọ WIAN OWIAN RO TITIRI OMAMỌ

AKPENYERẸN MẸ BI: E vwiẹre mẹ uvuẹn Croydon, South London, mẹmẹ yẹ ọmọ ọrẹ erhan usuẹn emọ irhinrin ri ha uvuẹn ekrun ame. Eri vwiẹre mẹ itu i Caribbean island, rọ ha uvuẹn St. Vincent. Izu mẹ o riẹ ishọshi Methodist. Dedevwo mi vwo ẹguọlọ kpahen uyono ọrhẹ isese, ọrẹn mie vwo omamerhomẹ mi ne yono kpahen Osolobrugwẹ-ẹ. Ame i rha ha omeronmo uvuẹn isukuru, ni mie riẹ usurhẹn owu rọ kẹrẹ oghwa ame ye se ẹbe sansan mi momorin uvuẹn ekete ra sẹrorẹ ẹbe rhọ.

Ẹgbukpe buebun ọke mia ruotọre nẹ isukuru, ni mi mẹrẹnvwrurhe taghene mi vwo ọdamẹ mi na ha userhumu rẹn ihworho ri ha ọkanronmẹ. Ọnana no mwurun mẹ tuẹn owian rhọ uvuẹn ekete ra hẹrote eri vwe vwo oghwa ọrhẹ era vwa sabu yono ọbe, nime eghọn oma aye ọ gba-a. Ọke oru, ni mi riẹ isukuru ọduado ye yono kpahen oborẹ a hẹrote ihworho lele. Ọke mia ruotọre nẹ isukuru na, na yẹre me ẹrhẹ sansan ri titiri omamọ, ọnana nọ lẹrhere mẹ vwo ekwakwa ugboma buebun. Ra mẹriẹn taghene owian mẹ ọrẹ mi na ha urhebro rẹn ihworho re kpomẹ na, ikọmputa ọrhẹ itanẹti ọvo yi mi guọlọre ne mi sabu wian owian mẹ. Omarana, ni mie riẹ ẹkwotọre sansan ya riakpọ uvwre ikprughwre ezẹko jeghwai wian avwaye, mi na daji hotẹli rọ mai je mẹ, riamerhen okegbe na, jeghwai ha ekwakwa ri ha avwaye sasoma. Ni mie roro taghene ọnana ye se akpẹriọ. Ọrẹn, ọke ephian yi mie roro kpahen ihworho ra rioja re ji sehiẹn.

OBORẸ I BAIBOL NA O WENE AKPENYERẸN MẸ LELE: Uvwre ẹgbukpe buebun ni mie roro, ‘Mesoriẹ a ma ituakpọ?’ Ọrẹn, mi vwa tobọ damoma guọlọ ẹkpahenrhọ na uvuẹn i Baibo-oI. Ẹdẹ owu uvuẹn ẹgbukpe 1999, omizu mẹ ọkokamu ọgbọtọ re se Margaret ro rhiẹ Oseri Jehova ọrhẹ ugbehian yen ọgbọtọ ni rhiẹ ọpha ro mẹ, ugbehian ye na o dje ọdamẹ okokodo phia mẹ. Fọkiẹ ọnana ni mi kweri nọ ha uyono i Baibol mwu mẹ, ọrẹn mi vwe ruẹ riaro omamọ-ọ, nime owian mẹ ọrhẹ aruẹ akpọ mie nyerẹn ọ ha ọsoso ọke mẹ.

Uvuẹn ọke uvo ọrẹ ẹgbukpe 2002, ni mi kwa riẹ southwest England. Ni mi rharhumu riẹ isukuru kodorhọ neneyo mi sabu tẹn ona rhọ uvuẹn iruo mẹ. Mẹmẹ rhẹ ọmọ mẹ ọhworhare ni tuẹn uyono rhọ uvuẹn Aghwẹlẹ Uvie. Dedevwo mia riamerhen oborẹ mie yono obẹ isukuru, ọrẹn oborẹ mie yono uvuẹn i Baibol na, nọ lẹrhe mẹ vwẹruọ oborẹ ọsoriẹ ebẹnbẹn a vuọn akpọ na, ọrhẹ oborẹ ene ru ti aye nie. Ni mi mẹrẹn urhomẹmro rọ ha uvuẹn Matthew 6:24, rọ tare taghene a sabu rhiẹ ọvrẹn rẹn inini eva-a. Nọyẹ, mi na djẹ sẹ Osolobrugwẹ mi na ga yanghene efe. Mi rheri taghene o fori ne mi brorhiẹn kpahen oborẹ ọnọ mai ghanren uvuẹn akpenyerẹn mẹ.

Ẹgbukpe rọ vrẹnren, mie lele ẹko Iseri Jehova owu ruẹ uyono i Baibol kugbe, ọke ọrana aye e yono ọbe na Is There a Creator Who Cares About You?a No mo mwu mẹ ẹro taghene Ọmemama ọwan ọvo ro rhiẹ Jehova yọ nọ sabu tiẹ ebẹnbẹn ituakpọ nie. Ọke mia ha isukuru, e yonirin mẹ taghene ituakpọ a guọlọ Ọmemama na uvuẹn akpenyerẹn aye-e. Ọnana nọ lẹrhẹ evwan biomi mẹ omamọ. Ọke ibiamo eva a vrẹn, ni mi dobọ isukuru na ẹnya ji, neneyo mi sabu bọn onyerẹnkugbe mẹ rhẹ i Jehova gbanhonrhọ.

Ekete i Baibol ro mwurun mẹ wene akpenyerẹn mẹ yẹ Proverbs 3:5, 6 rọ tare: “Hẹroso i Jehova rhẹ ọsoso ọmudu ọnọ, wu na hẹroso irherhe omobọ ọnọ-ọ. Uvuẹn izede ọnọ ephian karorhọ ye, ọye no no ruẹ izede ọnọ phiọn.” Uyono kpahen Osolobrugwẹ ọ ghanren ghwẹ ekwakwa ugboma, yanghene ẹrhẹ ephian rẹ owian mẹ ọnọ sabu yẹ mẹ. Ọke mie yono kpahen ọhọre i Jehova kpahen otọrakpọ na, ọrhẹ oborẹ i Jesu ọ ha arhọ ye kpahontọre lele fọkiẹ edandan ọwan, ọnana no mwurun mẹ homakpahontọre rẹn Ọmemama na. Mi bromarhame uvuẹn April 2003. Ọke oru, ni mie ruẹ akpenyerẹn mẹ lọhọ bibiesuọn.

ERERE MI MẸRẸN NE: O vwo oborẹ ana ha dje onyerẹnkugbe mẹ rhi Jehova-a. Mi vwo obọdẹn ufuoma ọrhẹ aghọghọ ne nime mi rherie. Oma ọ ji merhen mẹ nime mie kwomakugbe idibo i Jehova erọrọ ga ye.

Mi ji vwo ẹguọlọ kpahen uyono, ọrẹn oborẹ mie yono uvuẹn i Baibol na ọrhẹ iyono ukoko ọ lẹrhe mẹ vwo evwẹnvuọn. Oma ọ ji merhen mẹ mi ne ghwoghwo rẹn awọrọ. Ọnana yẹ owian mẹ vwana, nime mi na sabu ha userhumu rẹn ihworho nyerẹn omamọ akpọ ji vwo obọdẹn ifiẹrorhọ kpahen akpọ ọkpokpọ rọ sa obaro na. Mia wian owian ọkobaro ọke ephian avwẹ June 2008 rhe, vwana mi mẹrẹn omamerhomẹ ọrhẹ evwẹnvuọn vrẹn ọke bi ne. Mi ji rhe oborẹ ọsoriẹ a ma ituakpọ ne, mi ghini kpẹmẹ i Jehova omamọ ro djeyi mẹ.

“Uhwu ugbehian mẹ ọ hobọte mẹ omamọ.”—ROMAN IRNESBERGER

• ẸGBUKPE RE VWIẸ YE: 1973

• ẸKWOTỌRE RO NURHE: AUSTRIA

• IKUEGBE YI: O FIBIKORO

AKPENYERẸN MẸ BI: Uvuẹn amwa ọkokamu owu re se Braunau rọ ha ẹkwotọre Austria ya mọren mẹ ghwanren. Ihworho re rhirhiẹ amwa na edafe, habaye ozighi ọ vuọn amwa na-a. Ekrun mẹ itu i Catholic, ishọshi ọrana yẹ eri vwiẹre mẹ a mọren mẹ ghwanren.

Emru owu ọ phiare uvuẹn akpenyerẹn mẹ rọ hobọte mẹ omamọ. Uvuẹn ẹgbukpe 1984 ọke mia ha ẹgbukpe 11, mi karorhọ ọke mie lele ugbehian mẹ owu rọ kẹrere mẹ omamọ fa ibọru. Erhẹrhuvo ọrana, no hwuru fọkiẹ asidẹti. Uhwu ugbehian mẹ na ọ hobọte mẹ omamọ. Ẹgbukpe buebun a vrẹn ọke asidẹti na ọ phia hin, ni mie roro kpahen oborẹ ọ phia erhe hwu ne.

Ọke mia ruotọre nẹ isukuru, ni mia wian owian ẹlẹtrishani. Dedevwo mi vwo uruemru ra ha igho obuebun fibikoro omamọ, mie vwo ebẹnbẹn igho-o. Mia ghwọghọ ọke buebun rhẹ iruẹn, mi ji vwo ẹguọlọ kpahen ijoro re jiri ozighi ọrhẹ ọfanrhiẹn. Mie riẹ iklọbu omamọ rhẹ ọrẹ iruẹn na-a. Ọke ephian yi mia guọlọ akpẹriọ ji nyerẹn akpọ ọfanrhiẹn, ọrẹn oma ọ vwọ merhen mẹ-ẹ.

OBORẸ I BAIBOL NA O WENE AKPENYERẸN MẸ LELE: Uvuẹn ẹgbukpe 1995, ọhworhare Oseri Jehova owu rọ kpako ne nọ ha obọ fomu ighwe mẹ, nọ yẹrẹ mẹ ọbe owu ra bọn kpahen i Baibol na rọ kpahenrhọ onọ na, Me yọ phia erhe hwu ne? Uhwu ugbehian mẹ na o ji kpokpo ẹhẹn mẹ, omarana ni mi ha ọbe na. Ọke mie se urhomu-ẹmro rọ ta kpahen uhwu na hin, ni mi se ọsoso ọbe na!

Oborẹ mi seri ọ kpahenrhọ onọ mẹ kpahen uhwu. Ọrẹn, mi ji yono ekwakwa erọrọ. Nime ishọshi Catholic ya mọren mẹ ghwanren, Jesu ọvo nọyẹ mi vwo imwẹro kpahen. Ọrẹn uyono i Baibol ro mwidjẹn, nọ lẹrhere mẹ vwo onyerẹnkugbe rọ kpẹnkpẹnren rhẹ Ọsẹ i Jesu ro rhiẹ i Jehova. Oma ọ merhenren mẹ ọke mie yono taghene Jehova o vwo ọdamẹ kpahen ọwan, ọ ji guọlọ ne tikẹriẹ. (Matthew 7:7-11) Mi yono kpahen oborẹ ana sabu ru na lẹrhẹ oma merhen i Jehova. Mi ji yono taghene ọ ha ive yi ephian te orugba. Ọnana nọ lẹrhere mẹ vwo omwemẹ mi ne yono kpahen aruẹmẹrẹn i Baibol, ọrhẹ oborẹ aye i rugba lele. Oborẹ mi se mẹrẹn, ọ lẹrhẹ esegburhomẹmro mẹ kpahen Osolobrugwẹ gbanhonrhọ.

O jiri-i, ni mi mẹrẹnvwrurhe taghene Iseri Jehova ọvo yi ghini vwo ọdamẹ aye ina ha userhumu rẹn ihworho vwẹruọ oborẹ i Baibol na ọ tare. Mi kokarhọ ekete i Baibol ra rionbọrhọ uvuẹn ọbe rẹ Iseri Jehova na i yẹre mẹ, ọke oru, ni mi serẹ aye uvuẹn i Baibol rẹ ame a ha ruiruo uvuẹn ishọshi ame. Ọnana nọ lẹrheriẹ mwu mẹ ẹro taghene mi mẹrẹn urhomẹmro na ne.

Ni mi yonorin uvuẹn uyono i Baibol mẹ taghene Jehova o fiẹrorhọ ne mi nyalele irhi enẹyen. Oborẹ mi seri uvuẹn Ephesians 4:22-24, nọ lẹrhere mẹ mẹrẹnvwrurhe taghene o fori ne mi wene “uruemru ahwanren” mẹ, ro sekpahen ‘uruemru mi vwori bi,’ jeghwai “ku uruemru ọkpokpọ na rhọ ra maren lele ọhọre Osolobrugwẹ.” Omarana, ni mi dobọ akpenyerẹn ọfanrhiẹn ji. Mi ji dobọ ibikoro efio ji, nime o jiri uruemru ufiuvwele ọrhẹ ekwakwa ugboma. (1 Corinthians 6:9, 10) Mi rheri taghene ne mi sabu ruẹ ewene enana, mi ne mwu igbehian ekpokpọ uvuẹn ukoko na, ji fan erẹ ahwanren mi vwori bi.

Ewene enana a lọhọ-ọ. Ọrẹn, ni mie lele Iseri Jehova riẹ uyono obẹ Aghwẹlẹ Uvie, ni mi ji mwu igbehian ekpokpọ uvuẹn ukoko na. Mi ji fiomarhọ uyono i Baibol omobọ. Idjaghwẹ enana ni lẹrhere mẹ wene aruẹ ijoro mia kerhọ ye, ẹkẹ mi bru te oma, ọrhẹ aruẹ osẹme mia sẹ. Uvuẹn ẹgbukpe 1995, ni mi bromarhame rhiẹ owuọwan usuẹn Iseri Jehova.

ERERE MI MẸRẸN NE: Vwana, mia ha ukẹro ro serhọ ni igho ọrhẹ ekwakwa ugboma ne. Vẹrhẹ bi mie kiki tuekwẹre, ọrẹn vwana mia sabu suẹn ekwẹre mẹ ne. Habaye, mi vwe ji brudu phan kpahen oborẹ obaro na ono rhirhiẹ-ẹ.

Oma ọ merhenren mẹ taghene mi ha usuẹn idibo i Jehova, ra ha ẹga riẹn uvuẹn ọsoso akpọ na. Imizu enana i vwo ebẹnbẹn sansan, ọrẹn aye a ji fuevwan ga i Jehova udabọ ebẹnbẹn na. Vwana, oma ọ merhen mẹ taghene ukperẹ mi na hatua ojemẹ omobọ mẹ, mia sabu ha ọke ọrhẹ omẹgbanhon mẹ ephian ga i Jehova ji ruẹ orhorhomu rẹn awọrọ.

“Vwana, mi vwo obọdẹn akpenyerẹn ne.”—IAN KING

• ẸGBUKPE RE VWIẸ YE: 1963

• ẸKWOTỌRE RO NURHE: ENGLAND

• IKUEGBE YI: O BIOMEVWAN KPAHEN AKPENYERẸN

AKPENYERẸN MẸ BI: E vwiẹre mẹ uvuẹn ẹkwotọre England, ọrẹn ọke mia ha ẹgbukpe irhiruẹ ekrun mẹ ni kwa riẹ ẹkwotọre Australia. Ame i kwa riẹ ekete rẹ ihworho buebun e kiẹn re se Gold Coast, rọ ha uvuẹn Queensland, Australia. Dedevwo ekrun mẹ o vwo igho-o, ọrẹn ame a mẹrẹn oborẹ ame i guọlọre.

Dedevwo a dabu rhe mẹ mọren, ọrẹn oma ọ vwọ merhen mẹ-ẹ. Ni mie biomevwan kpahen akpenyerẹn. Ọsẹ mẹ ọdinyo. Mia ghwai vwo ẹguọlọ kpahiẹn pha-an, fọkiẹ oborẹ ọ da inyo lele ọrhẹ oborẹ o ruẹ izu mẹ. Ọrẹn, ọke mie yono kpahen oborẹ o rhiẹromẹrẹn ọke ro rhiẹ isodja uvuẹn Malaya, ni mi vwẹruọ oborẹ ọsoriẹ o ruẹ oborẹ o ruẹ.

Ọke mia ha isukuru yi mia tuẹn inyo egbogbanhon ẹda rhọ. Ọke mie te ẹgbukpe 16, ni mi nẹ isukuru ya wian owian i navy. Ni mia ha imwu egbogbanhon, ji se itaba rhọ. Ni mi me vwo uruemru inyo ẹda. Ni mia da inyo kẹdẹkẹdẹ.

Ọke mia joma te ẹgbukpe 20, ni mie vwo ẹhẹn eveva sẹ Osolobrugwẹ ọ havwiẹ. Ni mie roro, ‘Orhianẹ Osolobrugwẹ ọ havwiẹ, mesoriẹ ọ ha uphẹn rẹn ihworho nẹ aye i rioja ji hwu?’ Uvuẹn ọbe owu mi yare, mi tobọ ta taghene Osolobrugwẹ yọ suẹ ekwakwa ibiobiomu ra phia uvuẹn akpọ na.

Mi nyajẹ owian i navy vwo ọke mia ha ẹgbukpe 23. Ọke oru, ni mi wian ewian sansan ji riẹ ẹkwotọre sansan uvwre ẹgbukpe owu, ọrẹn mia mẹrẹn omamerhomẹ-ẹ. Mie bru ẹkẹ owuorowu te oma-a. No họhọre taghene o vwo oborẹ mi na ha akpenyerẹn mẹ ru-u. Mi vwa tobọ nie taghene oserhọ ne vwo oghwa, iruo yanghene ẹrhẹ ọduado-o. Oborẹ ọ yẹ mẹ “urhebro” yẹ inyo egbogbanhon ẹda ọrhẹ ijoro ekporo.

Mi karorhọ ọke mie vwo omwemẹ mi na guọlọ oborẹ mi na ha akpenyerẹn mẹ ru. Mi ha ẹkwotọre i Poland ọke ọrana, ni mi rhiẹ ọpha ruẹ ọko ra ha oja riẹ ihworho rọ ha uvuẹn Auschwitz. Mi se kpahen irueruo ọkon re ruẹ avwaye ne. Ọrẹn, ọke mie te avwaye ji mẹrẹn oborẹ ihworho na i bun te, ọnana nọ hobọte mẹ omamọ. Mia sabu vwẹruọ oborẹ ọsoriẹ ituakpọ a ha oja riẹ ituakpọ erọrọ omana-a. Mi karorhọ taghene ọke mia nya kinhariẹ ọko na, amioviẹ no koko ikẹro mẹ ni mia nọ, ‘Mesoriẹ ọnana ọ phia?’

OBORẸ I BAIBOL NA O WENE AKPENYERẸN MẸ LELE: Uvuẹn ẹgbukpe 1993 ọke mia ghwẹrioma rhiẹ Australia, ni mi tuẹn isese i Baibol rhọ ne mi sabu mẹrẹn ẹkpahenrhọ harẹn enọ re kpokpi mẹ. O jiri-i, Iseri Jehova awanva ni ha obọ fomu ighwe mẹ, ji ha use mẹ rhiẹ omẹvwa ọduado re ne ruo uvuẹn stadium owu rọ kẹrẹ ekete mie rhirhiẹ. Ni mi brorhiẹn taghene mi na nya.

Mi riẹ stadium ọrana ye nughe ibọru dẹ nẹ, ọrẹn mi mẹrẹn ovẹnẹ ọduado ọke mia rhiẹ omẹvwa na. Iseri Jehova na emamọ ihworho, osẹme aye o ji serhọ, habaye emọ aye e ji ruẹ dẹndẹn. Oborẹ mi mẹrẹnren ọke ame a riẹ emaren erhẹrhuvo o gberi mẹ unu omamọ. Iseri Jehova buebun i riẹ emaren uvuẹn odin na, ọrẹn bọmọke aye a ghwẹrioma riẹ ekete aye i siyẹ, aye ephian ni dabu ruẹ ekete na fon, mia mẹrẹn otele owuorowu-u! Ọrọ mai ghanren, aye i vwo ẹhẹn otemẹ ọrhẹ ufuoma—ọnana oborẹ mi vi guọlọ. Mia karorhọ ẹmro owuorowu ra haphia ẹdẹ ọrana-a, ọrẹn uruemru Iseri Jehova na i djephia ọ hobọte me omamọ.

Owuọwọn ọrana, ni mi karorhọ ọmọ omizu ọsẹ mẹ ọhworhare ro se i Baibol na, ji guọlọ ẹga urhomẹmro na. Ẹgbukpe buebun ri vrẹnren, ọ ta mẹ taghene Jesu ọ tare taghene ana sabu mẹrẹn ẹga urhomẹmro na vwrurhe nyoma iruemru re djephia uvuien. (Matthew 7:15-20) Ni mi tare taghene mi na guọlọ oborẹ ọsoriẹ Iseri Jehova a vẹnẹ ẹga erọrọ. Ọnana ọke ọrukaro ro mwu mẹ ẹro taghene mi vwo ẹruefirhọ mi ne nyerẹn obọdẹn akpọ.

Ọkprughwre rọ ha kpahiẹn, Iseri Jehova ri ha use mẹ rhiẹ omẹvwa ọduado na ni rharhumu bru mẹ rhe. Aye ni ha use mẹ mi lele aye yono i Baibol na, ni mi kwerhọ ye. Ni mie ji lele aye riẹ iyono ukoko.

Ọke mie yono i Baibol na, ukẹro mia ha ni Osolobrugwẹ bi no wenerin phẹlẹphẹlẹ. Mi yonorin taghene rhẹ Osolobrugwẹ yọ suẹ ojẹriọ ọrhẹ irueruo ọko-on, nime oma ọ vwọ merhiẹn ọke ihworho e ruẹ ekwakwa ibiobiomu-u. (Genesis 6:6; Psalm 78:40, 41) Fọkiẹ ọnana, ni mi brorhiẹn taghene mi rhe ruẹ oborẹ ọnọ lẹrhẹ evwan biomu i Jehova-a. Mi guọlọre nẹ oma ọ merhiẹn. (Proverbs 27:11) Ni mi dobọ inyo ẹda ji ọrhẹ itaba e se rhoma, ni mi ji tiobọnẹ akpenyerẹn ọfanrhiẹn mẹ. Uvuẹn March 1994, ni mi bromarhame rhiẹ owuọwan usuẹn Iseri Jehova.

ERERE MI MẸRẸN NE: Mi vwo obọdẹn omamerhomẹ ọrhẹ evwẹnvuọn ne. Mi vwa rha hẹrosuẹ inyo egbogbanhon taghene ọrana yo no ti ebẹnbẹn mẹ nie-e. Ukpomaran, ni mie donron ebẹnbẹn mẹ vwe i Jehova.—Psalm 55:22.

Uvwre ẹgbukpe ikpe ri vrẹnren na, mi sabu rọnmọ omizu ọmase owu ro rhiẹ Oseri Jehova ro vwo erhumu omamọ, odẹ ye Karen, ọye o ji vwo ọmọ ọgbọtọ owu bi ne re se Nella. Ame awansa a riamerhen owian aghwoghwo na kugbe, nime ọnana ọ yẹ ame uphẹn rẹ ame ine yono awọrọ urhomẹmro kpahen Osolobrugwẹ. Vwana, mi vwo obọdẹn akpenyerẹn ne.