Oborẹ wu ne ru Sabu Ruẹ Uyono i Baibol Omobọ ọnọ Mwidjẹn Jeghwai Merhoma rhọ

Joshua o se Urhi na; ugbomoghwa i Jericho i ghwọghọre ọrẹn oghwa i Rahab ọvo yo mevi; Joshua ọ kpare urhomu rierun nọ nẹrhomo

JOSHUA o vwo owian ọgbogbanhon owu. Nọyẹ owian ro no suẹn emọ Israel na ruẹ Otọre Ive na, udabọ ebẹnbẹn aye ina dẹrughwaroghwu. Ọrẹn, Jehova nọ yẹriẹ urhebro ọrhẹ imwẹro taghene ono fikparobọ, nọ ta riẹn: ‘Fiudugbere ne wu ji gbanhon omamọ. Nyalele Irhi mẹ. Se aye te ason te uvo, neneyo wu jomarhotọre ru lele ọsoso oborẹ a ya rhẹ uvuẹn aye. Ne wu ne fikparobọ jeghwai ru irueruo ẹghwanren.’—Josh. 1:7, 8.

Uvuẹn “ọke egbogbanhon ra bẹn enyerẹn” na, a ji dẹrughwaroghwu ebẹnbẹn egbogbanhon. (2 Tim. 3:1) Jerẹ i Joshua, ana sabu fikparobọ orhianẹ a nyalele urhebro i Jehova. Ana sabu se i Baibol na kẹdẹkẹdẹ jeghwai ha iruemru-urhi ri ha uvuien fi ebẹnbẹn kparobọ.

Ọrẹn, ihworho buebun e vwo omamerhomẹ kpahen uyono yanghene ẹbe ese-e. Ra mẹriẹn taghene uyono i Baibol ọ ghanranren na, gbe se ekpeti na “Damu Irorẹdjẹ Enana,” ne wu sabu mẹrẹn eghwẹmro ri na sabu lẹrhẹ uyono i Baibol omobọ ọnọ mwidjẹn jeghwai merhoma rhọ.

Ọbo ijoro na nọ tare: “Sun mẹ uvuẹn izede ekama enọ, fọkime mia mẹrẹn omamerhomẹ nẹ uvuien.” (Ps. 119:35) Wu na sabu mẹrẹn omamerhomẹ we rhe sẹ i Baibol na. Wu na mẹrẹn erere buebun orhianẹ wa guọlọ iyono eghoghanren ri ha uvuien.

Dedevwo wu suẹn agbamwa jerẹ i Joshua-a, ọrẹn wu ji vwo ebẹnbẹn wa dẹrughwaroghwẹ. Omarana, jerẹ i Joshua, o fori ne wu yono jeghwai nyalele oborẹ ọ ha uvuẹn i Baibol na. Wu rhe ruẹ omaran, wu ne ji fikparobọ jeghwai ghwanren.

DAMU IRORẸDJẸ ENANA

Ha ẹrhomo tuẹn uyono omobọ ọnọ rhọ. Iroro Osolobrugwẹ rọ maigbanhon na, yọ ha uvuẹn i Baibol na, a yariẹ rhotọre no rhiẹ erere wẹn. Omarana, ta riẹn nọ ha userhumu wẹn ne wu sabu vwẹruọ oborẹ wu ne se, karorhọ ye jeghwai haye ruiruo uvuẹn akpenyerẹn ọnọ.—Ezra 7:10.
Nọ oma enọ we rhe se i Baibol na yanghene ẹbe ra bọn kpahen i Baibol na. Wu na sabu nọ: ‘Me yẹ aran na o yonirin mẹ kpahen i Jehova? Marhẹ o ru toroba iyẹnrẹn i Baibol na? Marhẹ mi ne ru ha iroro enana sa awọrọ erhumu?’
Roro kodo kpahen oborẹ wu yonorin na. Domaji ne wu roro: ‘Marhẹ ekete aran na ọ hobọte mẹ lele? Mesoriẹ ọ hobọte mẹ? Marhẹ o ru rhamẹ oborẹ ọ phia mẹ vrẹn ne, oborẹ mie rhiẹromẹrẹn vwana ọrhẹ ekwakwa ri na sabu phia obaro na? Marhẹ mi ne ru sabu ha iruemru-urhi Baibol ọrhẹ urhebro ọnana ruiruo uvuẹn akpenyerẹn mẹ?’ (Job 23:5; Ps. 49:3) Nie sẹ wu na sabu rhe oborẹ ọsoriẹ i Jehova ọ ta rẹn idibo yi nẹ aye i kẹnoma rẹn irueruo ezẹko yanghene oborẹ ọnọ sabu phia orhianẹ aye i kpare idjaghwẹ ri sọre.—Deut. 32:28, 29.
Ha oghwa iroro ọnọ ruiruo we rhe se ekete i Baibol ri sekpahen idjedje. Jerẹ udje, wu na sabu ha ẹhẹn roro oborẹ erhirhiẹ na ọ havwọ, ọke imizu i Joseph a rhẹ ye rẹn itu Ishmael? (Gen. 37:18-28) Me wa mẹrẹn, me we rhon yanghene me we sọrhiẹn? Fiomarhọ erhirhiẹ ihworho we se kpahan na. Me yẹ aye e roro? Aruẹ iroro enana ina sabu lẹrhẹ uyono i Baibol ọnọ mwidjẹn jeghwai merhoma rhọ.
Ha ekwakwa ukoko na o tiobọnu ruiruo ne wu sabu guọlọ otọrẹ eghwẹmro sansan. Rienrian oma rhẹ ekwakwa sansan re fomu phia ri ji ha iwẹbsaiti ukoko na, uvuẹn edjadjẹ ọnọ. Wu vwe jẹ ofa lẹrhuọ ja nekpẹn userhumu kpahen oborẹ wu na ha aye ruiruo lele-e. Jerẹ udje, Watch Tower Publications Index yanghene Research Guide for Jehovah’s Witnesses, ina ha userhumu wẹn guọlọ oborẹ a ta kpahen irhomu-ẹmro sansan ọrhẹ oborẹ ekete i Baibol sansan i mevirhọ. Wu na ji sabu ha appendix rọ ha i New World Translation of the Holy Scriptures na ruiruo. Ekwakwa enana i vwo iyẹnrẹn kpahen emwa sansan, uvwioghwa ihworho i nurhe, oborẹ ekwakwa i ghwa te ọrhẹ oborẹ a vwanvwọn ekwakwa lele kugbe erọrọ.
Ruẹ ẹzẹkoko ihwẹmro na, nọ ha userhumu wẹn sabu karorhọ oborẹ wu seri na. Habaye, wu na sabu ta rẹn awọrọ kpahen oborẹ wu yonorin. O vwo oborẹ wa guọlọ ha ruiruo uvuẹn aghwoghwo? Omarana, wu na sabu sẹrorẹ ihwẹmro na rhẹ ẹhẹn jeghwai ha aye sa awọrọ erhumu.