Oborẹ Ene ru Tuẹn Ẹmro Eghwoghwo Rhọ Rhẹ Itrati

Nẹ January 2018 rhe, yẹ obaro Ọbe-Owian Uyono Akpenyerẹn Ọrhẹ Iruo Uvie Na o vwo idje ẹhaphia. E jiririe rẹn ọwan na tẹnrovi owian re ne ghwoghwo rẹn ihworho ukperẹ ana ghwai nyajẹ ẹbe vwo rẹn aye. Nẹ ighwoghwẹmro i sabu rha ha ena sansan ruiruo, ividio idje ẹhaphia na na ta kpahen oborẹ ene ru tuẹn ẹmro eghwoghwo rhọ rhẹ i Baibol na ọvo. Ọnana no mevirhọ taghene a vwa ha ẹbe ruiruo ọke re ruẹ aghwoghwo nẹ oghwa riẹ oghwa-a? Ẹjo! Jerẹ udje, ana sabu ha itrati tuẹn aghwoghwo rhọ izede ro mwidjẹn. Ana sabu ha ena ri ha obotọre na ruiruo orhianẹ a guọlọ ha owu usuẹn itrati na rẹn ohworho:

1. Nọ onọ rọ ha obaro itrati na.

2. Dje ẹkpahenrhọ ri Baibol na ọ haphia uvuẹn aruọbe ọreva itrati na rẹn ohworho na. Orho vwo ọke, se jeghwai ta kpahen iyẹnrẹn erọrọ ri ha uvuẹn itrati na.

3. Ha itrati na rẹn ọrovwoghwa na, jeghwai jirie riẹn no se ekete ri hẹrhẹre uvuẹn itrati na.

4. Bọmọke wu na ki nyarhẹn, dje ekete ọnana “Gbe Roro Kpahen Ọnana” rẹn ohworho na, ji ruẹ ẹkwaphiẹrhotọre wu na kpahenrhọ onọ na nẹ i Baibol na rhe ọke ọrọrọ.

Wu rha ghwẹrioma rhe, gba kpahenrhọ onọ na jeghwai nyajẹ onọ ọrọrọ vwo riẹn re wu na kpahenrhọ ọke ọrọrọ. Wu na sabu djẹ onọ nẹ iwẹbsaiti ọwan yanghene nẹ ọbe ra rionbọrhọ oberhumu itrati na. Uvuẹn ọke ro serhọ, gba yẹ ohworho na ibroshọ na Iyẹnrẹn Esiri ro nẹ Obẹ Osolobrugwẹ Rhe! yanghene ọbe ọrọrọ re yono usuẹn Ekwakwa ra ha Yono Ihworho