Wu na Sabu ni Vrẹn Oborẹ Ohworho ọ Havwọ ọrẹ Ugboma?

DON ro rhiẹ Oseri Jehova obẹ i Canada, ọ damoma ro no ghwoghwo rẹn ihworho ri vwe vwo oghwa re rhirhiẹ otafe. Don nọ ta kpahen owu usuẹn ihworho erana: “Ọhworhare owu ro vwo vwo oghwa, rẹ odẹ ye orhiẹ i Peter, yo ohworho rọ mai gbe mi mẹrẹn ne uvuẹn idumu na. Ọye o tuẹn ihworho oma, ihworho i vwa rha guọlọ ti kẹriẹ-ẹ. Ọye o vwo kwe nẹ ihworho i ji dje uruemru esiri riẹ-ẹn.” Ọrẹn, Don o ji dje uruemru esiri rẹn ọhworhare ọnana ro vwo vwo oghwa na te ọsoso ẹgbukpe ri vrẹn 14.

Ẹdẹ owu, Peter nẹ ọ nọ i Don: “Mesoriẹ we ji bru mẹ sa? Ihworho ephian i nyaji mẹ vwo ne. Mesoriẹ we gbe arodọmẹ mẹ?” Don nọ ha izede ona se ekete i Baibol esa ro no te ẹhẹn i Peter riẹn. Ọrukaro, Don nọ nọ i Peter sẹ o rheri taghene Osolobrugwẹ o vwo odẹ, nọ ta riẹn taghene o seyi nẹ uvuẹn i Baibol na rhe uvuẹn Psalm 83:18. Don nọ jeghwai dje oborẹ ọsoriẹ o gbe arodọmẹ rẹn i Peter nyoma o se Romans 10:13, 14, rọ tare taghene “kohworho kohworho ro se odẹ ọrẹ i Jehova ono simirhọ.” Ọrọkẹta, Don no se Matthew 9:36, nọ ta rẹn i Peter no seyi harẹn omayen. Oghwẹmro ọrana nọ tare: “Ọke [i Jesu] ọ mẹrẹn ihworho na, no gbe arodọmẹ rẹn aye, fọkime aye i djabọ jeghwai họhọ igegede ra nya sa nya rie, ri vwe vwo osuingegede.” Ogege, Peter nọ viẹ, nọ tare: “Mẹmẹ i ha usuẹn igegede erana?”

Peter no wene bibiesuọn. Ọye nọ yọ wọ omayen fon, nọ hwanren ẹtuẹngban yen totọre, nọ jeghwai ku omamọ ewun ri Peter ọ yẹriẹ rhọ. Peter no ru omayen fuan ọke ephian.

Peter o vwo ọbe rọ ya oborẹ ọ phiare rhọ. Ekwakwa ibiobiomu ri phiare yi Peter ọ ya rhẹ obọrẹ ukaro uvuẹn ọbe na, ọrẹn, oborẹ ọ ya kperhumu na e vẹnẹren. Ẹmro owu rọ ya rhẹ ọbe na, nọ tare: “Mi yono odẹ Osolobrugwẹ inyenana. Vwana, mia rha nẹrhomo, mi na sabu nẹrhomo vwe i Jehova. Emru omamerhomẹ re ne rhe odẹ Osolobrugwẹ. Don ọ tare taghene i Jehova ọnọ sabu rhiẹ Ugbehian mẹ, ohworho rọ nọ dabu rha kerhọ mẹ, o toro ọke ọrhẹ ekete na-a.”

Ẹmro i Peter ri kẹta o ki hwu, ọ yariẹ vwe imizie. Ọrhọ ya:

“Oma mẹ ọ gbanhon inyenana-a. Ọ họhọre taghene mi ho ne omamọ. Ọrẹn, orho rhirhiẹ taghene inyenana ọvo mi vwori, mi rheri taghene mi na mẹrẹn ugbehian mẹ [Don] uvuẹn i Paradais. Are e rhe se ọbe ọnana, nọyẹ mi hwu ne. Ọrẹn, are i rha mẹrẹn ọhworhare owu rọ dabu sẹ osẹme rhe orinmi esion mẹ, are i lelie tẹmro, biko are i se ọbe ọnana [ọbe na yẹ “The Truth That Leads to Eternal Life” ra ha yono ihworho i Baibol na, ra yẹ i Peter ẹgbukpe ezẹko ri nyavrẹn ne].a Ọbe na ọ tare taghene mi na rharhumu mẹrẹn ugbehian mẹ uvuẹn i Paradais. Mi vwo imwẹro kpahen ọnana rhẹ ọsoso ọmudu mẹ. Omizu are ọghoghanren, Peter.”

Ọke re sin i Peter hin, omizu i Peter re se Ummi nọ tare: “Ẹgbukpe eva ri vrẹnren na, Peter no seri mẹ. Ọrana yẹ ọke ukaro uvwre ẹgbukpe buebun ri vrẹnren na rẹ oma ọ merhiẹn. Ọ tobọ chẹẹ ibiesuọn.” Ummi nọ ta rẹn i Don: “Mi ne se ọbe na nime oborẹ ọnọ sabu te ẹhẹn omizu mẹ, ghini oborẹ ọ ghanranren omamọ.” Ummi o ji kwerhọ ye taghene ono lele Iseri Jehova yono ọbe ọkpokpọ re se What Does the Bible Really Teach?

Ọwan ina ji sabu ni vrẹn oborẹ ohworho ọ havwọ ọrẹ ugboma, ana sabu dje ẹguọlọ phia rẹn aye, jeghwai vwo edirin rhẹ ihworho ephian. (1 Tim. 2:3, 4) Erhe ru omaran, ana sabu hobọte ọmudu ihworho ri havwọ jerẹ i Peter, ọkezẹko aye a ghwai rhoma ọrẹ ugboma-a, ọrẹn, aye i vwo ẹhẹn esiri. Ana sabu vwo imwẹro taghene i Jehova rọ mẹrẹn ọmudu na, ono ruie nẹ urhomẹmro na ọ do uvuẹn ọmudu ihworho erana.—1 Sam. 16:7; John 6:44.